曼聯躉紅魔鬼地帶[VOL.95]各項賽事三連勝,入球眾數,重上正軌？

[Busconcamp]

雲達沙公開信致魔迷：「要錫住雲迪碧克！」



正式宣佈由母會阿積士，轉投加盟曼聯嘅荷蘭新星雲迪碧克，即將喺英超展開新旅程。喺呢單重大轉會交易確認後，阿積士CEO兼曼聯名宿雲達沙，就喺《曼徹斯特晚報》買下全版廣告登出公開信，希望曼聯球迷可以好好錫住呢位新成員。

喺阿積士出道嘅雲達沙，職業生涯後期加盟曼聯，與呢支英超豪門贏盡各大獎項，成為備受「魔迷」尊敬嘅傳奇球星。如今雲迪碧克亦將步前者後塵，成為「紅魔」一份子，雲達沙作為喺兩間球會都極具影響力嘅人物，當然希望雲迪碧克呢位後輩，可以喺新東家取得成功，好似自己當年咁贏得曼聯球迷歡心，於是就向曼聯球迷寫咗張公開信，為雲迪碧克鋪好條路。

雲達沙以阿積士CEO名義，喺信中鄭重向曼聯球迷介紹呢位自己嘅後輩：「我哋(阿積士)嘅一員，來季將成為你哋一份子。佢同好多前輩一樣，細細嗰就加入我哋(阿積士)。自從為球隊首次上陣，佢好快就成為最佳球員之一，尤其過去幾年表現出色。

由歐霸決賽，到歐聯征途，以及喺荷甲捧盃，佢同球隊向世界證明，阿積士有幾叻。同曼聯一樣，阿積士出名善於培養新星，畀佢哋機會喺最高舞台表現自己，呢位曼聯新星，就係阿積士青訓嘅驕傲。希望你哋好好照顧雲迪碧克，幫佢達成夢想。」

雖然有作為曼聯名宿嘅雲達沙出到聲，但係「紅魔」球迷出晒名要求高，雲迪碧克要贏得「魔迷」尊重，都係要靠場上表現先至得。

[Busconcamp]

【取而代之】軒達臣向迪基亞下戰書： 我回來曼聯不是做後備


甸恩軒達臣（右）希望從迪基亞（左）手中，搶走曼聯正選門將位置。

效力英超球會曼聯的門將甸恩軒達臣直言，他今季結束在錫菲聯的外借生涯返回奧脫福，就是為了從西班牙門將迪基亞手中，搶走紅魔正選門將位置。

今年23歲的軒達臣雖出身自曼聯青年軍，但從沒有為一隊上陣過，只被外借予多間低組別球會。到18/19球季，軒達臣以借將身分效力英冠球會錫菲聯，職業生涯開始起飛。他先協助球隊升上英超，而錫菲聯上季在不被看好情況下以第九名完成球季，軒達臣實是功臣之一。曼聯季前宣佈與軒達臣續約五年，周薪高達12萬鎊（約123萬港元），而他更會留在奧脫福跟迪基亞爭奪正選位置。

目前正隨英格蘭國家隊出戰歐國聯比賽的軒達臣說：「（大家）留心，我新球季的目標，百份百是上場比賽。經過上季的好表現後，我當然希望可保持勢頭，而不是不用作賽做後備。

「迪基亞過去幾年一直是名偉大的門將，他的表現極出色，更成為我奮鬥的目標，也令我想擁有跟他一樣成功的職業生涯。所以當我第一天回曼聯練習時，會盡一切努力以求成為正選，因為這正是我想的。我現在跟目標如此接近，絕不會放棄......我也知道前面的挑戰絕不輕易，但我已準備就緒。」

除了想成為曼聯正選外，軒達臣下一個目標，就是成為英格蘭一號門將。之前只曾為英格蘭U21上陣的他說：「我想代表英格蘭作賽，我也想成為曼聯正選，而自己能做的，就是每天努力工作。但我百份百接受，你不可能在球會只是二號門將，在國家隊卻是正選。」迪基亞近年在曼聯常有大意失誤，現在有軒達臣這名具競爭力的挑戰者，就看領隊蘇斯克查仍相信迪基亞的實力，還是看重軒達臣這後起之秀。

[Busconcamp]

[Busconcamp]

迪基亞提醒你　曼聯斟緊利古朗



曼聯簽入雲迪碧克之後，下一個目標係邊個？呢個問題可以問迪基亞，佢最近喺社交網上載一張自拍相，係同西班牙隊友利古朗合照，相片一出引起魔迷無限想像，因為利古朗正係傳聞中紅魔下一個目標。

利古朗上季由皇馬外借到西維爾，協助球隊贏得歐霸盃冠軍，呢位24歲左閘捧盃後向傳媒話，下季去邊度踢，連佢自己都唔清楚。施丹已表明皇馬冇預佢，西維爾只想續借而唔買斷，呢個時候，盛傳曼聯開價3000萬歐元(約2.75億港元)收購利古朗，等待皇馬答覆。

曼聯希望簽入利古朗，以加強左閘位置實力，事關勞基梳爾成日傷，班頓威廉斯又後生得滯；迪基亞搵佢合照，魔迷一口咬定係有啲嘢嘅。

[Busconcamp]

英格蘭爆醜聞　兩新星帶女上房犯禁遭革扯



2位英格蘭新星菲爾科頓及格連活特，被揭發上周六(5日)晚作客冰島賽後，帶女仔返酒店玩樂，2人已涉嫌違反疫情下一系列禁令，英格蘭大軍亦將2人隔離，唔准加入大隊練波備戰對丹麥，英軍主帥修夫基其後在記者會中確認，菲爾科頓與格連活特已被國家隊開除。

英國《太陽報》報道，冰島傳媒取得一段相信是英格蘭大軍在冰島酒店內嘅片段，片段由2個女仔發布，片段中影到英格蘭2位新星菲爾科頓與格連活特在酒店中嘅情況，當中附有一段對話：「我哋去酒店房間，會見到邊個呢？」另一人回答：「係格連活特，我真係好緊張，好X緊張呀。」

2位英軍新星私自與外界人士接觸，已經違反英格蘭國家隊規定。按今次歐國聯條例，英格蘭到訪冰島比賽，獲得豁免毋須隔離5天檢疫，條件是球隊人員不得與外界人士接觸，事件曝光後，英格蘭足總已將2位球員隔離，不得參與球隊活動。

當地傳媒搵到今次事件嘅2位女仔，其中一位向傳媒透露：「我真係唔想畀麻煩佢哋，但我哋真係唔知有防疫禁令，我同佢哋其中一個接觸都有幾日時間，佢哋冇講過唔可以影相。」

年僅20歲嘅菲爾科頓及18歲嘅格連活特，喺今次國際賽檔期首次入選大國腳，上周六作客冰島首次上陣，效力曼城嘅菲爾科頓正選彼甲，至於曼聯新星格連活特於78分鐘後備入替隊長哈利卡尼，2人均被視為英軍超新星，無論在球會及國家隊，前途無可限量，點知首次為國家隊征戰就出事，被踢出隊。

菲爾科頓兩年前已同女朋友Rebecca Cooke生咗個仔，至於格連活特就喺今年5月同女友Harriet Robson分咗手。

[Busconcamp]

英超唔畀賽事延期　湊夠14個就要踢



上個月英超季前嘅新冠病毒測試中，即使喺12支球隊入面發現咗14宗確診個案，但係英超賽會都無意推遲賽季，近日仲通知20支球隊，即使疫情再反彈，佢地都要根據賽程湊夠人數繼續踢落去。

《每日郵報》透露，英超賽會決定2020/21賽季將會按照原定賽程完成，所有球隊因任何理由，而提出將賽事延期的申請都會被拒絕，除非球隊可以上陣嘅1隊球員少過14人。根據慣例球隊需要喺U21青年軍搵球員去湊夠比賽人數。

如果有球隊以任何理由拒絕出賽，英超賽會將會交畀獨立紀律小組進行裁決，處罰措施由警告、罰款到扣分不等。英超賽會目前將下年5月23日定為英超煞科日。

受到今次英超賽會嘅強硬態度，預計大量後備同年青球員，甚至一班預備組小將都會有更多嘅上陣時間。

另外有傳熱刺正準備喺對愛華頓嘅英超開鑼戰，開放4000個最貴嘅座位，試行畀球迷重新入場。

除咗英超之外，歐洲足協早前亦表明今季嘅歐聯同歐霸將會如期進行，而要求甚至比英超賽會更苛刻。歐洲足協規定，如果兩支球隊都有13個球員可以上陣，球賽就會如期舉行。另外如果任何一支球隊唔可以組成一支13人嘅陣容，佢哋將會喪失比賽資格並即時判輸3:0。

[Busconcamp]

科頓公開道歉　「綠木」刪twitter潛水



英格蘭兩大新人王菲爾科頓同格連活特爆出「帶女返酒店」醜聞，已即時被領隊修夫基踢出國家隊，已婚兼且已做爸爸嘅曼城20歲中場菲爾科頓，事後發出聲明公開道歉，以至18歲嘅格連活特就選擇刪twitter「潛水」。

菲爾科頓喺道歉聲明入面話：「關於我喺冰島嘅行為，我想向修夫基、英格蘭隊友、職員、球迷、我嘅球會同家人道歉。當我收到英格蘭嘅徵召，第一個反應就係覺得無上光榮，我係年輕球員，仲有好多嘢要學，但我知道自己代表英格蘭同曼城係有好大責任，喺呢個情況下我作出咗好錯嘅決定，我嘅行為未符合大家對我嘅期望，同時違反咗保護我同隊友嘅防疫守則，依家我失去出戰丹麥嘅機會，實在令我心痛，今次錯誤判斷令我上咗寶貴一課。」曼聯前鋒格連活特暫時未有回應，只係將自己嘅twitter帳戶刪除。

[Busconcamp]

雲迪碧克冇貨交　畀球迷串仲差過車仔後備



荷蘭剛於歐國聯以0:1不敵意大利，新加盟曼聯嘅中場雲迪碧克今仗正選上陣，可惜表現強差人意，更於57分鐘被換走。

雲迪碧克今場出任進攻中場，全力支援單箭頭迪比。雖然傳球命中率達到100%，不過全場只交出5次傳送，比荷蘭其他中場至少低出7次。除此之外只有1次過人成功同射門中框，仲有2次畀對手偷到波，連累荷蘭上半場控球率不足4成，更只有1次射門中目標。

賽後雲迪碧克更成為球迷批評嘅對象，有車路士球迷喺社交網站發言，將佢同今場同樣正選上陣，意大利中場佐真奴費路比較：「雲迪碧克比我哋球隊第6中場佐真奴仲要差!」

雲迪碧克即將啟程返英國，準備新一季英超賽事，曼聯中場下季靠哂依位荷蘭小將，希望佢可以儘快調整返自己狀態。

[Busconcamp]

曬曼聯黑白間波衫　萬人迷：我好鍾意



曼聯第二作客波衫，終於由萬人迷碧咸公告天下，佢喺社交網上載相片，着起呢件打破傳統嘅紅魔戰衣，仲留言話：「我好鍾意呢件曼聯波衫。」

對於曼聯呢件新波衫，球迷反應分別好大，唔少球迷話接受唔到，感覺好怪，更有球迷整咗幅惡搞圖，話係囚犯衣服，畀哈利馬古尼着就啱晒，不過由碧咸現身親自示範，大家似乎都接受到，仲有球迷話：「全靠你拯救咗件波衫。」

講起碧咸，英國傳媒《太陽報》爆料，原來今年3月初碧咸夫婦喺美國出席各項活動期間，感染到新冠肺炎，而且係整個團隊都中晒招，相當大鑊，但當事人一直將事件保密，不動聲色，直至患病者康復後，碧咸夫婦就致力抗疫宣傳，提醒世人防範病毒。

[Busconcamp]

【唔做水魚】蘇B高呼使錢要精明 辛祖入「魔」凍過水？



曼聯今夏已簽下荷蘭中場雲迪碧克，但外界仍催促他們應盡快增兵，以加強爭冠實力，惟領隊蘇斯克查暗示球會沒有無窮無盡的財力，去花數以億計羅致一位球員。

今個夏天，曼聯再與不少球員扯上關係，當中他們相中已久的查頓辛祖，可能要過億英鎊才能說服多蒙特放行，最近又傳利古恩及阿歷士迪尼斯也是目標。不過，蘇B也堅定表示球會不會為了羅致球員就「有求必應」，絕不會超出他們認為該球員所值的預算。

「我們經常研究如何讓陣容變得更強大，能否帶入適合我們級數、質素及個性的球員。」他續謂：「不過，今年是奇怪的一年，不是每間球會都能花上數百萬或數千萬買人，而且在一支球隊中若擁有太多新兵，從來都不易，可能需要一段時間來融入，我看到有些球會迅速大事增兵，去根治他們的問題，過程中充滿自信，我們也要改進，但要看得更準確所需球員的條件如何。」蘇B重申在轉會窗關閉前，沒有限自己要簽入多少新兵，就好像他當年能在球場上射入20球，也不是他一早設定的目標。

對於能購入雲迪碧克，蘇B似乎已非常滿意：「當我們簽到波基斯費南迪斯（B費），知道這類球員是我們欠缺而需要的，而雲迪碧克也一樣，我們知道他會融入球會的文化，帶領我們進步。我們知道他能入球，球隊中場就是欠缺了這種能力，這就是能挑戰冠軍的條件。」

另外，英媒指缺席曼聯今周操練的中堅基斯史摩寧，正準備啟程再往意大利，正式轉會上季借用他的羅馬，轉會費約1,800萬鎊（約1.8億港元）。

[Busconcamp]

「綠木」變一碌木　格連活特被勒令獨操



被踢爆「帶女返酒店」醜聞嘅曼聯新星格連活特，自從被英格蘭國家隊踢走之後，禮拜四返到球會復操，但歸隊之後下令要自己獨操，唔畀同隊友一齊練。

「綠木」格連活特同曼城嘅菲爾科頓喺本月初隨英格蘭作客冰島之後，帶女仔返酒店，二人已涉嫌違反疫情下一系列禁令，即被國家隊開除。「綠木」禮拜四回歸曼聯即被領隊蘇斯克查「照肺」，據英國傳媒報道，呢位18歲新星只能喺蘇帥同一隊球員離開之後，先可以到訓練場操練，官方嘅講法就係格連活特需要隔離，同埋要做新冠肺炎病毒測試之後，檢測結果無問題才能重返球隊。

曼聯周末友賽阿士東維拉，「綠木」肯定榜上無名，至於英超開鑼之後嘅紅魔首戰19號對水晶宮能否上陣，則有待決定。

[Busconcamp]

格連活特終於道歉：我係抵死



英格蘭兩位新星菲爾科頓同格連活特日前出戰歐國聯期間，被爆出「帶女返酒店」醜聞，即時被領隊修夫基踢出國家隊，曼城20歲中場菲爾科頓早前已率先發聲明公開道歉，而一度「潛水」嘅18歲曼聯前鋒格連活特亦走出來承認責任，透過曼聯官網發出公開信，為自己嘅行為道歉。

格連活特喺信中話：「我為自己嘅行為進行反思，必須為自己所造成嘅尷尬後果，向大家道歉。我違反咗為保護球員、工作人員同公眾而制定嘅防疫規定，呢種係不負責任嘅行為。我特別要向修夫基道歉，佢曾經非常信任我，但我令佢失望，為英格蘭效力係我一生中最驕傲自豪嘅時刻之一，對於犯下呢個巨大錯誤，我只能怪自己。」

格連活特同時向家人、球迷、曼聯及英格蘭國家隊道歉，並承諾會從中吸取教訓。

[Busconcamp]

曼聯斟辛祖有突破　達成個人協議



英國傳媒《BBC》報道，曼聯斟介查頓辛祖出現突破，與球員達成個人條件及經理人佣金協議，餘下時間就係要說服多蒙特放人。

曼聯同辛祖斟介持續超過一年，情況一直膠着，球迷都睇到麻木，紅魔鬼希望喺10月5日轉會窗關閉前完成交易，據報查頓辛祖本人願意轉投曼聯，周薪達到25萬鎊，屬一線隊員水平。

辛祖所屬球會多蒙特一直堅持轉會費1.08億鎊(約10.8億港元)，曼聯方面則堅持固定轉會費唔超過8000萬鎊，不過紅魔鬼願意在浮動條款上加碼，並以分期付款方式說服多蒙特答應交易。

[Busconcamp]

重開觀眾席無期　英超面臨損失125億



英超將於周六(12日)晚開鑼，由於歐洲爆發新冠肺炎第2波疫情，令英超原本10月重新容許球迷入場睇波嘅計劃落空，英國《太陽報》指如果繼續無法重開球場觀眾席，英超20間球會將面臨12.5億鎊(約125億港元)損失。

英超行政總裁馬斯達斯表示，英超各球會上季已經因為受新冠肺炎打擊，損失7億鎊，原本計劃10月開始，開放球場25%座位畀球迷入場，將新一季損失減至5.47億鎊，據悉曼聯打算主場比賽畀12,000人入場，但依家成事機會非常渺茫。

馬斯達斯指以往有球迷入場睇波，平均每場英超可以創造2,000萬鎊經濟效益，賽會要求重開觀眾席，都係希望為國家經濟作出貢獻，成為重啟經濟活動嘅模範，閉門比賽對球會及國家經濟都會造成重大損失，英超已經做好準備工作，畀球迷入場，但一切都要等政府批准。

屋漏偏逢連夜雨，由於英國疫情緊張，英國政府計劃削減畀各級聯賽嘅檢測資源，調配去其他領域，可能令英格蘭球會面臨檢測困難，想取消閉門比賽，就更加無望。

[Busconcamp]

【英超前瞻】曼聯阿仙奴想做王？問過摩帥未



英超仲有兩日開咧，每季球迷都會問，昔日兩大班霸曼聯同阿仙奴，幾時先重現王朝？今季喺少帥蘇斯克查及阿迪達領軍下，兩雄係咪真正踏上復甦之路？熱刺上季交由名帥摩連奴接手，但「寸王」保守嘅風格，係咪呢支老牌勁旅打破多年無冠嘅鎖匙呢？

曾13度稱霸英超嘅曼聯，自蘇斯克查領軍後重回基本步，抄足恩師費格遜秘方重用年輕小將，上季早段捱過低潮期後，季中重金購入波基斯費南迪斯，連同復賽後保羅普巴傷愈歸隊，「紅魔鬼」打出一段19場13勝6和強勁走勢，最終殺入前4重獲歐聯入場券。

紅魔火力強防線弱

曼聯基本陣容成形，前線拉舒福特、安東尼馬迪爾及格連活特日漸成長，中場除波費及普巴外，新加入擅打「Box to Box」嘅荷蘭國腳雲迪碧克，呢個組合集齊活力、創造力及逼搶力，令人期待。不過曼聯防線始終欠穩，門神迪基亞近年不時蝦碌，回巢嘅甸恩軒達臣能否頂住豪門壓力，重演上季高水準，將係曼聯能否更上一層樓嘅關鍵。

阿仙奴上季聯賽只排第8位，係球會25年來最曳成績，不過自西班牙少帥阿迪達季中接手後，無論係前場壓迫抑或戰術細節嘅執行，都有大幅改善。上季首次領軍就連捧英足盃及季前嘅社區盾，足見「兵工廠」已重回正軌。「達Sir」同樣重用年輕小將，布卡約沙卡及尼基迪亞等上季一鳴驚人，今季「斬多兩味」簽入法國年輕中堅威廉沙列巴及加比爾馬加希斯，免費來投嘅韋利安經驗豐富，加上高效隊長奧巴美揚，絕對有力爭入前4。

熱刺莫財難為摩連奴

至於另一倫敦勁旅熱刺，上季辭退普捷天奴請來摩連奴領軍，就係想打破長達12年嘅無冠困局。不過熱刺人腳參差，防線艾歷迪亞及奧里亞不時出洋相，令「寸王」不得不走回頭路，重拾穩守突擊嘅功利打法。摩連奴奪冠無數，單係英超都拎過3次，但佢過往多數有「無限金錢」支持，嚟到熱刺就冇呢支歌仔唱，班主利維講明「要買人必先賣人」，「寸王」今夏只係收購中場悍將賀積查治及狼隊右翼衞馬特杜靴迪，未有為哈利卡尼及孫興民增添具分量嘅替補，上季兩人受傷就令球隊一度死晒火，加上熱刺仲有歐霸外圍賽包袱，隨時影響季初聯賽成績。

[Busconcamp]

雲迪碧克成「魔」首操！處子戰日期已定



曼聯早前用4,000萬鎊收購阿積士中場雲迪碧克，呢位23歲新星為荷蘭國家隊出戰完歐國聯之後，迅速向曼聯報到，並參加首課操練，預料可於9月19日晚曼聯今季首場英超對水晶宮上陣。

雲迪碧克抵達卡寧頓訓練基地之後，領隊蘇斯克查為佢作出球隊簡介，並逐一介紹隊內職球員，由於部份球員踢完國際賽未歸隊，主要由隊長哈利馬古尼招呼佢，並進行簡單操練。
雲迪碧克上場歐國聯為荷蘭對意大利，被指表現欠佳，甚至話曼聯又做咗「水魚」入錯貨。不過，雲迪碧克亦可能只係留力為曼聯搏殺，各位曼迷唔好太早下定論。

蘇斯克查話2015年帶領莫迪喺歐霸盃對阿積士，已經留意雲迪碧克，因為佢當年入咗1球，打和1比1。蘇B好喜歡雲迪碧克喺球場上嘅感染力，又指雲迪碧克可以提升曼聯中場入球能力，呢方面係曼聯一直所缺乏嘅元素。

曼聯上月中先至踢完歐霸盃4強，獲得額外一星期休息時間，要等9月19日晚先至會踢今季首場英超，主場對水晶宮。在此之前，曼聯仲會同阿士東維拉踢熱身賽，未知雲迪碧克到時會唔會上陣。

[Busconcamp]

普巴戰勝肺炎歸隊！可為曼聯踢首場英超



曼聯收到好消息，早前感染新冠肺炎嘅中場球星保羅普巴已經康復，並返回訓練基地歸隊操練，可望於9月19日晚曼聯今季首場英超上陣，主場對水晶宮。

保羅普巴喺上月尾確診新冠肺炎後，立即自我隔離，因而缺席法國2場歐國聯賽事。根據英國《每日郵報》報道，呢位27歲中場經過最新檢測後，證實對病毒呈陰性反應，並立即歸隊操練。

保羅普巴嘅老婆Maria Zulay上星期已經喺社交網上話，佢哋夫妻服用完維生素D之後，感覺已經好好多。由於曼聯有份踢歐霸盃4強，獲準延遲一星期展開新一季英超，所以9月19日晚先至會登場，出戰水晶宮，保羅普巴康復後，仲時間備戰。

曼聯球迷都好期待，保羅普巴、波基斯費南迪斯、雲迪碧克組成嘅黃金中場可以同時上陣。

另一位曼聯中場桑馬達經過檢測後，亦由陽性轉為陰性，佢早前由西班牙返回英國之後，一直自我隔離，隔離時期即使結束，有望幾日之後歸隊。

[Busconcamp]

曼聯兩新兵正選變黑腳　曼迷叫再簽人



英超周六(12日)晚開鑼，但由於曼聯同阿士東維拉首周英超輪空，所以兩支球隊決定趁機進行季前熱身賽，最後曼聯喺今季唯一場熱身賽作客以0比1不敵阿士東維拉，引起球迷批評。

始終係熱身賽，加上球員啱啱踢完國際賽，曼聯今場選擇畀部份主力休息，球星波基斯費南迪斯、保羅普巴、安東尼馬迪爾等全部缺陣。

正選陣容入面只有拉舒福特、勞基梳爾同隊長哈利馬古尼係上季踢得比較多，其他球員好似恩哈路、麥湯米尼以及連格等上季都好少上陣，後備席上亦以占士加拿、班頓威廉斯等年輕小將為主。值得一提，兩位新兵雲迪碧克同甸恩軒達臣同時正選上陣。

結果開波16分鐘，阿士東維拉由新加盟嘅前鋒奧尼屈堅斯攻入全場唯一入球。雖然曼聯以0比1落敗，但主帥蘇斯克查對球隊表現大致滿意：「上半場球隊發揮唔錯，創造咗好多機會，今場熱身賽對我哋好重要，因為距離第1場聯賽開始只有1個星期，好明顯見到有部份球員需要多啲時間操返起狀態。」

對於球隊今夏兩個新加盟球員，蘇斯克查亦讚不絕口：「甸恩軒達臣表現出一定霸氣，佢嘅表現相當適合做曼聯門將，前景令人興奮。雲迪碧克係一個空間創造者，通過傳球同走位為自己創造空間，我對佢嘅表現感到非常滿意。」

不過紅魔鬼球迷就唔係咁樂觀，有啲仲係社交網站取笑球隊：「呢場就係典型曼聯對弱旅嘅局面，再唔簽人，之後成季都會係咁！」曼聯周日凌晨(20日)英超將會主場面對水晶宮。

[Busconcamp]

綠木又做錯嘢　今次喺屋企吸笑氣



曼聯小將格連活特繼之前國際賽期間，帶女仔上酒店房違反隔離令。近日英國《太陽報》又爆出一段獨家片段，影住「綠木」係曼徹斯特一間公寓吸入笑氣，個人形象再受影響。

依段片係屬於幾個星期之前，球季剛完結，由著住爛牛仔褲嘅格連活特女友人拍攝，入面可以清楚見到當時成身黑色T恤、短褲同戴住帽嘅格連活特正幫汽球注入大量一氧化二氮(笑氣)，並即場將氣體吸入，另外枱面仲見到有兩支充滿大量氣體嘅Smartwhip充電器，睇嚟佢個日都吸咗唔少。

格連活特隨即透過曼聯發出聲明：「我承認自己的判斷力很差，不過我已經意識到當中健康風險，我強烈勸告其他人不要效法我這樣做。」「作為一個18歲的孩子，我一直在學習，我決心交出職業球員應該有的態度和信念，以回報教練對我一直的支持。」吸入笑氣可以引發心臟病同腦部損傷，而長時間吸入更會導致記憶力減退以及維生素缺乏症。

阿仙奴法國前鋒拿卡錫迪今年5月，亦曾經揭發喺家中吸入笑氣，當時佢被指違反球隊紀律，幾場冇得踼正選，仲差啲面臨被出售命運。

「綠木」上季先正式上位，今季已經穿上傳奇球星傑斯嘅11號球衣，畀曼聯同球迷寄予望厚，希望佢可以吸取今次教訓，唔好再淨係掛住玩啦。

[Busconcamp]

精明！曼聯1850萬鎊簽到最強帶刀侍衞



曼聯領隊蘇斯克查一直打算簽入1位左後衞，依家收到好消息，葡超勁旅波圖計劃減價出售即將約滿嘅左閘阿歷士迪尼斯，預料1,850萬鎊就有交易，據悉呢位27歲巴西國腳嘅經理人已經飛到英國，同曼聯代表展開談判。

阿歷士迪尼斯同波圖嘅合約將於明夏屆滿，佢已經拒絕續約，等到明年1月就可以同其他球隊傾自由身加盟事宜。根據葡萄牙《球報》爆料，波圖為免人財兩失，決定割價求售，由原本2,250萬鎊減至1,850萬鎊。

阿歷士迪尼斯上季為波圖各項賽事上陣49場，射入13球及12次助攻，技術攻守兼備，1,850萬鎊轉會費實在抵到爛。由於曼聯左閘勞基梳爾經常受傷，20歲小將班頓威廉斯水準不穩，蘇斯克查的確有需要簽入1位左後衞，有望同波圖達成協議。

除咗曼聯之外，巴黎聖日耳門、狼隊都有興趣收購阿歷士迪尼斯，紅魔鬼係出手就要快啦。

[Busconcamp]

#轉會消息

曼聯對收購利古朗一事已考慮一段日子，曼聯的報價將不會高於三千萬歐元。雖然有傳皇馬希望收到最少三千萬歐元的轉會費，但隨著時間流逝，皇馬或會改變立場。

皇馬希望於是次轉會中加入回購條款，但曼聯並不接納此安排。而曼聯開出的個人待遇並不成問題。利古朗本人希望加盟曼聯，曼聯將於本週內作正式報價！

[Busconcamp]

曼聯華裔新星起底　真名叫陳達毅？



荷蘭小國腳鍾達希被視為曼聯明日之星，佢今夏被外借去德甲雲達不來梅，表現備受期待。20歲嘅鍾達希有華人血統，過去有報道話佢祖先係中國人，當年因為逃避戰亂先至移居到荷蘭，媽媽係第三代華人，近日專門研究華裔球員嘅權威Jallo_Tang喺微博爆料，經過佢多番查證之後，發現鍾達希其實係姓陳，全名叫陳達毅。

Jallo_Tang表示，鍾達希嘅太公係江門新會人陳友(Chong Yow)，佢喺1940年因戰亂移居荷蘭，並喺當地結婚並生咗6個仔女，其中第4個仔陳富秀(Chong Fook Shau)就係鍾達希外公。Jallo_Tang喺2011年開始研究華裔球員，曾經發掘出李可、侯永永等有中國血統嘅國腳，係中國國家隊近年歸化計劃嘅一大功臣，佢喺2014年已經訪問過鍾達希，並且得到陳友嘅相片同登記文件，可信性頗高。

[Busconcamp]

曼聯11人上陣成疑！連格或擔正



曼聯將於周六(19日)深夜出戰今季首場英超，主場對水晶宮，但紅魔鬼爆出不利消息，根據英國《曼徹斯特晚報》爆料，曼聯有11位球員受到各種原因影響，可能缺陣今場比賽，領隊蘇斯克查甚至可能焗用一度面臨被踢走嘅連格擔任正選。

曼聯因為有份踢上屆歐霸盃4強，獲得延後1星期出戰英超，但備戰時間仍然不足，多位球員之前未能如期歸隊操練。

保羅普巴早前因為確診新冠肺炎，需要隔離，周一(14日)先至歸隊。尼曼查馬迪、桑馬達、費特洛迪古斯、雲比沙卡、艾歷拜利都因為由外地返回英國，需要隔離14日，同樣周一(14日)先至復操，意味呢位6人只有5日時間訓練。

中場球星波基斯費南迪斯因為陪太太生BB，上周六(12日)先至歸隊，同樣未必有足夠狀態應付比賽。

新星格連活特早前為英格蘭服役期間「帶女返酒店」被踢出國家隊，佢返回曼聯後，只能獨自操練，狀態成疑。杜安薛比仍然養傷，菲爾鍾斯剛傷愈，估計未可以上陣，後備門將羅美路仲未歸隊，好可能轉會。 比較確定會正選上陣嘅球員得拉舒福特、哈利馬古尼、勞基梳爾，新兵雲迪碧克亦可能擔正。

[Busconcamp]

熱刺截劫曼聯簽巴利　「大聖爺」回歸英超



「大聖爺」加里夫巴利即將回歸英超！據英國同西班牙媒體報道，曼聯同熱刺都運作借用皇家馬德里球星加里夫巴利，不過消息指熱刺喺英國時間周二(15號)晚談判取得重大突破，好大機會贏出呢場爭奪戰，加里夫巴利經理人亦放風：「巴利仍然愛熱刺，係佢想去嘅地方！」

31歲嘅加里夫巴利喺2007年至2013年效力熱刺，之後轉會皇馬贏過4次歐聯冠軍，不過近年已經淪為球隊「蛀米蟲」，30萬鎊周薪亦係皇馬一大負擔。據報曼聯同熱刺近日先後出手，「紅魔鬼」知道簽查頓辛祖機會渺茫後，已將目標轉移借用加里夫巴利，不過熱刺亦都提出斟介，而且更有望遲嚟先上岸。

英國《每日電訊報》消息指，熱刺願意將迪利阿里外借皇馬1季作為交易條件之一，24歲嘅迪利阿里一直係皇馬會長皮里茲心儀球員，皇馬過去亦曾經斟介，呢個交換借用方案有機會成事。加里夫巴利經理人巴列納接受《BBC》訪問亦證實：「巴利仍然愛熱刺，我哋(熱刺、皇馬)傾緊，(熱刺)係佢想去嘅地方！」

除咗加里夫巴利之外，熱刺據報亦非常接近完成收購皇馬左閘利古朗，無獨有偶，呢位23歲新星近期亦係曼聯熱烈追求嘅目標，不過摩連奴再一次截劫成功，據報轉會費高達2,750萬英鎊。轉會權威記者Romano透露，皇馬要利喺利古朗合約內加入「回購條款」，但係曼聯拒絕，而熱刺就答應要求，令轉會更易成事。

[Busconcamp]

雲迪碧克對於加入曼聯後的感覺

「球隊每位都樂意幫助我，讓我有家的感覺，很不錯，給了我比賽的信心。一個像大家庭的球會，從我來這裡的幾秒鐘就已經感覺到了。奧脫福是一個了不起的球場。最好的事情是球迷也在那裡，我急不及待地想在他們面前比賽。我希望很快能在球場上見到他們，因為對於我們來說，能將球迷帶到我們身邊時，他們會給我們很大的力量。」

「我看過很多曼聯的賽事，因為很多荷蘭球員曾經在這裡作賽，那時還是個小孩，在那裡看到荷蘭球員包括白蘭特，雲達沙和雲佩斯，感覺很美好。他們贏了多個冠軍，曼聯一直踢著漂亮足球，這總是樂於看到的。我急不及待和隊友一起比賽。陣中有很多年輕球員和我年齡差不多，對我來說是一個良機去幫助球隊取得佳績。能與這班球員一起比賽令我獲益良多，你可以向他們學習。每位球員都有自己的特質，能從中偷師。我很高興能和他們一起。這就是我想要的，我希望我們能夠為球會創造一個非常美好的未來。」