曼聯躉紅魔鬼地帶[VOL.95]各項賽事三連勝,入球眾數,重上正軌？

[Busconcamp]

英超6.17重開　頭炮曼城對阿仙奴



英國傳媒報道，英超重開日期敲定在6月17日，屆時將會上演2場比賽，分別係曼城主場對阿仙奴，以及阿士東維拉對錫菲聯。

英超恢復操練剛踏入第2步，就係允許球員有限度密切接觸，可以剷波及攔截，很快就傳出英超重開日期是6月17日(周三)，2場俱為補賽，其中曼城主場對阿仙奴一仗，正是因為阿仙奴在歐霸盃曾經接觸過奧林比亞高斯確診新冠肺炎的班主，賽事因此叫停，事後證實做得啱，因為阿仙奴領隊阿迪達亦於其後確診。

完成2場補賽後，6月19日(周五)及緊接的周末，便會全面復賽，英超賽會希望能於8月1日完成全部賽事，足總盃決賽將會在聯賽結束後1星期上演，然後就讓需要應付歐洲賽的球隊參加歐聯及歐霸。

[Busconcamp]

連格轉死性懺悔：我真係冇盡力



因為長期冇入波、冇助攻而被球迷嘲諷為「零格」嘅曼聯中場連格，突然轉死性作出懺悔，承認冇專注於足球，導致迷失自己，嚴重影響表現。

連格接受傳媒訪問時話，承認自己太得意忘形，忽略最基本事情：「之前每季開咧之前，我都會為自己設定一個目標，但因為某些原因，上季已經冇咁做，我承認冇將全部心思放喺比賽上，亦冇全力以赴，好似唔係真正嘅我。」連格口中嘅「某些原因」可能係指佢成名之後，開始驕傲，掛住玩樂，又扮潮流達人，所以搞到分心。

不過，連格亦表明，英超重開之後，自己一定會修心養性，以正確態度比賽，有信心可以重拾顛峰時期水準。至於最終是否成真，大家拭目以待。

[Busconcamp]

經理人：恩哈路「續借」曼聯接近成功



【Now Sports】經理人透露，外借到曼聯的前鋒恩哈路有望將借用假延長，離開「傾掂數」只欠最後一步。

由上海申花外借到曼聯的恩哈路（Odion Ighalo）原本今天便要返回中國報到，但他為曼聯上陣8場比賽中攻入4球，這隊英超豪門原本已希望延續外借期；另一方面各國之間因為防備新冠疫情而限制出入境，亦令上海申花召回恩哈路的態度軟化。其經理人安尼基指雙方球會正就此事磋商：「我們與曼聯接近談妥延續外借的事宜。如果成事的話，恩哈路將留在曼聯直到下年1月。」

消息指，上海申花原本無意延續外借，更指唯有曼聯方肯直接收購恩哈路方會為外借延期開綠燈，作價高達2000萬鎊。但此刻申花不再堅持，雙方只要談妥了外借的費用，恩哈路即有望為「紅魔鬼」再披戰甲。

[Busconcamp]

拉舒福特點先能夠更上一層樓



1997年出世既拉舒福特，轉眼間都即將踏入23歲生日。至今為曼聯上陣總共201場，攻入64球。由方丈提拔上一隊既福仔，原來唔經唔覺已經為曼聯效力咗咁耐，睇嚟都開始要改口叫佢做福佬喇。今季雖然有三分一時間養傷，有三分一時間抗疫，得三分一時間為曼聯上陣，不過喺英超既數據都唔差，錄得14個入波以及4個助攻，抖咗咁耐仍然仲係球隊既神射手，絕對值得稱讚。雖然喺數據上，福仔既表現唔算太差，但喺足球世界入面，數據只不過是一個數字，最重要都係球員對球隊既幫助有幾高。拉舒福特無論喺名氣上、天賦上甚至係人工上，都算係世界級。但奈何佢既表現仍然同世界級呢三個字，有著一段距離。今次，小編就同大家講講拉舒福特到底喺邊方面需要加強，邊方面需要改善。

拉舒福特 (Marcus Rashford)
年齡：22歲 (1997年10月31日)
身高：180CM
國籍：英格蘭
慣用腳：右腳
位置：左翼、中鋒

雖然今季喺英超數據上，福仔有14個入球，對一個翼鋒或者係前鋒嚟講，算係一個唔錯既數據。但事實上有5個入波係憑住十二碼獲得，而講到射門次數就錄得74次。係全英超第六多既球員，但比其他球員少踢七場波。證明拉舒福特射門非常多，但入波就真係唔算十分多。補充少少，射手榜喺拉舒福特以上既6位球員，分別係華迪、奧巴美楊、沙拿、阿古路、丹尼恩斯同文尼，只有沙拿射門係比福仔多。證明福仔有好多射門係轉化唔到成為入球，難聽啲講姐係浪射。

身為球隊既入球重心球員，射門轉化入球率咁低，確實係要改善一下，尤其是曼聯本來已經唔係一隊好易做到攻勢既球隊，唔似曼城、利物浦咁。如果有咁多射門係冇辦法轉化成入球，對曼聯嚟講真係幾傷。不過，小編都用另一個數據幫福仔平反下，就係今季中柱中眉既次數，拉舒福特至今係英超之冠，總共6次。如果計埋落去入球到，佢既入波都唔少既，甚至已經喺射手榜排第一名。但好老實，入唔到波就係入唔到，計呢個數據都係無謂，所以福仔喺射門準繩方面，確實都要落多少少功夫。因為要成為一位世界級既球員，最重要就係穩定性，運氣差絕對唔可以係一個藉口。

而另一方面小編認為福仔要進步既就係佢既罰球。拉舒福特既射罰球方式同師兄C朗非常相似，如果能夠將呢個技巧練得十分熟練，絕對係一個殺手鐧。因為直至今時今日，好多門將面對呢啲高飛曲墜既射門，都顯得相當狼狽以及吃力。就算皮球唔能夠直接送入網，都會令到門將輸角球甚至搞到門前一片混亂。然而，今時今日拉舒福特既罰球，比大家既感覺都會係一飛沖天多過射得有威脅，希望喺未來既日子，可以有多啲好似佢對車路士射嗰球咁靚既世界波睇。

再講要改善既就係佢既決定性。講到決定性其實佢問題就唔係十分大，但係喺某啲關鍵既情況下，佢既決定始終都未算係十分成熟。喺電光火石之間好多時一個決定就會改變咗整個攻勢，甚至係整場賽事。雖然喺呢方面，佢未算差得太犀利，但係如果要再上一層樓，喺決定性嗰方法要再改善多少少。

但講到最最最大問題既，一定係未遇到一個令到佢進步得好快既教練以及球隊。事實上曼聯雖然現時有好多年青球員，但好多球員都只係憑住佢地本身既潛力以及比賽經驗而進步。相反，曼城既史達寧上一季進步神速最大功神一定係哥帥。哥帥最值錢既地方除咗係因為戰術大師之外，就係好能夠將球員提升到另一個階段。但可惜現時蘇斯克查仍然好似未有呢個功力。加上曼聯喺近年嚟表現一直麻麻，入波又唔多，勝仗又唔多又唔穩定。

講到呢到，大家可能會覺得球隊點會影響番球員。其實真係會㗎，如果一隊波能夠贏得多，入得波多。佢既進步以及身價都會容易啲提升，情況就好似多蒙特既夏蘭特咁。如果當初佢加盟既係曼聯而唔係多蒙特，嚟到曼聯既表現又唔係十分耀眼。除咗影響咗佢本身咁順既腳風同信心之外，佢既身價都會下跌得好快，就好似盧卡古咁。

講咗咁多福仔要改善既野，都講番啲福仔做得幾好既幾方面。第一點要讚既就係佢既速度以及盤扭技巧。作為一個翼鋒，最重要嗰兩項福仔都做得唔錯。今季亦都有幾次代表作，能夠以一敵二甚至喺啲好窄既空間能夠運用佢既技巧擺脫對手。不過有時亦都係因為佢腳法好，令到佢好鐘意去挑戰對手或者上腳多咗，呢一方面就係好似小編啱啱所講，有啲唔夠成熟既表現。

其次拉舒福特既心理質素亦都非常好，呢一個論點可能大家會覺得冇咁重要。但要成為一個頂級既球員，一個良好既心理質素係必須既。20出頭既福仔能夠喺上季歐聯射入奠定性既一個十二碼，確實唔易。加上喺好多大戰入面，拉舒福特都唔會太過緊張或者冇表現，的確值得讚賞。呢一點都係小編曾經講過既一個重要既論點，就係穩定性。沒錯，穩定性同心理質素係掛勾㗎。因為有好多球員面對弱隊或者中遊球隊都會有好表現，但每當面對一啲重要既賽事或者一啲比較強既對手。佢地既表現就會差得好緊要，呢一方面有啲球員甚至踢到二十六七歲，仍然未能夠解決。但顯現地福仔喺呢一方面就做得幾好。

將近23歲既拉舒福特，前途仍然係無可限量。只要全心全意專注喺足球上面，心態正確的話，相信喺不久既將來會成為一個世界級球星。但球迷們又唔好期望太大，始終呢個世界咩都可以發生。好似尼馬當年都被譽為明日之星，到今時今日愈嚟愈差。好似當年話仲有廿幾年既香港，到今時今日原來已經過咗五十年。

喺未來既日子，仍然有好多未知之數。但只要心態正確，仍然堅持，相信有朝一日。總會成功。加油，拉舒福特！

[Busconcamp]

沙奧尼古斯證實　3日內公布「新球會」



馬德里體育會中場球星沙奧尼古斯，一直被傳係曼聯同曼城嘅收購目標，呢位西班牙國腳周日(31號)晚突然喺twitter貼相，表示會喺3日後親自公布「新球會」，貼文一出即時引嚟球迷無限猜想。西班牙《阿斯報》早前報道，曼聯打算出價7,000萬鎊收購呢位好波之人，沙奧尼古斯呢個貼文當然最受「曼迷」關注。

不過，依家喺疫情之下，所有豪門嘅轉會策略都係按兵不動，而且如果真係有驚天轉會出現，要隱藏3日冇走漏風聲等佢自己公布幾乎冇可能，所以普遍預計呢個貼文好可能係一則宣傳廣告，例如係佢成立一間「電競球會」、收購一間低組別球會或者加入一支慈善球會等等，宣布自己高價轉會機會近乎零。

[Busconcamp]

連格問2位舊隊友攞料！密謀去意甲搵食



曼聯中場連格因為長期表現欠佳，淪為大後備，已多次傳出球會計劃出售佢，英國《獨立報》爆料，指呢位27歲英格蘭國腳向2位前曼聯隊友基斯史摩寧及艾舒利楊格攞料，打算去意甲搵食，已傳AC米蘭有興趣簽入連格。

據悉，連格近日聯絡基斯史摩寧及艾舒利楊格，向對方打聽喺意甲比賽嘅情況，呢2位前紅魔鬼球員今季分別轉投羅馬同國際米蘭，表現大翻身，後衞基斯史摩寧更加獲得「羅馬馬甸尼」稱號，近期仲得到阿仙奴垂青，搵到事業第二春。

除咗基斯史摩寧及艾舒利楊格之外，另1位前曼聯球員盧卡古今季加盟國際米蘭之後，表現亦如有神助，喺意甲上陣25場轟入17球。上述3位前紅魔鬼球員嘅成功經歷都令到連格心癢癢，希望加盟意甲球隊，拯救足球事業。

事實上，新冠肺炎疫情爆發之前，已傳出AC米蘭有意簽入連格，佢真係有機會去米蘭同艾舒利楊格及盧卡古相遇。連格今季為曼聯於各項賽事上陣35次，射入2球及2次助攻，但入波都係來自盃賽，喺英超仍然食白果。

連格將於明年夏天約滿，曼聯無意同佢續約，預料好大機會今夏出售佢，以免人財兩失。

[Busconcamp]

死線前達協議　曼聯續借恩哈路半季



剛過去周日(31日)就係尼日利亞前鋒恩哈路與曼聯借用期滿，按規定佢要離開英國返回母會上海申花，事情峰迴路轉，兩間球會在死線前達成協議，申花答應曼聯續借恩哈路半季至明年1月31日，曼聯周一落實協議，恩哈路亦喺社交網向球迷報喜。

恩哈路加盟曼聯後好啱用，上陣8場交出4入球1助攻驕人數據，令紅魔曾想過將恩哈路正式買斷，不過上海申花開價2000萬鎊(約1.9億港元)轉會費，以及向恩哈路提供40萬鎊周薪新合約，成為雙方談判最大障礙，雖然恩哈路曾明言加盟曼聯唔係為錢，亦願意在曼聯收取13萬鎊周薪待遇，但同申花嘅條件差距太大。

上海申花在談判初期表現強硬，堅持要求恩哈路借用期滿就要返中超準備新球季，但近日出現變化，疫情擴散至全球之下，恩哈路想返回中國絕非容易，申花立場軟化，最終同意讓該位30歲射手留在曼聯。

獲得恩哈路續留半季，曼聯在即將重開嘅英超賽事，將可全力衝擊前4，爭奪歐聯入場券，仲有8月重開嘅歐霸盃，以及來季上半季賽事，恩哈路都可以繼續為曼聯爭勝，的確係好消息。

[Busconcamp]

普巴火併費南迪斯　令人興奮



保羅普巴同波基斯費南迪斯邊個勁啲？呢個問題好難搵答案，上周六(6日)曼聯在奧脫福進行隊內練習賽，普巴同波費各自領軍對陣，場面令人興奮。

訓練當日，普巴穿上曼聯主場波衫，亦係呢位法國中場3個月來再度於奧脫福亮相，至於波基斯費南迪斯就穿上曼聯作客波衫，兩位中場核心各領一隊作戰，領隊蘇斯克查安排11人對11人，作為英超復賽嘅重要演練。

蘇斯克查表示，好球員會自動走埋一齊，所以佢唔擔心普巴同波費合作唔到：「好球員通常都能聚在一起，佢哋肯定能夠，我哋已經有麥湯米尼、費特洛迪古斯、尼曼查馬迪，嚟緊仲有好多比賽令2人加強聯繫，新陣容令人興奮。」

[Busconcamp]

曼聯綁實天才左閘！加薪9倍



曼聯19歲左後衞班頓威廉斯今季表現出色，會方繼上年10月同佢續約至2022年之後，又再計劃同呢位英格蘭小國腳續約，今次更大手筆加人工至4萬鎊周薪，比現時多9倍。

班頓威廉斯上年10月為紅魔鬼上陣2次後，隨時續約至2022年，周薪為4000鎊。呢位新星把握勞基梳爾養傷，取得更多上陣時間，於各項賽事上陣26場，包括9場英超正選，而且愈踢愈好，並於作客錫菲聯一役，取得個人首個英超入球，被球迷封為「新艾雲」。

據悉，領隊蘇斯克查決定取消今夏簽左閘嘅計劃，並準備畀班頓威廉斯擔正，當然要為佢提供1份「正選級數」新合約。

不過，即使班頓威廉斯加薪後，都只係4萬鎊周薪，僅及勞基梳爾三份之一，甚至比達洛治少1萬鎊周薪，相信只要班頓威廉斯保持水平，之後應該仲有人工加。

[Busconcamp]

曼聯爆新冠肺炎恐慌　熱身賽對手領隊確診！



英超球會近期加強備戰，紛紛安排熱身賽嚟為聯賽重開做準備，曼聯原定周二(10號)約戰英冠球會史篤城拍跳，點知當球員陸續抵達比賽場地卡寧頓訓練中心，史篤城就收到周一進行嘅病毒檢測結果，證實領隊米高奧尼爾確診，對曼聯嘅熱身賽亦喺開波前一刻臨時取消。

史篤城官方聲明表示：「米高奧尼爾喺周一進行嘅病毒檢測呈陽性，佢之前5輪測試結果都係陰性，依家會立即進行自我隔離，同時間會透過視像去同職、球員交流，助教比利麥堅尼會暫時接手訓練工作。」據報喺確診消息出現前，史篤城大部分球員已經各自揸車去到卡寧頓訓練基地，不過根據賽會安全守則，史篤城球員並冇出現喺曼聯球員備戰嘅地方，更加冇任何接觸。曼聯呢場熱身賽臨時取消後，領隊蘇斯克查即將安排球員改踢分隊賽。

[Busconcamp]

阿積士證實曼聯想簽雲迪碧克



阿積士中場球星雲迪碧克上季彈起後，引嚟唔少歐洲豪門垂青，盛傳佢已經同皇家馬德里私下傾掂轉會，不過阿積士行政總裁雲達沙日前證實，英超勁旅曼聯都已加入戰團。

前曼聯球星雲達沙，依家係阿積士嘅行政總裁，佢最近接受荷蘭媒體《NOS》訪問，談及雲迪碧克嘅去留問題嗰陣話：「皇家馬德里同曼聯對佢好有興趣，呢個係非常正常嘅現象。」現年23歲嘅雲迪碧克轉會費為4,300萬鎊，本來皇馬係簽入佢嘅熱門，不過疫情影響下皇馬未必肯再投入大量金錢，令財政較健康嘅曼聯有機可乘。

[Busconcamp]

強化中場！曼聯撬J洛再搶葡超「八爪魚」



今季曼聯被指中場組織能力差，自從波基斯費南迪斯加盟之後，情況有所改善，球員時代司職前鋒嘅領隊蘇斯克查深明「得中場得天下」嘅道理，所以繼續搵佢心目中嘅良好配搭，除咗傳咗好耐嘅皇馬中場占士洛迪古斯，賓菲加新星費羅倫天奴係曼聯最新目標。

蘇斯克查一直好質賞J洛，舊年已經話佢好想簽入呢名哥倫比亞國腳，占士洛迪古斯下季就會同皇馬結束賓主關係，「銀河艦隊」似乎冇乜意思同佢續約。自2014年簽入之後，一直攞唔到正選，喺2017/18同2018/19年球季借咗去拜仁，今季重返皇馬但只上陣過13次，紅魔希望可以用一個折扣價錢收購，但要等皇馬回覆。

此外，據葡萄牙傳媒報道，紅魔亦睇中賓菲加20歲防守中場費羅倫天奴。費羅倫天奴喺中場覆蓋力高，而且擁有極高搶奪能力，有「八爪魚」嘅稱號，雖然曾協助葡萄牙奪得U17及U19歐國盃冠軍，但一直未能喺球隊搶到正選，據聞曼聯今年1月已經同佢經理人接觸，而費羅倫天奴對加盟紅魔興趣亦好大。

[Busconcamp]

震驚！曼聯棄辛祖秘斟巴塞神童



曼聯在斟介多蒙特前鋒查頓辛祖一直處於領先位置，但事情突然有變，西班牙傳媒報道，近日有球探向巴塞隆拿神童前鋒安素法迪秘密問價，追查後是曼聯在背後操作，紅魔打算放棄辛祖改斟法迪，雖然已遭拒絕巴塞，但事件曝光後仍然令市場人士震驚。

多蒙特早已表態不會賤賣辛祖，轉會費1億歐元起錶，缺乏討價還價空間，曼聯雖在斟介辛祖上「排頭位」，但疫情過後球員身價暴跌，1億歐元有更佳選擇。據報曼聯不再堅持簽入辛祖，至於準備收購辛祖資金，則轉向「美斯接班人」安素法迪探盤。

西班牙《每日體育報》報道，曼聯向巴塞探盤，打算以1億歐元收購安素法迪，但巴塞拒絕。據報道，早在數周前，突然有球探向安素法迪問價，背後原因是蘇亞雷斯傷愈，加上巴夫韋迪在陣，安素法迪難有上陣機會，法迪經理人團隊開始運作，結果引來曼聯報價。

巴塞為17歲嘅法迪定下1.7億歐元違約金，另有報道指，巴塞早就打算將法迪出售予祖雲達斯，因此巴塞拒絕曼聯報價，被視為以退為進。

[Busconcamp]

曼聯新陣　普巴坐正費南迪斯靠右



英超重開在即，曼聯有保羅普巴傷愈復出，與新加盟嘅波基斯費南迪斯組成中場雙核心，英國傳媒報道，曼聯近日演練2人合作嘅新陣容，就係將普巴推前坐正打10號位，費南迪斯靠右，到時正式比賽就係咁擺。

英國《太陽報》報道，普巴自去年聖誕檔期受傷後，養傷休息至康復足足6個月，然而領隊蘇斯克查仍給予佢十足信任，認為佢已經徹底傷愈，仲將10號位交畀佢，意思係將佢全面釋放，畀佢在進攻上做更多工作，衝擊前4歐聯入場券。

在普巴多年紅魔生涯中，佢都多次被安排踢10號位，不過並非長期固定位置，好多時都要佢回防，但不少球評認為，必須給予普巴更大自由度，佢先可以發揮更大作用，而曼聯嚟緊復賽，就打算利用普巴打硬仗。

至於波基斯費南迪斯，今年初加盟後令曼聯全隊全面提升，而佢踢法攻防兼備，蘇斯克查安排佢踢8號位，作為球隊中場組織核心，與普巴分工清晰。

波費攻擊能力極強，加盟曼聯後，短短9場賽事就交出3入球4助攻，問題係佢能否與普巴共存，尚待正式賽事引證。

[Busconcamp]

林伯同蘇B拗手瓜爭德國人氣新星



車路士早前截胡買斷迪姆華拿之後，繼續有大搞作，準備同曼聯硬撼，以7000萬鎊爭購利華古遜嘅王牌新星夏維斯，為來季爭冠鋪路。

根據英媒《太陽報》同埋《每日鏡報》消息，車仔主帥林柏特已經睇中夏維斯，更加視呢位德國新星係提升球隊實力嘅一塊完美拼圖，目前迪姆華拿同夏維斯都係德國最紅嘅新星，林伯打算一口氣擸走兩個，而事實上德國傳媒亦強調車仔的確有同利華古遜聯絡，詢問交易問題。

20歲嘅夏維斯可謂前途光明，德甲重開後落場4次入5球，各支豪門已經對佢虎視眈眈，皇馬、拜仁仲有紅魔曼聯。車路士解除咗轉會禁令後，相當積極，而林柏亦特別鍾意用年輕球員，家陣率先出手，睇嚟真係好想來季捧盃喎！

[Busconcamp]

諷華人播病毒　阿里停賽1場無緣鬥曼聯



熱刺中場迪利阿里於今年2月在社交網上嘲諷華人散播病毒事件，英足總有判決，判罰阿里停賽1場及罰款5萬鎊，英超復賽首仗對曼聯無緣上陣。

今年2月初迪利阿里在社交網上載影片，片入面佢喺機場偷拍一名中國口音男子講嘢，話對方就係新冠肺炎病毒，又開玩笑話新冠肺炎病毒唔夠佢跑得快，所以「捉佢唔到」。當時新冠肺炎正在中國爆發，尚未波及到歐洲。

影片遭網民炮轟，指佢涉嫌種族歧視、侵犯私隱以及作出不適當言論，阿里事後已急急刪片並道歉，不過英足總當時已表明會展開調查，結果足總對阿里判罰停賽及罰款，並在聲明中表示，阿里觸犯涉及侮辱及不當行為，因而作出處罰。

迪利阿里透過熱刺官方再次道歉，佢喺聲明中表示：「這是一個低級拙劣嘅笑話，新冠肺炎對人們嘅影響遠超我嘅想象，感謝足總認為我係冇心，無意作出種族歧視，我會好好注意自己言行。」

[Busconcamp]

錫菲聯同正副隊長續約　威脅曼聯



英超重開前，錫菲聯官方宣布與隊長比利沙柏及副隊長羅活續約，刺激士氣讓球隊重開後爭取佳績，現時該隊在爭奪歐洲賽形勢上唔會差過曼聯同狼隊，而且仲有機會爭取歐聯席位。

34歲嘅比利沙柏2004年在錫菲聯出道，職業生涯3度效力錫菲聯，直至2015年重投母會後穩定落嚟，雖然已經一把年紀，但球會仍然同佢續約2年，相信亦係佢最後一份球員合約。

羅活現年29歲，曼聯青訓出身，生涯早期效力曼聯，但長期外借到其他球會，從未為紅魔鬼上陣，今季加盟謝菲聯並成為副隊長，會方同佢續約3年，比利沙柏退休後就輪到佢坐正做隊長。

謝菲聯將於英超重開頭炮亮相，在6月17日作客阿士東維拉，如能順利贏波，將可壓過曼聯及狼隊升上第5，爭取歐洲賽資格處於有利位置，係曼聯爭取歐聯席位嘅一大威脅。

[Busconcamp]

球圈好現實　曼聯準備犧牲彭利拿



曼聯今夏繼續增兵，打算同各大豪間爭奪雲迪碧克及夏維斯2位天才中場球員，英國傳媒報道，為完成增兵大計，紅魔鬼打算犧牲巴西中場安達斯彭利拿，將呢位24歲球員放售。

英國《鏡報》報道，雲迪碧克及夏維斯都係今夏最炙手可熱球星，前者正與皇馬斟介，銀河艦隊處於領先地位，至於夏維斯更受到歐洲各豪門爭奪，曼聯是其中之一。

報道指，曼聯對簽入雲迪碧克及夏維斯其中一人頗具信心，到時安達斯彭利拿將會被犧牲，不過該巴西球星亦不愁出路，因為紐卡素、愛華頓及韋斯咸都佢有興趣，隨時出手接收。

安達斯彭利拿係曼聯青訓產品，2014年效力至今，期間曾外借到西甲CF格蘭納達及華倫西亞，近2季重返曼聯間中有正選機會，但如果曼聯簽到雲迪碧克或夏維斯，放棄佢都好正常。

此外，今季外借到國際米蘭嘅阿歷斯山齊士，今夏借用期滿歸隊，據報道曼聯接收山神後，會將呢位32歲前鋒列作後備，由於佢周薪超過50萬鎊，勢必成為最貴後備。

[Busconcamp]

英超冠軍無懸念　列強搶歐聯位



英超周中回歸，利物浦封王已經無懸念，反而下屆歐聯入場券之爭更加激，特別係2哥曼城嘅歐聯席位仍等候審判，加上疫情令經濟損失嚴重，呢張歐聯入場券就更加彌足珍貴，由第3位嘅李斯特城到第9位嘅阿仙奴，餘下賽程將陷入大混戰，刺激到暈！

曼城因違反財政公平條例，畀歐洲足協判罰未來兩屆冇得踢歐洲賽，佢哋上訴後要7月中先有結果，若然上訴失敗，就要騰出一個歐聯位畀人。現時3哥李斯特城領先第5位曼聯8分，睇落幾安全，但「狐狸」未來仲要鬥阿仙奴、曼聯、熱刺同錫菲聯等競爭對手，加上佢哋停擺前5輪聯賽僅1勝，季尾甩轆跌出前4唔出奇。

曼聯餘下賽程易踢

第4位嘅車仔同第9嘅阿仙奴僅差8分，當中錫菲聯同阿仙奴各打少1場，隨時大翻身。車仔今季喺林柏特帶領下刮起青春風暴，不過一眾生牯仔畀列強睇通後開始見底，同時佢哋作客表現飄忽，停擺前8場作客聯賽贏得2場，因而畀其他球隊愈追愈近。曼聯自從冬窗羅致波基斯費南迪斯後重上正軌，停擺前接連擊敗車仔同曼城殺上第5，只落後車仔3分，而且保羅普巴傷愈復出，加上餘下賽程得熱刺同李斯特城較惡打，分分鐘後上成功。

至於「奇兵」狼隊同錫菲聯就各有問題。狼隊今季鋤強扶弱，對住白禮頓、屈福特都失分，實在信唔過。升班球隊錫菲聯本來目標係護級，依家超額完成，難免放鬆，嚟緊仲要對曼聯、阿仙奴、熱刺、車仔同李斯特城，隨時連歐霸席位都保唔住。

主力復出熱刺行運

至於北倫敦雙雄，熱刺因疫情而獲得休養生息，哈利卡尼等主力全部趕及傷愈，嚟緊對手只有曼聯同阿仙奴較強，仲有主場之利，有機會從後趕上。反觀阿仙奴停擺前嘅強勢被打窒，加上今季作客只曾兩勝堅曳，重開後要連續3場作客，睇怕又要緣盡歐聯。

[Busconcamp]

曼聯啟動Plan B　轉斟基亞利殊



曼聯今夏增兵頭號目標，本來係多蒙特嘅英格蘭新人王查頓辛祖，但由於斟介多時未有進展，紅魔高層近期決定「轉章」，改為全力斟介阿士東維拉隊長基亞利殊，準備出高價7500萬鎊(約7.27億港元)一舉將呢位英格蘭中場簽下。

英國《鏡報》報道，雖然查頓辛祖一直是曼聯心儀球星，紅魔更願意支付1億鎊天價轉會費，但斟介仍然膠着，期間曼城及車路士並未放棄斟介，令交易更難落實，近日有消息指，查頓辛祖決定今夏留效多蒙特，曼聯高層唯有啟動Plan B。

報道指，曼聯執行副主席伍德沃德決定將注意力放在基亞利殊身上，希望簽入這位24歲中場，以免兩頭唔到岸，簽唔到查頓辛祖之餘，連基亞利殊都冇埋。

基亞利殊是維拉青訓產品，2012年升上一隊至今，並隨隊在英超及英冠之間浮沉，現時維拉排英超尾2，嚟緊周四凌晨英超復賽頭炮，維拉主場迎戰錫菲聯，佢就要領軍為護級而戰。

[Busconcamp]

【英超戰報】普巴「助攻」B費入12碼 曼聯1:1逼和熱刺



經歷周中復季的兩場補賽後，英超第30輪賽事周五正式展開，重頭戲是尾場的曼聯作客大戰熱刺。紅魔雖然上半場有門神迪基亞撲救貝雲積射門時略有犯錯失守，一度落後0:1，但換邊後憑後備上陣的保羅普巴博得12碼，助新拍檔波基斯費南迪斯（B費）射入建功；兩大中場首次聯袂雖只得半小時，火花未見，總算合力炮製了一個入球，也替紅魔扳平1:1搶回1分。

主隊熱刺藉聯賽停擺3個月後，陣容回復完整，原本養傷的兩大前鋒哈利卡尼及孫興民都已回歸，今戰擔正攻堅，惜另一重心球員迪利阿里因2月曾拍片嘲諷中國人是武漢肺炎病毒源頭，被英足總判罰在網上發佈不當言論，停賽1場缺陣，其位置由拉美拿頂上。曼聯同樣有拉舒福特及普巴擺脫傷患，後者卻先任後備，未與冬季新加盟的B費組成正選雙核，而另一早前獲續借至明年1月的前鋒恩哈路，也同樣做後備。

一如近期比賽，兩隊先為黑人種族抗命作單膝下跪動作後才開賽，而比賽早段，兩隊未完全入局，直至22分鐘才有一腳具威脅的射門，「福仔」藉敵衞達雲臣山齊士頭槌解圍不果，近門起腳，卻被對方門將洛里斯快腳擋出。這邊廂紅魔不入，5分鐘後，熱刺便取得領先，冬季新兵貝雲積在右路30碼位置獲得皮球後，憑一己之力扭過面前的曼聯隊長哈利馬古尼，而緊纏他的費特洛迪古斯速度又跟不上，結果順利殺入禁區，在域陀連迪路夫出腳攔截前施射，迪基亞救球時手勢不佳，只能將皮球擋入網中，紅魔落後1球。

熱刺31分鐘差點擴大紀錄，又是貝雲積右路發難傳球到後柱，無入看管的孫興民即頭槌攻門，但迪基亞這次終做齣好戲，飛身將皮球托高出底線。換邊後，在比賽中一直不落下風的曼聯換入普巴，踢近81分鐘終於靠此子的功勞得收穫，在右路底線連番假動作成功擺脫艾歷迪亞入禁區，結果被對方撞跌，球證直指12碼，B費操刀命中，追成1:1。

曼聯完場前以為可兩度靠12碼由輸變贏，當時B費禁區內跌倒，球證又指向12碼點，場邊倒戈的熱刺領隊摩連奴憤怒抗議，但後來經視像助理裁判（VAR）覆核，發現疑踢低B費的艾歷迪亞這次並沒有犯規，推翻了12碼判決，虛驚一場，加上格連活特在補時的最後一擊柱邊出界，最後以1:1和氣收場，兩隊各得1分。

[Busconcamp]

曼聯傳奇爆內幕：普巴唔會走啦



曼聯中場保羅普巴上場英超後備上陣，以一下精彩個人突破博到12碼，成為球隊逼和熱刺嘅大功臣，獲得外界一致好評。紅魔鬼昔日傳奇門將舒米高更加爆料，指普巴已經打消轉會念頭，將會繼續效忠曼聯。
舒米高話：「我絕對相信普巴係想留隊，我哋將會睇到1位更出色嘅普巴，比1年前出色好多。傳媒經常報道佢嘅轉會消息，以及有關佢經理人嘅言行，但我認為普巴並唔想離隊。」

至於點解舒米高咁肯定普巴一定會留隊，佢話因為同「相關人士」傾過，似乎真係收到內幕料喎。

[Busconcamp]

曼聯2中場悍將人工太奀



英國傳媒公開曼聯全隊薪酬情況，門將迪基亞及外借到國際米蘭嘅阿歷斯山齊士雄踞榜頭2位，但紅魔鬼並非個個都咁富貴，新加盟嘅頂級中場波基斯費南迪斯，以及近季獲重用嘅小將麥湯米尼，人工就奀到離譜，好易令人心理不平衡。
英國《太陽報》報道，以表列形式公開曼聯全隊人工情況，排榜首係續約後人工加到周薪37.5萬鎊嘅迪基亞，至於原本周薪50.5萬鎊嘅阿歷斯山齊士，由於國米支付部份人工，因此位居次席，保羅普巴則以29萬鎊周薪位列3甲。
由上海申花外借加盟嘅恩哈路，以12.5萬鎊周薪排第9，但佢其實係減薪外借，上海申花同佢續約時，周薪加到40萬鎊，如果佢出番全薪，將會打破晒曼聯薪酬架構。

令人意外係2位正選中場悍將，今年初新加盟嘅波基斯費南迪斯，周薪只有10萬鎊，遠遠落後於其他球星，不過佢係「新嚟新豬肉」，蝕底啲都冇辦法，下次續約就唔係呢個數。排名墊底嘅，竟然係紅魔鬼近年力捧嘅中場新星麥湯米尼，周薪僅得1萬鎊，人工有好大上升空間。

[Busconcamp]

保羅普巴做救世主　曼聯逼和熱刺



周六(20號)凌晨英超大戰，曼聯作客以1比1逼和熱刺，傷愈復出嘅保羅普巴雖然冇得踢正選，不過佢63分鐘入場依然夠時間做「救世主」，81分鐘施展神級腳法玩到艾歷迪亞陀陀擰，並且殺入禁區博到12碼，結果由波基斯費南迪斯操刀追成1比1平手。

熱刺同曼聯復賽首仗，孫興民、哈利卡尼、拉舒福特等傷兵全部復出，熱刺喺27分鐘憑貝雲積中場個人表現後遠射得手，曼聯就有波基斯費南迪斯連番遠射威脅，不過要到保羅普巴入場先至激活中場線，並且憑佢博到12碼造就「波費」入波。完場前曼聯幾乎再博到12碼，不過球證摩斯睇完VAR後，認為艾歷迪亞並冇接觸波基斯費南迪斯，最終兩隊踢成1比1平手。

[Busconcamp]

曼聯屈機戰術　2季獲得23個12碼



曼聯於周六(20日)凌晨憑保羅普巴博到12碼，驚險逼和熱刺1比1，根據OPTA統計顯示，紅魔鬼由上季開咧至今，已於英超比賽獲得23個12碼，屬於各隊之中最多，兼比第2多嘅球隊多出9個，網民寸曼聯靠一招「12碼戰術」已經夠打入前4位。

曼聯今季多次於關鍵時刻獲得12碼，包括對李斯特城，由拉舒福特射入12碼，贏1比0，上年12月對熱刺及曼城，紅魔鬼都獲得12碼，並勝出呢2場大戰。

紅魔鬼今場唔止憑12碼扳平，仲幾乎可以靠12碼反勝，當時踢到補時，波基斯費南迪喺禁區內疑似被艾歷迪亞撞跌，但球證摩斯睇完VAR後，發現2人並冇接觸，先至冇吹罰。