曼聯躉紅魔鬼地帶[VOL.95]各項賽事三連勝,入球眾數,重上正軌？

[Busconcamp]

一個原因　普捷天奴今季唔教曼聯阿仙奴



英超帥位近期大執位，不過直到依家，阿仙奴都仲只係搵嚟龍格保做看守領隊，曼聯領隊蘇斯克查帥位又似係危危乎，唔少人都認為，依家待業嘅前熱刺教頭普捷天奴，將可能成為呢兩間老牌勁旅其中一間嘅新領隊。不過，有傳媒就發現，原來普帥畀熱刺炒魷收錢嗰陣，係簽咗份協議，承諾過今季之內唔可以執教任何一間英超球會，否則就要賠畀熱刺1,250萬鎊，所以一般估計「肥普」都唔會教佢哋，反而拜仁或者皇馬仲有機喎！

負責踢爆呢份協議嘅係英國《每日快報》，佢哋認為要「肥普」自己賠錢畀熱刺去教另一支英超球會根本冇可能，至於無論要「兵工廠」定「紅魔鬼」去畀錢請佢，考慮到只係為大約半季時間，人哋都未必肯畀，大不了咪等出年夏天先囉！

相反，因為協議只係阻佢喺英超其他球會搵食，但外國球會就冇問題，家陣拜仁仲未搵到新帥，皇馬、巴塞又成日傳出會炒教練，睇嚟普捷天奴去德甲或西甲搵食機會即時提升好多。

[Busconcamp]

【特稿】勁敵頻換帥　曼聯炒蘇B換普帥？



本季英超勁旅頻受挫折，其中熱刺、阿仙奴已先後炒領隊；而一直盛傳曼聯對普捷天奴有興趣，加上本身成績曳到極，究竟紅魔鬼會唔會果斷辭退蘇斯克查？現已成英國球壇熱話。據《The Athletic》專欄分析，曼聯高層目前完全冇將蘇帥落鑊嘅打算，其中一個主要原因，係曼聯球迷現時依然好支持蘇帥，冇好似熱刺、阿仙奴Fans一樣出現大規模不滿。

無論係戰績或實際表現，曼聯本季都係災難級。近期紅魔先後打和2支升班球隊錫菲聯同阿士東維拉，又於歐霸盃鬥哈薩克球隊艾斯坦拿反勝為敗，雖然蘇帥依然話表現持續有進步，但其實前中後3線演出都難以令人滿意，淨係睇曼聯依家排緊英超第9，魔迷都擰晒頭。

雖然蘇斯克查於3月坐正後，22場聯賽僅勝6場，計成績曳過晒莫耶斯、尹戈爾同摩連奴，但曼聯目前完全冇考慮換帥。《The Athletic》記者丹尼爾泰萊分析，曼聯高層目前諗法係就算聘普捷天奴為帥，都難以喺短時間內將曼聯帶返高峰，故成績差勁已喺預計之內。

另外最重要一點，係曼聯球迷亦都出奇地支持蘇斯克查。雖然對球隊不滿，但佢哋更傾向責怪陣中球星，大多數魔迷都認為，要畀時間蘇斯克查撥亂反正。當然呢份「耐性」，係源於蘇斯克查屬曼聯名宿所致。

[Busconcamp]

蘇斯克查同球員講：輸埋呢兩場我就離開



經歷無數個「30年來開季最差」之後，曼聯領隊蘇斯克查已明白到自己處境，英國《太陽報》報道，未來兩場對熱刺及曼城將決定蘇帥前途，因為蘇帥本人已向球員宣布，如果嚟緊兩場輸波，自己就會離開。

曼聯內部消息人士透露，蘇斯克查同球員宣布時頗激動，佢話：「希望球員全力準備對熱刺，全心投入比賽。」雖然佢冇評論前主帥摩連奴，但明顯對勝利無比渴望，睇得出佢希望藉此激起球員鬥志。

其實蘇斯克查仲有人撐，曼聯行政總裁伍德沃德表態，全力支持蘇帥嘅重建計劃，重用青訓球員，希望蘇帥能夠堅持住。

[Busconcamp]

【曼熱戰】摩連奴：曼聯係我歷史一部份



熱刺會喺聽晚英超作客曼聯，亦係熱刺新領隊摩連奴離開「紅魔鬼」之後，首次回歸奧脫福。對於重返前東家，「寸王」今次勁客氣，但就強調曼聯已經係佢人生結束咗嘅一章，依家返到去只係會諗點樣贏波喎！

摩連奴話：「對我嚟講，呢個係已完結嘅一章！我離開咗間球會，我曾經把握時間去實現咗所有嘢，依家我會用盡我時間去準備人生嘅新挑戰。老實講，曼聯係我累積經驗嘅一本書，已經成為我嘅歷史書。」

講到周三深夜場英超大戰，曼聯今季喺蘇斯克查帶領下，表現低迷，摩佬話：「依家唔係由我分析曼聯情況，我只會由對手角度去研究佢哋踢法，諗吓點樣打低佢哋，佢哋又會點去打低我哋，呢啲先係我現時最關心。」

重返奧脫福再遇曼聯球迷，「寸王」又點睇先？佢話：「我同曼聯支持者有良好關係，我曾經用球評家身份返去，受到球迷熱情款待。不過，聽日我會以其他球隊教練身份返去，會嘗試打敗曼聯，我明白佢哋嘅想法正係同我相反，當然，我會期待喺比賽期間，佢哋會忘記我。」

[Busconcamp]

拿玻里決定炒安察洛堤　曼聯阿仙奴搶人



安察洛堤即將回歸英超？據意大利傳媒報道，今季陷入危機嘅拿玻里，已經決定下星期炒教練安察洛堤魷魚，雖然呢位60歲名帥就快冇得撈，不過佢絕對唔憂嫁，事關曼聯同阿仙奴兩大勁旅都搶住要，「肥安」極可能會喺今季內重返英超。

拿玻里上季喺安察洛堤帶領下拎意甲亞軍，不過今季爆出球員叛變鬧劇，安察洛堤亦同班主迪羅倫迪斯不和，意大利著名媒體《Radio Marte》爆料，迪羅倫迪斯已經下達內部指令，下周二(10號)歐聯最後一場分組賽對亨克後，正式解僱安察洛堤，而且已經秘密同前AC米蘭教練加度素斟介，安排上任事宜。

曾帶領車路士贏英超同足總盃冠軍嘅安察洛堤，據聞已經被曼聯同阿仙奴盯住，「兵工廠」依家正物色新主帥，如果安察洛堤回復自由身嘅話，絕對係阿仙奴嘅理想對象，事實上早喺雲格離隊後，阿仙奴亦曾打算搵安察洛堤接手。

安察洛堤教波成績輝煌，曾經率領AC米蘭捧過意甲及歐聯冠軍，而去英超、法甲、德甲搵食都贏過聯賽冠軍，執教西甲豪門皇馬時期，奪得歐聯冠軍，絕對係頂級名帥。

至於曼聯雖然暫未有炒蘇斯克查打算，不過「紅魔鬼」嚟緊聯賽連撼熱刺同曼城兩大勁旅，若果成績依然唔掂，蘇斯克查隨時比安察洛堤更早「落鑊」。經歷蘇斯克查嘅災難後，曼聯高層更想 搵一個有江湖地位嘅教練揸旗。

[Busconcamp]

曼聯要簽艾歷臣　摩連奴支持



熱刺領隊摩連奴未能說服中場基斯甸艾歷臣續約，為免呢位丹麥國腳明夏自由身離隊，令球會人財兩失，熱刺計劃下月轉會市場重開之後出售艾歷臣。

曼聯一直想簽艾歷臣，據悉紅魔鬼依家只需用2500萬鎊(約2.5億港元)再加中場尼曼查馬迪，就可以買到艾歷臣，摩帥亦唔反對呢單交易。

27歲嘅基斯甸艾歷臣早於開季前已想離隊，搞到影響表現，今季仲失去正選，熱刺已打定輸數，希望盡快賣走佢，收回資金畀摩帥簽新球員。

曼聯用2500萬鎊轉會費再加中場尼曼查馬迪，可以話係一次過滿足摩連奴兩個願望，一嚟佢有資金買人，二嚟馬迪一直係佢嘅愛將，兩人曾於車路士及曼聯合作過，「寸王」好希望獲得呢塞爾維亞國腳幫手。

對於曼聯而言，馬迪已經成為冗員，唔介意放走佢，而且仲可以簽到艾歷臣，非常抵玩，兩間球會有望一拍即合。

[Busconcamp]

福仔起孖　摩連奴重返奧脫福敗北



英超矚目大戰曼聯主場迎戰熱刺，「寸王」摩連奴領軍重返奧脫福倒戈，結果曼聯憑拉舒福特上下半場各建一功，以2比1擊敗熱刺，蘇斯克查在絕境中力退強敵，挽救曼聯兼自救，摩帥上任熱刺3連勝後斷纜，首嚐敗績。

曼聯今仗一洗之前3仗不勝頹氣，全軍努力壓搶，攻勢凌厲到肉，開賽6分鐘打開局面，連格前場左路迫搶後送交拉舒福特，福仔禁區內射近柱，熱刺門將加沙寧加落地稍慢撲到皮球仍彈柱入網，曼聯領先1比0。

離開曼聯351日後重返奧脫福，今次以熱刺主帥身份倒戈嘅摩連奴，似乎諸事不順，不但開局落後，13分鐘場邊更發生一次小意外，哈利雲克斯與丹尼爾占士爭波雙雙跌出場邊，曼聯小將丹尼爾占士頭部撞中摩連奴右膝及小腿，幸好並無嚴重受傷。

福仔今仗極之活躍，開紀錄後殺得性起，多次施射威脅熱刺大門，25分鐘福仔離門25碼施冷箭，加沙寧加飛盡拍到再中楣彈出，熱刺逃過一劫。戰至39分鐘，近況極佳嘅迪利阿里一次埋門，在小禁區頂右腳一挑過頭，皮球擦中肩膊，再於門前射入扳平，經VAR確認冇犯手球，熱刺扳平1比1完半場。

下半場開賽僅70秒，拉舒福特左路個人突破殺入禁區，穆沙施素高上前搶位將福仔撞跌，球證判罰12碼，福仔親自操刀射成2比1，個人梅開二度。賽事餘下時間曼聯專心打反擊，熱刺強攻不果，最終曼聯以2比1贏波，摩連奴入主熱刺後首嚐敗績，近期飽受下台壓力嘅蘇斯克查可以暫時鬆一口氣。

[Busconcamp]

【賽後解碼】狂打死穴　蘇B智破摩連奴



上年嘅12月，曼聯搵蘇斯克查接替摩連奴嘅位置，1年之後兩位主帥喺奧脫福交鋒，雖然賽前球迷普遍睇好氣勢如虹嘅熱刺，但結果蘇斯克查帶領曼聯打出漂亮一仗，勝利關鍵係蘇B搵出熱刺命門──奧里亞，再用拉舒福特盡情壓，戰術性擊倒摩連奴。

摩連奴帶領熱刺頭3場全勝，不過防線問題係有目共睹，右閘奧里亞嘅超搶鏡助攻，更加被視為摩連奴妙筆。奧里亞攻強守弱，但佢係熱刺唯一正宗右閘，摩連奴選擇畀奧里亞盡情助攻，同時安排左閘收後作為填補(今場就用維頓漢客串)，等兩位中堅可向右閘填補漏洞。

不過，呢個治標唔治本嘅做法就成為熱刺死穴，蘇斯克查搵拉舒福特同連格專打熱刺右路防守，由一開波就向住奧里亞狂攻，「福仔」每次引球推進，奧里亞同熱刺防線都騰騰震，結果兩個入波都係由左路進攻產生。蘇斯克查呢鋪智破摩連奴，終於威番次。

[Busconcamp]

【特稿】紅魔超強數據　曼市打吡冇得輸



曼聯今季表現令人失望，只得3成幾嘅得勝率令蘇斯克查帥位岌岌可危，不過周四(5號)主場2比1擊敗熱刺後，曼聯今季5次面對Big 6球隊，竟然錄得3勝2和不敗成績，戰績之強僅次利物浦，周六深夜「曼市打吡」，睇怕曼城想贏極有難度。

熱刺領隊摩連奴賽後話，曼聯嘅踢法係「遇強愈強」，蘇斯克查嘅反擊戰術一向係最強殺著，面對主守嘅較弱球隊反而無用武之地。睇番曼聯今季各項賽事5次對住Big 6球隊，分別贏過熱刺同2贏車路士，對住利物浦同阿仙奴都係打和，亦係利物浦今季英超唯一贏唔到嘅球隊，可見「紅魔鬼」踢大戰特別醒神。

[Busconcamp]

寸摩佬唔泊大巴　舒米高心儀熱刺大將



曼聯於英超再度遇強愈強，主場2:1殺敗熱刺，本季曾2勝車路士、擊敗李斯特城及熱刺，又曾打和榜首利物浦，曼聯對勁旅係有一手。賽後舒米高除寸摩連奴排錯陣、出錯人外，仲大讚對手前鋒孫興民係世界級，好想佢有朝一日可以加盟曼聯。

曼聯殺敗熱刺，舒米高賽後當然多嘢發表：「如果畀摩連奴再揀，佢一定唔會咁排陣，又唔會咁樣用人。我以為佢返到奧脫福，肯定會泊大巴，點知佢唔係喎，出晒一眾前鋒殺手，不過又唔主動搶攻，真係『好唔摩連奴』！下半場尼當比利落場踢得好好，佢應該踢正選。」

「睇番熱刺陣容，冇邊幾個我係好鍾意，但孫興民係例外。佢係個頂級前鋒，曼聯正正就係需要呢個卡士嘅球員，希望有輔一日，佢可以着上曼聯波衫啦。」

[Busconcamp]

沙夏獻計！曼聯簽卡雲尼一舉兩得



冬季轉會市場將於下月重開，成績低落嘅曼聯會唔會增兵備受關注，紅魔鬼名宿沙夏接受傳媒訪問時獻計，認為曼聯必須簽人，並推薦巴黎聖日耳門前鋒卡雲尼。

沙夏話：「曼聯係冬季最需要增兵嘅英超球隊，佢哋應該考慮簽入卡雲尼，透過引入更優秀球員，既可提升實力，又可以加強隊內競爭，卡雲尼可以推動拉舒福特同安東尼馬迪爾進步，令佢哋做得更好，我好期待卡雲尼加盟曼聯。」

沙夏仲話雖然紅魔傳奇主帥費格遜以往唔喜歡1月買人，但依家情況完全唔同，曼聯需要盡最大努力加強實力。

卡雲尼今季已淪為副選，佢將於明夏約滿，加上已經32歲，相信轉會費唔會高，問題係領隊蘇斯克查推行年輕化，如果要簽入1位老將救亡，似乎違背佢嘅發展方針。

[Busconcamp]

【曼市打吡】永續蘇B？今次係曼聯球員講喎



曼聯喺英超周中快車爆冷擊敗熱刺，總算係暫時幫領隊蘇斯克查「續命」，不過今晚佢哋又要迎來「力保帥位」第2關，作客同市死敵曼城，究竟「紅魔鬼」會唔會輸波，甚至連蘇帥個位都輸埋呢？只係，尋日英國《每日郵報》就爆料，話原來曼聯成班球員都勁撐「蘇B」，近排曾經走訪高層，幫「蘇B」求情，祈求任何情況都唔好炒「蘇B」，要畀多啲時間佢喎！

報道話，雖然「紅魔鬼」今季戰績反覆，只係球員都相信蘇斯克查提拔新人，同提倡快樂足球及進攻足球嘅理念係正確，所以全隊上下都勁支持佢。據聞，喺鬥熱刺賽前，「紅魔鬼」班球員就去搵定高層求情，而會方亦因為唔想再喺季中換帥，所以都同意決定等季尾先算喎！難怪之前記招，「蘇B」一直都話有球員同高層支持，原來唔係吹水，大家今晚睇曼市打吡，唔使再為「蘇B」擔心啦！

[Busconcamp]

曼聯同阿里巴巴結盟　7億球迷大茶飯



曼聯周五(6日)宣布，與內地市值最高網絡公司阿里巴巴簽約成為合作伙伴，從此全球7億曼聯球迷將會在阿里巴巴嘅天貓及優酷等平台，開設商店及設置專有頻道，實行發大嚟搞。

達成合作協議後，曼聯將會在阿里巴巴購物網站天貓設立商店，售賣球會商品，至於優酷就會開設紅魔專屬頻道，提供曼聯比賽、曼聯學院、女足及巡迴賽，轉播曼聯在全球及內地嘅特定賽事，以及原創作品。

曼聯商務總監阿諾特(Richard Arnold)表示，球會一直尋求與球迷互動嘅新方式，阿里巴巴就係最理合作伙伴：「阿里巴巴擁有內地最大嘅網上購物平台及視頻媒體平台，球會可以直播與球迷建立聯繫。」

曼聯是全球最受歡迎球會，阿里巴巴是內地市值最高網絡公司，今次聯手備受注目，雖然曼聯近年戰績一般，但行政總裁伍德沃德是華爾街出身，搞波佢唔識搞，但將球會商業化就非常把炮，今次拍住阿里巴巴，即使曼聯成日輸波，但喺商界就冇得輸！

[Busconcamp]

曼聯3次犯手球冇吹！VAR又玩死曼城



「曼市打吡」同人唔同命，曼聯靠VAR獲得12碼，由拉舒福特打開紀錄，但曼城卻又成為VAR受害者。曼聯有3位球員喺禁區內，涉嫌犯手球，但球證安東尼泰萊只有1次要求VAR協助裁決，而且判冇犯規，另外2次更加唔需要VAR，直接話冇手球，間接令曼城錯失3次獲得12碼嘅機會。

上半場曼聯球員已經有2次喺禁區內有犯手球之嫌，中堅域陀連迪路夫瞓身鏟波，右手掂到個波，但球證安東尼泰萊冇表示。之後輪到中場費特洛迪古斯，佢又瞓身攔截時犯手球，今次安東尼泰萊要求VAR協助，但結果維持判角球。

踢到下半場曼城中場馬列斯右路傳中，勞基梳爾雙手擺喺心口，被皮球省中，佢當時身體同手部都有移動，但球證安東尼泰萊都認為冇犯手球，注定曼城今場冇運行。

[Busconcamp]

曼聯連贏2場硬仗！真係要永續蘇B



周日(8日)凌晨英超「曼徹斯特打吡」，曼聯踢出今季代表作，作客以2:1擊敗曼城，繼上場擊敗回勇嘅熱刺後，再取得1場重大勝利。領隊蘇斯克查由上星期瀕臨被炒，到依家帥位大為穩陣，真係可以「永續蘇B」。

雙方今場快上快落，開波唔夠2分鐘，曼聯就有第1次攻門，丹尼爾占士勁射太正，被門將艾達臣摩拉斯撲出，連格亦有1次近門起腳，僅被艾達臣摩拉斯用腳刪出。

至於曼城有大衞施華、奇雲迪布尼連環起腳唔中目標。跟住又輪到曼聯前鋒安東尼馬迪爾禁區內勁射，又被艾達臣摩拉斯擋出。

曼聯踢到20分鐘有回報，拉舒福特殺入禁區，被貝拿度施華撞跌，球證睇完VAR後，判罰12碼，拉舒福特自己主射入網。

[Busconcamp]

蘇斯克查向住佢慶祝　曼迷好感動



曼聯作客2比1擊敗同市死敵曼城，踢出今季最漂亮一仗，蘇斯克查由上星期面臨被炒，到依家被當神咁拜，蘇B同佢嘅支持者都鬆一口氣。當賽事完結後，蘇斯克查離場嗰陣特別向住曼城主場看台振臂慶祝，初時大家都唔知佢點解咁做，不過電視台Zoom埋去之後，原來看台上係蘇斯克查嘅恩師費格遜，當時費Sir亦都起立向佢鼓掌，曼迷見到呢一幕都不禁眼濕濕。

蘇斯克查一直係費格遜嘅得意弟子，上年蘇B就係喺費Sir力薦之下得到做看守領隊嘅機會，到「坐正」之後再陷入危機，依家連贏2場硬仗後再獲得球迷信任，作為老師嘅費格遜當然老懷安慰。

[Busconcamp]

【人物誌】曼市打吡未完　要爭奪新大簡



大利傳統盛產中堅，率領意大利捧2006年世界盃冠軍嘅簡拿華路，更加係唯一曾獲得世界足球先生嘅後衞，可惜自「大簡」掛靴後，意軍中堅人才凋零，來來去去都係得基亞連尼同邦路斯，兩人年事已高，莫非意大利光輝傳統，就咁終止？

咁又未必，意大利出現1位被譽為自簡拿華路之後，最具潛力成為世界頂級中堅嘅「藍戰士」，佢叫羅倫素派奧拉。

呢位17歲新星現時效力國際米蘭青年軍，並協助意大利U17打入今屆世少盃8強，僅不敵後來嘅冠軍巴西。

羅倫素派奧拉以頭腦冷靜、位置感強見稱，被指踢法似簡拿華路，而佢身高1米85，比當年「大簡」更有身體優勢，佢喺今屆世少盃仲射入1球，助攻力都贏「大簡」。

當今球壇優秀中堅非常渴市，身價已拍得住進攻球員，各大豪門已經留意到羅倫素派奧拉，其中曼聯同曼城一齊睇中佢，派出球探密切跟進呢位「新大簡」。

羅倫素派奧拉姓氏(Pirola)同派路(Pirlo)好相似，意大利傳媒提醒國際米蘭教練干地，必須小心睇實羅倫素派奧拉，唔好重蹈當年放走派路嘅覆轍。

[Busconcamp]

【賽後解碼】費特脫胎換骨　普巴隨時走得



曼聯近期連贏熱刺同曼城2大勁旅，除咗領隊蘇斯克查突然聲望大增之外，巴西中場費特洛迪古斯亦受到廣泛肯定。呢位巴西球星由上季加盟開始冇腳好波，到今季季初都仍然被視為毒瘤，不過隨住蘇斯克查嘅信任同重用，以及搵到場上最佳拍擋，費特嘅信心同表現都大幅提升，今場對曼城嘅表現更堪稱為加盟曼聯後嘅代表作。

費特今場踢得好，更搞到現場曼城擁躉睇唔過眼，喺其中一次角球攻勢，費特行近角球旗，藍月球迷瘋狂向佢掟雜物，更被一個打火機掟中，好彩人無事。

連埋今場在內，費特已經連續第9場喺英超正選上陣，佢同麥湯米尼嘅合作亦證實好有火花，有掃蕩同活動力強嘅麥湯米尼喺身邊，費特可以專心做番「發動機」嘅任務，憑住唔錯嘅腳法同爆發力，經常可以施展「短途爆破」展開突襲，今場就成功4次扭波過人兼2次創造機會，其中一球通洛迪坑渠更加瀟灑到暈，唔單止大批曼迷都感嘆話費特終於「百X成才」。

費特依家愈戰愈勇，同佢撞位嘅保羅普巴據聞亦即將傷愈復出，之後要點樣用就睇蘇斯克查，費特比保羅普巴優勝嘅係踢法簡單，唔會好似保羅普巴咁要長時間上腳，更加適合曼聯嘅快速反擊，但要堂堂法國世界盃冠軍做後備亦唔合邏輯，如果皇馬仍然想要，1月送普巴去西甲似乎係最佳選擇。

[Busconcamp]

曼聯大翻身　堅尼原來有功勞



英超老牌勁旅曼聯過去一周先後擊敗熱刺同曼城，成功從谷底大翻身，主帥蘇斯克查本來帥位不穩，依家都可以鬆番口氣。球員打爭氣波，「蘇B」戰術調動得宜，都係「紅魔鬼」反彈原因之一，不過最重要一點，可能係前曼聯隊長堅尼曾經秘密探營，嚟到卡寧頓訓練中心，同班球員分享當年嘅成功之道，講吓以前曼聯皇朝期間，球員有乜要做，犧牲啲乜，同埋有幾強嘅求勝心等！

根據《每日鏡報》報道，堅尼今次係應前隊友兼現任領隊蘇斯克查邀請，回歸曼聯幫手。據知，當日堅尼喺訓練場地同球員講解時候，有位冇開名球星就一副懶懶閒嘅態度（唔通係保羅普巴？）不過，報道就冇講話一向火爆嘅堅尼有冇發脾氣，但同時強調今次呢位前愛爾蘭名將嘅分享，對曼聯球員嚟講係相當成功。

現年48歲嘅堅尼，今次係自2005年12月同傳奇領隊費格遜不和離開曼聯後，首次重返前東家。雖然堅尼之前做講波佬期間，曾經唔少次試過公開批評班曼聯球員，諸如費特洛迪古斯同安達斯彭利拿等都畀佢鬧過，不過大家都對堅尼回歸感到非常興奮。

有消息人士爆料：「大家可以想像得到，堅尼對於點樣去做一個曼聯球員有強烈睇法，而佢亦會直接去講出觀點。佢發現有一個球員對佢說話唔多感興趣，但其實現場大部份人都非常感興趣，想知堅尼當年係點樣取得成功，佢嘅飢渴感同求勝心係點解咁犀利。」

其實自從蘇斯克查上年年尾接掌曼聯開始，間中都有去堅尼屋企傾偈取經；而包括費查、艾拉同尼曼查維迪等名將，都先後返過嚟卡寧頓同曼聯球員分享，睇嚟「蘇B」呢招係幾得喎！

[Busconcamp]

【特稿】曼聯對前6位球隊　搶分率達9成



曼聯今季遇強愈強，穩守突擊踢法對住強隊發揮到淋漓盡致，連贏熱刺同曼城之後，目前排第5位嘅「紅魔鬼」，今季英超面對依家前6位球隊，一共錄得5仗4勝1和佳績，搶分率接近9成，相當厲害。

曼聯喺開咧戰主場4比0大炒車路士(第4位)，9月份再1比0小勝李斯特城(第2位)，10月迎戰利物浦(第1位)踢成1比1平手，亦係「紅軍」今季唯一失分比賽，加上近2仗接連擊敗熱刺(第6位)同曼城(第3位)，對住前5位球隊4勝1和，入10球只失3球。不過曼聯今季輸過畀韋斯咸、紐卡素同般尼茅夫等中下游球隊，遇弱愈弱問題仍然有待解決。

[Busconcamp]

魔鬼經理人幫手！曼聯有得平簽維達爾



冬季轉會市場將於下月開啟，曼聯為咗提升實力，爭入英超前4位，增兵刻不容緩，特別要簽入中場中，彌補呢個最弱位置。

根據西班牙《阿斯報》爆料，曼聯計劃收購巴塞隆拿「冠軍級」中場維達爾，轉會費只需要1500萬歐元，的確抵玩。

保羅普巴、麥湯米尼早前受傷缺陣之下，曼聯暴露中場中位置能力嚴重不足，費特洛迪古斯、安達斯彭利拿都難當大任，尼曼查馬迪年事已高，而且好大機會離隊，簽入中場成為紅魔鬼當務之急。咁啱巴塞隆拿已決定下月放走維達爾，為咗促成交易，願意只收1500萬歐元轉會費。

曼聯總裁伍德沃德非常欣賞維達爾技術全面，攻守兼備，最關鍵係呢位32歲智利國腳同國家隊隊友阿歷斯山齊士屬於同一位經理人費利斯域治旗下。當時伍德沃德簽入A山，同費利斯域治建立良好關係，所以今次又搵佢幫手，要簽埋維達爾，費利斯域治梗係樂意效勞。

雖然維達爾年紀已經唔細，但勝在大賽經驗豐富，效力意甲祖雲達斯、德甲拜仁慕尼黑、西甲巴塞隆拿都贏得聯賽冠軍，最犀利係佢由2011/12年球季至上季，已連續8季有聯賽冠軍落袋，簡直係人生勝利組，佢嘅大賽經驗，正係現時年輕化嘅曼聯最缺少元素。

值得一提，維達爾曾於祖記同普巴做過隊友，一齊捧意甲冠軍同打入歐聯決賽，佢亦同A山喺智利國家隊合作多年，將來A山返回曼聯，3人或者可以擦出火花。

[Busconcamp]

蘇斯克查撐福仔做新C朗

【Now Sports-體育】熱刺領隊摩連奴早前指孫興敏媲美巴西傳奇前鋒朗拿度，是Son-aldo，曼聯主帥蘇斯克查亦把華舒福跟另一個朗拿度相提並論——基斯坦奴朗拿度。

前鋒華舒福（Marcus Rashford）入球停不了，今季於曼聯及英格蘭代表隊合共上陣27場轟入16球，只比上季整季的入球少1球。這名22歲小將慣常於左路起動，令蘇斯克查聯想起曾於紅魔首贏金球獎的基斯坦奴朗拿度。 蘇B說：「很容易把兩人拿來比較，不論是技術、體型、態度、能力。華舒福有機會成為頂級球員，希望他能夠繼續發展下去。」

今次已不是蘇斯克查首次拿福仔跟C朗比較。當華舒福早前於英聯盃轟入30碼外的罰球後，蘇B已經指那是一記「C朗式罰球」。

今季是華舒福從一隊彈起後，僅第2季於英超取得雙位數入球，但蘇B拒絕向這位英格蘭國腳設下入球目標：「我不想談及入球數字。只要他保持正面及直接，想想如何走到門前，如何獲得機會，他將會繼續破門。」

[Busconcamp]

舒米高激讚丹占：出色收購

【Now Sports-體育】快翼丹尼爾占士今夏加盟曼聯，馬上奠定正選席位，更獲名宿舒米高擊節讚賞。

丹尼爾占士（Daniel James）上季僅效力英冠史雲斯，想不到以1500萬鎊改投曼聯後，這樣快便征服了英超；上場曼徹斯特打吡，這名22歲威爾斯國腳跟華舒福、馬斯亞、連加特在前線極有威脅。 舒米高（Peter Schmeichel）表示：「他令人難以置信，每球都力追到底，參與了每次反擊，同時在右路跟後衛雲比沙卡合作防守。他今季場場踢足，仍然表現出色，是一宗出色的收購。」

曼聯上仗以2:1擊敗同市死敵曼城，舒米高認為領隊蘇斯克查的戰術成功曝露了藍月的缺點：「戰術上來說，曼聯是完美的。曼城現時以落後利物浦14分，全因不能防守，紅魔正正利用了這一點。」

[Busconcamp]

傳「麥湯」新約人工雙倍

曼聯防守中場麥湯文尼（Scott McTominay）出道以來表現優異，將獲新約回報，周薪達6萬鎊。

據《每日郵報》指，這位年僅23歲的蘇格蘭國腳目前是一隊的低薪族，新合約預計為期直至2025年，足足是現時的周薪的雙倍，非常和味。 今年1月，「麥湯」才簽下新約，但紅魔仍願意提早續約，管理層未來幾日將與球員代表見面，希望新一年能夠成事。

此子本季為曼聯英超上陣14場，攻入3球且貢獻1次助攻，表現不遜於陣中的大牌球星。 「這是合理的，他的表現值得一份大合同，他一直腳踏實地，默不作聲地努力，絕對是年青球員的模範。」消息人士指。

[Busconcamp]

蘇斯克查：福仔同C朗太多嘢相同



曼聯近期愈戰愈勇，先後殺敗熱刺和曼城2大強敵，2場賽事福仔總共射入3球，絕對是紅魔鬼贏波功臣。今季拉舒福特已於各項賽事射入13球，當中10個是英超入波。蘇帥表示：「看拉舒福特，你好易聯想到C朗。他倆無論技術、身形、態度、屬性，一切一切都好似。」


「拉舒福特擁有一切能發展成頂級球星的潛質，好希望他可以繼續進步，未來有C朗的成就。我不會介意他現時的入球數字不算太多，只要他繼續有好演出，帶領曼聯有好表現，他最後都會入波。」(goal.com)