曼聯躉紅魔鬼地帶[VOL.95]各項賽事三連勝,入球眾數,重上正軌？

[Busconcamp]

般奴出手助財赤艾維斯

【Now Sports】曼聯中場般奴費蘭迪斯好人好事，出手幫助陷入財赤的葡超球隊艾維斯。

艾維斯隊長費基利度（Afonso Figueiredo）透露，這支葡超球隊陷入財政危機，自從今年3月開始已經拖欠人工，不少一隊球員都因此離隊，需要使用大量青年軍球員。由於保險問題，留下來的球員都不能使用球會設施。

為了拯救艾維斯，般奴費蘭迪斯（Bruno Fernandes）、李斯特城右閘列卡度皮利拉、當迪拿門將哥迪奧拉莫斯合力伸出援手。當中，般奴更親力親為，幫助陣中任何有需要的球員。 與般奴份屬前葡萄牙U23隊友的費基利度表示：「般奴在場內是一名非常出色的球員，在場外更加偉大，還有列卡度皮利拉等，他們都不會對這裡發生的事情漠不關心，我要多謝大家的支持，以及數以千計的鼓勵訊息。」

[Busconcamp]

舒利亞：「綠木」入波隨時多過我

【Now Sports】名宿舒利亞認為假以時日，曼聯前鋒美臣格連活必可超越自己的入球紀錄，成為英超史上入球最多的球員之一。

舒利亞（Alan Shearer）大讚曼聯超新星美臣格連活（Mason Greenwood）：「他是具潛質的超級巨星，我很重視埋門腳頭，而他左右腳都同樣做得到。而且他起腳快，守門員欲救無從。我認為12、13年後，談英超射手紀錄保持者的話就是他了。他現在只有18歲，身形會變得更健碩，球員質素會變得更好。」

舒利亞是英超歷來入球最多的球員，其驚人紀錄達260個入球，朗尼以208球緊隨其後。前曼聯射手高爾則以187球排行第3，阿古路則以180球排行第4，當然在役的他大有機會趕上一眾前輩。不少人認為，當今最有機會超越舒利亞紀錄的是現年26歲的哈利簡尼，該熱刺前鋒至今已在英超攻入了142球。但美臣格連活的崛起，似乎令這個紀錄多一個人選，就連曼聯名宿約基都大讚他「比華舒福更出色」，是後衛的一大惡夢。

[Busconcamp]

因為一件事！羅美路要求今夏離開曼聯



曼聯門將迪基亞近年經常「派膠」，但仍然穩佔正選，令被譽為「最強2號門將」嘅羅美路非常無癮，特別係呢位33歲阿根廷鋼門今季一直為曼聯喺英足盃把關，但4強卻要讓位畀迪基亞，睇住佢2次犯錯，連累球隊出局，仲得到領隊蘇斯克查袒護，更加心淡，據悉佢已下定決心今夏走人。

羅美路2015年以自由身加盟曼聯，其後盛傳迪基亞可能加盟皇馬，羅美路被睇好可以坐正，點知「迪迪仔」最後留隊，令呢位阿根廷國腳只能長居後備，主要踢本土盃賽，但卻冇得踢英足盃4強，條氣梗係唔順。

迪基亞喺英足盃4強「派膠」之後，原本有傳羅美路可以喺上場英超正選對韋斯咸，但結果都係由迪基亞把關，令佢更加心死。加上曼聯會方已視外借去鍚菲聯嘅23歲門將甸恩軒達臣為迪基亞接班人，所以就算迪基亞離隊，羅美路留喺曼聯都係冇運行，離開成為最佳選擇。據悉羅美路可能重返阿根廷搵食，或者加盟美職球隊。

[Busconcamp]

曼聯中場大反擊　最討厭占士米拿同VVD！

利物浦歷史性贏得英超冠軍後，死對頭嘅曼聯球迷面目無光，「紅軍」大將占士米拿喺捧盃派對入面公然爆粗寸曼聯「去打J」，更加撥起兩隊擁躉嘅火。曼聯嘅巴西中場安達斯彭利拿就大反擊，日前接受巴西著名Youtube頻道《Desimpedidos》訪問，直指全英超最討厭球員係占士米拿同華基爾雲迪積克。

安達斯彭利拿喺訪問入面被問到，覺得全英超邊個球員最囂張 ，呢位24歲巴西中場就話：「我唔係好鍾意嗰個人，占士米拿。老實講，我都好唔鍾意華基爾雲迪積克，一個好囂張嘅人，就連佢嘅踢波風格都一樣。」事實上，利物浦今季已經唔係第1次喺《Desimpedidos》節目入面「中槍」，上個月愛華頓巴西前鋒李察利臣，就喺節目入面話「雲迪積克唔係世界3大中堅」、「我都曾經扭過佢」。

占士米拿同華基爾雲迪積克依家冠軍獎牌在手，相信都唔會太介懷安達斯彭利拿嘅反擊，而且呢位巴西中場盛傳今夏會被曼聯放棄，下季隨時唔會再喺英超碰面。

[Busconcamp]

各取所需！曼聯用A山向國米換比列錫



眾所周知，曼聯已經無意收回「高薪低能」嘅阿歷斯山齊士，最新計劃用呢位智利國腳換取國際米蘭翼鋒比列錫，國米亦想正式買斷A山，雙方好大機會完成交易大計，將2人互換。

早於摩連奴執教曼聯時期，紅魔鬼已經想收購比列錫，但當時因為轉會費傾唔掂數，而未能成事。干地成為國米主帥之後，並唔喜歡比列錫踢法，將佢外借去拜仁慕尼黑。由於拜仁亦唔打算用2000萬歐元買斷呢位31歲克羅地亞國腳，比列錫下季返到國米都難有上陣機會，干地自然好樂意接受曼聯嘅換人要求。

事實上，阿歷斯山齊士喺意甲重開之後，表現有明顯改善，7次上陣射入2球及7次助攻，證明意甲先至係佢最佳去處，如果今次交易成事，絕對係「4贏」。

[Busconcamp]

【英超煞科】曼聯車路士唔輸得



周日晚英超最後一輪，歐聯席位現時係曼聯、車路士同李斯特城3隊爭2個位，曼聯作客李斯特城將直接決定一個出線席位，而車路士主場對狼隊亦甚為矚目，其實對於李斯特城嚟講，踢歐聯同踢歐霸分別不大，但對於曼聯同車路士嚟講，喺收入上就差好遠。

英國《每日郵報》報道，曼聯同車路士如果錯失歐聯席位，經濟損失相當龐大；先講曼聯方面，佢哋晉級歐聯嘅分成數額甚多，贊助商亦有額外獎金，粗略估計，曼聯錯失歐聯席位將會損失7000萬鎊(約6.9億港元)，最大鑊係曼聯之前貸款1.4億鎊，冇咗歐聯筆收入，條數都唔知點還。

車路士方面，錯失歐聯席位亦會令佢哋損失5000萬鎊，由於車仔今夏大肆擴軍，已買入薛耶治同埋迪姆華拿，仲話遲啲會買夏維斯，已經洗大咗，呢班人腳如果唔踢歐聯，走去打歐霸盃不但係浪費，收入大減亦好難向老闆交代。

[Busconcamp]

今日焦點：英超煞科　曼聯前4關鍵戰



英超周日(26日)晚上煞科，焦點當然落喺前4名之爭，排第5位嘅李斯特城，主場對排第3嘅曼聯。

李斯特城今場贏波，就肯定取得歐聯入場券，如果打和就要望車路士輸波，形勢上要焗攻，不過佢哋今場繼續有中堅蘇恩古停賽，列卡度彭利拿及芝維爾亦因傷缺陣，後防陣容嚴重不整，一旦谷得太上，隨時輸得更快。

曼聯雖然和波已達標，但唔想有差池，相信亦唔會刻意求和。曼聯近13場聯賽未輸過，加上近7次聯賽對李斯特城贏6次，明顯格食格。

[Busconcamp]

一項黃金定律！曼聯獵狐謝幕



周日(26日)晚英超煞科，10場波同時間上演，當中李斯特城主場對曼聯嘅爭前4超激戰，唔係你死就我亡。「狐狸」防線唔穩陣，焗攻隨時輸得更慘；曼聯今場只要唔輸即穩奪歐聯入場券，對來季收入極有幫助，加上近年對賽食住對手（Now 621及611周日晚11時直播）

季中一直穩做3哥嘅李斯特城，踏入下半季大跌Watt，復賽後8仗只得2勝3和3負，不斷失分搞到跌落第5，要爭前4今仗需主動求勝，若然打和就要望「車仔」另一邊輸波，形勢唔多好。喺射手榜領先嘅占美華迪雖重拾射門鞋，但中場重心占士麥迪臣提早收咧，右閘列卡度彭利拿續抖及中堅蘇恩古坐波監，近期防線漏洞百出，前後陣容都不整，焗攻仲牙煙。

「紅魔」近7次對賽6勝

曼聯上周中雖然打和韋斯咸失分，但因另一爭前4勁敵車路士輸波，得以升上第3位。「紅魔鬼」已經連續13場聯賽不敗，單計復賽後8仗更豪取5勝3和，自波基斯費南迪斯加盟後，全面激活中前場。佢哋喺英足盃4強畀「車仔」淘汰，眼前目標放晒喺前4嘅歐聯入場券身上，疫情重創經濟下，呢條大水喉更不容有失。翻查紀錄，曼聯近7次聯賽對「狐狸」獲6勝1和，擺明格食格，煞科戰唔會再保留！

[Busconcamp]

麥迪臣同意續約李城　先摑紅魔一把



李斯特城將於周日(26日)晚同曼聯決一死戰，爭奪下屆歐聯入場券，大戰前夕，英國傳媒爆料，李斯特城中場主將占士麥迪臣已經同意續約，粉碎曼聯簽入呢位23歲英格蘭新星嘅希望。

根據英國《每日郵報》爆料，占士麥迪臣將會同李斯特城續約至2025年，獲得9萬鎊周薪，隊內僅次於擁有12萬周薪嘅占美華迪。

占士麥迪臣近年迅速冒起，上季英超入7球，今季亦已有6球進帳，並不時有助陣，多次傳出曼聯計劃收購佢，如果占士麥迪臣成「魔」，周薪肯定唔止9萬鎊。

不過，占士麥迪臣選擇「低薪」續約，可見佢對李斯特城忠心一片，用行動狠狠地拒絕曼聯，可以振奮軍心，爭取今場擊敗紅魔鬼。

[Busconcamp]

紅魔「12碼戰術」成超必！李城等受死



周日(26日)晚英超「藍紅大戰」李斯特城主場對曼聯，勝負關鍵好可能由12碼主宰！據英超賽會及OPTA統計，李斯特城係今季被判罰12碼最多嘅球隊，總共有10次，當中被射入7球；相反曼聯今季13次獲12碼屬英超之冠，當中射入9球亦係英超最多。

曼聯喺「強強對碰」每每獲得12碼，復賽後首戰對熱刺，就憑保羅普巴博到12碼，「波費」操刀追平1比1。舊年12月對熱刺同曼城，佢哋都有12碼兼贏波全取3分。咁蹺首循環主場鬥李斯特城，曼聯又係憑拉舒福特嘅12碼險勝對手，難怪有網民寸佢哋靠一招「12碼戰術」就夠入前4。

劊子手不離福仔波費

至於曼聯今場若然真係獲得12碼，會由邊個做劊子手呢？之前多數係「福仔」，佢今季射入6個12碼，不過近期似乎改由「波費」做首選，佢加盟後所入7球，其中3球係12碼，今場搵佢主射嘅機會較高。

[Busconcamp]

B費改變前四之爭　曼聯李城神奇交鋒



史上最長、為期近一年的英超終近落幕，煞科戰焦點在前四之爭，適逢是曼聯與李斯特城兩支競爭對手直接交鋒，自然更矚目。

從2016年童話式封王開始，李城被冠上神奇之師，正當今季以為又能顛覆Big 6奪得歐聯資格時，曼聯突在復賽後脫胎換骨，波基斯費南迪斯（B費）如神仙下凡領軍急起直追，周日大戰前更已反壓李城一分，踢對方出前四，兩支神奇球隊誰能笑到最後？今晚揭曉。

[Busconcamp]

[Busconcamp]

68分鐘
M9被伊雲斯從後掃跌
F18操刀12碼
1:0

[Busconcamp]

90+
伊雲斯2黃1紅

95分鐘
K舒自殺式扭波解圍
被L14近距離截球
推橫射入空門
2:0完場

取得英超季席及來屆歐聯席位

[Busconcamp]

【英超煞科】曼聯車路士取得歐聯資格



周日晚英超煞科，歐洲賽席位之爭有結果，車路士以2比0擊敗狼隊，曼聯同以2比0擊敗李斯特城，雙雙取得來季歐聯資格，保住龐大財政收入；熱刺作客1比1賽和水晶宮，憑得失球壓過同分嘅狼隊，與李斯特城出戰來季歐霸盃。

李斯特城主場對曼聯一仗戰況緊湊，上半場曼聯前場及後防均有犯錯，被李斯特城多次突擊埋門，不過「狐狸」未能把握機會，戰至下半場初段，占美華迪一次頭槌頂中楣角，曼聯逃過一劫。

直至下半場69分鐘，安東尼馬迪爾一次單刀突破殺入禁區，被莊尼伊雲斯及韋斯摩根左右夾擊倒地博得12碼，波基斯費南迪斯操刀破網成1比0，完場前莊尼伊雲斯領紅牌出場，再由連格埋齋，曼聯最終贏2比0，來季重返歐聯帶來高達7000萬鎊收入有着落。

[Busconcamp]

必殺技升呢！曼聯無愧「12碼之王」



曼聯作客李斯特城嘅英超煞科生死戰，賽前已經預視12碼會係勝負關鍵，事關曼聯今季係全英超拎最多12碼球隊，而李斯特城就係被罰最多12碼球隊。結果劇情亦係同預告一樣，曼聯喺71分鐘由安東尼馬迪爾博到12碼，交畀波基斯費南迪斯操刀打破僵局。

據Opta數據顯示，呢個12碼係曼聯今季聯賽第14個12碼，打破英超史上單季最多12碼紀錄，舊紀錄係李斯特城同水晶宮嘅13次(見表)，「紅魔鬼」果然無愧「12碼之王」之名。如果計埋所有盃賽，曼聯今季12碼數字更達到20球大關。

曼聯今季英超14個12碼當中，有10成功轉化為入波，宴客嘅集中喺開季保羅普巴、拉舒福特等，自從波基斯費南迪斯加盟後，呢位葡萄牙國腳4次操刀全部得手，令曼聯12碼必殺技進一步加強。

英超單季獲得12碼紀錄

曼聯 19/20 14次

李斯特城 15/16 13次

水晶宮 04/05 13次

車路士 09/10 12次

利物浦 13/14 12次

阿仙奴 06/07 12次

布力般流浪 94/95 12次

曼聯 18/19 12次

[Busconcamp]

曼聯力保「三間」100%贊助費

【Now Sports】曼聯在周日英超鎖定歐聯席位，力保adidas球衣贊助合約中的2500萬鎊。

根據曼聯跟adidas的球衣贊助合約，如紅魔於來季未能出戰歐聯，一季7500萬鎊的贊助費將會減至5000萬鎊。曼聯在周日英超擊敗李斯特城以聯賽季軍身份重返歐聯，代表可以保住這2500萬鎊。 紅魔這份每季7500萬鎊的球衣贊助合約，原本是英超最高，但於今年1月已經被利物浦取代。

紅軍跟Nike簽下了一季8000萬鎊的球衣贊助合約，雙方在下季開始合作。 重獲2500萬鎊，名宿加利尼維利認為曼聯在季後應該大事擴軍：「紅魔需要更多球員，上次晉身前4，摩連奴用了1.7億鎊，但花得不聰明，他們要再投資，但必須用得其所。」

[Busconcamp]

曼聯踢歐聯　普巴蘇B財源滾滾來



曼聯以英超第3名衝線，下季重返歐聯舞台，財政上亦係一次重大勝利。「紅魔鬼」踢歐聯基本獎金已經有5,000萬鎊，據英國《每日郵報》透露，原來曼聯同贊助商adidas嘅每年7,500萬鎊合約中，列明如果曼聯踢唔到歐聯，當年嘅贊助費會減至5,000萬鎊，意味曼聯由歐霸升呢踢歐聯，贊助收入即多2,500萬鎊。

曼聯將帥同樣都有豐厚酬勞，據報保羅普巴等多位球員，合約都有歐聯薪酬同歐霸薪酬，踢歐霸盃嘅球季人工少約25%，下季「紅魔鬼」重返歐聯，保羅普巴等變相加薪25%。至於領隊蘇斯克查當然會有大獎，佢同曼聯合約中列明，如果率領球隊殺入歐聯，可以獨袋100萬英鎊獎金。

[Busconcamp]

國米買斷山齊士　希望曼聯收順啲



科學鑑證，一口咬定，阿歷斯山齊士都係適合意甲，國際米蘭近日有意買斷山齊士，不過價錢方面希望曼聯再收順啲，將原價2000萬歐元減到1000萬至1500萬歐元左右，促成呢單交易。

「鋼琴佬」由阿仙奴轉投曼聯後，完全踢唔出水準，網民談論最多就係曼聯又做水魚，每星期支付山齊士50萬鎊周薪，搞到迪基亞同保羅普巴心理失衡，要求曼聯加人工。

自從山齊士外借到國米，曼聯家宅安寧，發展暢順，仲重返歐聯添，至於國米方面，山齊士近期喺意甲大爆發，干地對於呢位智利前鋒表現好滿意，因此希望買斷長用。

意大利傳媒報道，只要曼聯願意減價，國米就會買斷山齊士，而國米亦諗好山齊士嘅高昂薪酬問題，就係向政府提出減稅方案，將山齊士嘅人工支出減輕30%。

[Busconcamp]

英超埋單　6個「估你唔到」嘅數據



英超曲終人散，各路雄師有人歡喜有人愁，不過足球世界唔係得排名咁簡單，今季英超就有7個神奇數據，包你睇完會話：「真係估你唔到喎！」

1●曼城雖然失落冠軍，不過進攻火力依然係超晒班，今季聯賽入咗102球咁多，估你唔到嘅係，靈魂人物史達寧全季竟然只得1次助攻，助攻次數同利物浦門將艾利臣比加一樣！當然，史達寧今季有20個聯賽入波，冇人會質疑佢嘅能力，但如果可以提升埋助攻數字，肯定會好恐怖。

2●曼聯強勢復甦，今季表現比上季大躍進？數字上唔係囉！曼聯今季有66分，分數同上季排第6係完全一樣，雖然有超新星格連活特爆出，又有波基斯費南迪斯加盟，但查賽今季聯賽入66球，只係比上季入多1球咁大把咋。

3●上年10月，李斯特城作客9比0狂數修咸頓，呢場波更成為兩隊命運嘅轉捩點。統計顯示自呢場大屠殺後，李斯特城到季尾只係拎多42分，反而修咸頓拎到更多嘅44分，李斯特城最後連歐聯資格都失去埋。

4●狼隊今季以第7名成績完結，不過整體表現仍然獲得好評，佢哋今季英超有51個入球，分別由12個球員取得，不過竟然冇1個入波係由英格蘭球員攻入，墨西哥前鋒魯爾占美尼斯係唯一一個入波達到雙位數字球員。

5●意大利名帥安察洛堤執教生涯贏過無數錦標，之前執教AC米蘭、車路士、拿玻里、巴黎聖日耳門、皇家馬德里同拜仁慕尼黑等球會，25年主帥生涯從未試過以聯賽下半部成績完結，直到今季教愛華頓以第12名衝線。

6●2014/15球季，般尼茅夫以英冠冠軍身份升上英超，當年一齊升班嘅仲有亞軍屈福特同季軍諾域治，點知時隔5年，呢3隊波竟然一齊喺英超降班，而且連排名都同當年升班一模一樣。

[Busconcamp]

般奴撐連加特：佢好勤力

【Now Sports】曼聯中場連加特向來是球迷的嘲笑對象，隊友般奴費蘭迪斯就為他抱不平。

連加特（Jesse Lingard）於周日最後一輪英超，後備落場在最後時刻建功，幫助曼聯奠定2:0勝局，保住季軍以取得歐聯入場券。這個入球更是連加特今季首個聯賽入球。 雖然臨收咧開齋，但連加特賽後仍然被球迷嘲諷。般奴費蘭迪斯（Bruno Fernandes）表示：「雖然那入球來自門將犯錯，但也要連加特勤力走到那位置，他值得這個入球。」 般奴又指，中場馬達、安迪亞斯皮利拉、射手恩哈路這些不常擔正的球員，也有能力入球及防守：「再者，他們推動了正選披甲的球員踢出更高水平。」

般奴在1月加盟後，14場英超錄8入球7助攻，是曼聯重返歐聯的功臣。他坦言心目中沒有甚麼最佳、重要的入球：「最重要的入球永遠是下一個，所有入球在不同層面來說都是最重要的。」

[Busconcamp]

多蒙特13日「期間限定」賣山曹



【Now Sports】蜜蜂軍團多蒙特為山曹的前途，訂下最後13日死線，若曼聯的報價未達心水價位，將終止轉會談判。

炙手可熱的英格蘭國腳山曹（Jadon Sancho）剩下不足兩年的合約，有意重返英超加盟曼聯。對於20歲超新星山曹的去留，多蒙特企硬要求1.1億鎊轉會費，並拒絕了曼聯的8900萬鎊報價。德國《圖片報》引述消息指，山曹將於周四歸隊復操，準備9月中開咧的德甲，蜜蜂軍團設定了13日限期，即8月10日，如紅魔不再提高叫價，便會拉開前往瑞士集訓，不再考慮放人。 雖然夏天英超轉會窗直至10月5日關閉，但紅魔要買山曹的話，所餘時間無多。

這位英格蘭翼鋒在2017年由曼城改投多蒙特，身價僅僅800萬鎊，如今升值超過10倍。 值得一提是，紅魔領隊蘇斯克查有權決定哪些球員外借，19歲中場加拿有可能離隊，現時受到多支英冠隊如錫周三、史雲斯和卡迪夫城等青睞。

[Busconcamp]

傑斯：紅魔要買3正選兵

【Now Sports】曼聯名宿傑斯認為，紅魔需要收購3名具必然正選能力的新球員，才有力爭標。

曼聯幾經辛苦終於重返歐聯，傑斯（Ryan Giggs）坦言非常重要：「這可以吸引球員，有些球員只會選擇可以出戰歐聯的球隊。當球迷能夠回來時，於奧脫福的歐聯之夜是非常特別的。」 經過今季引援後，紅魔愈戰愈勇，特別是中場般奴費蘭迪斯在1月來投後，立即激活中前場。

傑斯認為：「蘇斯克查的球隊開始成形，這令人期待，但他仍然缺乏人腳。」 「在停擺之後，蘇B經常都排出相同陣容，因為球隊正值強勢，很難作出改變。他們需要3名可以立即打入正選的新兵，這樣才能夠在來季挑戰英超及歐聯錦標。」傑斯補充。

[Busconcamp]

奧雲：基亞利殊心繫轉會曼聯



24歲的基亞利殊幫助維拉成功護級，他轉會曼聯之說也被傳了一段長時間。奧雲認為基亞利殊亦屬意過曼聯：「我覺得他也屬意曼聯，我聽說他志在加盟『紅魔鬼』，如果他最終去別處，我會感到驚訝。」

奧雲也提到，維拉成功護級意味著他們有能力為這位隊長叫更高的價錢：「基亞利殊現在對於對他感興趣的球會來說更昂貴了。維拉仍是英超一員，如果他們降班了，交易可能更容易。你踢英冠的話難以留住這樣的球員，基亞利殊是頂級球員，他可以融入許多球隊。」奧雲說很多人喜歡將基亞利殊跟占士麥迪臣比較，但他覺得前者比後者在多方面都更優秀。(Goal.com)

[Busconcamp]

連加特：金錢買不到快樂

【Now Sports】曼聯中場連加特不諱言，因家事而影響了自己在球場上的表現，坦言即使擁有金錢，也不代表能夠買得快樂。

連加特（Jesse Lingard）接受訪問時，道出自己今季未能在曼聯再進一步的原因：「真的不容易，尤其那是家庭問題，我在家中有很多事情要處理，同時亦要每周在7.5萬人前比賽。」 「我有點感到麻木，像自己根本並非身在那裡。對我來說，充滿心事之下，比賽只是例行公事，明顯地，我們都是人，人們會認為『你多麼幸福，擁有那麼多錢，擁有漂亮的房子』，然而金錢是買不到快樂的。」連加特補充。

連加特坦言有對領隊蘇斯克查傾吐心事：「家人對你非常重要，你總不想看到他們受到傷害，因此對我來說，那是一段艱難時期，這刻我承受了很多事情，我認為跟領隊說出事情是對的，感覺很好，他完全明白我，他和我一起捱過了這段日子。」