曼聯躉紅魔鬼地帶[VOL.94]~Closed~

[Busconcamp]

蘇帥要爆喇　向隊員發脾氣：我好尷尬



蘇斯克查自上任曼聯領隊以來，成日笑笑口，球隊踢得曳又會維護球員，加上佢一副娃娃臉，大家都以為佢好仁慈，但曼聯近排踢到不知所謂，更有報道指佢嘅成績，竟然同前任領隊摩連奴一模一樣，尷尬到不得了，蘇帥終於忍唔住，喺更衣室向球員大發脾氣。

《Opta》，曼聯不敵韋斯咸後，蘇帥上任後嘅戰績，同摩連奴離開曼聯前嘅成績，竟然驚人地一樣，同樣係27戰14勝6和7負，呢個數據反映出，曼聯一啲都冇變，根本毋須換領隊，蘇帥上任係多餘嘅。

《太陽報》報道，其實蘇斯克查表面上維護球員，但私底下都有發脾氣，上場輸畀韋斯咸，半場期間佢向球員大發脾氣，警告球員下半場要反勝，但結果都係輸咗。

[Busconcamp]

曼聯高層投降　奪冠等多3年



曼聯對上一次奪得英超錦標要數到2012至13年，呢幾年浮浮沉沉，最叻係前季得英超亞軍，但作為英超史上奪冠最多球會，高層同球迷當然唔收貨，大家都好心急捧盃，但原來會方對此已經投降；英國《每日郵報》報道，曼聯高層最近制定一項3年計劃，現時重建球隊，想捧盃要再等多3年。

報道指，是項計劃意思係，現時係曼聯重整期，高層對於未來3年打定輸數，將會畀足機會蘇斯克查做嘢，包括曼聯CEO伍德沃德，以及格拉沙家族都會全力支持蘇帥，包括下放權力畀蘇斯克查去購買合適球員，但又打算招聘技術總監管理球隊。

曼聯上述計劃，其實係參照利物浦模式，讓高普長期執教球隊達致成功，所以會方已做好未來3年陪跑嘅心理準備，重返爭標行列要等到2022年先得。

[Busconcamp]

保羅普巴新Look曝光　決心為曼聯賣命



曼聯中場保羅普巴養傷一輪後，周四(26日)凌晨英聯盃第3圈主場對英甲羅奇代爾將會復出，呢位法國國腳更會以新Look登場，佢嘅御髮型師用Ahmed Alsanawi，日前喺社交網公開保羅普巴新形象，留言：「PP(保羅普巴縮寫)返嚟啦！」

保羅普巴新髮型相當搶眼，兩邊頭髮染咗紅白兩隻顏色，並且剷咗「PP」嘅Logo，用咗紅、白兩隻曼聯顏色，唔少球迷認為佢係決心留低幫曼聯打江山，近日有傳「紅魔鬼」正準備同佢續長約，唔知保羅普巴係咪用髮型表態呢？

[Busconcamp]

知唔知醜呀？普巴咁樣威脅曼聯



今個夏天扭計轉會不成，兼夾開季以來表現麻麻嘅曼聯中場保羅普巴，根據西班牙媒體Diario Madridista報道，話佢經理人已經正式同曼聯展開談判，要求加薪，仲要係一加加到去到60萬鎊周薪，成為「紅魔鬼」球員之冠。報道仲話，普巴經理人威脅如果曼聯唔答應佢哋要求，就會離隊他投去皇馬，真係知唔知醜呀？

根據報道，普巴依家喺曼聯收緊29萬鎊周薪，喺「紅魔鬼」陣中都唔係頂薪，早前同曼聯續約嘅門將迪基亞，就將會收取37.5萬鎊周薪。對於呢個情況，普巴依家就想提升人工去到60萬鎊周薪，相較已經離隊嘅阿歷斯山齊士當日嘅50萬鎊周薪都仲高，即係年薪會去到3,500萬歐元，成為曼聯史上最貴人工球員。

至於曼聯一旦唔應承，普巴就可能會過檔皇馬，查實今夏「銀河艦隊」主帥施丹一直都想簽呢個法國同胞，依家普巴再加力爭取，話唔定出年夏天真係過得成呀！

[Busconcamp]

【賽後解碼】保羅普巴被邊緣化　末日來臨



曼聯周四(26號)喺英聯盃主場迎戰英甲下游球隊羅奇代爾，原本被視為一場例行工事，「紅魔鬼」亦排出保羅普巴、費特洛迪古斯、連格、雲比沙卡、菲爾鍾斯等「大哥」上陣，可惜「新人王」美臣格連活特68分鐘嘅入波，唔夠8分鐘就被羅奇代爾追番，結果兩隊打成1比1平手要互射12碼，曼聯5射全中之下，12碼贏5比3驚險晉級。

呢場肉酸勝利令球迷失望，而傷愈復出嘅保羅普巴更加成為焦點人物，呢位一度成為曼聯候選隊長嘅法國國腳，今場離奇被褫奪任何職務，隊長臂章居然落喺後防小將杜安薛比手上，而互射12碼嘅5輪當中，被蘇斯克查欽點為「2號劊子手」嘅保羅普巴亦冇份操刀。

蘇斯克查賽後冇回應普巴嘅事件，只係解釋杜安薛比一直有隊長潛能，今場搵佢做隊長並唔係「求其」決定。眾所周知，蘇斯克查一向係保羅普巴嘅最大支持者，但今場喺隊長選擇同12碼人選上，保羅普巴突然被「邊緣化」並唔尋常，如果連蘇斯克查都放棄佢，保羅普巴嘅曼聯末日可能好快來臨。

[Busconcamp]

英聯盃抽籤紅軍鬥槍手 曼聯戰車仔



剛於周三擊敗米爾頓凱恩斯晉級的紅軍，於第4圈主場鬥兵工廠，上演兩隊在聯賽盃第15次交鋒。而大勝甘士比7︰1晉級的車仔，則在主場對紅魔。

第4圈其他英超球隊對碰尚有曼城對修咸頓、愛華頓鬥屈福特等，第4圈賽事將於10月28日的該星期舉行。(Goal.com)

英聯盃第4圈抽籤

愛華頓 v 屈福特

阿士東維拉 v 狼隊

曼城 v 修咸頓

伯頓 v 李斯特城

卡維尼 v 高車士打

車路士 v 曼聯

牛津聯 v 新特蘭

利物浦 v 阿仙奴

[Busconcamp]

麥湯米尼世界波美揚扳平　魔仙言和



周二(1日)凌晨英超大戰曼聯主場對阿仙奴，主隊紅魔雖有麥湯米尼完半場前世界波開紀錄，但抵唔住阿仙奴攻勢，下半場被奧巴美揚破門，結果踢成1比1各得1分，曼聯暫以9分排第10，阿仙奴12分排第4。

曼聯今仗有拉舒福特傷愈復出，總算有個進攻重心，不過福仔狀態似乎未足，今仗射門不多亦欠銳，戰至45分鐘，福仔左路回傳禁區頂，保羅普巴未能接應，剛好麥湯米尼在附近，佢控定勁射世界波破網，曼聯領先1比0。

阿仙奴於58分鐘扳平，小將沙卡中路妙傳值線，奧巴美揚走位接應突破越位然後輕鬆射入，旁證最初舉旗示意越位，但球證經VAR判斷入球有效，阿仙奴追和1比1。以雙方表現而論，和波是較合理賽果，最終亦以1比1完場。

[Busconcamp]

【賽後解碼】終極墮落！還我真‧仙魔大戰



自從英超成立之後，曼聯同阿仙奴係其中兩支最重要球隊，尤其90年代尾到千禧世代初期，兩隊競爭異常激烈，「仙魔大戰」成為球迷最期待戰役，傑斯喺足總盃嘅1扭6金球、亨利世界波收死巴夫斯、朗尼終結阿仙奴49場不敗、堅尼同韋拉嘅惡漢對決、基昂對雲尼斯達萊嘅咆吼......每一場都係球技、戰術同激情嘅較量。

今時今日，曼聯對阿仙奴喺周一深夜上演，因為佢哋已經冇份踢歐聯，今場比賽嘅戰情亦反映出兩大豪門嘅終極墮落，主場嘅「紅魔鬼」進攻創造力極低，只靠丹尼爾占士個人突破，阿仙奴對住勢弱嘅曼聯亦驚輸，3個防守型中場令攻守失衡，結果頭27分鐘兩隊齊齊錄得「0」射門，成為今季最遲最現首次埋門嘅英超賽事，捱眼瞓睇波嘅球迷真係一殼眼淚。

蘇斯克查同艾美利今季還原基本步，大膽起用大量年輕新人，事實上今場表現最好嘅球員，好似丹尼爾占士、麥湯米尼、古安杜斯同布卡約沙卡正正就係新人，或者重建之路係行啱第1步，但羅馬並非一天建造，真正「仙魔大戰」，未來一段時間只能夠Youtube回味。

[Busconcamp]

7戰9分！曼聯創30年來最差紀錄



魔仙戰結束，曼聯主場僅以1比1賽和阿仙奴，雖然成功將主場對阿仙奴不敗走勢延長至13場，但紅魔鬼今場未能取勝，開季7戰僅得9分，積分未達雙位數對上一次已是30年前，領隊蘇斯克查壓力山大。

開季7戰9分已經係英超成立以來曼聯最差嘅開局，而7戰積分未達雙位數，對上一次已經係英甲年代嘅1989-90年球季，當年曼聯頭7仗僅得7分，最終該季曼聯排名第13，照現時走勢，曼聯今季極可能跌落中游。

其實細心睇，曼聯開季成績冇理由咁差，首仗大炒車路士4比0後，所遇對手只係狼隊、水晶宮、修咸頓、李斯特城、韋斯咸及今仗嘅阿仙奴，結果僅贏過車路士及李斯特城，但輸畀水晶宮同韋斯咸，賽和狼隊及阿仙奴，令人好難接受。

[Busconcamp]

隱形發電機　加利仔力撐連格唔係垃圾！



曼聯主場同阿仙奴合演一場低水平賽事，「紅魔鬼」雖然有拉舒福特同保羅普巴兩大將復出，不過進攻力仍然非常疲弱，只係靠麥湯米尼一腳神來之筆入波。今場以「10號位」上陣嘅連格，再一次化身「隱形發電機」，賽後繼續受到球迷瘋狂炮轟。

連格今季仍然未有英超入球同助攻紀錄，就算計晒成個2019年，連格亦只係喺1月份錄得1次助攻，作為曼聯嘅進攻鎖匙人，呢個數據當然唔及格。今場對住阿仙奴，佢上陣嘅74分鐘只有24次掂波同19次傳球，射門次數係0，反而有3次失去控球權，試問曼聯仲點可以組織到攻勢？

曼聯名宿加利尼維利開波前，力撐連格「唔係垃圾」，仲指出連格有個最佳位置：「我覺得連格受到嘅批評係好唔公平，作為一個曼聯青訓，而且又可以踢多個位置。蘇斯克查要佢做7號位、8號位，但佢其實更加適合做16號、17號、18號，連格可能唔係正選材料，但作為曼聯22人之一好有用。」畫公仔畫出腸嘅話，即係連格最佳位置係後備囉！

[Busconcamp]

堅尼嚴選5大世界級戰友　冇C朗反而有佢



前曼聯隊長堅尼尋晚去咗電視台講波，睇住前東家「紅魔鬼」又失分。不過佢心情都唔算太差，仲同拍檔加歷查講起佢曾經合作過嘅5大世界級隊友，當中大名鼎鼎好似傑斯同簡東拿當然有份，但包你估唔到嘅仲有係經典愛爾蘭後衞艾雲喎！

堅尼第一個點名係世界級，就係威爾斯傳奇球星傑斯：「依家睇番，你一定會揀傑斯。要界定一個世界級球員，佢要持續9、10，甚至11年有好表現，而傑斯係更長久維持喺高水平。對我嚟講，要成為最頂級球員，你一定要穩定，傑斯就係個最好例子。」

傑斯之後，堅尼令人意外仲揀多個威爾斯球員，呢個就係射手曉士。堅尼形容呢位前巴塞隆拿同拜仁慕尼黑前鋒係個卓越前鋒。第三、四個揀出分別係簡東拿同史高斯，堅尼同樣形容佢哋卓越聰明嘅球員。

至於最後一個入選堅尼5大，則係佢愛爾蘭同胞艾雲，堅尼話艾雲係唯一一個毫無爭議入選費格遜經典11人陣容球員：「試想想，如果艾雲依家仲踢緊，佢可以踢左右閘，仲識入波，可以防守，永不受傷，仲要喺更衣室都勁有用。對我嚟講，艾雲就係世界級囉！」查實喺堅尼年代，同佢拍過仲有朗尼、C朗同舒米高等，不過要揀出5大，總有犧牲嘅！

[Busconcamp]

多蒙特高層親證辛祖走硬　曼徹斯特等緊佢



德甲勁旅多蒙特聽晚歐聯將會作客布拉格斯拉維亞，今日舉行賽前記招，身為「蜜蜂兵團」體育總監嘅米高索治突然爆響口，話陣內超級新星查頓辛祖嚟緊一定會走人，仲會係返去英超添！同時出面就吹緊風，呢位19歲英格蘭新星極有機會去曼徹斯特市，差在係重返母會曼城定係加盟曼聯啫！

查頓辛祖喺2017年8月由曼城轉投多蒙特，至今喺「蜜蜂兵團」踢咗64場波就取得18球同29次助攻。今年10月佢首次代表英格蘭國家隊上陣，家陣身價估計去到1億歐元，而佢同多蒙特合約係去到2022年。根據英國傳媒報道，家陣曼市雙雄都吼實佢，事關佢今季開季9場又交出4入球6助攻，超級高效。

米高索治話：「唔使預言家，係人都知辛祖一定唔會留喺度踢多5年。不過點都好，佢肯定知道自己喺多蒙特取得極大成長進步，我好懷疑如果佢喺英格蘭球會，有冇可能咁成功？我哋好相信年輕球員嘅能力，更唔怕畀佢哋上陣，辛祖都應該知。」講到底，就係想辛祖識感恩囉，到時幫球會賺多啲錢呀！

[Busconcamp]

19歲新艾雲係幸運童子　經歷過大奇迹日


曼聯將於周五(4日)凌晨歐霸盃L組，作客荷甲球隊阿爾克馬爾，紅魔鬼傷兵滿營，其中2位左後衞勞基梳爾、艾舒利楊格都缺陣，領隊蘇斯克查打算以19歲小將班頓威廉斯擔任正選左閘。

班頓威廉斯上年4月同曼聯簽職業球員合約，直至日前英聯盃對羅奇代爾，先至首次為一隊披甲，當時下半場後備上陣，估唔到今場歐霸盃反而有機會擔正。

大家唔好睇小班頓威廉斯，其實佢一早見慣大場面，曼聯上屆歐聯16強次回合作客以3:1擊敗巴黎聖日耳門，奇迹晉級，班頓威廉斯當時都有份做後備，雖然佢冇上陣，但相信都學咗唔少嘢，今場有機會表演。

班頓威廉斯最佳位置踢左閘，被指似曼聯名宿艾雲，前愛爾蘭國腳艾雲球員時代於1990至2002年效力曼聯，捧過7次英超冠軍，亦係1999年三冠王主力，大家拭目以待睇下班頓威廉斯將來能否成為另一位紅魔鬼傳奇人物。

[Busconcamp]

普巴彈出彈入又傷？曼聯歐霸盃勢危

曼聯本季戰績麻麻，現時於英超僅排第10位，上仗鬥阿仙奴雖然有保羅普巴復出，但始終未能贏波。球隊周四深夜將作客荷甲勁旅阿爾克馬爾，呢位法國世界盃冠軍成員冇隨大隊去荷蘭，換句話講紅魔中場戰鬥力又會大大減低，肯定好難踢。

普巴早前於英聯盃鬥羅奇代爾一戰復出即受傷，鬥兵工廠已算能奇迹復出，但今戰歐霸盃，唔知係普巴又傷過，定係領隊蘇斯克查傾畀佢休息，總之今戰就唔使預佢。另外上仗因為突然生病未能鬥「廠」嘅右閘雲比沙卡，亦都仲未好番，佢同普巴一樣會留於英國休息。

前鋒安東尼馬迪爾同勞基梳爾，今仗一樣唔出得，預料蘇帥將用小將格連活特打正選，馬高斯盧祖、達洛治同費特洛迪古斯等都會出場。

[Busconcamp]

曼聯最重要一簽！撬些路迪軍醫救亡

曼聯過去2個月已經有14位球員先後受傷，包括安東尼馬迪爾、拉舒福特、保羅普巴、連格、丹尼爾占士、菲爾鍾斯、勞基梳爾、雲比沙卡等主力，搞到經常要「讓賽」，令到領隊蘇斯克查非常頭痛。

根據英國傳媒爆料，曼聯計劃聘請些路迪著名軍醫添威廉臣，改善傷兵問題。添威廉臣有「奇迹創造者」之稱，佢唔止係些路迪軍醫，亦係蘇格蘭國家隊醫療隊成員，之前去過多支英格蘭球隊工作，包括伯明翰、熱刺、列斯聯，熟悉當地情況。曼聯現時傷兵以肌肉受傷為主，唔知添威廉臣有冇計呢？

[Busconcamp]

曼聯悶和AZ 跨季10場作客不勝

曼聯昨在歐霸L組作客阿爾克馬爾（AZ）6射零中框，最終互交白卷，跨季各項賽事10場作客不勝，當中只入5球。

曼聯以丹尼爾占士任箭頭，從後策應的是格連活特（圖右）、安祖高美斯及桑馬達，惟至下半場中段攻門寥寥，蘇帥調入拉舒福特、連格和麥湯米尼圖增強攻力，但只能兩次叩關，終與12射4中的阿爾克馬爾悶和0：0，也是曼聯自今年3月英超負阿仙奴後，連續10次客場不勝，而且自今季英超首戰以4：0大勝車路士後，各項賽事連續9仗單場入球不多於1球。

蘇帥再批評主隊的人造草場「令情况艱難」，又稱為對方禁區內犯手球，未獲判12碼而沮喪，並稱讚麾下表現非常好。曼聯兩戰得4分排L組次席，與榜首柏迪遜同分。蘇帥又證實連格腿筋受傷，明晚聯賽作客紐卡素勢缺陣，而此役缺陣的曼聯中場保羅普巴因足踝受傷，沒有入選法國隊大軍。

[Busconcamp]

絕地救亡！曼聯冬季搶購俄國巨人射手

曼聯今季其中一個死穴係攻力差，上場歐霸盃作客阿爾克馬爾打和0:0，最大鑊係紅魔鬼竟然全場冇1次射門中目標。

翻查紀錄，曼聯於各項賽事，跨季近10場作客只射入5球，成為自1984年3月至9月以來，最差作客入球數據。曼聯為提升攻力，計劃明年1月轉會市場重開後收購射手，最新目標係俄超球隊森馬拉嘅新星蘇保利夫。

現年22歲嘅蘇保利夫身高1米95，制空力強，佢今季表現大勇，喺俄超11戰已經有8球進帳，把握力非常強。由於呢位「巨人」剛冒起，甚至仲未入選過俄羅斯大國腳，所以身價只係1500萬鎊，非常抵玩。

除咗蘇保利夫之外，曼聯亦睇中祖雲達斯老將文迪蘇傑、里昂前鋒穆沙迪比利、般尼茅夫前鋒哥林威爾遜，睇來曼聯冬季將會有大搞作。

不過，遠水救唔到近火，曼聯將於周日(6日)晚英超作客紐卡素，恐怕又要食白果。

[Busconcamp]

曼聯傳買卡林威爾遜　奧雲：點解賣盧卡古？

前曼聯前鋒奧雲表示，不明白曼聯領隊蘇斯克查的買人哲學。近日有傳紅魔鬼將於1月收購般尼茅夫射手卡林威爾遜，奧雲認為如果要買這個實力的前鋒，當初為何要放走更具級數的盧卡古？

曼聯今夏購入哈利馬古尼、雲比沙卡及丹尼爾占士，卻放走了盧卡古、阿歷斯山齊士、安達靴里拉和基斯史摩寧等，其中鋒線方面尤其「出事」，拉舒福特、安東尼馬迪爾似乎都非可靠的前鋒。有傳球會於1月將收購卡林威爾遜。

奧雲表示：「一個已經過了25歲，但他是個好球員，而且又是英格蘭國家隊成員，曼聯對他有興趣也有可能。但如果要買卡林威爾遜，為何要讓盧卡古離開？今夏的轉會窗，我相信蘇帥心知肚明，他是令球隊的實力弱了。盧卡古、A山、靴里拉先後離開，蘇帥是知道這些球員，是可以令球會進步。蘇帥的買人哲學，似乎是認為球會需要先變弱，之後才有機會更強。我真的不明白這個哲學。」(goal.com)

[Busconcamp]

兩閘廢既...
整條中場係度消費時間,
R10掂過波未？

[digiharuka]

作者: Busconcamp

兩閘廢既...
整條中場係度消費時間,
R10掂過波未？

整個中場都不知做什麼, F17 在場都 不知踢什麼
M8 可不可以走回去右邊?

[Busconcamp]

意料中事...被反擊失波

[Busconcamp]

作者: digiharuka

整個中場都不知做什麼, F17 在場都 不知踢什麼
M8 可不可以走回去右邊?

中場防中揾F17做串聯,點知就剩係識傳左傳右同交返後,
A15就傳波無尺寸,專交無人地帶,
Y18角球既無限低質量...已經唔洗講！

[Busconcamp]

曼聯沉淪！迪基亞失望到想喊



曼聯再一次踢出垃圾級表現，作客以0:1不敵紐卡素，目前8戰2勝3和3負積9分排12，僅僅多過尾3愛華頓2分。今戰賽後迪基亞接受訪問，不斷擰頭扁嘴抖大氣，一副想喊嘅表情，魔迷見到唔知仲嬲唔嬲得佢落呢？

曼聯去到聖占士球場，全場冇乜入肉攻勢，正宗係攻不銳守不穩，最後主隊19歲小將馬菲朗達夫一腳禁區外遠射收死迪基亞，曼聯1分不保。迪基亞賽後接受Sky Sports訪問，全程流露失望表情，仲要喪擰頭捽面抖大氣，承認呢一刻係佢加盟曼聯後最艱難時間，佢本人都唔知隊波發生咩事，問到點可以改善，淨係識講要「努力」，明顯已冇晒計。

「我哋創造唔到有威脅攻勢，但防守係OK嘅，成隊波都要正面回應問題。球隊係有唔少傷兵，但唔可以攞嚟做藉口。我哋係曼聯，需要再努力啲去操練，繼續戰鬥同贏取賽事。」被問到隊波有咩要改善，迪基亞話：「所有嘢都要改善。真係好多嘢要改進，我都唔知點答。依家係我加盟以來最艱難時候，我唔知點解，亦唔知發生咗咩事。要同球迷講對唔住，我哋會努力戰鬥。老實講唔只今場了，開季以後曼聯真係唔夠好。」

[Busconcamp]

曼聯自救要使多3億

曼聯距離降班區僅多2分，但低處未算低，如果照現有人腳打聯賽，下半季隨時要護級，呢個時候名宿沙柏畀料，曼聯依家搞成咁已經冇得選擇，一定要再掟錢買人，可能使多3億鎊補鑊，首要目標係買入哈利卡尼。

沙柏指出，曼聯嚟緊嘅收購目標唔可以咁求其，一定要一針見血即時幫到隊波，球隊最欠缺就係射手，準備3億鎊資金，最好買入類似哈利卡尼嘅球員。

「哈利卡尼一季可以射入25球，可以幫球隊解決攻力弱嘅問題，不過由於急住搶人，或者要使多啲錢，2億至2.2億鎊先可到手。」

「不過就算買到人，可能都要等多年半先有能力爭標，曼聯現時同利物浦及曼城比較，仲係差好遠。」

[Busconcamp]

【東體爭議】曼聯死穴　前鋒唔識頂頭槌



曼聯今季8場聯賽只入9球，仲少過2支新升班球隊阿士東維拉(13球)及諾域治(10球)，攻力差又點贏波呢。

翻查數據，曼聯入波之所以少，原來係「讓人一頭」，單計英超比賽，紅魔鬼近58次用頭槌攻門，都入唔到波。

盧卡古離隊後，曼聯空中轟炸力進一步下降，因為2位前鋒拉舒福特、安東尼馬迪爾都不擅長頂頭槌。

福仔為曼聯踢119場比賽入30球，但只有3球來自頭槌，比率僅10%。馬迪爾踢168場入47球，更加只有2球係頭槌頂入，即係得4.3%。睇番曼聯陣中「最強頭槌王」保羅普巴喺英超亦只係入4球頭槌。

因此，英國傳媒建議曼聯明年1月轉會市場重開後，必須簽入「空中霸王」，首選可以係祖雲達斯老將文迪蘇傑。呢位克羅地亞名將踢256場入96球，其中39球來自頭槌，比率達40.6%，文迪蘇傑可能成為曼聯最後救星。