曼聯躉紅魔鬼地帶[VOL.95]各項賽事三連勝,入球眾數,重上正軌？

[Busconcamp]

多蒙特預期山曹周一歸隊

【Now Sports】多蒙特預期身在英國的山曹於周一歸隊，轉會一事似乎沒有進展。

山曹（Jadon Sancho）最近返回英國，周六參加由Rapper Krept和Konan舉辦的派對。不少球迷甚至轉會專家都認為，這名英格蘭國腳此行同時為了完成以1.08億鎊加盟曼聯的轉會。 不過，根據德國《踢球者》報道，多蒙特預期他會在周一如期歸隊。蜜蜂兵團發言人表示：「如果沒有冒上風險，球員在訓練營前回家是很平常及沒有問題的事。從我們的角度看，他沒有違反現時的防疫條例。」

盛傳多蒙特為山曹轉會一事定下死線，就是周一8月10日訓練營展開之日。CEO華斯基早前指出，未有跟曼聯就山曹的轉會事宜接洽，如今又預期球員會參與訓練營，似乎轉會沒有進展.。

[Busconcamp]

蘇B：為小將而設的平台

【Now Sports】曼聯領隊蘇斯克查直言，歐霸是為小將而設的完美表演平台。

「我們知道本季歐霸盃是己隊爭奪一個錦標的機會，但同時予年青球員發展，對我們是完美。」歐霸盃8強會師德國，曼聯將會在科隆面對哥本哈根，蘇斯克查賽前說：「若然我們本季參戰歐聯，也許不會有那麼多機會讓班頓威廉斯與美臣格連活上陣機會。」

受到疫情影響，本屆歐霸盃由8強起於德國各地上演一場過決勝，快刀斬亂麻，各隊目標當然是躋身本月21日的決賽。 蘇B沒有明言來到這階段的輪換程度，但承認為門將一環面對幸福的煩惱，似就起用在這賽事慣常正選羅美路，抑或首席門將迪基亞把關舉棋未定：「我們有沙治奧（羅美路）、大衛（迪基亞）以及將會回歸的甸軒達臣，所以我們擁有3名頂級、頂級門將。」

[Busconcamp]

史高斯畀料：曼聯可以入決賽贏呢隊



歐霸盃賽事踏入最後直路，只剩下最後8支球隊，當中包括英超強隊曼聯，對於外界認為曼聯可以繼2016/17年球季再次捧起冠軍，名宿史高斯相當同意，他認為曼聯實力秤先，需要好好把握今次奪冠機會。

曼聯名宿史高斯表示真正的考驗在4強才開始：「相信曼聯會喺8強輕鬆擊敗哥本哈根，但4強可能要小心西維爾，話唒佢哋曾經喺歐霸拎過3連冠。」不過史高斯坦言國際米蘭才是曼聯的最大威脅：「我認為佢哋同曼聯一樣，係賽事中最好嘅球隊。」

假如曼聯和國際米蘭能夠一直順利晉級，將會在決賽相遇。史高斯本人亦對這個決賽戲碼十分期待：「將會係一場好正嘅決賽，雙方都會好有動力，尤其係國米球員，例如盧卡古，而佢之前離隊嘅原因同方式，亦會成為比賽一大焦點，但我認為曼聯球員實力比國米更好。」

曼聯早前在16強輕鬆晉級，兩回合計以7比1大炒寧斯，8強面對丹麥球隊哥本哈根的賽事，將會在周二(11日)凌晨進行。受疫情影響，歐霸盃8強以及之後的賽事，將會以一場過的形式，於德國中立場舉行。

[Busconcamp]

蘇B：馬斯亞簡單就是美

【Now Sports】曼聯主帥蘇斯克查稱讚陣中法國前鋒馬斯亞，指他在很多方面都有進步。

24歲的曼聯前鋒馬斯亞（Anthony Martial）今季在各項賽事攻入23球，曼聯領隊蘇斯克查對他的表現十分滿意，「這個球季他在很多方面都有很大進步，身體上，他已經處在個人職業生涯的最佳水平。」 蘇帥續說，「他現在經常去健身室，鍛煉自己的體能和力量，我期待看到他進步，他還能帶來更多。我們知道他能射入世界波，但我喜歡他攻入一些簡單入球，在門前把球送進去，他已經做到了好幾次。」

馬斯亞在上場歐霸盃後備入替奠定勝局，在周一於德甲鬥哥本哈根的8強，肯定是紅魔爭勝的最重要武器。

[Busconcamp]

里奧：贏歐霸建立勝利文化

【Now Sports】名宿里奧費迪南認為，贏得今季歐霸盃可以讓曼聯重新建立勝利文化。

曼聯在周一歐霸盃與哥本哈根爭入4強，雖然只是歐洲次級賽事，但里奧費迪南（Rio Ferdinand）相信這將是紅魔重返榮耀的跳板，「這可以成為球會重新建立文化的重要部份。」 「我認為紅魔在過去7、8年都失去了一點，就是一個持續勝出的時期，而不是那些零星的獎盃。你必須每季都挑戰聯賽冠軍，每季都能進入決賽。」

曼聯在近年贏過英足盃、英聯盃，以及2017年歐霸盃，但整體表現仍然平平。 里奧表示：「如果他們現在能憑這些年輕球員，以及蘇斯克查努力塑造的團隊，去得到這種勝利文化，我們將會有一個美好的未來，只是我們必須成功執行。」

[Busconcamp]

羅美路9場第8次「零封」　曼聯真係賣佢？



曼聯下季有甸恩軒達臣外借回歸後，連同迪基亞同羅美路，將會擁有三名頂級門將，甸恩軒達臣已要求曼聯承諾給予正選位置，領隊蘇斯克查日前公開承認，好可能要放走其中1名門將。阿根廷老將羅美路喺歐霸盃就用行動表明，佢唔應該係被放棄嘅1個。

羅美路今屆歐霸盃上陣9場，其中有8場不失球，演出相當穩陣，如果計埋曼聯上次踢歐霸盃捧盃(16/17球季)，羅美路當屆12次上陣同樣有8場不失球，即係話呢位阿根廷國腳對上21場歐霸盃賽事，有16場「零封」紀錄，相當驚人。

蘇斯克查賽前表示自己係最幸運領隊：「球隊有3個頂級門將，要留住佢哋3個係非常困難。歐霸盃證明咗羅美路對我哋有幾重要，不過迪基亞都一直有好表現，所以我哋會再睇多陣，先決定下一步做啲咩。」

[Busconcamp]

曼聯錯過轉會死線？山曹隨蜜蜂赴瑞士



【Now Sports】快翼山曹在周一向多蒙特報到，再出發至瑞士訓練營，代表曼聯已經錯過蜜蜂兵團定下的轉會死線。

早前有指多蒙特為山曹（Jadon Sancho）的轉會，定下周一8月10日這條死線，即季前訓練營展開之日。不過，曼聯在這天未有動作，所以山曹從英國飛返德國跟大軍會合，再齊齊出發到瑞士城鎮巴德拉加茲。 山曹跟射手賀蘭等隊友，周一於機場戴著口罩等check-in，但這名英格蘭國腳的精神似乎普通，眼神有點迷離。山曹早前返回英國，周六參加了由Rapper Krept和Konan舉辦的派對。

盛傳曼聯提出以1.08億鎊羅致山曹，分3期付清，但蜜蜂兵團CEO華斯基早前指：「多蒙特跟曼聯沒有接觸，就連透過所謂的中間人都沒有。至今沒有人就山曹出價，但己隊對他所需的轉會費用是心中有數的。」

[Busconcamp]

又係12碼！波費率曼聯入歐霸4強



周二(11號)凌晨歐霸盃8強大戰，曼聯喺中立場面對哥本哈根頑強防守，90分鐘內悶和0比0，去到加時再次使出「殺手鐧」──12碼，由「12碼之王」波基斯費南迪斯操刀射入，曼聯就憑呢個入波贏1比0殺入4強，將會同狼隊或者西維爾爭奪決賽資格。

曼聯今場派出最強陣容，中場起用波基斯費南迪斯同保羅普巴呢對黃金拍擋，加埋「三叉戟」拉舒福特、安東尼馬迪爾同格連活特攻堅，不過面對哥本哈根極有紀律嘅防守，同埋龍門「上身」表現，結果屢攻不下，格連活特曾入波又慘食炸胡，結果90分鐘互無紀錄。

加時賽踢咗5分鐘，安東尼馬迪爾終於博到12碼，由波基斯費南迪斯操刀射入，呢球係「波費」1月加盟後第11個入波，而當中有7個係嚟自12碼。統計顯示，「波費」自17/18球季開始，曾經21次操刀12碼竟然無一失手，堪稱係當今球壇最強「劊子手」。

「波費」嘅12碼出神入化，而且仲別出心裁，以往嘅「彈跳射門」已經舉世聞名，今場佢就故意唔跳直接轟入，領隊蘇斯克查透露愛將係特別訓練：「佢(波費)知道龍門等緊佢跳，所以佢專登練習跳同唔跳嘅射法。」另外，Opta數據指今場係曼聯今季第21次獲得12碼，冠軍今季歐洲5大聯賽。

[Busconcamp]

般奴又做救星 曼聯加時1：0拔「根」



【Now Sports】曼聯周一於德國舉行的歐霸盃8強，憑般奴費蘭迪斯在加時射入12碼，以1:0力克哥本哈根過關。

曼聯精銳盡出，三叉戟為馬斯亞、華舒福、美臣格連活，費特取代馬迪踢防中，跟普巴、般奴費蘭迪斯（Bruno Fernandes）合作，「盃賽專用」門將羅美路再度把關。哥本哈根以約拿斯雲特掛帥。 上半場，紅魔雖然取得大部份控球權，可是行軍速度慢，受制於哥本哈根的嚴密防線。21分鐘，般奴近門頂中楣。完半場前，格連活曾把皮球送入網，但被VAR判越位在先，兩軍半場互無紀錄。

曼聯易邊後加快比賽節奏，57分鐘，般奴在禁區邊左腳抽射中柱彈出。般奴、普巴連橫轟出遠射，可惜皆無功而還。馬斯亞在完場前單騎殺入禁區，但被對方守將攔截成功，兩軍以0:0進入加時。 馬斯亞在加時發威，先以技術扭過對手單刀埋門僅被門將用腳擋出，再在95分鐘博得12碼，般奴操刀一針見血。哥本哈根球員明顯體力不繼，紅魔雖有中堅連迪洛夫射中柱，仍以1:0取勝殺入4強。

[Busconcamp]

般奴今次唔跳 蘇B：有練過



【Now Sports】般奴費蘭迪斯於周一歐霸盃為曼聯射入奠勝12碼，領隊蘇斯克查指出般奴有備而來。

曼聯在這場8強戰力戰至加時，方由般奴費蘭迪斯（Bruno Fernandes）射入12碼奠勝，而他這次沒有用上起腳前慣性跳起的技倆，而是直接施射破網。蘇斯克查賽後特別提到此點：「他（般奴）知道門將等待他跳起，他兩樣（跳與不跳）都有練過，也練過射向兩邊，所以他順利完成。」

這是曼聯本季第3個盃賽晉身4強，蘇B續說：「這本來可能是一個最終要互射12碼決勝的晚上，對手具組織性，有策略，我早知不易攻破，所以需要耐性。我也知道己隊會得到機會，我們的鋒將總可製造機會。」 談到4強想遇上哪一隊，他處之泰然：「是狼隊或西維爾，兩支都是出色的球隊。我們不在乎。」

[Busconcamp]

曼聯死心啦！查頓辛祖已經秘密續約



曼聯收購多蒙特翼鋒查頓辛祖，以失敗告終，多蒙特體育總監索斯(Michael Zorc)正式表示，關於斟介呢位20歲英格蘭國腳嘅最後限期已過，查頓辛祖新一季肯定會留隊，並透露佢上年夏天已經續約至2023年，獲得加人工。

Michael Zorc話：「查頓辛祖下季仍然會留隊效力，呢個亦係最終答案，其實上年夏天，球會已經根據查頓辛祖嘅表現，調整咗佢嘅人工，並已經續約至2023年，早前有關佢嘅轉會消息，的確令人驚訝，但我哋反應好冷靜，就知乜事啦。」

一直以來，有關於曼聯收購查頓辛祖一事嘅消息滿天飛，由於德甲將於9月18日開鑼，多蒙特為免影響下季組軍工作，因此為查頓辛祖轉會談判設下死線，依家限期已過，唔會再同任何球會傾，查頓辛祖可以專心留隊，為多蒙特備戰新一季賽事，佢近日跟隨多蒙特隊友一齊操練，將會去奧地利踢熱身賽。

[Busconcamp]

國米想簽史摩寧　干地繼續組「曼聯幫」



上屆被外借到羅馬表現出色的史摩寧，最後因轉會費問題被曼聯收回。不過這名30歲中堅絕對不愁沒有人要，據報國際米蘭有興趣簽下史摩寧，繼續組建「曼聯幫」。

國際米蘭上季已經從曼聯引入盧卡古、艾舒利楊格以及借用阿歷斯山齊士，而這三位球員的表現亦相當出色，帶領國米排在聯賽第2位和殺入歐霸4強，當中盧卡古在今季屢破紀錄，各項賽事射入31個入球，成為國米史上單季入波第3多，以及史上第1位跨屆連續9場歐霸盃入球的球員。一眾曼聯球員加盟國米後全部「交到貨」，難怪教練干地希望再引入史摩寧，組成曼聯四人幫。

國米早前正式買入阿歷斯山齊士，令曼聯不用再負擔山齊士的高昂薪金，減輕了財政負擔，以如今和曼聯的友好關係，要簽下史摩寧並非沒可能。

[Busconcamp]

狼隊自炒12碼！西維爾入4強鬥曼聯



周三(12日)凌晨歐霸盃8強，英超異軍狼隊失去神奇力量庇護，首席射手前鋒魯爾占美尼斯射失12碼之餘，更被西維爾喺比賽末段絕殺。「歐霸專家」西維爾贏1比0，晉級4強，將會同曼聯爭入決賽。

狼隊喺開波13分鐘靠艾達馬查奧爾博到12碼，以為可以重演上場贏波好戲，但魯爾占美尼斯主射，卻被西維爾門將耶辛尼保奴救出，錯失領先黃金機會。值得一提，魯爾占美尼斯上場16強次回合射入12碼，成為狼隊晉級功臣，估唔到今場變成罪人。

西維爾曾經5次捧歐霸盃冠軍，屬於史上奪標次數最多嘅球隊，大難不死，似乎注定佢哋又可以問鼎呢項大賽。踢到88分鐘，西維爾中場班尼加喺右路傳中，由奧甘波斯頂入，一箭定江山，打入4強。狼隊今季英超只有第7位，依家歐霸盃出局，意味下季無緣歐洲賽。

另1場8強賽事，薩克達以4比1大勝巴素利，將會同意甲勁旅國際米蘭爭奪決賽權。

歐霸盃4強形勢

17/8 3:00am 西維爾Vs曼聯

18/8 3:00am 國際米蘭Vs薩克達

[Busconcamp]

曼聯顫抖吧　西維爾神數據預示必捧盃



西維爾打入歐霸盃4強之後，將會遇上英超豪門曼聯，戲碼夠晒強勁，紅魔鬼下半季大勇，加上係2017年冠軍，照計可以秤先。

不過，任何球隊喺「歐霸之王」西維爾面前，都顯得渺小，呢支西甲勁旅史上5次入歐霸盃8強，最後都成功捧盃，果然依家打入埋4強，向冠軍又行近1步，恐怕曼聯都阻唔到佢哋奪冠。

西維爾屬於歐霸盃史上捧盃次數最多嘅球隊，總共達到5次(2005/06、2006/07、2013/14、2014/15、2015/16)，其中2014至16年更加創出3連冠霸業，令歐霸盃有「西維爾盃」之稱，西維爾亦被網民封為「歐霸皇馬」。

事實上，過去10屆歐霸盃有6屆冠軍落入西甲球隊之手，英超佔3屆冠軍，包括車路士獲得2次，曼聯獲得1次，另一屆冠軍屬於葡超波圖。因此，曼聯今屆4強鬥西維爾，可以話係提早上演決賽。

[Busconcamp]

申請轉會！艾歷拜利要去土超搵食



曼聯中堅艾歷拜利近年經常受傷患困擾，今季只上陣10次，據悉呢位26歲科特迪瓦國腳已經準備今夏離隊，目的地係去土耳其超級聯賽搵食。

根據土耳其傳媒爆料，艾歷拜利嘅經理人已經聯絡土超勁旅費倫巴治，初步方案係艾歷拜利以借用身份效力費倫巴治1季。由於艾歷拜利同曼聯只剩下1年合約，基本上等於提早免費放走佢。

雖然曼聯面臨人財兩失，但會方仍然好可能同意畀佢走，因為與其高薪留住1位大後備，不如免費放走佢，仲可以慳到一大筆人工。

艾歷拜利2016年夏天以3000萬鎊轉會費，由維拉利爾加盟曼聯，成為當年摩連奴執教紅魔鬼之後第1簽。

[Busconcamp]

歐霸對陣贏賞識　曼聯簽天才翼鋒



曼聯收購查頓辛祖一事遇上大麻煩，不過據塞爾維亞媒體報道，「紅魔鬼」已經非常接近簽入17歲天才翼鋒史堤芬奴域，呢位左翼年紀輕輕已經成為國內班霸柏迪遜主力，今屆歐霸盃就曾經2次對曼聯上陣，並且成功贏得曼聯賞識，將佢收歸旗下。

塞爾維亞媒體《Outlet Republika》報道，曼聯決定用1,200萬歐元向柏迪遜簽入史堤芬奴域，不過20/21球季會先將佢借番畀柏迪遜繼續磨練，1年之後先至正式登陸曼聯。據報柏迪遜原本叫價2,000萬歐元，但由於史堤芬奴域只剩2年合約，所以被逼「割價」出售呢位明日之星。

史堤芬奴域踢左翼為主，17歲嘅佢已經42次為柏迪遜披甲，包括19/20球季上陣35場入9球，今屆歐霸分組賽柏迪遜2次對曼聯，史堤芬奴域2仗都有後備上陣。曼聯同柏迪遜曾經合作無間，2009年曾一口氣向柏迪遜簽入蘇蘭托錫同拿積，雖然拿積最終因工作證問題未能加盟。

[Busconcamp]

曼聯買人食豬油糕　PSG出手搶恩哈路

啱啱殺入歐聯4強嘅巴黎聖日耳門(PSG)，一邊爭冠一邊進行組軍，雖然佢哋早前已經正式買斷阿根廷前鋒莫路伊卡迪，又有尼馬同基利安麥巴比兩大天王壓陣，連後備祖普莫亭都做埋英雄，不過PSG仍然想簽多個前鋒，取代即將約滿離隊嘅卡雲尼。

據法國媒體《Foot Mercato》報道，PSG已經同恩哈路嘅代表進行接觸，呢位尼日利亞前鋒今年1月由上海申花外借曼聯表現突出，不過「紅魔鬼」遲遲未有出手將佢收購，令PSG有機可乘。消息指PSG原本打算提拔18歲前鋒梅恩加，呢位法國小將喺8強對阿特蘭大亦有擔任後備，不過總監李安納度認為球會需要一個更有經驗前鋒，所以就打恩哈路主意。

[Busconcamp]

簽唔到辛祖　曼聯Plan B係迪比利



英國傳媒報道，曼聯近日向巴塞隆拿法國前鋒奧士文尼迪比利非正式會談，商討轉會可能性，外間估計紅魔鬼此舉，係斟介查頓辛祖嘅後備方案，一旦未能簽下辛祖，迪比利就係Plan B。

由於迪比利有嚴重紀律問題，又經常受傷，巴塞喺近年每次轉會窗開啟，都會將迪比利放售，或作為球員交換嘅籌碼，可見佢喺魯營球場嘅前途都唔會長遠，對於曼聯接洽，巴塞樂意斟介，不過雙方球會未有為此有正式接觸，由於迪比利身價唔平，轉會方案有好多，包括先借後買，或直接轉會。

消息指出，曼聯首選仍然係查頓辛祖，不過同多蒙特拉鋸多時未有突破，近日更傳出辛祖與多蒙特已秘密續約，雖然紅魔鬼並未宣布放棄，但有兩手準備都好正常。

[Busconcamp]

「鍾仔」外借不來梅！網民：應該去國米



曼聯周日(16日)在官網宣布，將20歲的翼鋒鍾塔西外借至德甲雲達不來梅一季，成為繼安祖高美斯約滿離隊後，另一位在下季離隊的小將。
鍾塔西在交易宣布前，已經出席雲達不來梅在奧地利的季前訓練營，不來梅體育總監包文對鍾塔西的加盟十分開心：「佢速度好快，喺一個好有能力同潛質嘅年輕人，喺曼聯已經累積咗一啲經驗，下一步準備同我哋一齊喺德甲成長。」

鍾塔西在2016年夏天從飛燕諾加盟曼聯青年軍，最近4個賽季都得到一隊徵召，可惜在前場粒粒皆星的情況下苦無上陣機會，各項賽事僅亮相16次，英超更只有5次的出場機會。

這位荷蘭U21小國腳在今年3月剛續約至2022年，所以曼聯決定將他外借到德甲吸收經驗，據報雲達不來梅將會負擔鍾塔西的大部份人工。

不過，唔少網民認為，曼聯其實應該將鍾塔西外借去國際米蘭，因為盧卡古、阿歷斯山齊士、艾舒利楊格轉投國米之後，表現都大翻身。

荷蘭出生的鍾塔西出道至今備受關注，因為他的母親是三代華人，令他擁有8份1的中國血統。

[Busconcamp]

曼聯小學雞防守出醜　4強倒輸出局



周一(17日)凌晨歐霸盃4強，曼聯領先1球之下，因為防守連接犯錯，導致1比2倒輸畀西維爾，兩位大將波基斯費南迪斯同域陀連迪路夫更因為防守問題爆內訌，即場互相指罵，認真醜怪。

曼聯今場有個好開始，開波9分鐘，拉舒福特殺入禁區起腳一刻，被西維爾中堅迪亞高卡路士鏟跌，球證吹罰12碼，紅魔鬼由波基斯費南迪斯主射入網，打開紀錄。

不過，踢到26分鐘，西維爾後衞利古朗左路傳中，伏兵遠柱嘅蘇索無人看管之下射入扳平1比1，當時已為曼聯防線敲起警號。

點知曼聯仲未吸取教訓，踢到78分鐘，西維爾老將捷西斯拿華斯右路傳中，由後備上陣嘅盧克迪莊近門射入。

當時曼聯有4位球員喺禁區內，反觀西維爾只有盧克迪莊1人入禁區，但一班紅魔鬼球員都變晒「觀眾」睇波，畀呢位荷蘭前鋒輕鬆射入反超前2比1。波基斯費南迪斯同域陀連迪路夫更因為呢個失球互相指罵。

曼聯領隊蘇斯克查喺87分鐘開始連換4人，但為時已晚，被淘汰出局。西維爾打入決賽之後，將會同國際米蘭對薩克達嘅勝方爭冠。

[Busconcamp]

曼聯2位大將爆內訌！對罵內容曝光



曼聯喺歐霸盃4強領先之下，1比2不敵西維爾，痛失好局，無緣入決賽，紅魔鬼失第2球非常肉酸，4位球員喺禁區內都被對方唯一球員盧克迪莊射入。

曼聯中場波基斯費南迪斯都睇唔過眼，指責中堅域陀連迪路夫走甩對手，點知呢位瑞典鐵衞竟然老羞成怒，口出惡言爆粗辱罵「費波」，兩人幾乎開拖。

曼聯失咗呢球之後，落後1比2，波基斯費南迪斯立即上前指責域陀連迪路夫補位不力，後者亦不甘示弱以粗口回應。

英國傳媒根據域陀連迪路夫嘅嘴形，指佢當時應該係先用英文粗口「F*** You」、「F*** off」，似乎驚「費波」聽唔明，再用埋葡萄牙語「Filho da puta(仆X，你條契弟)」鬧呢位葡萄牙國腳。

好彩兩人發生口角後，各自行開，冇令事態惡化，但可能因為發生呢次內訌，令曼聯餘下時間無法扳平。

整個過程都被直播鏡頭影到晒，喺全世界觀眾面前出醜，曼聯今次真係輸波又輸人。

[Busconcamp]

蘇B回應衝突事件：曼聯必須增兵



曼聯2位主力波基斯費南迪斯同域陀連迪路夫喺歐霸盃4強，發生衝突，令全球關注，賽後紅魔鬼主帥蘇斯克查亦被問到有關問題，蘇B表示呢個失波令人好失望，但並冇怪佢哋，反而認為曼聯必須增兵，先至可以取得更好成績。

蘇斯克查話：「我諗當時佢哋好嬲，呢個失波的確令人失望，域陀連迪路夫被對手傳中波笠過，我希望所有球員都可以承擔責任。」

跟住蘇斯克查大談未來大計，認為球隊有需要再簽人：「我哋要取得更好嘅成績，就必須增兵，唔一定要簽大名氣球星，最重要係睇球員性格，同埋能否融入球隊，我哋會再研究下，有邊啲位置需要加強人腳。」

可見蘇B對於目前陣容仍然不滿，就算佢冇怪責域陀連迪路夫，恐怕中堅位置都可能會換血。

[Busconcamp]

瘋狂46次射門只入12碼　曼聯前鋒龍定蟲？



曼聯喺歐霸4強對西維爾佔盡優勢下輸波，後防嘅犯錯當然責無旁貸，但前線嘅把握力同樣都引起質疑。

據Opta數據顯示，曼聯今場有20次射門，但最後只係入1個12碼，情況同8強對哥本哈根一樣，上輪曼聯圍攻哥本哈根狂射26次，結果踢到加時先至入12碼晉級，即係話曼聯喺2場歐霸盃狂轟46腳，但只係入過2球12碼。

自從波基斯費南迪斯加盟後，曼聯嘅創造力同入球機會都大大提升，安東尼馬迪爾、拉舒福特同格連活特嘅入球數字亦都算理想，但呢2場波證明佢哋嘅把握力仍然有好大進步空間，仲未去到頂尖射手級別。

最大問題係，領隊蘇斯克查已決定繼續依賴呢三叉戟，收購一名頂尖射手機會唔大，如果要改善呢個問題，唯有靠呢條仍然年輕嘅三叉戟自我提升。

[Busconcamp]

盧卡古瘋狂入波創紀錄　曼聯前鋒學嘢



國際米蘭5球炒薩克達入歐霸盃決賽，2射1傳嘅盧卡古再次展示出強大入球能力，佢繼續刷新歐霸盃連續入波紀錄去到10場，今屆歐霸盃5場入6球，如果決賽可以再入2球，就可以追平射手榜第1位嘅波基斯費南迪斯，分享金靴獎殊榮。

盧卡古上年被曼聯掃走，轉投國際米蘭後即大爆發，前一日睇住曼聯前鋒屢失良機而被西維爾踢走，盧卡古就以「師兄」身份示範點樣入波，今場梅開二度後，佢今季各項賽事累積入33球，唔單止係個人職業生涯新高，亦係國米史上單季入球第3多球員，僅次於兩大傳奇伊度奧(37球)同朗拿度(34球)。

盧卡古同拿達路馬天尼斯亦都合作無間，呢對前鋒今季入波達到54球(馬天尼斯入21球)，成為國米史上單季最多產前鋒組合，超越阿祖安奴同馬田斯喺04/05球季嘅50球。盧卡古賽後亦豪言要捧盃而回：「國米依家狀態好好，破紀錄當然好開心，但我哋嚟嘅主要目標係將冠軍獎盃帶返屋企！」

[Busconcamp]

終於解封！曼聯對熱刺或畀球迷入場



英超新一季啱啱公布具體賽程，曼聯將會第4輪主場對住熱刺，據英媒消息呢場波好大機會解封，被球迷入場睇波。

受到新冠肺炎影響，英超自復賽後所有賽事都是閉門作賽，球迷只可以透過直播支持愛隊，但英超一直同英國政府研究，希望10月1日開始可以畀部份球迷入場睇英超，入場人數大約係球場容量的３成。

如果真係落實10月解封，新賽季英超嘅第四輪賽事安排喺10月3日踢，屆時曼聯對熱刺一戰就可成為新賽季首場有球迷觀戰嘅比賽。

其實，英國體育部已陸續開放體育比賽容許有限觀眾入場，啱啱結束嘅世界桌球錦標賽決賽，已容許有限球迷現場睇波。