Games Animation Forum

返回   Games Animation Forum > 娛樂興趣區 > 體育版 > 球會討論區

回覆
 
主題工具 顯示模式
舊 10-31-19, 07:18 AM   #1
Busconcamp
The One
紅魔鬼閃耀GAF
 
註冊日期: Jan 2003
文章: 69,304
曼聯躉紅魔鬼地帶[VOL.95]各項賽事三連勝,入球眾數,重上正軌?

又僅贏12碼!曼聯歐霸靠新仔救駕



曼聯喺歐霸盃又煲魚生粥,作客柏迪遜僅勝1:0。曼聯本季攻力疲弱,今仗呢個缺點又再次表露無遺,面對次級對手攻門少之又少,最終僅靠新仔左閘班頓威廉斯喪跑博得12碼,安東尼馬迪爾一箭定江山。紅魔鬼雖然贏波,但成個下半場被撳住揪,魔迷真係睇見都唔開胃。

曼聯今仗作出唔少輪換,最有威脅嘅拉舒福特、丹尼爾占士被收起,安東尼馬迪爾、桑馬達、連格負責攻堅,2名新仔班頓威廉斯同占士加拿獲派正選上陣。曼聯上半場表現,同近期分別不大,面對擁有主場之利嘅柏迪遜,曼聯上半場機會唔多,其中麥湯米尼接應右路罰球近門一頂中網側,已經係最大亮點。39分鐘主隊更有入波黃金機會,前鋒烏馬沙迪基禁區外妙射中柱彈出。43分鐘,班頓威廉斯左路硬推入禁區,主隊後衞落腳將佢剷跌,球證直指12碼點,馬迪爾主射中鵠,半場曼聯領先1:0。

換邊後曼聯畀柏迪熟撳住踢,主隊於禁區外得到罰球,拿捷高主射柱邊出界。52分鐘蘇馬於禁區頂「級」到馬古尼成份跌低,空晒左腳狂抽,但角度太正被羅美路救出。67分鐘班頓威廉斯於禁區內手球,但球證冇畀12碼。

柏迪遜愈攻愈入肉,74分鐘蘇馬禁區邊橫傳,烏馬沙迪基第一時間勁射可惜貼柱出界。83分鐘日本國腳淺野拓磨接應右路角球近門一頂,又畀羅美路神勇救到,最終曼聯頂得住小勝1:0,3場分組賽只入2球但取得2勝1和。

此篇文章於 10-31-19 12:21 PM 被 Busconcamp 編輯。
Busconcamp 目前離線   回覆時引用此篇文章
舊 10-31-19, 12:24 PM   #2
Busconcamp
The One
紅魔鬼閃耀GAF
 
註冊日期: Jan 2003
文章: 69,304
【賽後解碼】曼聯咪轉陣 3中堅壽終正寢

[img]https://hk.on.cc/hk/bkn/cnt/sport/20191025/photo/bkn-20191025090123732-1025_00882_001_01p.jpg?20191025090132[I/mg]

曼聯上場英超對利物浦改踢3-4-1-2陣式,表現可話係今季最好一仗,周五(25號)歐霸盃作客柏迪遜,領隊蘇斯克查繼續用3中堅陣式,就用啲令人意外。

「紅魔鬼」呢個陣靠雲比沙卡同班頓威廉斯兩閘負責側擊,佢哋亦交足功課,不過中前場發揮就令人失望,繼上輪歐霸作客阿爾克馬爾0次射門中龍後,今場到安東尼馬迪爾完半場前射入12碼嗰刻,先至係第1次中龍射門。由連格同桑馬達負責組織進攻,曼聯連最殺食嗰瓣速度都斷埋,當然唔會有好結果,對住鋒力強橫嘅利物浦作出針對性變陣可以理解,但對住柏迪遜都用3中堅,就變成自廢武功。

蘇斯克查都發現問題,60分鐘已經換入拉舒福特同丹尼爾占士,踢番4-4-2後行軍先比較順暢,相信3中堅嘅實驗可以「壽終正寢」。


__________________
避免"殘酷一BAN"...請謹慎出POST~
偶體內流住GAF
曼聯成功拿下頂級聯賽20冠軍!
流胃兄x民賤聯.無恥黨x禮義廉......
250311.3975.12363
Busconcamp 目前離線   回覆時引用此篇文章
舊 10-31-19, 12:25 PM   #3
Busconcamp
The One
紅魔鬼閃耀GAF
 
註冊日期: Jan 2003
文章: 69,304
曼聯歐霸盃怪陣 你認得幾多個?



唔少人細細個玩《Winning Eleven》,都會見到一大埋假嘅球會、球員名,估唔到類似嘅畫面會喺現實中出現!曼聯周五(25號)歐霸盃作客柏迪遜,賽前主場大銀幕列出曼聯正選名單,但就睇到一眾曼聯球迷


__________________
避免"殘酷一BAN"...請謹慎出POST~
偶體內流住GAF
曼聯成功拿下頂級聯賽20冠軍!
流胃兄x民賤聯.無恥黨x禮義廉......
250311.3975.12363
Busconcamp 目前離線   回覆時引用此篇文章
舊 10-31-19, 12:26 PM   #4
Busconcamp
The One
紅魔鬼閃耀GAF
 
註冊日期: Jan 2003
文章: 69,304
曼聯想買卡尼?畀人寸到應一應!



曼聯係英格蘭史上,其中一支最成功球隊,但本季成績認真麻麻,依家9場得10分排第14,前隊長堅尼就畀貼士,叫紅魔鬼用盡所有資源,下個夏天去收購英格蘭隊長哈利卡尼。

其實係人都知卡尼勁嘅,但熱刺前球員奧哈拉就話,曼聯唔使旨意買到卡尼,話明依家曼聯,根本就渣過熱刺,卡尼邊有咁蠢轉去曼聯?反而阿古路年紀唔細,卡尼轉去曼城先合情合理,起碼曼城有冠軍爭喎,曼聯球迷聽到,肯定激到成晚瞓唔着呀!


__________________
避免"殘酷一BAN"...請謹慎出POST~
偶體內流住GAF
曼聯成功拿下頂級聯賽20冠軍!
流胃兄x民賤聯.無恥黨x禮義廉......
250311.3975.12363
Busconcamp 目前離線   回覆時引用此篇文章
舊 10-31-19, 12:28 PM   #5
Busconcamp
The One
紅魔鬼閃耀GAF
 
註冊日期: Jan 2003
文章: 69,304
【東體爭議】曼聯最需要球員喺阿仙奴雪櫃



曾被摩連奴譽為球壇「最佳10號」嘅奧斯爾,周五(25號)歐霸盃再一次無緣入選阿仙奴大軍名單,亦係佢連續第5場喺冇傷冇病情況之下,連18人名單都入唔到,顯而易見嘅係,阿仙奴已經完全將佢踢出計劃之內。

奧斯爾嘅優點同弱點分明,用唔用佢亦引嚟唔少爭論,不過曼聯名宿史高斯就話,奧斯爾正正就係曼聯依家最需要嘅球員。史高斯為BT Sport評述歐霸盃嗰陣,同拍擋討論奧斯爾嘅情況時表示:「我唔明白(奧斯爾被棄用),我認為奧斯爾係可以連繫全隊嘅球員,佢有好高質素嘅技術,呢一點佢嘅足球生涯已經證明咗,我唔知道,但佢可以成為曼聯短期『答案』。如果奧斯爾肯減薪嘅話係有可能,我唔覺得呢件事(轉會曼聯)會發生,但奧斯爾呢類型球員,係曼聯依家最需要嘅球員。」


__________________
避免"殘酷一BAN"...請謹慎出POST~
偶體內流住GAF
曼聯成功拿下頂級聯賽20冠軍!
流胃兄x民賤聯.無恥黨x禮義廉......
250311.3975.12363
Busconcamp 目前離線   回覆時引用此篇文章
舊 10-31-19, 12:30 PM   #6
Busconcamp
The One
紅魔鬼閃耀GAF
 
註冊日期: Jan 2003
文章: 69,304
李斯特城1場勝仗 曼聯遭2次致命抽水



李斯特城以9:0大勝修咸頓,追平曼聯保持嘅英超史上最大勝仗紀錄之後,紅魔鬼再遭網民抽水,指李城1場入9球,已經等於曼聯近12場比賽入球總和。

曼聯喺聯賽及盃賽,近12場冇1場入波多過1球,其中3場食白果,近12場比賽加埋只入9球。如果單計聯賽,近8場聯賽只入6球,只及李斯特城今場入波3份之2。

事實上,紅魔鬼除咗開鑼戰大勝車路士4:0之外,其他8場英超冇1場入波多過1球,佢哋今季踢咗9場英超入10球,都只係比李城1場波嘅入球數字多1球,難怪被網民狂寸。

除此之外,之前盛傳曼聯計劃收購李斯特城中場占士麥迪臣,呢位22歲中場新星今場都有1球進帳。網民認為曼聯可以死咗條心,因為李斯特城已經殺上前4位,有力爭取下屆歐聯入場券。

反觀,曼聯依家只係比降班區多2分,占士麥迪臣梗係揀留隊等踢歐聯,點會去幫曼聯護級。
Playasia - Buy Games & Codes for PS4, PS3, Xbox 360, Xbox One, Wii U and PC / Mac.

__________________
避免"殘酷一BAN"...請謹慎出POST~
偶體內流住GAF
曼聯成功拿下頂級聯賽20冠軍!
流胃兄x民賤聯.無恥黨x禮義廉......
250311.3975.12363
Busconcamp 目前離線   回覆時引用此篇文章
舊 10-31-19, 12:30 PM   #7
Busconcamp
The One
紅魔鬼閃耀GAF
 
註冊日期: Jan 2003
文章: 69,304
【賽後解碼】多謝曼聯!李城下季歐聯見

李斯特城作客狂數修咸頓9:0,創下英超史上作客最大勝仗,亦係131年來英格蘭頂級聯賽最大作客勝仗,反映球隊質素一流,如果到季尾殺入前四、取得下屆歐聯資格實在毫不出奇。李城本季於羅渣士帶領下,打出行雲流水嘅進攻足球,前中後三線非常平均,整體戰鬥力極強:而且班波非常當打,幾名中前場主力仲有得進步,球隊今季全面升級,實在要多謝曼聯。

上季中羅渣士成李城主帥,呢位前利物浦領隊,曾帶領紅軍狠狠衝擊英超冠軍,其後於蘇超協助些路迪贏盡所有冠軍,實在係有料到。到今夏曼聯以8000萬鎊重金收購哈利馬古尼,羅渣士用土耳其中堅蘇恩古頂替,完全冇無縫接軌;佢用呢筆錢分別正式購入泰利文斯、艾約斯佩雷斯同另一比利時國腳丹尼斯普拉特,前二者已經成球隊主力,泰利文斯已有3個聯賽入波,艾約斯今仗更戴帽,當丹尼斯普拉特都打起埋,李城將更加恐怖。

李城2016年創下英格蘭足球史上其中一個最大神話,爆大冷贏得英超冠軍,當年於雲尼亞里麾下後防滴水不漏,再配以尼高路簡迪於中場掃蕩、馬列斯同占美華迪於前線攻堅,當然有不俗戰鬥力;但今季李城整體實力更平均,泰利文斯同占美麥迪臣於中場充滿創造力,尼迪迪中場掃蕩愈造愈成熟,加上芝維爾已成英超其中一個最佳左閘,李城進攻有條不紊;再配合左翼哈維班尼斯彈起,李城已完全打出進攻套路。華Dee寶刀未老,現已取得9個英超入球,目前壓倒阿古路同譚美阿巴謙領先射手榜,李城現時信心十足,聯賽10戰過後,上到聯賽榜次席極有說服力。


__________________
避免"殘酷一BAN"...請謹慎出POST~
偶體內流住GAF
曼聯成功拿下頂級聯賽20冠軍!
流胃兄x民賤聯.無恥黨x禮義廉......
250311.3975.12363
Busconcamp 目前離線   回覆時引用此篇文章
舊 10-31-19, 12:32 PM   #8
Busconcamp
The One
紅魔鬼閃耀GAF
 
註冊日期: Jan 2003
文章: 69,304
曼聯冬季想簽佢 球迷聽完爆粗



曼聯今季攻力疲弱,盛傳將於明年1月轉會市場重開後,簽入進攻球員,除咗祖記前鋒文迪蘇傑之外,拜仁慕尼黑中場湯馬士梅拿都係主要目標。不過,曼聯球迷認為呢位30歲德國國腳只會係「小豬2.0」,簽嚟都冇用。

湯馬士梅拿過去10年大部分時間係拜仁同德國隊主力,但近兩年狀態明顯下滑,已經被國家隊棄用,佢喺今季8場德甲亦只有3場擔任正選,所以明年1月好可能離隊,曼聯「求才若渴」唔理咁多,計劃簽入湯馬士梅拿試試。

不過,大部分曼聯球迷認為湯馬士梅拿年齡唔細,又無復當年之勇,情況似曼聯2015年向拜仁簽入當時已經31歲嘅「小豬」舒韋恩史迪加,結果令人失望,佢第一季英超只上陣18次,第二季中途就離隊去美職搵食。

如果曼聯今次簽入湯馬士梅拿,恐怕只會係「小豬」嘅翻版。不過,國際米蘭都對湯馬士梅拿有興趣,所以就算曼聯想簽佢,都未必可以得手。


__________________
避免"殘酷一BAN"...請謹慎出POST~
偶體內流住GAF
曼聯成功拿下頂級聯賽20冠軍!
流胃兄x民賤聯.無恥黨x禮義廉......
250311.3975.12363
Busconcamp 目前離線   回覆時引用此篇文章
舊 10-31-19, 03:01 PM   #9
Busconcamp
The One
紅魔鬼閃耀GAF
 
註冊日期: Jan 2003
文章: 69,304
皇馬出絕招 用佢做籌碼加錢買硬普巴



搞出成個夏天都買唔到保羅普巴嘅皇家馬德里,根據英國《太陽報》報道,話佢哋管理層又諗到新招,今次係出錢加埋加里夫巴利作為交易籌碼,希望逼到曼聯放普巴。報道話皇馬會長皮里茲已經諗好晒,知道曼聯要搵進攻球員加強火力,送上「大聖爺」係最啱數,另外再加轉會費8,500萬鎊,應該會逼到「紅魔鬼」放走有離心嘅普巴,滿足到皇馬主帥施丹嘅需要。

查實施丹一直都想簽入佢同胞法國球星普巴,只係今夏佢哋開價去到1億鎊都打動唔到曼聯,而「紅魔鬼」索價1.8億鎊簡直係超癲價,兩間會根本冇辦法達成共識。查實皮里茲本身就想喺一月簽入身價較平嘅基斯甸艾歷臣頂替算數,不過既然施丹一直睇巴利唔順眼,依家可以送走「大聖爺」,兼換到心頭好普巴,絕對係一家便宜兩家着嘅交易。

再講,曼聯本身對「大聖爺」未算太大興趣,但經歷咗開季一輪,前線入球能力明顯不足,家陣冇得揀之下,如果可以傾到大牌球星返嚟,都可以滿足埋球迷,今次呢單交易堅有可能成真囉!


__________________
避免"殘酷一BAN"...請謹慎出POST~
偶體內流住GAF
曼聯成功拿下頂級聯賽20冠軍!
流胃兄x民賤聯.無恥黨x禮義廉......
250311.3975.12363
Busconcamp 目前離線   回覆時引用此篇文章
舊 10-31-19, 03:08 PM   #10
Busconcamp
The One
紅魔鬼閃耀GAF
 
註冊日期: Jan 2003
文章: 69,304
【特稿】曼聯真正命脈係安東尼馬迪爾



曼聯喺蘇斯克查接手後全面重建,保羅普巴、拉舒福特、哈利馬古尼同迪基亞被視為「紅魔鬼」脊柱,不過數據顯示,對曼聯爭勝最重要嘅球員,其實係安東尼馬迪爾,曼聯有佢同冇佢在陣,勝率差天共地!

安東尼馬迪爾上場傷愈後首做正選,即刻入波協助球隊獲勝,原來自蘇斯克查上任之後,安東尼馬迪爾曾經13次英超擔任正選,曼聯就贏咗當中10場,勝率高達77%,球隊平均每場入2.3球。相反,喺安東尼馬迪爾冇份踢正選嘅18場英超,曼聯勝率就急跌到28%(5勝),球隊場均入球亦大跌至1.1球。

事實上,安東尼馬迪爾有速度同腳法,控球能力亦都出色,今季擔正箭頭更加係佢最適合發揮嘅位置,如果可以改善埋經常受傷嘅問題,「紅魔鬼」嘅鋒力問題可能唔係球迷諗得咁差。


__________________
避免"殘酷一BAN"...請謹慎出POST~
偶體內流住GAF
曼聯成功拿下頂級聯賽20冠軍!
流胃兄x民賤聯.無恥黨x禮義廉......
250311.3975.12363
Busconcamp 目前離線   回覆時引用此篇文章
舊 10-31-19, 03:10 PM   #11
Busconcamp
The One
紅魔鬼閃耀GAF
 
註冊日期: Jan 2003
文章: 69,304
99三冠曼聯Vs曼城利物浦 傑斯點樣睇?



曼城同利物浦近2季於英超鶴立雞群,兩軍成一時瑜亮,曼城上季勇奪國內三冠王,利物浦於英超攞足97分,之後稱霸歐聯。紅軍、藍月亮已為英超定立暫時難以逾越嘅新標準,但如果搵兩大雄師,同99年曼聯歐洲三冠王比又如何?傑斯就認為,相比之下曼聯始終係最強,深信若三軍同處一個時代,擁有碧咸、史高斯、傑斯、堅尼嘅紅魔鬼100%可以取得英超冠軍。

曼聯屬英超時代英格蘭最強球隊,於費格遜麾下橫掃英超球壇,喺「七小福」帶領下於1999年勇奪歐洲三冠王,其中於補時階段反勝拜仁稱霸歐洲,已成歐聯史上經典。傑斯表示:「99年嘅曼聯,可唔可以壓倒依家嘅曼城同利物浦奪得英超冠軍?100%可以。雖然係充滿難度,但我哋必定可以。現時曼城係好強,而且有個頂級名帥,但99年曼聯係好特別,可謂無堅不摧。」

咁傑斯效力曼聯多年,邊隊紅魔鬼先係最強呢?「93/94年一季曼聯取得雙冠王,雖然球隊於歐洲踢得唔好,但呢隊真心勁。07/08嘅曼聯亦都非常犀利,陣中粒粒皆星。但講到最勁,始終係99年嗰一隊,只係睇我哋成績、板櫈深度同踢出嘅足球,就已經好有說服力。」


__________________
避免"殘酷一BAN"...請謹慎出POST~
偶體內流住GAF
曼聯成功拿下頂級聯賽20冠軍!
流胃兄x民賤聯.無恥黨x禮義廉......
250311.3975.12363
Busconcamp 目前離線   回覆時引用此篇文章
舊 10-31-19, 03:23 PM   #12
Busconcamp
The One
紅魔鬼閃耀GAF
 
註冊日期: Jan 2003
文章: 69,304
唔使買前鋒!蘇斯克查話最強殺手喺陣中



超老牌勁旅曼聯今季表現持續低迷,依家以9戰得10分排緊第15位。「紅魔鬼」戰績差,前線把握力不足係一大問題,唔少球迷同球評家都叫佢哋一月要買入好前鋒,不過今日曼聯主帥蘇斯克查同大家講,佢哋根本唔需要喺前線增兵,事關最好前鋒一直喺陣中,呢個就係啱啱傷愈冇耐嘅安東尼馬迪爾喇!

早排曼聯名宿堅尼公開呼籲曼聯要簽熱刺射手哈利卡尼,不過「蘇B」唔認同:「馬迪爾歸隊喇!我對球隊現時鋒線好滿意。我聽到有人話我哋冇9號射手,但其實馬迪爾可以成為一個最頂級中鋒,佢擁有所需要嘅一切天賦。佢有速度,又有射手,會係個頂級終結者。」

「蘇B」話全部曼聯人都知呢位法國射手有幾勁:「馬迪爾之前承諾肯留隊,其中一個主要原因,係我曾經同佢保證,佢會成為一個中鋒殺手。或者外人唔明白佢有幾犀利,但我哋更衣室所有人都明白。每當大家諗緊點樣可以入波,然後隊友回應都會係話,『將個波交畀馬迪爾啦』。我哋全部人喺練波都見識過佢有幾勁,大家都信任佢。」

蘇斯克查向球迷保證,之後會令馬迪爾可以健健康康作戰,為曼聯爭取好成績。最令人意外,「蘇B」仲插埋兩位前曼聯主帥尹戈爾同摩連奴,話佢哋唔識用馬迪爾:「其他教練都鍾意將馬迪爾放喺翼位邊線,我當然明白佢哋點解咁做,因為馬迪爾實在太快。但係,我認為佢係個真正嘅9號位球員,佢需要同比賽連成一線,能夠成為最頂級射手。我深信只要佢喺適當地方接到波,佢就會成為一部入球機器。」


__________________
避免"殘酷一BAN"...請謹慎出POST~
偶體內流住GAF
曼聯成功拿下頂級聯賽20冠軍!
流胃兄x民賤聯.無恥黨x禮義廉......
250311.3975.12363
Busconcamp 目前離線   回覆時引用此篇文章
舊 10-31-19, 03:24 PM   #13
Busconcamp
The One
紅魔鬼閃耀GAF
 
註冊日期: Jan 2003
文章: 69,304
曼聯「齊頭數」入球者 都係傳奇人物!



曼聯上場英超對利物浦,拉舒福特射入紅魔鬼喺英超第1999個入球,亦係英超史上入波最多嘅球隊,第2多係阿仙奴,有1858球。

換言之,曼聯只要周日(27日)晚作客諾域治,再入1球就達到第2000球里程碑,對球會同球員都係一種無上榮譽,所以全世界都估緊邊位紅魔猛將可以成為「幸運兒」。

曼聯今季10個英超入球之中,拉舒福特有4球,新星丹尼爾占士有3球,早前復出嘅安東尼馬迪爾亦入咗2球,仲有1球係由麥湯米尼射入。由於拉舒福特兼任12碼「劊子手」,無疑係「紅魔2000球先生」大熱。

睇番曼聯過去「齊頭數」入球者,都係獨當一面嘅傳奇人物,翼鋒簡察斯基1993年11月為曼聯取得第100個英超入球,1999年2月高爾將球數增至500,第1000球屬於球王C朗,佢喺2005年10月對米杜士堡時射入,而貝碧托夫入第1500球。

照咁推斷,為曼聯入第2000個英超入球嘅人,應該都可以成為一代豪傑,唔知今晚(27日)會唔會出現呢?


__________________
避免"殘酷一BAN"...請謹慎出POST~
偶體內流住GAF
曼聯成功拿下頂級聯賽20冠軍!
流胃兄x民賤聯.無恥黨x禮義廉......
250311.3975.12363
Busconcamp 目前離線   回覆時引用此篇文章
舊 10-31-19, 03:25 PM   #14
Busconcamp
The One
紅魔鬼閃耀GAF
 
註冊日期: Jan 2003
文章: 69,304
曼聯今夏拒簽加里夫巴利

英西傳媒近日又傳出,西甲皇家馬德里打算以現金加上加里夫巴利,去買曼聯球星保羅普巴,仲話「紅魔鬼」鋒力差,應該會對「大聖爺」感興趣。不過,今日《每日鏡報》就爆料,曼聯查實喺暑假曾經有機會簽入巴利,只係最終考慮到兩個原因,先至放棄收購,其中一個原因自己係佢玻璃人頻頻受傷嘅考慮。至於另一個原因,竟然係佢沉迷高爾夫球喎!

報道話自從皇馬主帥施丹喺暑假講明唔會畀「大聖爺」上陣機會之後,原來「銀河艦隊」曾經打算即使賣佢唔走,但如果佢肯,借去畀曼聯一季都冇問題。雖則巴利佢星味十足兼踢得,應該幾啱曼聯口味,只係最終曼聯球探部認為巴利囓比目魚肌長期傷患令人擔心,同時愈來愈鍾意喺工餘時間去打高爾夫,驚佢唔可以專心去幫球會比賽,所以先放棄咋!

報道仲話來自曼聯高層消息,嚟緊「紅魔鬼」基本上都唔會簽「大聖爺」,除非佢肯簽入嗰種根據上陣次數去出糧嘅合約,否則就冇得傾喎!
Playasia - Buy Games & Codes for PS4, PS3, Xbox 360, Xbox One, Wii U and PC / Mac.

__________________
避免"殘酷一BAN"...請謹慎出POST~
偶體內流住GAF
曼聯成功拿下頂級聯賽20冠軍!
流胃兄x民賤聯.無恥黨x禮義廉......
250311.3975.12363
Busconcamp 目前離線   回覆時引用此篇文章
舊 10-31-19, 03:26 PM   #15
Busconcamp
The One
紅魔鬼閃耀GAF
 
註冊日期: Jan 2003
文章: 69,304
曼聯緊急出手!斟「約克郡派路」



一直盛傳曼聯將於明年1月轉會市場重開後,簽入前鋒改善攻力,但英國各大傳媒指,紅魔鬼依家最想簽入中場,提升組織力,頭號目標係英冠列斯聯新星加雲菲臘斯。

曼聯今季9場聯賽只入10球,表面上係前鋒啞火,但其實中場缺乏創造型球員亦係死因。紅魔鬼助教費蘭近期去睇列斯聯比賽,據悉主要係觀察加雲菲臘斯表現。

現年23歲嘅加雲菲臘斯屬於列斯聯青訓產品,由2016/17年球季開始已經成為球隊主力。呢位英格蘭新星司職墮後中場,負責校炮組織攻勢,屬於列斯聯中場大腦,領隊比爾沙形容佢係「關鍵先生」。

由於加雲菲臘斯踢法似意大利名宿派路,加上佢喺約克郡利茲土生土長,因而被稱為「約克郡派路」。

熱刺年初曾經提出用2700萬鎊收購加雲菲臘斯,但被列斯聯拒絕,由於曼聯同列斯聯屬於「世仇」,紅魔鬼想得到加雲菲臘斯,恐怕要大幅加碼至得。


__________________
避免"殘酷一BAN"...請謹慎出POST~
偶體內流住GAF
曼聯成功拿下頂級聯賽20冠軍!
流胃兄x民賤聯.無恥黨x禮義廉......
250311.3975.12363
Busconcamp 目前離線   回覆時引用此篇文章
舊 10-31-19, 03:29 PM   #16
Busconcamp
The One
紅魔鬼閃耀GAF
 
註冊日期: Jan 2003
文章: 69,304
射失兩個12碼 曼聯竟然照贏



一支球隊喺一場波內射失兩個12碼,真係想贏都難,但世事偏偏有例外,所講係曼聯。英超賽事曼聯作客諾域治,紅魔鬼就有拉舒福特同安東尼馬迪爾各極刑宴客,但最終球隊贏3比1,經過聯賽4場不勝後終於贏波,以13分升上第7位,落後前4名球隊7分。

21分鐘麥湯米尼把握對方解圍失誤,近門勁射成1比0,而呢個入波亦係曼聯第2000球,別有意義。29分鐘,丹尼爾占士博得12碼,由拉舒福特操刀卻告宴客,但4分鐘後,丹尼爾占士右路大腳傳中,拉舒福特接應破網,曼聯領先2比0。

44分鐘曼聯博得今場第2個12碼,佢哋唔敢再搵福仔射,安排馬迪爾操刀,結果都係宴客,直至下半場73分鐘,安東尼馬迪爾窄位挑射入網,為曼聯射成3比0奠定勝局,88分鐘,奧尼爾靴南迪斯為主隊破蛋,最終曼聯贏3比1完場。


__________________
避免"殘酷一BAN"...請謹慎出POST~
偶體內流住GAF
曼聯成功拿下頂級聯賽20冠軍!
流胃兄x民賤聯.無恥黨x禮義廉......
250311.3975.12363
Busconcamp 目前離線   回覆時引用此篇文章
舊 10-31-19, 03:30 PM   #17
Busconcamp
The One
紅魔鬼閃耀GAF
 
註冊日期: Jan 2003
文章: 69,304
曼聯英超2000球 居然係佢



曼聯今仗贏諾域治3比1,升上第7,仲有一樣值得高興嘅係,今仗首開紀錄嘅麥湯米尼,所入1球係曼聯角逐英超第2000球,意義重大,亦係英超史上第一。

其實呢個入波好多人都估計係拉舒福特,或者安東尼馬迪爾,依家竟然係呢位22歲嘅蘇格蘭兵,可見佢真係有運。

睇番過去每位取得曼聯入球關鍵數字嘅球員,個個聲名顯赫,例如第100球得主係簡東拿、500球係高爾、1000球係C朗、1500球係貝碧托夫,依家2000球係麥湯米尼,佢嘅名字將同上述一班巨星並列。


__________________
避免"殘酷一BAN"...請謹慎出POST~
偶體內流住GAF
曼聯成功拿下頂級聯賽20冠軍!
流胃兄x民賤聯.無恥黨x禮義廉......
250311.3975.12363
Busconcamp 目前離線   回覆時引用此篇文章
舊 10-31-19, 03:31 PM   #18
Busconcamp
The One
紅魔鬼閃耀GAF
 
註冊日期: Jan 2003
文章: 69,304
曼聯1戰翻身 夢幻賽程前4不是夢



聯開季9場僅得10分,成績同表現絕對唔合格,但嚟到第10場全隊覺醒,作客3比1擊敗諾域治,一場勝仗竟然鹹魚翻生,現以13場排第7,但距離前4仍然落後7分,根據賽程,曼聯絕對有機會谷底反彈。

之前幾輪賽事,曼聯僅比降班區多2分,而且護級漩渦好邪門,一旦被捲入就好難返出去,要脫身唔係咁容易,作為英超最成功球會,今季竟然咁接近降班區,實在令人始料不及。

睇番英超聯賽榜,除咗利物浦一放絕塵,其餘球隊都係正正常常,中游至下游球隊積分相差極少,因此今場曼聯贏波,排名立即由14位升上第7。

睇番曼聯嚟緊幾場賽程,對手順序係般尼茅夫、白禮頓、錫菲聯、阿士東維拉,以曼聯能力,上述4場只要全取12分,殺上前4唔係冇可能。


__________________
避免"殘酷一BAN"...請謹慎出POST~
偶體內流住GAF
曼聯成功拿下頂級聯賽20冠軍!
流胃兄x民賤聯.無恥黨x禮義廉......
250311.3975.12363
Busconcamp 目前離線   回覆時引用此篇文章
舊 10-31-19, 03:34 PM   #19
Busconcamp
The One
紅魔鬼閃耀GAF
 
註冊日期: Jan 2003
文章: 69,304
【東體爭議】英超前4已定 北倫敦玩完

英超今季剛好踢完第10輪聯賽,同上季最大分別係無論榜首或者前4位歐聯入場券之爭,形勢已經出現明顯分野,「一哥」利物浦拋離次席曼城6分,而第4位車路士領先第5位阿仙奴4分,以兵工廠近期頹勢,加上李城、車仔愈戰愈勇,睇怕阿仙奴好難打入前4位。

不過,最悲哀都係另一支北倫敦球隊熱刺,輸畀利物浦之後,已經跌至積分榜「下半部」嘅第11位,仲低過曼聯4位,已落後車路士8分,想重返前4位,機會微乎其微。

熱刺最大問題係陷入「樽頸位」,上季首次打入歐聯決賽功敗垂成,洩咗道氣,領隊普捷天奴似乎已經黔驢技窮,即使今季有得簽人,都未能帶來突破,成績更加退倒,情況同阿仙奴相似,相信難免要行最後一步:換帥,先至有機會重生。


__________________
避免"殘酷一BAN"...請謹慎出POST~
偶體內流住GAF
曼聯成功拿下頂級聯賽20冠軍!
流胃兄x民賤聯.無恥黨x禮義廉......
250311.3975.12363
Busconcamp 目前離線   回覆時引用此篇文章
舊 10-31-19, 03:36 PM   #20
Busconcamp
The One
紅魔鬼閃耀GAF
 
註冊日期: Jan 2003
文章: 69,304
【阿King】曼聯1場勝仗有3大意義



曼聯喺周日(27日)深夜英超即使射失2球12碼,但仍然以3:1擊敗諾域治,今場波對紅魔鬼而言,意義重大。

首先,曼聯終於取得今季英超首場作客勝仗,打破心理關口之後,有助提升嚟緊作客比賽信心。同時亦係近5場英超第1次贏波,可以暫時鬆一口氣。

第二,曼聯全取3分之後,一次過連升7位,殺上第7,雖然仍然落後第4位車路士7分,但起碼重返前列,唔使再畀人寸要護級。

第三,曼聯自開鑼戰贏車路士4:0後,首次可以單場入多過1球,呢樣非常關鍵,因為曼聯炒完車仔之後,表現就急插水,緊接嘅12場比賽只有3勝6和3負,而且冇1場可以入過多1球,攻力弱得可憐。

不過,曼聯今場就算「讓兩球」射失2球12碼,仍然可以攻入3球,的確令人驚喜。當中最大改變,就係領隊蘇斯克查終於放棄佢口中所謂嘅曼聯傳統「進攻足球」,佢當初認為可以用費Sir時代嘅踢法,問題係曼聯現時中前場冇踢呢種波嘅本錢。


曼聯今場改為踢快速反擊,立即脫胎換骨,除咗第1球係諾域治後防失誤之外,曼聯另外2個入球都係靠快速反擊攻入,證明快速「防反」先至係當今足球戰術嘅王道。「天下武功,無堅不破,唯快不破」,足球都係同樣道理,恭喜蘇斯克查終於參透當中道理。


__________________
避免"殘酷一BAN"...請謹慎出POST~
偶體內流住GAF
曼聯成功拿下頂級聯賽20冠軍!
流胃兄x民賤聯.無恥黨x禮義廉......
250311.3975.12363
Busconcamp 目前離線   回覆時引用此篇文章
舊 10-31-19, 03:40 PM   #21
Busconcamp
The One
紅魔鬼閃耀GAF
 
註冊日期: Jan 2003
文章: 69,304
紅魔噩耗!普巴傷勢比預期嚴重



曼聯上場英超作客以3:1擊敗諾域治,踢出近期代表作,但亦傳來噩耗,就係中場球星保羅普巴嘅傷勢比預期嚴重,領隊蘇斯克查透露,12月之前都唔使預呢位法國國腳參賽。

保羅普巴先係8月足踝受傷,之後出現腳趾骨折問題,原本以為佢康復進度良好,可以喺周四(31日)凌晨英聯盃16強復出對車路士。

不過,蘇斯克查話情況唔樂觀:「我認為大家喺12月之前都見唔到普巴上陣,佢仲會缺陣一段時間,等完全傷愈再講。」

曼聯12月之前,仲有6場比賽,包括英聯盃作客車路士,英超對般尼茅夫、白禮頓、錫菲聯,歐霸盃對柏迪遜、艾斯坦拿,除咗鬥車仔之外,其他5場應該唔難踢。

曼聯名宿加利尼維利認為,紅魔鬼明年1月應該簽入中場,首選係熱刺球星基斯甸艾歷臣,咁就唔使再依賴普巴。


__________________
避免"殘酷一BAN"...請謹慎出POST~
偶體內流住GAF
曼聯成功拿下頂級聯賽20冠軍!
流胃兄x民賤聯.無恥黨x禮義廉......
250311.3975.12363
Busconcamp 目前離線   回覆時引用此篇文章
舊 10-31-19, 03:42 PM   #22
Busconcamp
The One
紅魔鬼閃耀GAF
 
註冊日期: Jan 2003
文章: 69,304
曼聯6球12碼入得2球 衰在大佬文化



曼聯上場英超對諾域治,竟然射失2球12碼,紅魔鬼今季6次獲得12碼,屬於各隊之中最多,但只入2球,命中率只有33%,實在非常差劣。

陣中3大進攻球星保羅普巴、拉舒福特、安東尼馬迪爾都曾經宴客,莫非曼聯真係冇人識射12碼?

咁又未必,其實曼聯陣中有1位「劊子手」最佳人選,就係安達斯彭利拿。呢位23歲巴西中場上年國冠盃對AC米蘭,「馬拉松式」互射12碼階段,佢兩輪都射入。

事實上,當曼聯今場博到第2球12碼時,安達斯彭利拿主動去執起個波,想自己主射,但卻被安東尼馬迪爾搶走,但呢位法國前鋒卻射失。

曼聯今季已經唔係第一次出現爭射12碼情況,之前普巴同拉舒福特就試過爭射12碼,雖然領隊蘇斯克查之後欽點福仔做首席劊子手,但佢今場第1球12碼射失後,卻突然換由馬迪爾主射,可見蘇斯克查對劊子手人選,仍然十五十六。

既然係咁,不如畀安達斯彭利拿試下,唔好因為佢名氣及身價唔及3位「大哥」,而浪費呢位人才,否則下次就冇咁好彩啦。


__________________
避免"殘酷一BAN"...請謹慎出POST~
偶體內流住GAF
曼聯成功拿下頂級聯賽20冠軍!
流胃兄x民賤聯.無恥黨x禮義廉......
250311.3975.12363
Busconcamp 目前離線   回覆時引用此篇文章
舊 10-31-19, 03:43 PM   #23
Busconcamp
The One
紅魔鬼閃耀GAF
 
註冊日期: Jan 2003
文章: 69,304
【曼聯靠你喇】超新星創本季英超紀錄!



曼聯今季演出的確麻麻,雖然剛啱作客贏諾域治、取得本季英超首場勝仗,而且排名跳上第7,不過已差第4車路士7分。雖然紅魔鬼本季亮點唔多,但新加盟嘅雲比沙卡,演出長期高質,今輪更造出11次成功攔截,創本季英超單場紀錄。

雲比沙卡於剛過去夏天,以5000萬鎊高價轉會曼聯,每次落場都打出拚命三郎氣勢,佢速度快落腳極準,等閒翼鋒對住佢都叫苦連天。今場面對諾域治,佢一共11次成功攔截,創出本季英超紀錄。到目前為止佢英超上陣8次,累積數字為44次,於聯賽排名第3,僅不及李斯特城右閘列卡度彭利拿(47次)同中場尼迪迪(45次),不過兩者出場次數(10場及9場)均多過雲比沙卡。

另外,雲比沙卡本季聯賽已係第2次造出雙位成功攔截數字(之前對修咸頓曾攔截10次);而對上1個曼聯球員,單場可以成功攔截10次或以上嘅已經係艾拉,當時係12年5月對史雲斯。


__________________
避免"殘酷一BAN"...請謹慎出POST~
偶體內流住GAF
曼聯成功拿下頂級聯賽20冠軍!
流胃兄x民賤聯.無恥黨x禮義廉......
250311.3975.12363
Busconcamp 目前離線   回覆時引用此篇文章
舊 10-31-19, 03:47 PM   #24
Busconcamp
The One
紅魔鬼閃耀GAF
 
註冊日期: Jan 2003
文章: 69,304
堅尼:艾歷臣幫唔到曼聯



曼聯想買熱刺中場基斯甸艾歷臣,都傳咗好耐,並極有可能於明年1月落實轉會,不過今季艾歷臣喺熱刺表現失準,不敵利物浦一仗更冇腳好波,前曼聯隊長堅尼贊疑,曼聯就算簽入艾歷臣,相信都幫唔到手。

堅尼與其他幾位球評家出席《天空體育》評論英超各隊,話題講到艾歷臣,一致指出呢位丹麥中場今季水準下跌,不過儘管佢表現未如理想,但仍然係歐洲頂級豪門羅致對象,皇馬同曼聯都想簽佢。

對於曼聯想簽艾歷臣,堅尼指出:「如果我係曼聯領隊,我唔會,我認為艾歷臣會尋求自由轉會,但佢無法提升球隊實力,對於曼聯這樣希望縮少與前列球隊差距,呢個決策好關鍵。」

不過作為足球名嘴,堅尼都不忘幽默一下:「艾歷臣唔會令曼聯變強,但話說回來,曼聯都買入費特洛迪古斯。」一提到費特,即場引發一陣笑聲。


__________________
避免"殘酷一BAN"...請謹慎出POST~
偶體內流住GAF
曼聯成功拿下頂級聯賽20冠軍!
流胃兄x民賤聯.無恥黨x禮義廉......
250311.3975.12363
Busconcamp 目前離線   回覆時引用此篇文章
舊 10-31-19, 03:53 PM   #25
Busconcamp
The One
紅魔鬼閃耀GAF
 
註冊日期: Jan 2003
文章: 69,304
踢法身材樣貌都似 曼聯搵到普巴接班人!



曼聯復興之路仲係好漫長,領隊蘇斯克查已經部暑緊下個夏天嘅買人計劃,當中包括收購「普巴接班人」保巴卡尼蘇馬爾!據《每日郵報》報道,紅魔鬼睇中法國U21國腳、現效力法甲里爾嘅蘇馬爾,呢名20歲中場球員,踢法、身材甚至個樣都勁似普巴,而蘇馬爾份約到今季尾就完,所以紅魔有機會於1月,以優惠價3000萬鎊成功搶人。

曼聯於剛過去夏天,用咗超過1.5億收購哈利馬古尼、雲比沙卡同丹尼爾占士,3個表現都非常對辦,睇到蘇帥買人眼光唔錯。唔少球評家都認為,曼聯起碼要用多4至5個轉會窗,先可以「成軍」再次挑戰英超冠軍,蘇馬爾就被蘇帥視為未來中場主力。

《每日郵報》表示,曼聯雖然冇諗過出售普巴,但呢名法國國腳若堅持走人,紅魔都需要有替補人選。蘇馬爾係巴黎聖日耳門青訓出身,17年加盟里爾後,現時已經係球隊主力,今年2月就傳出曼城對佢有興趣,而近期歐聯里爾對華倫西亞,曼聯就派人現場觀察呢名中場。

蘇馬爾同普巴一樣可踢中場中同防中,身體對抗性極佳,而且好擅於喺中場攔截成功後,自己快速引球推進,之後再畀出致命直線,技術特點同打法極似普巴。據知除曼聯外,有唔少歐洲富豪球會都好留意蘇馬爾,故曼聯將會密切注意佢嘅情況。

除蘇馬爾外,曼聯對呢一位法甲球員都有意思,佢就係里昂前鋒穆沙迪比利。呢名23歲法國射手之前踢過富咸同些路迪,本季已取得7個法甲入球,屬陣中神射手,蘇帥希望佢同馬迪爾、拉舒福特組成紅魔新一代三叉戟,以解決攻力不足問題。


__________________
避免"殘酷一BAN"...請謹慎出POST~
偶體內流住GAF
曼聯成功拿下頂級聯賽20冠軍!
流胃兄x民賤聯.無恥黨x禮義廉......
250311.3975.12363
Busconcamp 目前離線   回覆時引用此篇文章
回覆

主題工具
顯示模式

論壇跳轉

相似的主題
主題 主題作者 版面 回覆 最後發表
曼聯躉紅魔鬼地帶[VOL.94]~Closed~ Busconcamp 球會討論區 1001 10-24-19 11:56 AM
曼聯躉紅魔鬼地帶 [VOL.85]~CLOSED~ Busconcamp 球會討論區 1020 04-10-14 09:28 AM
曼聯躉紅魔鬼地帶 [VOL.83] ~~~CLOSED~~~ Busconcamp 球會討論區 1000 11-25-13 01:33 AM
曼聯躉紅魔鬼地帶 VOL.81 ~~~CLOSED~~~ Busconcamp 球會討論區 1001 07-12-13 03:15 AM
曼聯躉紅魔鬼地帶 VOL.73 ~~~CLOSED~~~ Busconcamp 球會討論區 1040 03-05-12 02:03 AM


現在的時間是 06:35 AM


手機版 | APP版
Powered by vBulletin® 版本 3.8.3
版權所有 ©2000 - 2019,Jelsoft Enterprises Ltd. map
Games Animation Forum