[影壇] 2022 年最喜愛嘅電影電視作品

[肉羊哩咖]

（冇唔記得）今年回復「正常」，好嘅唔少，爛嘅繼續避得就避，可惜有唔少好有期待，但出到嚟又極之失望，好在又有啲無乜期待之下嘅驚喜。

廢話噏完，繼續只係嚮 2022 年上映/上架嘅片，唔包日系動畫，繼續排名不分先後：

電影

Top Gun Maverick 壯志凌雲獨行俠：唔只係因為本人鍾意飛，同埋鍾意卅年前上畫嘅上一集嘅關係；呢套係呢廿年嚟少見嘅「老校」電影製作，故事除咗同袍「父子」情，正能量爆燈又無說教，完全志在娛樂性行頭；唔只係出動真機同演員親身上陣，製作認真又「有 heart」；又唔係單靠懷舊做賣點，呢套戲真係只啱入場同其他人一齊睇先夠過癮。

The Black Phone：恐怖片唔係本人杯茶／咖啡，故仔加入啲超自然嘅元素，男主角嘅遭遇令人肉緊，故仔嘅舖排去到修尾完滿收結。雖然主角同家人關係只係側寫，但令人回味；反派 Ethan Hawke 有唔少片上，好似 Moonkinght 都係做反派，呢度佢嘅迫力特別令本人留下深刻印象。

The Northman：莎翁嘅《王子復仇記》嘅原本故事，充滿剛陽味同北歐神話味道，節奏明快，男主角動作場面同攝影出色。

See How They Run：對 Sam Rockwell 做喜劇有偏好嘅緣故，加上佢同軍裝女主角好有火花，呢套偵探片其實唔及 Glass Onion，但係勝在簡單悅目。

RRR：可能係 2022 年最好睇嘅「超級英雄片」，雖則本人對印度歌舞「唔太識欣賞」，呢套完全有返八九十年代港產動作片嘅味度，尤其開頭警署嗰場極之精彩，套片除咗有極誇張動作場面，家庭友情愛情國仇家恨歌舞無間道乜都有啲，處理唔亂唔拖，三粒鐘完全唔會覺得長。

Avatar: The Way of Water 阿凡達 2: 年尾大作，預佢個故仔唔掂所以無乜失望，啲視覺效果同埋製作嘅用心，無個演員認得（薛歌莉韋花居然係做嗰個「魔法少女」！！！），對上一套又無乜印象，都好睇，證明占士金馬倫大導演仲係好掂。又係另一套唔入場睇 -- 仲要係要睇 IMAX -- 唔會完全享受到套片正嘅地方。

The Unbearable Weight of Massive Talent 喪盡癲才：完全係齋睇 Nic Cage 配 Pedro Pascal 有幾好玩，雖則個修尾麻麻，不過本人又偏偏鐘意～

Elvis：唔係貓王嘅歌迷，近年又興返「傳記」電影，呢套唔止係今年，可以話近年呢類型，咁多套係最出色嘅一套，做貓王嘅 Austin Butler 可以話担起晒成套戲，由初出度嘅晚期，唔只話入型入格，係靠佢部戲先可以咁得。佢有份演 Dune 第二部，令人期待。

Sonic 2:上一套掂嘅元素繼續，仲要玩大啲，啲冒險情節豐富同有娛樂性，占爺繼續「玩晒」，睇佢就夠過癮，其他「人」嘅戲份真係可有可無，好在少咗好多唔太礙眼。占爺唔好咁快收山，玩埋第三集先喇；另，老任你手頭上咁多 IP，都加油加油玩埋一份。

Everything Everywhere All At Once：最正嘅留返最後，楊紫瓊呢套係攞奬大熱，關繼威再度「出山」係好掂，其他配角都極正，故仔同動作唔只好睇，仲極度有創意，笑位又夠，據報套戲嘅成本唔高，死未？故仔其實講夫妻母女情，訊息簡單易明，又感人。第一次睇可能會嫌有啲拖，但睇多兩次又唔係咁覺。

緣慳一面：The Barbarian，Violent Night，明日戰紀，All Quiet on the Western Front，Smile，Thirteen Lives，White Noise 等等 -- 通通都啲唔起心肝去睇，有機會補返再講。

按：係一套 MCU 同 DC 都無。

電視

Cobra Kai S5: S4 年頭完跟手秋天就上，故仔好過第二三四季，人物關係執返好，尤其兩個老冤家比班後生仲搶，客串新角懷舊得嚟又有得發揮，唔可以唔提今季個大反派，唔止有迫力，仲要搞到班主角好唔得掂。

Wednesday：添布頓回勇之作，成套幽默又冷又黑，女主角 Jenna Ortega 唔只撐起成套劇，一邊要木口木面，又要用其他身體語言搭夠，佢 2022 年上咗幾套片，都受好評，前途令人期待。佢個同房兼「老死」極度令人喜愛；雖然走青春片路線，但唔會低能。下一季令人期待。睇新聞話 Amazon 買咗 MGM，下一季可能會去咗 Amazon⋯⋯

Sandman：睇過漫畫聲音書，除咗有部份因為版權關係要改，絕對對效果無影響。故仔唔止節奏明快唔拖，情節有啲黑色；做「死亡」同「路西法」呢兩位演員極之搶鏡。換走咗 John Constantine 有啲可惜～

The Boys：執返上一季講故嘅問題，第三季加入 Jensen Ackles 呢個 Soldier Boy 真係型得嚟，又唔會輸蝕比 Homelander，而 Homelander 呢個極惡嘅存在，今季更上一層樓，下一季佢更事無忌旦就更令人期待。反而有兩件無乜作用又尾大不掉，就爭啲。

Star Wars Andor：初初啲消息傳出，真係對呢套毫無期望，點知可能係今年 D+ 最好嘅一套劇集：用三話做一節，每一節啲主角同配角都好似升咗一個 level 咁去推展，同時個驚險度又上一層，故仔黑得嚟又夠深度，啱大人睇多啲。人物寫得極出式，當中有三位配角極搶，尤其某個「神秘人」同 ISB 某位女特工，好在 Andor 又唔會被攞埋一邊；故仔有唔少獨白同演說都寫得好。玩殺必死嘅位極少同隱蔽，好多時唔停咗部片定格睇先覺，所以有人嫌太唔似星戰～

Reacher：Amazon 今年有兩套「大男人主義」劇集，本人偏好呢套多啲，同 Tom Cruise 同名電影系列唔同，電視版換咗件牛高馬大嘅大隻佬，唔洗講絕對有說服力得多，故仔有少少拖，但係鬥智鬥力場面補夠返。

Guardian of the Galaxy Holiday Special：完全玩嘢，個人覺得比電影版更好笑。

Peacemaker：另一套 James Gunn 得意之作，可以將個死乞人憎嘅角式扭轉嚟玩，仲要玩得好嗰隻：畀返啲人性佢，又有極搶嘅寵物同個好喪嘅拍檔襯起，啲配角都唔曳，尤其某個甚大份嘅新角。同 The Boys 一樣，左右開弓之餘，又睇得過癮。

Stranger Things S4!!! 可以話係繼 S1 之後最精彩嘅一季，一嚟有個極有迫力嘅大反派，又係搞到班主角好唔得掂；另一邊有個新角好受注目，生鬼之餘，佢個遭遇又令人扼腕，舊人方面：Hooper 同 Max 兩條線最出色。結局唔止收好大部份嘅線，仲開展最終季。好心下一季畀多啲嘢 Will 發揮吓。

Umbrella Academy S3:今季係爭咗啲，尤其中間嗰度，不過好在四哥五可個同七「妹」繼續掂，個大反派亦都合理無太過亂嚟。不過同樣，開咗最終季條橋，令人期待。

緣慳一面：Yellowstone、White Lotus 同史大龍套新劇，唔出公海無得睇；1899 都大受好評，又未有時間。