曼聯躉紅魔鬼地帶[VOL.95]各項賽事三連勝,入球眾數,重上正軌？

[Busconcamp]

曼聯因為有佢　慳番4.8億



曼聯準備今夏再度增兵，但就取消咗簽一個位置嘅球員，就係左後衞，因為19歲新星班頓威廉斯今季表現出色，領隊蘇斯克查有意來季用佢擔任正選左閘。

英國傳媒指，蘇斯克查近期搵咗班頓威廉斯傾偈，向對方大派定心丸，表明來季會留用佢，唔會將佢外借，同埋唔會簽入左後衞。

消息人士爆料話：「蘇斯克查已經停止物色新左後衞，因為佢被班頓威廉斯嘅表現深深打動，好鍾意呢位小將，下季將會留隊，曼聯管理層認為取消買左閘，可以慳番5000萬鎊(約4.8億港元)。」

曼聯現時有勞基梳爾、班頓威廉斯兩位左閘，勞基梳爾經常受傷，令到班頓威廉斯有機會上位，下季隨時可以穩坐正選。班頓威廉斯合約將於2022年夏天屆滿，曼聯有權同佢延長合約多1年。

[Busconcamp]

德甲放寬上陣年齡限制　曼聯最開心



德國足總日前通過新議案，正式放寬德甲上陣年齡限制，由以往最低17歲降低至16歲，呢個對英超球隊曼聯嚟講肯定係好消息。

點解又關曼聯事？因為提出呢個修例嘅係多蒙特，多蒙特隊中有位來自喀麥隆嘅天才球星莫高高，呢位已入藉德國嘅15歲球星依家跳級踢緊U19比賽，直至球季停擺前，今季上陣20場共入34球交出9次助攻，表現超晒班，今年11月佢就會滿16歲，有資格代表多蒙特出戰德甲。

多蒙特領隊法夫爾早前講過只要修例通過，就會畀莫高高跟一隊操練，勢成查頓辛祖接班人，令查頓辛祖今夏離隊轉投曼聯機會自然又高啲。

[Busconcamp]

魔迷喜訊！阿仙奴願意接收呢條「廢柴」



要數曼聯近年表現最差球員，連格認第二，冇人敢認第一，呢位27歲中場曾超過1年英超冇入波、冇助攻，絕大部分魔迷都要求賣走佢，依家終於可望成真。英國《每日郵報》指阿仙奴計劃簽入連格，代替借用期即將屆滿離隊嘅丹尼施巴路斯。

由於丹尼施巴路斯即將回歸皇馬，並準備轉投貝迪斯，阿仙奴領隊阿迪達需要簽新中場，日前就睇中愛斯賓奴小將馬克洛卡，依家將連格視為收購目標之一。據悉，阿仙奴高層辛尼爾已經接觸連格嘅經理人拉奧拿，商討簽入呢位英格蘭國腳嘅可能性。

被網民寸為「連美斯」嘅連格，今季各項賽事上陣35場，入2球，但2個入球都係無關痛癢嘅盃賽，佢喺英超仍然維持超過1年入球荒。加上曼聯簽入波基斯費南迪斯後，連格上陣機會進一步下降，已成為冗員。

連格將於2021年夏天約滿，相信曼聯會盡快出售佢，有傳紅魔鬼要求2000萬鎊轉會費，唔知阿仙奴接唔接受呢？

[Busconcamp]

辛祖開成魔條件：做唔到就唔好搵我



近期不斷傳出曼聯計劃收購多蒙特翼鋒查頓辛祖，特別係車路士退出爭奪之後，曼聯簽入呢位20歲英格蘭國腳嘅機會上升。不過，英國《每日星報》爆料，查頓辛祖只願意加盟有份踢歐聯嘅球隊，如果紅魔鬼達唔到呢個條件，佢係唔會成「魔」。

據悉，曼聯願意出1.3億歐元收購查頓辛祖，新冠肺炎肆虐之下，呢筆轉會費絕對係天價，好大機會可以打動多蒙特。

不過，查頓辛祖願唔願意成「魔」，又係另一回事，因為佢視歐聯資格為「重要個人條件」，如果去咗曼聯之後，要降格踢歐霸盃，佢寧願留喺多蒙特。

曼聯現時排英超第5位，同埋已晉身歐霸盃16強，但呢兩項賽事都暫停，紅魔鬼能否以英超前4位，或者歐霸盃冠軍身份出戰下屆歐聯，仍然係未知之數，所以要獲得查頓辛祖，並唔容易。

[Busconcamp]

恩哈路正式表態：等緊曼聯最後決定



尼日利亞前鋒恩哈路1月由中超球隊上海申花外借到曼聯之後，表現出色，為紅魔鬼上陣8次，攻入4球員，近期不斷傳出曼聯想正式收購佢。恩哈路近日喺社交網回覆球迷問題時，終於正式表態，話只要曼聯開出合約，佢就會留隊。

恩哈路居家操練，不忘上社交網話，好掛念足球，並回應球迷唔少問題。包括如果曼聯開出合約，佢就會答應留隊，仲話喜歡曼聯嘅一切，同隊中每個人都相處得非常好，當中最多同桑馬達一齊玩，而最難忘係踢曼徹斯特打吡戰。

最有趣係有球迷話，希望恩哈路打破朗尼喺曼聯嘅入波紀錄，呢位30歲射手幽默回應：「你知道我幾大年紀嗎？」睇來恩哈路又幾受曼聯球迷歡迎喎。

[Busconcamp]

【官宣】曼聯簽捷克「巨人」門



雖然足球賽事全面暫停，不過各大豪門嘅轉會計劃從未停止，英超勁旅曼聯日前率先完成一單收購，成功簽入16歲嘅捷克「巨人」門神維迪克！維迪克嘅球會奧洛慕克已經證實呢單交易，呢位天才門將會喺7月份先入曼聯青年軍，力爭成為「迪基亞接班人」。

依家只係得16歲嘅維迪克，身高已經有成1米98，身型高大之餘亦有敏捷嘅身手，被視為施治之後捷克另一頂級門之才，所以曼聯喺上年已經開始觀察佢嘅比賽，並喺今年1月份正式提出收購，經過多個月磋商後直到近期先至完成，而且已獲國際足協發出轉會紙。

奧洛慕克總監米納證實：「我好開心咁宣布，奧洛慕克再一次向歐洲頂尖球會輸出球員，維迪克咁年輕就獲得曼聯收購，對佢同球會都係一大光榮，而且喺財政層面上，維迪克將來如果為曼聯一隊上陣或者轉會，奧洛慕克會有一筆好可觀嘅收入。」

目前代表捷克U17嘅維迪克亦都表示：「感覺好唔真實，加盟曼聯係好多年輕足球員嘅夢想，最初聽到曼聯想簽我嗰陣，我覺得係流料，但依家已經成為現實，我非常期待呢次旅程。」曼聯除咗有No.1迪基亞之外，甸恩軒達臣亦有機會回歸搶正選，依家多埋維迪克呢粒明日之星，曼聯大門嚟緊都可以安枕無憂。

[Busconcamp]

蘇斯克查球員交易神操作　3個轉會窗率曼聯重回正軌

期待重拾輝煌的曼聯，在領隊蘇斯克查（Ole Gunnar Solskjær）領軍下戰績暫時未見突出，然而紅魔鬼在他任內在一個重要範疇終於看到起色。

跟恩師費格遜一樣，蘇斯克查在球員去留方面眼光奇準，5入9出共14個球員的轉會操作100%神準，令人嘖嘖稱奇。

自從傳奇領隊費格遜（Sir Alex Ferguson）2013年夏天離隊後，曼聯先後經歷莫耶斯、雲高爾和摩連奴三大領隊。他們各自買入一批心儀球員，每逢易帥便經歷一朝天子一朝臣，5年半下來，轉會操作失誤頻頻。

莫耶斯年代的費蘭尼，雲高爾年代的迪馬利亞，摩連奴年代的阿歷斯山齊士均為經典失敗例子，一方面令人驚覺紅魔昔日引以為傲的傑出轉會操作不再，另一方面長年累積下來球隊積弱不少，不再是大多數球員不能抗拒加盟、魅力十足的班霸。當時每逢轉會窗一開，都很好奇曼聯又會天價買入什麼球員，很有「水魚」的感覺。

回看曼聯莫耶斯、雲高爾、摩連奴三朝收購

2018年12月蘇斯克查接替摩連奴走馬上任時，便曾坦白說自己不懂魔術不能立即令曼聯變回強隊，但表示會利用好幾個轉會窗，一步步提升球隊實力。

他出任看守領隊時帶領紅魔19戰14勝，2019年3月底贏得一紙三年聘約，成為正式主帥後戰績有所回落，一度令人懷疑他的執教功力。深愛曼聯的他不理外界批評，默默為球隊開刀「做手術」，不惜一再放走一堆大牌球員，季初經歷一段痛苦低潮，10月賽和利物浦後低至聯賽榜第14位。

惟他寧願擇善固執，捱到1月轉會窗購入波基斯費南迪斯（Bruno Borges FERNANDES）之後，紅魔表現愈戰愈勇。

蘇斯克查任下5買9賣「神操作」

蘇斯克查遵守諾言，經歷三次轉會窗，成功帶領球隊重回正軌，令人期待今個夏天他和球會將再有什麼「神操作」。多蒙特翼鋒查頓辛祖據報很大機會來投，至於保羅普巴他將會如何處置，將會是個有趣的題目。

球員年代擁有「娃娃臉殺手」花名，如今歲月在他臉上留下痕跡，不變的是他的銳利依然：以往他笑着用入球痛擊對手，成為領隊後一副笑臉不改，毫不留情向一班老臣子開刀，還是面不改容。

[Busconcamp]

域陀連迪路夫重返母會　搶閘練波！



英超賽事復賽無期，就球隊連操練都被禁止，不過曼聯中堅域陀連迪路夫就搶閘練波，佢最近獲曼聯批准，返去母會韋斯特羅斯(Vasteras SK)跟操，希望能夠以最佳狀態迎接英超重開。

瑞典國腳域陀連迪路夫喺英超停擺後，已經飛返瑞典陪家人，最近佢更參加瑞典次級聯賽球隊韋斯特羅斯嘅操練，呢間球會係域陀連迪路夫2012年加盟賓菲加前，最後一間效力嘅瑞典球會。雖然瑞超聯賽因為新冠肺炎疫情未能開咧，但瑞典並冇「封城」措施，球隊仍然可以進行操練，域陀連迪路夫今次就成功「跟隊」。

韋斯特羅斯體育總監布隆美表示：「我哋練習都要跟足衞生指引，而且喺封閉嘅球場內練習，大家都做好個人衞生。」

[Busconcamp]

蘇斯克查自爆「水源充足」　疫市狂掃巨星



足球世界喺新冠肺炎疫情下全面癱瘓，唔少球隊都出現財政危機，不過貴為全球最搵錢球會之一嘅曼聯，就有機會喺「疫市」下大展拳腳！曼聯領隊蘇斯克查日前自爆，「紅魔鬼」依家財政非常理想，「水源充足」情況下已經為轉會做晒計劃，有信心可以喺財政危機大環境下趁機狂掃巨星！

蘇斯克查接受《天空體育》嘅加利尼維利訪問，證實聯賽停擺期間有更多時間制定轉會計劃：「其實我哋一直都有傾(轉會計劃)，當然依家有更多時間透過訊息交流，我哋會計劃球會應該點做？可以點做？目前一切進展良好。」

事實上，依家成個球壇經濟陷入危機，唔少專家都估計球員身價同人工會大幅縮水，蘇斯克查亦承認呢個係曼聯嘅黃金機會：「冇人會知道轉會市場會變成點樣，同樣冇人會知道球會需唔需要賣人套現，我唔排除會有一啲突發情況令你有機會(買人)，我只係知道曼聯依家財政非常理想，當足球回復正常，我深信曼聯可以做到我哋想做嘅交易。」

傳聞中曼聯3大增兵目標，包括多蒙特翼鋒查頓辛祖、阿士東維拉中場基亞利殊同伯明翰超新星祖迪比寜咸，原本估計3人總身價可能高達2億5,000萬鎊，不過喺疫情打擊之下，話唔定轉會費會有好大下調空間。

[Busconcamp]

迪亞高祖達回應曼聯斟介：我想著呢個號碼！



狼隊近2季表現令球迷眼前一亮，葡萄牙前鋒迪亞高祖達嘅演出亦光芒四射，盛傳曼聯領隊蘇斯克查對佢非常欣賞，有意喺轉會市場重開後展開收購行動。迪亞高祖達日前接受葡萄牙《紀錄報》訪問，首次回應「紅魔鬼」嘅斟介，竟然講埋佢希望着嘅曼聯球衣號碼！

現年23歲嘅迪亞高祖達表示：「首先要講嘅係，我要着18號波衫，不過波基斯費南迪斯啱啱已經拎咗件18號，所有已經有個好大問題！講笑咋！不過能夠同曼聯呢種級數球會扯上關係，我都覺得好榮幸。」講到有冇機會轉會，迪亞高祖達就大耍太極：「睇到依家個疫情咁嚴重，轉會呢啲事情已經唔再重要。」

[Busconcamp]

曼聯8.5億買全能戰士！但要先做一件事

曼聯唔止準備今夏清洗部分表現差嘅球員，同時亦計劃簽入猛將，提升下季爭標實力。意大利《羅馬體育報》指紅魔鬼打算收購拉素中場米連高域沙域，甚至已經派人去「探路」，據悉拉素要求1億歐元(約8.5億港元)轉會費。

雖然曼聯1月已經簽入葡萄牙進攻中場波基斯費南迪斯，但領隊蘇斯克查認為仲未足夠，希望再羅致1位大將同波費拍住上，進一步加強中場創造力，為鋒線提供源源不絕嘅入球機會。

25歲嘅米連高域沙域屬於全能戰士，可以勝任中場任何位置，今季各項賽事上陣30場入5球，成為拉素排意甲第2位嘅主要功臣。

事實上，曼聯早於上年夏天已經睇中米連高域沙域，但當時蘇B對保羅普巴仲抱有一線希望，而未有全力追逐米連高域沙域。

不過，蘇B現時已經對普巴死心，所以曼聯又出手斟呢位身高1米91嘅塞爾維亞國腳，甚至派人出向拉素會長洛迪度問價，對方要求1億歐元，先至肯賣。

呢個價錢的確比較貴，所以曼聯已經計劃今夏出售保羅普巴，一旦成事，就有資金簽入米連高域沙域。

[Busconcamp]

查頓辛祖直播　親口確認加盟曼聯?！



多蒙特超新星查頓辛祖，一直被傳係曼聯今夏收購頭號目標，德、英兩地傳媒都放風話成事機會頗高，轉會費估計達到1億英鎊。雖然新冠肺炎疫情令聯賽同好多轉會都Hold住，不過查頓辛祖就急不及待表態，日前喺IG開Live同球迷傾偈，竟然親「口」確認將會轉投曼聯嘅消息！

查頓辛祖開Live期間，有一名球迷留言提出：「如果你係加盟曼聯，就飲一啖水啦！」呢位20歲英格蘭國腳見到後，先後笑咗一笑，停咗幾秒後隨即拎起樽水飲咗一啖！雖然冇用言語，但查頓辛祖仍然用把口嚟確認呢單轉會，大批曼迷即時歡喜若狂，紛紛留言：「辛祖真係嚟啦」、「要發生嘅始終都發生」。

早前曼聯前鋒拉舒福特，亦喺IG直播接受傳媒訪問嗰陣，呼籲查頓辛祖過檔曼聯：「如果係真(加盟曼聯)梗係好事，佢係新世代嘅偉大球星。」

[Busconcamp]

熱刺鋒王宿命　貝碧托夫信卡尼入「魔」



英國傳媒瘋傳熱刺將會賣走王牌前鋒哈利卡尼，呢位26歲神鋒身價不菲，但仍然獲曼聯、皇家馬德里等豪門垂青。不過，前熱刺同曼聯射手貝碧托夫就話，哈利卡尼必定會加盟曼聯，因為呢個係熱刺歷代「鋒王」嘅宿命！

保加利亞名將貝碧托夫表示：「熱刺同曼聯一直有好強嘅聯繫，舒寧咸係熱刺最強前鋒，之後就過檔曼聯；我亦係由熱刺直接轉投曼聯，依家輪到哈利卡尼被傳會去曼聯，我哋3個都係熱刺前鋒。哈利卡尼依家同我當年情況好相似，你會考慮自己係咪喺正確嘅錦標路上，我知道有人會唔高興，但我要為自己作出正確選擇。」

曼聯領隊蘇斯克查日前表示會喺轉會市場大展拳腳，多蒙特翼鋒查頓辛祖都係目標之一，如果可以簽埋哈利卡尼，加埋本身嘅拉舒福特，曼聯將可以完美移植英格蘭國家隊嘅鋒線。

[Busconcamp]

英超重開在望　召集球員5月2日前歸隊

英超賽會正為重開聯賽進行部署，英格蘭聯賽會已通知參賽球隊，本地球員現在開始不要離開英國，至於非本土球員則開始召集，5月2日前返回英國接受隔離，為恢復操練做好準備。

英國《郵報》報道，英格蘭聯賽會已通知各參賽隊，爭取在5月16日恢復操練，希望在一個月內讓英超重開。

考慮到球員健康風險評估，賽會建議本地球員不要離開英國，至於身在外地的球員，亦須於5月2日前返回英國，再接受14日隔離，以準備5月16日恢復訓練。

各個聯賽及主要錦標最新進展

1.歐聯、歐霸：暫停，直至另行通知

2.英超、英冠、英甲、英乙、蘇超：暫停，計劃6月中重開

[Busconcamp]

曼聯買唔到辛祖　就會簽西甲新星



盛傳曼聯計劃今夏收購多蒙特翼鋒查頓辛祖，但以紅魔鬼近年收購紀錄，可能又會撻Q，所以會方已經有第二手準備，一旦未能簽入呢位20歲英格蘭國腳，就會收購華倫西亞翼鋒費倫托利斯。

同樣係20歲嘅費倫托利斯今季為華倫西亞於各項賽事上陣35場，射入6球及7次助攻，雖然數據上唔及查頓辛祖搶鏡，但仍然獲得多支豪門垂青，皇馬、祖雲達斯、利物浦、多蒙特都有興趣簽佢。

同埋費倫托利斯將於明年夏天約滿，華倫西亞仍然未能說服佢續約，為免將來人財兩失，隨時出售佢都唔奇，所以曼聯買入呢位西班牙U21小國腳嘅成功機會，可能仲高過買查頓辛祖。

不過，據悉多蒙特已經率先向華倫西亞提出用4000萬歐元收購費倫托利斯，可能係為出售查頓辛祖畀曼聯之後，搵定替代人選。

[Busconcamp]

傑斯爆料：當年我同佢是但一個走



2003年碧咸離開曼聯轉會皇馬，轟動全球，當年碧咸離開紅魔鬼原因，係領隊費格遜飛靴事件所致，不過傑斯近日爆出另一版本，佢話其實該季會方已決定，佢同碧咸是但一個要離開，最後碧咸離隊，傑斯留低。

傑斯近日出席一個節目，話番呢件事：「在2003年時候，除咗碧咸離隊，其實亦有消息話我會轉會國際米蘭，呢件事我自己都唔知道，但事實上該季我不在狀態。」

佢繼續話：「到球季後期，球會認真討論過我同碧咸之間，將會有一人離隊，唔係我就係佢，最終碧咸去咗皇馬，我留隊，嗰年亦係我最接近離開曼聯嘅一次。」

[Busconcamp]

蘇斯克查癲咗！收購名單多達14人



曼聯領隊蘇斯克查準備今夏大肆增兵，重建紅魔鬼王朝，英國傳媒指蘇B收購目標多達14人，甚至更多，總之要令球隊來季脫胎換骨。

英國《標準晚報》指曼聯將會首先簽入前鋒、翼鋒、中場，其他位置方面，蘇斯克查亦希望增強，佢早前已經表達掃貨嘅決心：「現時經濟環境之下，轉會市場多變，可能有球會突然需要出售球員，我哋可以利用呢個時機，曼聯係最大球會之一，財政上好健全。」

《標準晚報》列出蘇斯克查嘅收購名單，防線上有2位意甲中堅馬菲斯迪歷特、高列巴尼，效力拿玻里嘅高列巴尼身價達9000萬鎊，曼聯未必出錢收購。由於紅魔鬼知道祖雲達斯想回購保羅普巴，所以傾向用普巴向祖記交換馬菲斯迪歷特。

中線目標多達6人，包括2位英格蘭國腳中場占士麥迪臣、基亞利殊、伯明翰16歲天才伯明翰祖迪比寜咸，仲有阿積士主力雲迪碧克。如果買唔到呢幾位人氣球星，可能轉為收購紐卡素嘅桑恩朗達夫、韋斯咸嘅迪格蘭賴斯。

鋒線上有盛傳會加盟嘅查頓辛祖，以及身價2億鎊嘅熱刺射手哈利卡尼，而迪姆華拿同穆沙迪比利分別係利物浦、車路士嘅目標，相信要簽入佢哋並唔容易，難怪網民認為曼聯最後可能只會買斷上海申花借將恩哈路。

事實上，曼聯要買齊所有人，幾乎係冇可能，但如果前中後三線都各有1位球星加盟，紅魔鬼實力肯定會大升呢。

[Busconcamp]

踢阿甲仲好！馬高斯盧祖唔想返曼聯



曼聯今年1月將後衞馬高斯盧祖外借去阿根廷球隊學生隊，佢重返母會後，只係上陣1場，就遇上新冠肺炎賽事停擺，未知幾時重開，馬高斯盧祖表示，希望曼聯將借用期延長多6個月，畀佢為學生隊踢晒今季賽事。

30歲嘅馬高斯盧祖被外借去學生隊初期，因為有傷在身，缺陣一段時間，之後復出踢咗1場，仲貢獻1次助攻，以為會獲得重生，點知阿甲因為新冠肺炎暫停。

由於馬高斯盧祖借用期只係去到6月，如果阿甲一直暫停，佢到時就要返回曼聯，的確好冇癮，所以建議曼聯延長多6個月借用期，佢話：「如果由我做決定，我會同曼聯管理層傾下，將借用期延長多6個月，因為踢1場就被迫離開，我會好痛苦，我已經傷愈，可以上陣比賽。」

據悉，馬高斯盧祖已經向曼聯領隊蘇斯克查表達有關意願，其實蘇B都係認為馬高斯盧祖喺曼聯冇乜作用，先至借走佢，相信應該可以滿足到佢呢個心願。

[Busconcamp]

莫天才：曾幫曼聯斟佢3個



曾經係曼聯傳奇領隊費格遜指定繼任人嘅莫耶斯，近日接受訪問講番當年執教曼聯情況，原來當年佢斟過卻奧斯、加里夫巴利同埋法比加斯3大巨星，可惜佢未完成交易就被炒魷魚，曼聯亦同上述3位球星擦肩而過。

莫天才表示，卻奧斯其實已經同佢傾好晒，另外亦積極簽入加里夫巴利，曼聯開價8600萬鎊，至於法比加斯亦非常接近加盟。

可惜上述鴻圖大業都未能完成，莫耶斯上任一季被炒，改由尹戈爾接任，而幾位巨星交易亦同時告吹，卻奧斯、巴利去皇馬，法比加斯去車路士。

[Busconcamp]

費南迪斯撐普巴　佢真係好勁



雖然盛傳保羅普巴今夏離開曼聯，但球迷都想睇到，新加盟嘅波基斯費南迪斯夥拍普巴嘅中場線，究竟有幾勁，原來費南迪斯一樣好期待，佢仲話大家唔好只係批評，其實昔巴對球隊有好大貢獻。

費南迪斯表示：「係呀，我好想同普巴拍檔，好耐之前已知道普巴係一位出色中場，大家都知佢有幾勁，喺足球圈，球迷會因為你犯錯而忘記你嘅貢獻，你可能踢咗幾十場好波，只要1場唔好，球迷就會記住。」

「球迷鬧普巴，只因對佢抱有極高期望，要求甚高，情況等同祖記嘅C朗同巴塞嘅美斯一樣，大家都知道普巴係世界級，我對佢有信心。」

[Busconcamp]

至少9隊支持　英超趕在6月底前煞科

英超打算跟隨英冠等低組別聯賽在6月6日重開，仍須等待衞生部等政府部門開綠燈，然而英超20隊將於周五召開視像會議，尋求在6月30日球員約滿前完成球季，決出冠軍、歐洲賽資格及降班隊伍，希望搵到一個圓滿方案。

英國《鏡報》報道，至少9間英超球會向賽會提出，希望賽季餘下賽事能在6月30日前完成，以免因球員合約而出現的法律問題。雖然國際足協早前作出指引，容許球員合約自動延長至球季結束，不過一旦於6月30日約滿，而賽事仍未完成的話，球會無法要求球員落場，引發不少問題。

英超餘下賽程中，大部份隊餘下9場比賽，另有4隊餘下10場，周五視像會議將會找出賽事方案，讓球賽可在6月底前全部完成，之前有建議將賽事集中英格蘭中部幾個球場閉門作賽，個別賽事在溫布萊球場舉行，每隊隔3日打1場，相信此安排最接近各隊要求。

假如英超賽季最終未能完成，各隊將承受6.8億鎊經濟損失，利物浦英超冠軍夢亦告破滅，相信英超20隊班主都會極力避免此情況，而會共同搵到合適方案。

[Busconcamp]

曼市晚報　恩哈路可做新雲佬



曼聯借將前鋒恩哈路能否留隊，仲要睇紅魔高層嘅睇法，如果會方仲唔開合約留人，佢就會喺季尾返回上海申花。《曼徹斯特晚報》認為，恩哈路將可成為新雲尼斯達萊，希望曼聯高層認真考慮。

恩哈路在冬窗最後一刻加盟曼聯，初時由於佢來自中超，先要隔離14日，又冇得隨隊去西班牙集訓，但當佢投入賽事，就發覺佢同球隊相當合拍，上陣8場入4球，入球能力甚佳，好啱曼聯用。

報道指，恩哈路同前曼聯射手雲尼斯達萊擁有相同特質，就係擅於在禁區內尋找機會，雲佬於2001至06年效力曼聯，射入150球，之後被皇馬挖角離隊，恩哈路能在短時間證明自己能力，曼聯應該認真考慮給予合約，以免走寶。

[Busconcamp]

團結抗疫　曼聯主場亮藍燈撐醫護



疫情期間曼聯除咗密謀重大收購之外，亦盡力履行社會責任，不但宣布疫情期間向工作人員支付全薪，唔會炒人，仲向醫護人員作精神上支持，周三(15日)晚上奧脫福球場外亮起藍燈，向醫護人員以示支持。

在奧脫福球場正門，MANCHESTER UNITED的霓虹燈光，只亮起NHS UNITED幾個英文字母，NHS是英國國家衞生事務局縮寫，奧脫福球場呢一刻係屬於醫護人員。

曼聯在官網及社交網站留言：「沒有NHS，大家就沒有曼聯。」「夢劇場平日是不會出現藍光(曼城主色)的。」

[Busconcamp]

復賽開Turbo　英超5月18日全面復操



英超球會日前舉行嘅視像會議，為聯賽重開達成唔少重要協議，其中一個重要里程碑，就係會喺5月18號全面復操！6月初重開一直係英超嘅目標，《每日郵報》指一眾球會認為5月18號復操，可以確保球員有充足時間提升狀態，目標係6月8號正式重開，而英國《太陽報》進一步指出球會已定出復操3大揩施。

首先，球員要喺屋企換好全套練習裝備，到達訓練場就會立即投入練波，減少逗留喺更衣室同埋換衫嘅時間；第二係所有球員進入訓練場前都要接受新冠肺炎檢測，而且要留喺自己車入面進行；最後係效法德甲球會依家嘅做法，練習要以小組形式進行，5個球員為一組，意味一隊25人球隊就要分成5組練波。雖然係有好多制肘，但已經係向聯賽重開邁進一大步。

[Busconcamp]

曼聯排第5都可獲邀踢歐聯



雖然大部分英超球會都希望今季聯賽重開，但最新爆出一條消息，可能令曼聯改變主意。有傳如果歐洲主要聯賽無法完成賽事，歐洲足協就會喺下屆歐聯加入「邀請制」，邀請部分未能排所屬聯賽前4位嘅豪門參賽，曼聯、馬體會、羅馬有望成為最大得益者。

據悉，歐洲足協不滿比甲等聯賽自行宣布取消，提早將冠軍頒畀榜首球隊，可能褫奪佢哋歐聯資格，與此同時，歐洲足協打算一旦主要聯賽未能完成球季，就會將騰出嘅歐聯席位，用來邀請名牌球隊參賽。

獲邀球隊都係未能打入聯賽前4位，但屬於前列嘅傳統豪門，例如現時英超第5位曼聯、西甲第6位馬德里體育會、意甲第5位羅馬，藉以增加下屆賽事號召力，提升商業價值，彌補今屆賽事延期嘅損失。

不過，呢個只係初步構思，同埋要等主要聯賽確定無法完成，先至有機會實行，紅魔鬼都唔好太早開心住。