曼聯躉紅魔鬼地帶[VOL.95]各項賽事三連勝,入球眾數,重上正軌？

[Busconcamp]

曼聯新兵自白　加盟一刻阿媽喊咗出嚟

曼聯冬窗期間借入嘅尼日利亞射手恩哈路接受官方訪問，暢談入魔感受。恩哈路果然跑慣江湖，好識氹球迷，佢話加盟曼聯不惜減人工，仲話一家大細都係曼聯擁躉，加盟一刻阿媽仲喊咗出嚟添。

30歲嘅恩哈路喺2014至17年踢過屈福特，之後去咗中超效力長春亞泰同上海申花，佢話重返英超，仲要加盟曼聯就好似發夢一樣：「由於中英兩地時差，傾條件嗰陣我唔敢瞓覺，經理人問我去曼聯要減人工制唔制，我毫不猶豫答應，有得踢曼聯，減人工冇乜所謂。」

恩哈路稱，喺尼日利亞好多曼聯球迷，佢自己就係睇曼聯長大，一家大細都係曼聯擁躉，佢話：「當我打電話畀阿媽，話佢知我終於加盟曼聯，佢當堂喊咗出嚟，仲恭喜我『阿仔你夢想成真喇，阿媽戥你高興』。」

[Busconcamp]

大口氣！恩哈路稱有1優點勁過福仔馬迪爾

曼聯喺冬季轉會市場最後一刻向上海申花借用前鋒恩哈路，被嘲淪落到要靠中超兵救亡，但呢位30歲尼日利亞國腳聲稱自己有一個重要優勢，正係紅魔鬼鋒線現時所欠缺，自己可以成為最後一塊拼圖。

恩哈路話：「我速度非常快，有技術，身體亦好強壯，所以可以喺球場上任由我發揮，曼聯需要1位企喺最前嘅中鋒，安東尼馬迪爾鍾意踢邊路，拉舒福特都係，曼聯要有人喺中路控球、二傳、跑動，如果一切順利嘅話，我可以為球隊作出重大貢獻。」

恩哈路身高1米88，而且好大隻，的確好撞得，根據佢嘅講法，佢擁有嘅個人優點，屬於曼聯鋒線之一獨有，可能暗示希望蘇斯克查畀佢做正選。

[DevilElvis]

今季三殺車仔

[digiharuka]

睇完精華, M5 動作不這樣會傷, 紅牌? 不如說B23為何仲追到邊線 (笑下

2個入球都是頭, 咁似季初失波的情況?
對面Z15 那球就過harsh, 但銀河唯一那球就是VAR下的犧牲品了

[Busconcamp]

士砵亭高層恥笑曼聯係水魚



曼聯喺一月轉會窗關閉前，及時用高達6,780萬鎊從士砵亭買入葡萄牙中場波基斯費南迪斯，睇過「波費」首場演出，唔少人都認為佢哋入啱貨，難得今次冇做水魚。不過，士砵亭副會長辛夏近日受訪就踢爆，佢哋先係呢次轉會角力上嘅真正贏家，事關曼聯喺佢哋「膽博膽」互拋之下，最尾係被逼屈服畀高一截錢，慘成大水魚！

查實「紅魔鬼」由舊年暑假已經嘗試簽入「波費」，只係一直想壓價，直到一月班波唔掂，佢哋唔增兵唔得，到最後階段喺士砵亭拖字訣之下，唯有屈服畀高價，依家曼聯先要畀4,600萬鎊基本轉會費，然後附加條款更可令總轉會費去到6,780萬鎊。

辛夏表示：「我知道曼聯一直以為我哋最終會屈服放人，佢哋以為大約5,000萬歐元就可以成交，結果佢哋要畀超過6,500萬鎊。佢哋最後輸晒，要畀我哋嘅要求價碼，我哋足足較4個月傾好嘅數收多2,000萬鎊。」

[Busconcamp]

曼聯將普巴大劈價！皇馬祖記仲嫌貴



英國傳媒指，曼聯願意今夏出售中場保羅普巴，而且肯大劈價，只要有球會出8300萬鎊轉會費，就有交易，但據悉兩大潛在買家皇馬同祖雲達斯仍然嫌呢個價錢太貴。

曼聯之前曾經將保羅普巴標價1.5億鎊，但冇球會承接，由於呢位法國國腳去意已決，紅魔鬼知道無法留人，惟有大減價。

根據英國《衞報》爆料，曼聯依家只要求不低於8300萬鎊就得，比4年前向祖雲達斯收購普巴嘅價錢，仲少600萬鎊，名副其實係蝕讓。

不過，皇馬同祖雲達斯認為仲有得壓價，因為普巴近年表現欠佳，今季更長期受傷，而且係佢主動要求離隊，曼聯根本冇議價能力。最關鍵係去到夏天，普巴就只剩下1年合約，紅魔鬼為免明年人財兩失，勢必再減價，務求盡快甩手。

普巴經理人拉奧拿日前表示，普巴唔介意重返祖雲達斯，以祖記「算死草」作風，肯定壓價壓到盡，曼聯注定要蝕大本。

[Busconcamp]

蘇B露天機　普巴已踢曼聯最後1仗



曼聯周一(17號)深夜喺英超大戰車路士，法國中場保羅普巴繼續缺陣，呢位麻煩友自從做完足踝手術後，一直冇聲氣幾時復出，就連歇冬集訓都冇份參與。曼聯領隊蘇斯克查喺賽前記者講到保羅普巴，竟然唔小心洩露天機，暗示保羅普巴「有可能」已經唔會再為曼聯披甲！

被問到保羅普巴會唔會再上陣，蘇斯克查回應：「我都想，當佢回復健康，就有力為曼聯上陣，我肯定保羅普巴都好想再為曼聯披甲。」英國《每日郵報》指出，蘇斯克查嘅回應態度好唔肯定，「我都想」普巴再為曼聯上陣，即係唔Sure佢仲有冇機會再上陣。

另外，蘇斯克查被追問點解唔帶保羅普巴去集訓，蘇B亦只係耍太極話「唔需要解釋每一個決定」，似乎好隱晦喎！

[Busconcamp]

蘇斯克查親證　恩哈路有機會長留曼聯



曼聯喺1月借用上海申花前鋒恩哈路，唔少球迷都覺得意外，尤其係佢哋錯過艾寧夏蘭特等頂級前鋒，更加令人覺得曼聯另有所圖，借用恩哈路半季只係「權宜之計」。不過，恩哈路周一(17號)作客車路士「地標戰」前，領隊蘇斯克查就大派定心丸，講明恩哈路有機會長留曼聯。

蘇斯克查表示：「雖然只係借用，但係當你入得曼聯呢個門口，只要有好表現，就有機會(長留曼聯)。無論係借將或者正式簽約球員，如果表現出對球會有貢獻，球會當然會用盡方法將佢長期留低。恩哈路想盡力爭取好表現，如果我哋都想佢繼續留低，一定會確保佢都想留隊。」

[Busconcamp]

國米又簽曼聯球員！人工都傾掂咗



國際米蘭教練干地鍾情英超兵，尤其特別喜歡曼聯球員，根據意大利傳媒爆料，國米已經同曼聯20歲新星鍾塔西達成個人待遇條款，佢將於今夏以自由身加盟國際米蘭。

國米今季已經簽入盧卡古、阿歷斯山齊士、艾舒利楊格3位魔兵，今次又出手斟鍾塔西，據悉雙方將於今夏簽約5年，呢位荷蘭小國腳可以獲得3.5萬鎊周薪，如果佢可以拎晒所有獎金嘅話，平均周薪更可以達到5萬鎊，比曼聯開出嘅續約人工多一倍。

其實令鍾塔西最想離隊嘅原因，並非人工，而係由於現時缺乏上陣機會，佢今季於各項賽事，僅為曼聯上陣7次，而且主要都係踢盃賽，喺英超只有2次後備上陣，加埋只踢24分鐘，留隊實在睇唔到前景。

由於鍾塔西有華裔血統，去到由中資擁有嘅國際米蘭，點都有「人情分」加，而且教練干地又鍾情英超兵，鍾塔西去國米應該好過留喺曼聯。

[Busconcamp]

曼聯3殺車路士　歐聯資格大混戰



周二(18日)凌晨作客2比0擊敗車路士，繼首循環聯賽及英聯盃16強後，今季第3度「拆車」，蘇斯克查3次食住林柏特，成為車仔剋星。曼聯贏波後亦令來季歐聯資格出現大混戰，由第4位車路士至第9位愛華頓，分數都在5分內，在曼城被禁賽令第5名都有得踢歐聯情況下，歐聯席位之爭將成各隊主要戰場。

比賽初段車路士表現較佳，20分鐘哈利馬古尼與巴舒亞伊爭波在邊線倒地，期間馬古尼施展「撩陰腿」撐中巴舒亞伊要害，翻看VAR後馬古尼竟然無事，曼聯亦於完半場前一次攻勢，雲比沙卡右路傳中，安東尼馬迪爾頭槌破網，上半場領先1比0。

下半場55分鐘，後備入替嘅葛特蘇馬為車路士勁射破網，翻睇VAR後證實艾斯派古達推人在先判為詐胡，車仔錯失扳平機會後再失多球，66分鐘哈利馬古尼接應波基斯費南迪斯角球傳中，頭槌勁頂破網成2比0，呢位全球最貴後衞上半場逃過紅牌，跟住仲要頂入今季首個聯賽入球，肯定係今場主角。

至於林柏特注定輸畀蘇斯克查，77分鐘後備上陣嘅基奧特飛身頭槌破網，翻看VAR發現佢入波前鞋尖越位，車路士食第2鋪詐胡，加上其後美臣蒙特罰球中柱，結果車路士主場淨吞曼聯2蛋，全失3分，仍以41分排第4，曼聯則以38分排第7。

[Busconcamp]

【東體爭議】VAR兩廢車仔入波　判得啱？



車仔主場吞曼聯2蛋，過程都有唔少爭議性，哈利馬古尼出「撩陰腿」，球證睇完VAR都唔出紅牌自然係天方夜譚，而車路士今場仲有2個入波都被VAR判詐胡，「藍戰士」球迷梗係嬲到震，到底呢兩個判決又啱唔啱呢？

第1個係下半場早段，葛特蘇馬喺角球攻勢入面射入追平，不過VAR認為艾斯派古達喺隊入球前先推跌班頓威廉斯，所以判入球無效。艾斯派古達賽後解釋佢先被費特推，冇得揀情況下先推跌班頓威廉斯。慢鏡顯示，費特曾用右手輕推班頓威廉斯背脊，但佢就「雙龍出海」推跌想頂波嘅班頓威廉斯。雖然有爭拗空間，但判詐胡亦唔算錯判。

第2球係77分鐘基奧特門前頂入追番1比2，但VAR重睇後發現基奧特右腳腳掌的而且確「突」咗出嚟，喺VAR連突條體毛都要吹嘅世代，呢次越位無疑係相當明顯，冇乜爭議。

[Busconcamp]

神解釋！馬古尼撩陰腿其實係一番好意！



曼聯中堅哈利馬古尼喺贏車路士一仗成為關鍵人物，佢比賽早段場邊「撩陰腿」踢巴舒亞伊，球證離奇當冇事發生，如果呢位英格蘭國腳下半場仲入埋波，賽後自然受到各界炮轟。堅尼、加歷查、法比加斯等前英超球星，全部認同哈利馬古尼「應該食紅牌」，堅尼直指佢走甩紅牌係非常好運。

不過，哈利馬古尼賽後解釋呢次踢人事件，就真係聽到球迷O晒嘴。哈利馬古尼表示：「我係踩到佢，但我覺我佢當時就嚟失平衡壓喺我身上，我自然反應就係伸直隻腳『撐』住佢。喺電視睇落好似好肉酸，但我並唔係踢佢，球證判決係正確。」

[Busconcamp]

【阿King】超值波費！曼聯近9年最佳收購



自從費格遜退休之後，曼聯喺轉會市場成為水魚，買入唔少貴價水貨，但上月用6800萬鎊收購士砵亭中場波基斯費南迪斯後，紅魔鬼終於識戴眼買人。呢位葡萄牙國腳喺周二(18日)凌晨英超對車路士，表現堪稱完美，有1次助攻，仲有1次主射罰球中柱，威脅力極強，夠膽講句，「波費」可以話係自2011年簽入迪基亞之後，曼聯近9年最佳收購。

波基斯費南迪斯上場英超對狼隊，被安排踢防中，搞到佢難以適應，但該仗佢都有5次射門。領隊蘇斯克查今場終於醒覺，安排「波費」踢番佢最擅長嘅進攻中場位置，令佢可以專心發揮進攻才華。

波基斯費南迪斯今場無論個人突破、傳球、射門都發揮得淋漓盡致，包括個人盤扭令車仔守將魯迪格食牌，仲有1次妙傳畀安東尼馬迪爾，可惜後者失機。下半場「波費」開出精準角球畀哈利馬古尼頂入，呢位中堅以往效力李斯特城頂入唔少死球，但加盟曼聯後，冇死球專家幫手，令呢招高空轟炸絕技荒廢多時，依家有「波費」幫手，曼聯又多一瓣死球戰術。

除咗開角球，波基斯費南迪斯今場亦有1次射罰球中柱，成魔後未開齋的確可惜，但以佢全面進攻技術，相信之後要入波並唔難，連葡萄牙名宿費高都話曼聯今次買啱人。事實上，相比普巴8900萬鎊、哈利馬古尼8000萬鎊、盧卡古7500萬鎊轉會費，波基斯費南迪斯只係6800萬鎊，絕對抵到爛。

[Busconcamp]

神劇本！馬古尼賽前已講明頂入角球



中堅哈利馬古尼喺英超對車路士，又入波又踢人搶晒鏡，咁都唔止，原來佢仲係1位「先知」，賽前同細佬私訊對話，講明自己會頂入角球，果然真係成為事實。

哈利馬古尼嘅細佬羅倫斯上載一張兩人用Facebook通訊嘅截圖，羅倫斯話：「每次死球都係你嘅入波機會。」哈利馬古尼回應：「無錯，我今晚(17日)就會入波，睇住呀，就係有角球嘅時候。」

結果事情真係跟足哈利馬古尼嘅劇本發展，波基斯費南迪斯開出角球，馬古尼一頂入網，講得出做得到。

[Busconcamp]

曼聯非洲救星登場　唔係恩哈路喎



曼聯2比0擊敗車路士贏出歐聯爭逐關鍵一戰，呢場波成隊運作都相當討好，而且更有一位「非洲救星」驚喜登場！講緊嘅唔係補時階段首演嘅尼日利亞前鋒恩哈路，而係久休復出嘅科特迪瓦中堅艾歷拜利。

艾歷拜利上一次為曼聯上陣，已經係上年4月份嘅事，季前熱身重傷後今季一直缺陣，踢過幾場預備組賽事，今場域陀連迪路夫因病免役，艾歷拜利正選登場表現突出，其中上半場喺小禁區外，偷走巴舒亞伊腳下必入球，隨即一假身並360度轉身引球帶出重圍，連評述嘅加利尼維利都話：「艾歷拜利突然變做碧根鮑華！」睇到球迷拍爛手掌。

除咗哈利馬古尼係曼聯後防必然主力外，域陀連迪路夫嘅評價都係好壞參半，制空力不足係呢位瑞典國腳嘅弱點，如果艾歷拜利可以踢番出水準，絕對會令曼聯防守力提升，至少......球迷見到菲爾鍾斯落場嘅機會會減少好多。

[Busconcamp]

【東體爭議】曼聯今夏只有賤賣普巴



講普巴？又真係幾煩嘅！呢位曼聯中場由舊年夏天扭計離隊，但一直走唔到，然後到開季之後不斷受傷同養傷，搞吓搞吓，「紅魔鬼」早排先傳出肯將佢減價出售，不過根據英國傳媒最新消息，結合三大因素，家陣講緊曼聯將可能喺今夏焗住以「賤價」5,000萬鎊賣走，都咪話唔陰功呀！

上個星期，英媒先至話曼聯會將普巴由之前定價1.8億鎊，肯減到落1.5億鎊賣走，不過今日《每日郵報》指出，由於所有對普巴感興趣球隊都唔肯畀高價，家陣皇馬預計肯畀5,000萬鎊已經算係最高價位，仲表明唔會加碼，睇嚟曼聯今次隨時蝕大本。

究竟點解「紅魔鬼」要焗減價呢？《每日郵報》話有三大原因，首先係佢今季出場太少。唔係講笑，由於今季傷患不絕，普巴至今只為曼聯上陣8次，冇入過波，而由舊年9月底開始，普巴只為曼聯披甲71分鐘添！呢個情況，令外界對佢身體狀況出現疑惑，自然影響身價。

此外，普巴依家同曼聯嘅合約只剩一年半，如果今年夏天賣佢唔走，到出年夏天就可以免費轉會，曼聯為免到時人財兩空，今夏賣人似乎在所難免。事實上，曼聯喺2016年用成8,900萬鎊回購普巴，如果最終一蚊都拎唔番，真係點交代呀？

最後，只要睇吓普巴近排同經理人拉奧拿嘅新聞，其中「肥佬吸血鬼」多次放風將普巴同祖雲達斯拉埋一齊，又話普巴想返意大利同想踢歐聯。對於拉奧拿種種言論，普巴都冇公開否認過，似乎默許佢去「做嘢」。如此一來，曼聯想留人或續約都好難，到時唔將佢賤賣都唔得啦！

[Busconcamp]

蘇B神助攻！前4之爭益晒摩連奴



曼聯喺英超作客擊敗車路士，依家只係落後第4位車仔3分，打入前4位參加下屆歐聯機會大增。不過，紅魔球迷唔好開心住，因為曼聯拆車，最大贏家其實係前紅魔鬼主帥摩連奴，因為車仔全失3分後，「寸王」領軍嘅熱刺現時只係落後車仔1分，只要下場英超作客擊敗車路士，就可以反超前車仔，升上第4位。

今季英超第4位，屬於車路士、熱刺、錫菲聯、曼聯之爭，車仔雖然領先緊，但球隊走勢弱，近4場英超只有2和2負。反觀，第5位熱刺取得3連勝，包括擊敗第2位曼城，士氣高昂。同埋摩連奴對前球會車仔，以及徒弟林柏特嘅底細，瞭若指掌，下輪英超重返史丹福橋，真係唔熟唔食。

因此，摩連奴今次真係要多謝番炒咗佢嘅曼聯，至於紅魔鬼又唔使太洩氣，因為如果曼城上訴失敗，真係冇得踢下屆歐聯，曼聯仲可以爭第5位，打入下屆歐聯。

[Busconcamp]

激踩曼聯！「佢根本冇資格踢正選」



曼聯上輪英超作客戰勝車路士，取得重要3分，但阿仙奴名宿麥臣，就認為紅魔鬼根本不值贏波，而且有1名球員根本唔應該正選出場，佢就係翼鋒丹尼爾占士。麥臣覺得占士只有「速度」一招板斧，於英超難以生存，但依家嘅曼聯係慘到，唔出占士已經冇人代替。

曼聯2:0殺敗車路士，占士再度正選登場，蘇斯克查到80分鐘先用安達斯彭利拿入替呢名威爾斯小將。麥臣認為曼聯唔可以揠苗助長，因為占士實在係未夠料踢曼聯正選：「曼聯係全球其中一間最大球會，但依家竟然連個似樣嘅前鋒都冇，要搵占士打正前鋒。老實講，占士遲早會失去正選位，我戥佢可惜，但依家佢好迷惘，真係需要一個休息期。」

「占士落到場只有一招，就係速度，除此之外乜都冇，咁樣喺英超生存唔到。曼聯需要畀占士抖吓，但可憐嘅係紅魔依家冇人去頂佢個位。」麥臣仲認為，曼聯同車路士依家只係二流球隊，曼聯呢場贏波都唔見得踢得好，而哈利馬古尼一早應該被趕出場，之後佢攻入車路士大門，所以曼聯唔好因為全取3分而沾沾自喜。

[Busconcamp]

前紅軍門將助攻　幾乎砌低曼聯



曼聯喺英超畀宿敵利物浦全面壓制，估唔到嚟到歐霸盃賽場，都見到紅軍球員身影。歐霸盃32強首回合布魯日主場迎戰曼聯，為布魯日攻破曼聯1球，正是由前利物浦門將米洛列特送出助攻，其後安東尼馬迪爾扳平，兩隊踢成1比1完場，下周次回合再決雌雄。

進入淘汰賽階段，曼聯派出較強陣容，哈利馬古尼、安東尼馬迪爾均正選上陣，不過收起迪基亞，改用羅美路把關就差啲出事。開賽15分鐘，布魯日門將米洛列特大腳開龍門球，艾曼紐丹尼斯前場接應，力壓曼聯小將班頓威廉斯，又見到羅美路棄關出迎，該尼日利亞射手挑射笠過羅美路入網，為主隊領先1比0。

同「膠龍」卡利奧斯唔同，比利時門將米洛列特於2013年加盟利物浦後，一直係紅軍1號門將，不過自從簽入艾利臣比加，31歲嘅米洛列特再無上陣機會，上季尾結束後離開紅軍轉投布魯日，今季在布魯日上陣20場。

落後1球嘅曼聯於36分鐘扳平，安東尼馬迪爾在中場把握對方掟界外球失誤，成功搶位並單刀埋門射入，為紅魔扳平1比1，取得寶貴嘅作客入球，曼聯次回合返主場只要唔失波即可晉級。

[Busconcamp]

再揭曼聯走寶因由　簽唔到夏蘭特衰硬頸



艾寧夏蘭特成為全歐洲以至全球話題，英國傳媒此時翻舊帳，追查當日曼聯錯失簽入呢位挪威天才因由，其實夏蘭特一早心繫曼聯，加盟多蒙特亦並非為錢，咁點解唔去曼聯？一切原因係曼聯硬頸，唔肯同夏蘭特經理人，同時又係保羅普巴經理人拉奧拿(Mino Raiola)妥協，先至搞成咁。

英國傳媒《每日郵報》，夏蘭特由薩爾斯堡轉會多蒙特之前，其實想去曼聯，報道指蘇斯克查同夏蘭特相熟，早已達成共識，曼聯副主席伍德沃德更於去年12月中飛赴奧地利直接同薩爾斯堡商討，當時大家都以為，夏蘭特將會轉會曼聯。

不過曼聯同夏蘭特之間，其實仲有個經理人，佢就係拉奧拿，有指曼聯同呢位拉奧拿因為普巴轉會問題關係緊張，結果影響埋斟介夏蘭特，最後錯過簽入呢位天才射手，眼白白睇住佢去咗多蒙特，但損失無法估計。

[Busconcamp]

拉舒福特提早收咧



曼聯前鋒拉舒福特今季狀態大勇，上月背脊受傷後話要休養6個星期，不過領隊蘇斯克查日前證實，呢位英格蘭前鋒嘅傷勢比預期更加嚴重，將要養傷「幾個月」，意味今季提早收咧，就連夏天嘅歐洲國家盃決賽周亦好大機會缺席。

蘇斯克查證實：「拉舒福特仲要抖多幾個月，肯定要。佢做咗檢查，骨折情況比原本預期更友複雜同嚴重，我都希望佢今季仍然可以上陣同埋踢歐國盃，我唔係醫生，我只能夠希望佢康復速度會比我哋想中嘅更快。」

喺拉舒福特長期缺陣下，曼聯想會倚靠安東尼馬迪爾、新星美臣格連活特同新加盟嘅恩哈路數胡。

[Busconcamp]

唔要普巴！祖雲達斯轉斟拜仁大腦



一直有傳意甲豪門祖雲達斯打算今夏回購曼聯中場保羅普巴，但依家事情有變，意大利傳媒爆料，指祖記已經對呢位法國國腳失去興趣，改為計劃收購拜仁慕尼黑中場堤亞高艾簡達拿。

據悉，祖雲達斯管理層認為保羅普巴近年表現下滑，加上今季長期養傷，簽入佢會冒好大風險。反觀，堤亞高艾簡達拿今季狀態大勇，近5場比賽更加射入3球，而且佢踢法似祖記昔日名將派路，增添唔少印象分。

由於28歲嘅堤亞高艾簡達拿將於明年夏天約滿，至今仍然未打算續約，拜仁為免將來人財兩失，可能提早今夏平價賣走佢，啱晒一向精打細算嘅祖雲達斯。

[Busconcamp]

【賽後解碼】9分鐘證明　曼聯冇佢唔得



曼聯上場聯賽漂亮擊敗車路士，不過周五(21號)歐霸盃32強只能作客1比1打和布魯日，而且全隊表現乏善可陳，中場收起咗費特洛迪古斯同新加盟嘅波基斯費南迪斯，曼聯即時變返上半季死氣沉沉、毫無板斧嘅紅魔，「波費」喺81分鐘後備登場後，曼聯呢9分鐘就踢出全場最佳表現。

連格、尼曼查馬迪、安達斯彭利拿嘅中場線創造力極低，安東尼馬迪爾嘅入波都屬個人表演式，並唔係透過有效組織而創造。下半場中段曼聯先換入費特洛迪古斯，81分鐘再放埋波基斯費南迪斯落嚟，中場嘅交波速度、危險性同侵略性即刻大大提升，頭81分鐘曼聯有8次起腳，「波費」入場嘅9分鐘曼聯再錄得8次起腳，當中「波費」一個就佔4次。

蘇斯克查賽後都大讚「波費」9分鐘貢獻：「佢一落場就令比賽出現重大轉變，我哋要畀時間佢融入球隊，當時球隊需要控制賽事同爭取球，佢入場後製造唔少機會，再次證明佢嘅能力。」

[Busconcamp]

摩連奴最愛曼聯人！出手搶簽史摩寧



基斯史摩寧今季被曼聯外借去羅馬之後，表現大勇，更被稱讚為意甲「首席中堅」，羅馬都有意今夏買斷呢位30歲英格蘭守將，但曼聯索價2000萬歐元轉會費，令羅馬卻步。不過，仲有大把買家，最新消息指熱刺領隊摩連奴出手，要簽入呢位昔日紅魔鬼舊部。

熱刺3位中堅維頓漢、艾達韋列特、艾歷迪亞都好可能今夏離隊，摩連奴急需要物色新中堅，佢同基斯史摩寧喺曼聯合作過，知道佢嘅實力。最重要係基斯史摩寧今季表現出色，為羅馬上陣24場，成為防線主力，仲入咗2球，更有「羅馬馬甸尼」之稱

據悉，摩連奴已經問過曼聯可否賣基斯史摩寧畀熱刺，熱刺方面亦有同基斯史摩寧嘅經理人接觸，表明可以向史摩寧開出10萬鎊以上周薪，條件非常吸引，史摩寧亦想重返英超，雙方可望一拍即合。

[Busconcamp]

半場踢左40分鐘,無腳似樣...
終憑波費接應占士短傳單刀被科士打撲跌,
親自操刀12碼,先入到1:0領先