好多建築物太有現代感，最弊有一兩個鏡頭，背景上方好明顯見到貨櫃碼頭嘅吊機，呢啲好容用 CG 抹走嘅啫～

船嗰度咁搞出人命，電影好似晒下文，人無可能無情白事咁死咗。

戰俘嘅問題，德蘇39年入侵波蘭之後，曾大量屠殺波蘭戰俘，尤其係軍官階級嘅。之後英法比荷嘅好啲。據維基，英國戰俘在德軍死亡率唔到 3%，不過都好睇彩數。好似捉到你嘅德軍殺得性起，你舉咗手投降都照一鎗打過去（見 Saving Private Ryan)，之後任佢噏話有人想逃走有人想搶鎗之類，真係死無對証；之後亦要睇審你個軍官又係咩人，你好彩撞到 Adolf Galland 之類嘅，咁咪無事；跟住入戰俘營，畀人迫去做勞工，41年之後，納綷德國去打蘇聯，成個德國食都唔夠食，你做戰俘嘅伙食只會更差⋯⋯

電影講嗰隻船嘅係特例，平民參與嘅其實好少，當時英國海軍因為時間關係，好多時根本搵唔到啲船主，監粗徵用平民啲船，直接由自己人揸走，而船主嗰陣都唔知。

當年噴火式 （Spitfire）戰機係少數，主力係電影無見到嘅 Hurricane，不過兩者相對於同期德軍嘅 Me-109，無論性能同機師經驗都爭一段矩離，英軍地面部隊吐糟話啲空軍「飛咗去邊」係事實，但佢哋見唔到，係英法空軍嚮啲德軍未飛到去海已經攔截住啲轟炸機打，撤退期間兩方損失都差唔多，盟軍其實相當英勇。而德國空軍，阿頭戈靈拍晒心口話會搞掂班英國佬，但實情係佢下面班指揮官對呢個任務興趣缺缺，一嚟手頭啲兵力仲要支援其他同法軍打緊嘅戰線，二嚟法國戰役令到德空軍損失相當慘重，三嚟啲機場仲嚮德國境內，主力嘅 Ju-87 俯衝轟炸機嘅續航力幾乎去到極限。話就咁話，都令法國海軍損失三艘驅逐艦，而英軍有成六艘咁多。

空戰係少見嘅富真實感，其中一樣係實情子彈飛嘅時候係睇唔到，畀你見到嘅係特製嘅 tracer 子彈，彈頭有白磷，劃過空氣會發光，主要係幫機師修正彈道，用得太密，觀眾就好睇，但實際會令目標警覺而做出廻避動作就無謂，所以一般都係每幾發之間先有一發 tracer，好似電影入面咁，機師如果唔留心周圍，好易死咗都唔知咩事。另一樣係當年啲戰機係無殘彈數顯示，你唔知用剩幾多，曾經有人建議話最後幾十發加多啲 tracer落去，不過咁做極之蠢，等於話畀敵人知你就快「乾塘」，而片入面啲皇牌好識就住用又唔多似係問題。