曼聯躉紅魔鬼地帶[VOL.95]各項賽事三連勝,入球眾數,重上正軌？

[Busconcamp]

蘇斯克查怒吼：當時我想換晒10個球員



曼聯只踢7分鐘好波，換句話講其餘83分鐘都係廢嘅，英國《鏡報》報道，主帥蘇斯克查賽後接受訪問時怒稱，球隊今仗表現甚差，特別係上半場，當時有想過換晒除門將外嘅10個球員。

蘇斯克查指出：「佢哋真係踢得好差，輸緊0比2嗰陣，令我想起上季尾對愛華頓一仗，當時又係落後兩球，最終我哋輸0比4。當時我有諗過，除咗門將，將場上10個球員全部換晒落嚟。」

「錫菲聯看來爭勝心比我哋更強，對方嘅信念同部署都比我哋好，上半場時我哋甚至冇一個攻門係中目標，呢樣我真係無法接受。」

「我當時好憤怒、失望，半場期間我唔知要點樣鼓勵佢哋，幸好尾段突然間情況逆轉，班頓威廉斯、格連活特同拉舒福特接連畀我驚喜。」

「球隊相比起一年前有很大進步，如果在一年前，可能會輸4、5比0，但今場能夠反超前，我希望球員汲取頭70分鐘教訓，好好改善自己。」

[Busconcamp]

曼聯踢乜？中場彭利拿災難級表現



曼聯今仗未入波之前，全隊表現可算係災難級，當中踢得最差係中場，其實蘇斯查已經擺出433陣式，縮後踢就係541，不過串演防守中場嘅安達斯彭利拿實在唔係波，形同虛設，換走佢後曼聯就反勝，令佢嘅無能特別顯眼。

曼聯過去喺聯賽對錫菲聯7戰全勝，今場以為穩贏，點知踢落唔係嗰回事，由於保羅普巴、麥湯米尼受傷，蘇帥今場起用安達斯彭利拿串演防中，事實證明佢唔適合呢個位置，錫菲聯反擊如入無人之境，佢喺場上亦做唔到攔截，唯一嘅爭頂都失敗。

《曼徹斯特晚報》統計，安達斯彭利拿嘅傳球72次只有48次成功，成功率只得67%，其位置成為錫菲聯頭號針對目標，表現如同噩夢，最終踢到73分鐘被換走，而入替佢嘅格連活特上陣4分鐘就入波扳平2比2，曼聯之前踢得咁差，仲唔入晒佢數？

[Busconcamp]

有晒劇本！蘇B「助攻」普捷天奴接任



普捷天奴被熱刺炒魷後，一直盛傳佢有望成為下一任曼聯主帥，照計紅魔鬼現任領隊蘇斯克查應該會打醒十二分精神，但偏偏喺呢個敏感時刻，曼聯又失分，莫非注定蘇斯克查要讓位畀普捷天奴？

英國傳媒紛紛抽水寸爆蘇斯克查正在為普捷天奴「助攻」，著名記者Ronan Murphy話：「蘇斯克查發揮正常，因為佢同所有曼聯球迷一樣，都係希望普捷天奴可以上任。」

《BBC》記者Simon Stone話：「熱刺換帥後，蘇斯克查任何失利，都會聽到普捷天奴嘅名字，除咗迪基亞之外，曼聯球員上半場完全係Hea踢。」

普捷天奴可以「即時上班」，固然提升曼聯換帥可能性，同埋曼聯嚟緊賽程非常難踢，12月5日凌晨英超快車主場對由摩連奴執教嘅熱刺，3日之後就要出戰曼市打吡作客曼城，如果呢兩場波輸晒，曼聯高層更加有炒蘇斯克查嘅理據。

事實上，蘇斯克查季初自己講過，如果佢離開曼聯，對球隊有利嘅話，佢會毫不猶豫辭職。既然現時已經有最佳人選普捷天奴候命，蘇B都可以安心離去。

[Busconcamp]

費Sir同曼聯總裁吵大鑊！到底嘈緊乜



曼聯喺周一(25日)凌晨英超，落後2球反超前3:2，但最後又被錫菲聯逼和3:3，場上戰情固然刺激，場邊觀眾席亦充滿張力，因為有人影到紅魔鬼傳奇主帥費格遜同曼聯行政總裁伍德沃德，激烈爭論，疑似吵大鑊，引起球迷無限聯想。

當時費格遜同曼聯現任行政總裁伍德沃德，以及前行政總裁基爾一齊睇波，期間費Sir同伍德沃德有激烈討論，伍德沃德更加七情上面，表情有怒氣，仲手指指，基爾喺中間表情尷尬，仲要忍笑，似乎費Sir同伍德沃德真係發生口角。

由於唔知兩人講咗乜，於是網民惡搞，為佢哋配上對白，例如伍德沃德：「係你簽入菲爾鍾斯。」費格遜：「係你簽入費特洛迪古斯。」

以往曼聯內部，任何人得罪費格遜，都冇得留低，有唔少曼聯球迷認為可能伍德沃德就快唔撈，先至夠膽凶費Sir。

[Busconcamp]

踩師弟踩到盡！加利佬：佢3個係笑話



曼聯作客升班球隊錫菲聯，雖然曾經7分鐘內入3球，但最後都係畀對手逼和3:3，再次失分之下，目前13戰僅得17分排第9，同第4車路士有9分距離。曼聯今戰上半場演出可謂災難級，若非迪基亞屢作神救，上半場肯定唔只落後1球；鋒線方面亦毫無建樹，無論速度、身位、路數都輸晒畀錫菲聯後防。

為今仗作評述嘅曼聯名宿加利尼維利，睇見球隊於下半場早段輸到0:2，嬲到大鬧曼聯球員，佢特別針對前鋒3子拉舒福特、安東尼馬迪爾同丹尼爾占士，話佢哋徹徹底底係個笑話：「佢哋3個喺前線既冇互動又唔跑動，成場對曼聯一啲貢獻都冇，根本係個笑話。曼聯中場的確係曳，但前面3個表現都應該差到咁。你如果問錫菲聯領隊基斯韋達，會唔會肯用2個前鋒賴斯莫薩特同麥哥迪克，去換福仔同馬迪爾，佢一定唔肯。」

但福仔同占士，之後終於踢番好啲，其中福仔取得1入球、1助攻，而占士亦出咗個靚波予福仔射入第3球。雖然係咁，呢條曼聯鋒線頭1個鐘頭嘅演出的確勁曳，加利佬冇鬧錯人。

[Busconcamp]

英超13輪　蘇斯克查衰過上季摩連奴

曼聯又和一場，經過英超13輪賽事，曼聯現以4勝5和4負得17分排第9，「30年來最差」呢塊招牌已經搣唔甩，仲有一件事最大鑊，就係比較上季同期成績仲要差，上季13輪後曼聯有21分，比今季呢隊波多4分！

上季頭13輪，摩連奴為曼聯取得21分排第7，當時球隊已經被外間不斷抨擊，今季只得17分排第9，成績好明顯倒退咗，不過蘇斯克查仍然口硬，話依家球隊有曼聯DNA，仲吹水話球員仲年輕，將來會變好咁話。

上季摩連奴於聯賽第17輪被炒，當時成績係7勝5和5負得26分排第6，但今季紅魔鬼似乎仲差，季初一度距離降班區只差2分，更被評述員拉落下半版，與幾支護級球隊相提並輪，爭標無望。

至於今季曼聯打到第17輪有冇26分？即係話未來4場至少贏3場，先可以好過摩連奴被炒時嘅成績，曼聯未來4仗對手係維拉、熱刺、曼城、愛華頓，以曼聯現時情況，點贏呀？

[Busconcamp]

唔會收購曼聯　英國首富狂踩蘇斯克查



擁210億鎊身家嘅英國首富拉特克利夫，本身都係曼聯球迷，但佢近日接受《泰晤士報》訪問時稱，曼聯搵錯領隊，自己肯定唔會收購曼聯，聽佢意思，矛頭竟然指向蘇斯克查！

拉特克利夫指出：「在商言商，曼聯陷入巨大困境，佢哋選錯領隊，買球員又唔掂，好多收購都非常愚蠢，就例如買入費特洛迪古斯。」

生意多多嘅拉特克利夫涉足唔少體育項目，今夏佢就以1億鎊收購法甲尼斯，但佢表明唔會亂投資，講番佢對曼聯睇法，佢話：「費格遜離開領隊崗位後，曼聯已經投入大量資金，但結果呢？講得委婉嘅係，都冇乜嘢，直接咁講，係做得好差！」

「我喺尼斯嘅方式，要做得聰明啲，做好基層工作，尋找年輕人才，修咸頓、里爾似乎都能做到，但曼聯喺呢方面就唔得，佢哋並無適合年輕球員成長氛圍。」

[Busconcamp]

前水晶宮主席質疑蘇帥　曼聯似劣質A貨



曼聯成績持續不振，蘇斯克查被質疑之聲再起，英國首富直言蘇帥唔掂之後，前水晶宮主席西蒙佐敦又踩多腳，認為曼聯在蘇斯克查帶領下，只係一支劣質A貨。

西蒙佐敦針對蘇斯克查唔係第一次，近期曼聯成績差，佢又在節目《talkSPORT》發炮：「睇到班球員，我就覺得好似一支劣質A貨曼聯，睇佢哋踢波真係睇唔落去，你有咁多機會，咁大嘅影響力同資源同聲望，點會搞成咁？」

「現時嘅解決方案，就係搵一位前後備、教過卡迪夫城同莫迪，然後就來到呢支全球最大嘅球會執教，呢啲就係曼聯嘅偉大藍圖？」

[Busconcamp]

中國財團揼水　破世界紀錄贊助費撐曼聯



曼聯近年成績雖然不斷下滑，不過吸金力完全冇衰退過，早前盛傳佢哋主要贊助商Chevrolet眼見球隊表現差勁，計劃提早終止贊助合約，而據英國《太陽報》爆料，曼聯唔單止已經成功物色到新贊助商，而且贊助費更再一次刷新世界紀錄！

報道指中國海爾集團將以每年至少7,000萬英鎊贊助費贊助曼聯，超過Chevrolet依家每年6,400萬鎊嘅贊助費紀錄，更加大幅拋離利物浦、阿仙奴、車路士同熱刺嘅每年4,000萬鎊贊助費。海爾集團高層過去1個星期都喺倫敦，同曼聯進行最後斟介。

海爾集團嘅業務以家庭電器為主，預料佢哋會選擇旗下一個品牌作為曼聯波衫胸口廣告，世界知名吸塵機品牌Hoover係大熱之選。消息指海爾集團嘅巨額贊助費到位後，曼聯將會投放更多資金畀領隊喺轉會市場買人。

[Busconcamp]

6隊爭1米65小美斯！曼聯阿仙奴都有份



以往都係歐洲過氣球星去美職養老，但依家情況可能掉轉，因為曼聯同阿仙奴都睇中阿特蘭大聯進攻中場艾斯基巴高。呢位20歲阿根廷新星雖然身高只有1米65，但短小精幹，風格似美斯，引起「魔兵」展開1場爭奪戰。

艾斯基巴高上年1月以1500萬美元，由阿甲獨立隊轉投阿特蘭大聯，即協助球隊奪得上季美職季後賽總冠軍。雖然阿特蘭大聯今季衞冕失敗，但艾斯基巴高表現仍然出色，上陣15次入4球及3次助攻，難怪被捧為「美職美斯」。

除咗曼聯同阿仙奴之外，賓菲加、士砵亭、里爾、華倫西亞都對艾斯基巴高有興趣。事實上，艾斯基巴高年輕，而且卡士十足，非池中物，相信阿特蘭大聯都留佢唔住。

[Busconcamp]

懶理畀人鬧　呢位曼聯中場做鴕鳥

曼聯上場3比3賽和錫菲聯後，雖然有7分鐘亮點，但由於其餘時間打得太差，球迷批批聲音仍然持續，其中後備上陣嘅連格再度成為目標，亦因為畀人鬧得太多，搞到連格唔上網又唔睇報紙，做咗鴕鳥。

連格表示：「我份人好無聊，可以成個星期乜都唔做，匿喺房睇電影，網上有好多嘢睇，有人會講難聽嘅說話，但我唔會畀呢啲嘢影響。」

面對撲面而來嘅批評，佢話：「其實我唔睇呢啲嘢，唔上網又唔睇報紙，呢樣嘢對年輕人嚟講會好難，因為後生仔鍾意上網，亦介意別人講乜，但同樣令佢哋失去好多嘢。」

「我唔會讀網上嘅評論，最初我入一隊時會睇，但依家就算有人讚我我都唔會睇，我只鍾意踢波，專心去踢。

[Busconcamp]

夏蘭特又又又創紀錄　點解曼聯實買唔到？



今屆歐聯最爆新星非夏蘭特莫屬，呢位挪威前鋒瘋狂入波，周四(28號)歐聯再有入球進帳，帶領薩爾斯堡作客4比1大炒亨克，呢位19歲前鋒今屆5輪賽事全部入波，成為歐聯史上首個連續5場取得入球嘅20歲以下球員。另外，今屆首次踢歐聯嘅夏蘭特，喺生涯頭5場歐聯拎到8個入球，亦打破由迪亞高哥斯達同哈利卡尼保持嘅「頭5場歐聯入波紀錄」(7球)，認真犀利！

夏蘭特已經成為球壇搶手貨，其中英超勁旅曼聯就係最熱切嘅追求者。據德國《體育圖片報》爆料，夏蘭特嘅合約內有一條3,000萬歐元嘅買斷條款，不過就唔係隊隊都可以啟動，而係由德甲球隊RB萊比錫「獨家」專享！由於兩間球會幕後老闆都係紅牛集團，薩爾斯堡近年已經變成RB萊比錫嘅「衛星球會」，拿比基達、烏柏美卡奴、阿馬度希達拉、漢尼斯禾夫等都係由薩爾斯堡送去RB萊比錫，曼聯想搶人似乎難度極高喎！

[Busconcamp]

連歐霸都冇得踢！曼聯廢柴勢被革扯



曼聯今晚深夜征戰歐霸盃分組賽，作客哈薩克球隊艾斯坦拿，因為紅魔已經出線，所以領隊蘇斯克查幾乎畀晒主力休息，連飛機都唔使上，只帶4名平時聯賽上陣不多嘅連格、杜安薛比、勞基梳爾同門將李爾格蘭上機。英媒表示，31歲中場尼曼查馬迪於周三早上本身返到卡靈頓訓練場，但只係留咗24分鐘就走人，據知係被蘇帥告之冇得去哈薩克，認真陰公，睇嚟1月都會被革扯。

蘇斯克查話，暫時曼聯已經於歐霸盃完成任務，所以有空間畀年輕小將上陣吸收經驗。曼聯本季於英超，要爭前4困難重重，所以本土2個盃賽都係紅魔鬼嘅必爭之地，故此連今仗都唔畀小將出場，睇怕今季都冇乜其他機會。今仗紅魔陣容肯定以年輕小將為主，蘇帥已經公布邊個係隊長，於19年仲未有任何助攻同入球嘅連格，將會戴上臂章落場。

自代替摩連奴成曼聯主帥後，蘇帥擺明希望重用年輕球員，而馬迪經過一輪傷患後，落到場好多時都顯得有心無力，跟唔上比賽節奏，正選防中位已經畀麥湯米尼搶走。本季馬迪只係出過5次場，照計點都係計落上述連格、梳爾等人嘅「種類」，但依家連機都冇得上，睇怕都時日無多。

今仗曼聯將用上3號門將李爾格蘭，梳爾同英格蘭小將萊爾特分列左、右二閘，杜安薛比則會帶住新仔班納特握守中路。利維治、占士根拿打防中，連格則帶住鍾達希同安祖高美斯打攻擊中場。剛於英超攻入首個入波嘅格連活特就會打單箭頭攻堅。呢個陣容堅係有新鮮感，就算你係曼聯忠實球迷，都未必認得出晒佢哋。

[Busconcamp]

全城爭搶　夏維斯想入魔堅定流？



德國人氣超新星夏維斯，上季喺利華古遜光芒四射，全季攻入17球之多，有傳包括英超三強利物浦、曼聯同車路士，仲有德甲班霸拜仁慕尼黑同西甲盟主巴塞隆拿都想打佢主意。根據著名嘅德國《圖片報》爆料，話夏維斯竟然對「紅魔鬼」情有獨鍾，家陣佢估計身價達到1.2億鎊，「魔迷」聽到係咪好High先？

根據報道，話包括利物浦同曼聯都已經派人同夏維斯嘅經理人傾過，當中曼聯本來冇份踢歐聯，表面睇吸引力稍次，點知夏維斯反而對呢支褪色勁旅仲感興趣，但當中原因，報道就未有多講，只係話夏維斯為呢個轉會計劃「相當興奮」喎！

上季夏維斯表現堅勁，今季就稍微跌Watt，到依家只喺德甲入兩球，不過呢位小將思想非常成熟，對依家情況完全唔擔心：「上季就好似係我打出名堂嘅標誌性一季，但要保持住同樣進步速度根本好難，其實今季開季頭兩場入兩球，我已經覺得好好。對於一個好似我咁嘅年輕球員，總有機會經歷一個小低谷，但呢啲經歷將會幫我無論係做人定球員得到成長。依家好多評論對我都唔多正面，但我係唔會驚，我會去努力證明自己。」

[Busconcamp]

爆炸頭空門失機　曼聯敗走哈薩克



歐霸盃分組賽周五(29日)凌晨進行第5輪賽事，已在L組提前出線嘅曼聯派出二線陣容出戰，結果作客1比2負於小組包尾嘅哈薩克球隊艾斯坦拿腳下，其中19歲爆炸頭鍾塔西一度空門射失，當係上咗一課。

曼聯前4輪已得10分穩獲出線權，因此今仗收起全部主力，由連格及格連活特領軍，其餘球員都係「大冧把」球員，畀佢哋出席吓歐洲球會級正式賽事，見識大場面，開賽10分鐘曼聯開紀錄，勞基梳爾左路回傳，今仗隊長連格接應擺順勁射破網，曼聯領先1比0。

上半場再無紀錄，易邊後54分鐘曼聯本來可以擴大比數，勞基梳爾傳中，鍾塔西小禁區射空門竟然高出，1分鐘後艾斯坦拿扳平，曼聯被追和1比1，62分鐘曼聯伯納德阻擋對方射門改變方向入網，大會判入球伯納德擺烏龍，曼聯倒輸1比2，小組首嚐敗績，艾斯坦拿則打開勝利之門，仲要係贏曼聯，場內旗海飄揚，氣氛熱鬧。

[Busconcamp]

曼聯廢柴做隊長　破307日入球荒



曼聯在今場歐霸盃雖然輸波，但都唔係冇收獲，蘇斯克查派出大部份青年軍遠征之下，快將27歲嘅連格水鬼升城隍擔任今場隊長，更於開賽10分鐘入波，呢個入波係佢今年1月以來相隔307日嘅首個入球，真係好有紀念意義。

連格首次做隊長，對手只係艾斯坦拿，表現寧舍生猛，開賽初段即連造兩球畀格連活特及鍾塔西攻門，戰至10分，連格接應勞基梳爾三角回傳，離門20碼勁射死角入網，經過307日等待，連格終於再入波！

連格對上1個入波，要數到今年1月25日足總盃對阿仙奴，之後大半年渾渾噩噩，難得蘇斯克查無嫌棄佢，今場例行公事畀佢做隊長，真係幫到佢盡，而佢亦都爭氣取得今季開齋入球，全場6次射門及2次搶波，不過遺憾嘅係曼聯今場倒輸1比2，令佢首次做隊長紀錄蒙上污點。

[Busconcamp]

超幼齒　曼聯史上最年輕歐戰陣容



除咗連格打破入球荒，曼聯今場歐霸盃例行公事作客艾斯坦拿，原來打破球隊史上最年輕歐洲賽事陣容紀錄，平均年齡只有22歲，當中7名球員喺曼聯99年贏得3冠王嗰陣仲未出世。

根據外國足球網站統計，今仗曼聯正選11人平均年齡只有22歲零26日，當中加盟曼聯後首次正選門將把關嘅李爾格蘭快將37歲，佢1個人將全隊平均年齡扯高咗好多，如果除去呢位老將，其餘10人嘅平均年齡下降至20歲221日。

再詳細睇，領隊蘇斯克查99年射入反勝拜仁入球奠勝、協助曼聯勇奪3冠王嗰陣，呢支曼聯中7名球員都未出世。

明白到呢點，曼聯今仗早段領先，最終被對方反勝都唔係冇原因，後生仔經驗始終差啲嘅。

[Busconcamp]

計錯數　曼聯今場輸波原來好大鑊



已經提前兩輪出線，曼聯今場歐霸盃派出史上最年輕陣容遠征，對手只係小組包尾並已出局嘅艾斯坦拿，咁嘅安排好正常，但結果曼聯以1比2落敗，再睇小組形勢，若然曼聯喺煞科戰輸畀阿爾克馬爾，就會將小組首名拱手相讓，嚴重影響晉級32強後嘅走線，今次似乎闖禍喇！

曼聯今仗憑連格早段入波領先，但下半場被對方連下兩城反勝2比1，紅魔鬼在小組首嚐敗績令人意外，更有計錯數之嫌。其實曼聯今仗只要派出人腳實力稍強嘅陣容，要贏艾斯坦拿可謂輕而易舉，只要今場贏波就可鎖定小組首名，最後1場輸畀阿爾克馬爾都冇所謂，但依家形勢唔同晒。

現時L組曼聯以10分領先，阿爾克馬爾得9分排第2，兩個出線席位已決出，但首次名位置仲要睇最後1輪曼聯主場對阿爾克馬爾而定，如果阿爾克馬爾下場擊敗曼聯，就可搶手曼聯嘅首名出線資格。

歐霸盃32強對手，12組小組首名同4支歐聯成績較佳嘅小組第3名進入第1檔次，小組次名同4次歐聯較差嘅第3名就會在第2檔次，即係話，小組首名出線後所遇對手較弱，而次名出線所遇對手較強。

如果曼聯今場因為慳力輸畀艾斯坦拿，最後冇咗小組首名資格，咁就捉蟲喇！

[Busconcamp]

列強注意！意德西甲8連冠球星一月搵工



冬季轉會窗仲有一個月，列強想增兵補強都係時候做功夫鎖定目標人物。今日，喺西甲班霸巴塞隆拿有一頂級球星向主帥華爾維迪「逼宮」，話明再冇正選踢就會喺一月走人，呢個就係智利國腳維達爾！

32歲嘅維達爾，上季加盟巴塞隆拿之後，一直係球隊中場線頭號替補，不過當今夏有法蘭基迪莊加盟之後，呢位智利球星上陣機會就愈嚟愈少，至今18場波只有4場擔正。維達爾接受西班牙3台訪問就話：「如果喺12月或今季尾之前，我都仲係感受唔到自己喺球隊重要性，咁我就必須要搵出解決方法，我需要感受到自己係個重要球員。」

如果話前巴塞右閘丹尼爾係盃王之王，查實維達爾都唔嘢少，絕對係聯賽冠軍福星。事關對上8季，維達爾就分別幫祖雲達斯、拜仁慕尼黑同巴塞隆拿夾埋拎足8個聯賽冠軍，打遍意甲、德甲同西甲無敵手。始終維達爾唔止腳頭好可帶旺球隊，仲有梗係佢有頂級實力，家陣好似曼聯、熱刺同阿仙奴等想救亡，真係應該諗諗佢喎！

[Busconcamp]

蘇斯克查一句話　成功幫前鋒減壓



曼聯上場歐霸盃派出副選比賽，最終作客輸畀艾斯坦拿，紅魔鬼將於周一(2日)凌晨英超主場對阿士東維拉，領隊蘇斯克查將會出番主力，特別係前鋒拉舒福特係「新升班球隊殺手」，照計今場3分應該冇甩拖。

拉舒福特近5次英超對住新升班球隊，創造咗8個入球，包括入4球及4次助攻，好似上場英超對錫菲聯，佢就入1球及1次助攻，但後防唔生性，只能打和3:3，希望隊友吸取教訓後，今場會打醒十二精神啦。

曼聯今季英超入19球之中，有11球同福仔有關，比率達58%，包括佢自己射入7球，以及貢獻4次助攻，呢位英格蘭國腳已經連續3場英超有波入，腳風非常順。

領隊蘇斯克查講明，唔會為隊中前鋒設立入球數字目標，因為唔想增加佢哋嘅壓力。蘇B話對前鋒唯一要求係將訓練內容，發揮到球場之上，靈活走位，集中精神做出最佳射門決定。

[Busconcamp]

馬古尼解釋失波原因　激嬲全球魔迷



今夏用破後衞轉會費紀錄8000萬鎊(約8億港元)收購中堅哈利馬古尼，但近2場英超對2支新升班球隊，竟然失咗5球，令人懷疑紅魔鬼又做咗水魚。

今場賽後，哈利馬古尼仲死撐，竟然話曼聯遇到嘅對手，經常射入世界波，唔關防線問題。

哈利馬古尼話：「非常失望，我哋今場波開局形勢佔優，但卻被對手先入波，基亞利殊球波射得非常靚，我哋今年遇到嘅對手，總係可以射入世界波。」

無可否認，基亞利殊今場入波射得靚，但哈利馬古尼8000萬鎊嘅身價都係世界頂昂貴，而且仲未計身價5000鎊嘅右閘雲比沙卡，眼白白睇住基亞利殊射門。

兩位天價後衞都阻唔到1位過去3季踢英冠嘅球員入波，反而仲要搵藉口脫身，真係激死全球曼聯球迷。

[Busconcamp]

講波佬一句說話　蘇斯克查堅Ｏ晒咀



曼聯尋晚喺主場只能與阿士東維拉踢成2比2，賽後，依家做咗講波佬嘅前英格蘭國腳贊拿斯就鬧爆「紅魔鬼」前場三大主力包括拉舒福特、安東尼馬迪爾同連格，插佢哋全場發夢唔知做乜！最搞笑係贊拿斯用呢一句做總結：「畀蘇斯克查落場踢都可以連中三元啦！」唔知蘇B聽到係好嬲定好笑呢？

贊拿斯球員時代踢過紐卡素同熱刺等，就連阿士東維拉都曾經以借將身份效力過，想當年佢都同過蘇斯克查交手，當然知道對方有幾猛料，不過，依家睇見以前老對手曼聯搞到咁，難怪贊拿斯火都嚟：「今場波令我真正擔心嘅，係曼聯成隊都缺乏跑動，每個人都發晒呆企定定喺自己位。佢哋進攻組織凌亂，呢種情況經常發生。拉舒福特根本冇將注意力擺喺比賽上，大家都知道丹尼爾占士點踢，會點入禁區，然後曼聯有3個球員想入波，拉舒福特、馬迪爾同連格，但佢哋完全冇製造過任何機會。」

呢位前熱刺中場仲話：「最尷尬係，佢哋企喺場邊個領隊喺今場波落場的話，都有機會上演帽子孰法，呢場可能係佢睇過曼聯表現最差一場，成班球員都唔知自己想做乜？」贊拿斯又冇講錯，想當年「蘇B」單場入4球都唔使12分鐘，依家睇住呢班後輩，真係隨時嘔血呀！

[Busconcamp]

一個原因　普捷天奴今季唔教曼聯阿仙奴



英超帥位近期大執位，不過直到依家，阿仙奴都仲只係搵嚟龍格保做看守領隊，曼聯領隊蘇斯克查帥位又似係危危乎，唔少人都認為，依家待業嘅前熱刺教頭普捷天奴，將可能成為呢兩間老牌勁旅其中一間嘅新領隊。不過，有傳媒就發現，原來普帥畀熱刺炒魷收錢嗰陣，係簽咗份協議，承諾過今季之內唔可以執教任何一間英超球會，否則就要賠畀熱刺1,250萬鎊，所以一般估計「肥普」都唔會教佢哋，反而拜仁或者皇馬仲有機喎！

負責踢爆呢份協議嘅係英國《每日快報》，佢哋認為要「肥普」自己賠錢畀熱刺去教另一支英超球會根本冇可能，至於無論要「兵工廠」定「紅魔鬼」去畀錢請佢，考慮到只係為大約半季時間，人哋都未必肯畀，大不了咪等出年夏天先囉！

相反，因為協議只係阻佢喺英超其他球會搵食，但外國球會就冇問題，家陣拜仁仲未搵到新帥，皇馬、巴塞又成日傳出會炒教練，睇嚟普捷天奴去德甲或西甲搵食機會即時提升好多。

[Busconcamp]

英足盃抽籤　利物浦鬥愛華頓　曼聯遇剋星



英足盃第3圈抽籤，利物浦、愛華頓不是冤家不聚頭，將於晏菲路上演「默西塞德郡打吡戰」，另外曼聯亦有麻煩將要作客狼隊，自狼隊上季重返英超後，4次對紅魔鬼2勝2和，呢次主場出擊毋懼曼聯。

利物浦本周三深夜，將會於英超主場迎戰同市死敵，估唔到今次抽籤，一對冤家又抽埋一齊，同樣地紅軍有主場之利。上一次雙方於英足盃碰頭，係2018年1月嘅事，當時係華基爾雲迪積克加盟後紅軍處子戰，去到84分鐘呢位荷蘭隊長一頭定江山，助利物浦贏2:1晉級。

曼聯作客狼隊絕對唔易踢，紅魔近期鬥親狼隊都被食住，特別係上季雙方於英足盃8強對決，最終狼隊贏波，21年來首次入英足盃4強；而今季英超曼聯主場對狼隊，雖然先開紀錄，但最終被逼和，今次殺入狼穴相信都毫無甜頭。

曼城方面繼續維持好籤運，將對英乙仔維爾港。阿仙奴就會主場迎戰英冠升班大熱列斯聯，熱刺就作客英冠米杜士堡，李斯特城就喺自己地頭迎戰韋根。

[Busconcamp]

超級電腦計數　曼聯降班機率＞捧英超！



係大數據年代，所有事情都可以用電腦預測計算。今季英超已經踢咗1/3，利用數據於經濟、政治、文化、科學等範疇預測走勢嘅《FiveThirtyEight》網站，就預測咗今季最後排名。佢哋計出利物浦有7成機會捧盃，並預測紅軍最終會以93分奪標；而曼聯就會以54分排第6。另外佢哋計出曼聯今季降班機率為2%，而後上奪標只係得少過1%。

利物浦開季至今14戰13勝1和，目前以8分領先次席李斯特城高踞榜首，《FiveThirtyEight》認為佢哋捧盃機會達71%，而最後得分雖然少過上季4分，但依然可以打破魔咒首奪隊史首個英超冠軍。曼城就會以86分排第2，佢哋後上反壓紅軍完成英超3連霸嘅機會，只得25%。

摩連奴執教嘅熱刺，將會以62分奪得第5名，阿仙奴則排第7；而修咸頓、屈福特及諾域治就會降班收場。