曼聯躉紅魔鬼地帶[VOL.95]各項賽事三連勝,入球眾數,重上正軌？

[Busconcamp]

又僅贏12碼！曼聯歐霸靠新仔救駕



曼聯喺歐霸盃又煲魚生粥，作客柏迪遜僅勝1:0。曼聯本季攻力疲弱，今仗呢個缺點又再次表露無遺，面對次級對手攻門少之又少，最終僅靠新仔左閘班頓威廉斯喪跑博得12碼，安東尼馬迪爾一箭定江山。紅魔鬼雖然贏波，但成個下半場被撳住揪，魔迷真係睇見都唔開胃。

曼聯今仗作出唔少輪換，最有威脅嘅拉舒福特、丹尼爾占士被收起，安東尼馬迪爾、桑馬達、連格負責攻堅，2名新仔班頓威廉斯同占士加拿獲派正選上陣。曼聯上半場表現，同近期分別不大，面對擁有主場之利嘅柏迪遜，曼聯上半場機會唔多，其中麥湯米尼接應右路罰球近門一頂中網側，已經係最大亮點。39分鐘主隊更有入波黃金機會，前鋒烏馬沙迪基禁區外妙射中柱彈出。43分鐘，班頓威廉斯左路硬推入禁區，主隊後衞落腳將佢剷跌，球證直指12碼點，馬迪爾主射中鵠，半場曼聯領先1:0。

換邊後曼聯畀柏迪熟撳住踢，主隊於禁區外得到罰球，拿捷高主射柱邊出界。52分鐘蘇馬於禁區頂「級」到馬古尼成份跌低，空晒左腳狂抽，但角度太正被羅美路救出。67分鐘班頓威廉斯於禁區內手球，但球證冇畀12碼。

柏迪遜愈攻愈入肉，74分鐘蘇馬禁區邊橫傳，烏馬沙迪基第一時間勁射可惜貼柱出界。83分鐘日本國腳淺野拓磨接應右路角球近門一頂，又畀羅美路神勇救到，最終曼聯頂得住小勝1:0，3場分組賽只入2球但取得2勝1和。

[Busconcamp]

【賽後解碼】曼聯咪轉陣　3中堅壽終正寢

[img]https://hk.on.cc/hk/bkn/cnt/sport/20191025/photo/bkn-20191025090123732-1025_00882_001_01p.jpg?20191025090132[I/mg]

曼聯上場英超對利物浦改踢3-4-1-2陣式，表現可話係今季最好一仗，周五(25號)歐霸盃作客柏迪遜，領隊蘇斯克查繼續用3中堅陣式，就用啲令人意外。

「紅魔鬼」呢個陣靠雲比沙卡同班頓威廉斯兩閘負責側擊，佢哋亦交足功課，不過中前場發揮就令人失望，繼上輪歐霸作客阿爾克馬爾0次射門中龍後，今場到安東尼馬迪爾完半場前射入12碼嗰刻，先至係第1次中龍射門。由連格同桑馬達負責組織進攻，曼聯連最殺食嗰瓣速度都斷埋，當然唔會有好結果，對住鋒力強橫嘅利物浦作出針對性變陣可以理解，但對住柏迪遜都用3中堅，就變成自廢武功。

蘇斯克查都發現問題，60分鐘已經換入拉舒福特同丹尼爾占士，踢番4-4-2後行軍先比較順暢，相信3中堅嘅實驗可以「壽終正寢」。

[Busconcamp]

曼聯歐霸盃怪陣　你認得幾多個？



唔少人細細個玩《Winning Eleven》，都會見到一大埋假嘅球會、球員名，估唔到類似嘅畫面會喺現實中出現！曼聯周五(25號)歐霸盃作客柏迪遜，賽前主場大銀幕列出曼聯正選名單，但就睇到一眾曼聯球迷

[Busconcamp]

曼聯想買卡尼？畀人寸到應一應！



曼聯係英格蘭史上，其中一支最成功球隊，但本季成績認真麻麻，依家9場得10分排第14，前隊長堅尼就畀貼士，叫紅魔鬼用盡所有資源，下個夏天去收購英格蘭隊長哈利卡尼。

其實係人都知卡尼勁嘅，但熱刺前球員奧哈拉就話，曼聯唔使旨意買到卡尼，話明依家曼聯，根本就渣過熱刺，卡尼邊有咁蠢轉去曼聯？反而阿古路年紀唔細，卡尼轉去曼城先合情合理，起碼曼城有冠軍爭喎，曼聯球迷聽到，肯定激到成晚瞓唔着呀！

[Busconcamp]

【東體爭議】曼聯最需要球員喺阿仙奴雪櫃



曾被摩連奴譽為球壇「最佳10號」嘅奧斯爾，周五(25號)歐霸盃再一次無緣入選阿仙奴大軍名單，亦係佢連續第5場喺冇傷冇病情況之下，連18人名單都入唔到，顯而易見嘅係，阿仙奴已經完全將佢踢出計劃之內。

奧斯爾嘅優點同弱點分明，用唔用佢亦引嚟唔少爭論，不過曼聯名宿史高斯就話，奧斯爾正正就係曼聯依家最需要嘅球員。史高斯為BT Sport評述歐霸盃嗰陣，同拍擋討論奧斯爾嘅情況時表示：「我唔明白(奧斯爾被棄用)，我認為奧斯爾係可以連繫全隊嘅球員，佢有好高質素嘅技術，呢一點佢嘅足球生涯已經證明咗，我唔知道，但佢可以成為曼聯短期『答案』。如果奧斯爾肯減薪嘅話係有可能，我唔覺得呢件事(轉會曼聯)會發生，但奧斯爾呢類型球員，係曼聯依家最需要嘅球員。」

[Busconcamp]

李斯特城1場勝仗　曼聯遭2次致命抽水



李斯特城以9:0大勝修咸頓，追平曼聯保持嘅英超史上最大勝仗紀錄之後，紅魔鬼再遭網民抽水，指李城1場入9球，已經等於曼聯近12場比賽入球總和。

曼聯喺聯賽及盃賽，近12場冇1場入波多過1球，其中3場食白果，近12場比賽加埋只入9球。如果單計聯賽，近8場聯賽只入6球，只及李斯特城今場入波3份之2。

事實上，紅魔鬼除咗開鑼戰大勝車路士4:0之外，其他8場英超冇1場入波多過1球，佢哋今季踢咗9場英超入10球，都只係比李城1場波嘅入球數字多1球，難怪被網民狂寸。

除此之外，之前盛傳曼聯計劃收購李斯特城中場占士麥迪臣，呢位22歲中場新星今場都有1球進帳。網民認為曼聯可以死咗條心，因為李斯特城已經殺上前4位，有力爭取下屆歐聯入場券。

反觀，曼聯依家只係比降班區多2分，占士麥迪臣梗係揀留隊等踢歐聯，點會去幫曼聯護級。

[Busconcamp]

【人物誌】曼市打吡未完　要爭奪新大簡



大利傳統盛產中堅，率領意大利捧2006年世界盃冠軍嘅簡拿華路，更加係唯一曾獲得世界足球先生嘅後衞，可惜自「大簡」掛靴後，意軍中堅人才凋零，來來去去都係得基亞連尼同邦路斯，兩人年事已高，莫非意大利光輝傳統，就咁終止？

咁又未必，意大利出現1位被譽為自簡拿華路之後，最具潛力成為世界頂級中堅嘅「藍戰士」，佢叫羅倫素派奧拉。

呢位17歲新星現時效力國際米蘭青年軍，並協助意大利U17打入今屆世少盃8強，僅不敵後來嘅冠軍巴西。

羅倫素派奧拉以頭腦冷靜、位置感強見稱，被指踢法似簡拿華路，而佢身高1米85，比當年「大簡」更有身體優勢，佢喺今屆世少盃仲射入1球，助攻力都贏「大簡」。

當今球壇優秀中堅非常渴市，身價已拍得住進攻球員，各大豪門已經留意到羅倫素派奧拉，其中曼聯同曼城一齊睇中佢，派出球探密切跟進呢位「新大簡」。

羅倫素派奧拉姓氏(Pirola)同派路(Pirlo)好相似，意大利傳媒提醒國際米蘭教練干地，必須小心睇實羅倫素派奧拉，唔好重蹈當年放走派路嘅覆轍。

[Busconcamp]

【賽後解碼】費特脫胎換骨　普巴隨時走得



曼聯近期連贏熱刺同曼城2大勁旅，除咗領隊蘇斯克查突然聲望大增之外，巴西中場費特洛迪古斯亦受到廣泛肯定。呢位巴西球星由上季加盟開始冇腳好波，到今季季初都仍然被視為毒瘤，不過隨住蘇斯克查嘅信任同重用，以及搵到場上最佳拍擋，費特嘅信心同表現都大幅提升，今場對曼城嘅表現更堪稱為加盟曼聯後嘅代表作。

費特今場踢得好，更搞到現場曼城擁躉睇唔過眼，喺其中一次角球攻勢，費特行近角球旗，藍月球迷瘋狂向佢掟雜物，更被一個打火機掟中，好彩人無事。

連埋今場在內，費特已經連續第9場喺英超正選上陣，佢同麥湯米尼嘅合作亦證實好有火花，有掃蕩同活動力強嘅麥湯米尼喺身邊，費特可以專心做番「發動機」嘅任務，憑住唔錯嘅腳法同爆發力，經常可以施展「短途爆破」展開突襲，今場就成功4次扭波過人兼2次創造機會，其中一球通洛迪坑渠更加瀟灑到暈，唔單止大批曼迷都感嘆話費特終於「百X成才」。

費特依家愈戰愈勇，同佢撞位嘅保羅普巴據聞亦即將傷愈復出，之後要點樣用就睇蘇斯克查，費特比保羅普巴優勝嘅係踢法簡單，唔會好似保羅普巴咁要長時間上腳，更加適合曼聯嘅快速反擊，但要堂堂法國世界盃冠軍做後備亦唔合邏輯，如果皇馬仍然想要，1月送普巴去西甲似乎係最佳選擇。

[Squall-Lucifer]

歐霸32強抽中布魯日，先客後主

[Busconcamp]

冬季最搶手係佢！三大豪門爭住要



唔少優秀球員將於明夏約滿，所屬球會如果未能留住佢哋，往往會提早割價求售，以免人財兩失。拿玻里前鋒梅頓斯正係其中之一，由於呢位32歲比利時國腳要求600萬歐元年薪，先至肯續約，但拿玻里滿足唔到佢，勢必下月出售佢，結果引來曼聯、國際米蘭、多蒙特爭奪。

拿玻里早前發生兵變，內部笠笠亂，梅頓斯認為會方必須加佢人工，先至願意留隊，據報佢要求續約2年，每年600萬歐元人工。

不過，拿玻里老闆迪羅倫迪斯有意改組球隊，解決內部混亂問題，無意重金留住梅頓斯，雙方談判已經破裂。

今季已經係梅頓斯效力拿玻里第7個球季，佢過去3季意甲表現大勇，總共入咗62球，所以唔少球會有興趣簽佢。其中曼聯一直想簽入前鋒，提升攻力，梅頓斯身價唔算貴，成為目標之一。

多蒙特擔心查頓辛祖可能離隊，所以想簽入梅頓斯以備不時之需，而國米教練干地亦物色緊新前鋒，除咗基奧特之外，梅頓斯都係佢考慮人選之一。

[Busconcamp]

【賽後解碼】曼聯、阿仙奴「細路」當家



曼聯同阿仙奴兩支今季沉淪嘅英超豪門，周五(13號)喺歐霸盃都成功拎到小組首名出線，而兩隊今場最注目嘅球員，都係只得18歲嘅「天才細路」──美臣格連活特以及布卡約沙卡，兩大新人王雖然年紀輕輕，但表現已經相當成熟，今季爭逐歐霸之路相信仍會扮演重要角色。

美臣格連活特今季英超經常後備上陣，歐霸盃分組賽就孭重飛，5場正選攻入4球，今場對阿爾克馬爾梅開二度，令佢成為曼聯史上最年輕歐洲賽入2球球員(18歲72日)，領隊蘇斯克查賽後大讚：「我同朗尼等等頂尖前鋒合作過，但講到入球觸覺，格連活特係我見到最強球員之一，無論左腳右腳都冇問題，佢係所有後防嘅噩夢，如果練埋頭槌，就會成為最全面嘅前鋒。」

至於阿仙奴翼鋒布卡約沙卡，之前分組賽作客法蘭克福已經有1入波2助攻表現，今場作客標準列治雖然客串左翼衛(尾段仲做埋左閘)，但仍然有1射1傳帶領阿仙奴追和2比2，今屆歐霸盃4次上陣有2入球及4次助攻，更加係「兵工廠」今季各項賽事嘅助攻王(6次)！

曼聯目前鋒線人手只係猛猛緊，安東尼馬迪爾出任箭頭評價亦係好壞參半，美臣格連活特累積經驗後，上陣時間只會不斷增長，就算1月買新前鋒都唔會有太大影響，蘇斯克查會繼續力捧呢位愛將。布卡約沙卡喺阿仙奴同樣前途光明，陣中只有尼高拉斯比比一個翼鋒屬「大哥」，加比爾馬天尼利、雷斯尼爾遜都係爭緊上位嘅新人，沙卡嘅機會肯定唔會少。

[Busconcamp]

【東體爭議】有羅美路係曼聯嘅幸運



曼聯周五(13號)歐霸盃主場4比0大破阿爾克馬爾，阿根廷門將羅美路寫下「紅魔鬼」生涯里昂，今場係佢第50次為曼聯上陣，作為2號門將嘅佢，50次上陣當中竟然有31場保持不失，合共只係失過24球，數字相當驚人。

貴為球壇班霸阿根廷嘅門將，過去4個幾球季各項賽事上陣50場，絕對係少得可憐，但羅美路一直甘於「阿二」角色，從來冇扭計或者埋怨，而曼聯每次用佢都可以得到穩定表現回報，試問有邊間球會有羅美路呢種「卡士」嘅2號門將？

32歲嘅羅美路同曼聯合約去到2021年，而且曼聯有權再延長多1年合約，有佢同迪基亞分擔把守大門嘅責任，「幸運」曼聯可以無後顧之憂。

[Busconcamp]

講完福仔似C朗　蘇B又話青木似朗尼



曼聯喺歐霸盃大炒阿爾克馬爾，連同之前兩場英超硬仗連贏熱刺同曼城，紅魔鬼喺1周內3連勝，兩位天才前鋒拉舒福特同格連活特被捧到上天，蘇斯克查喺上兩場大讚「福仔」有C朗影子，今場「青木」起孖，又話佢似朗尼，總之就係勁。

蘇斯克查賽後大讚格連活特，佢話：「作為終結者，格連活特確係與眾不同，當佢喺禁區附近，你就會覺得佢會搵到機會，佢能夠創造空間，左右腳都純熟，我對佢非常滿意。」

佢又將佢同朗尼比較：「我見過幾位好似佢呢個年紀嘅好球員，我曾經與朗尼同隊，仲有我自己，都係與生俱來嘅終結者，佢係我見過其中一位最佳球員，我哋球會擅長培養呢類天才球員。」

[Busconcamp]

英超最強新人王！曼聯加入爭奪戰

曼聯領隊蘇斯克查一直想簽入進攻型中場，提升攻力，除咗睇中熱刺嘅基斯甸艾歷臣、李斯特城嘅占士麥迪臣之外，依家又有新目標，就係諾域治天才新星簡威爾。

呢位21歲英格蘭小國腳今季首度參加英超，表現一鳴驚人，21次上陣入6球，包括對車路士、曼城、阿仙奴，都取得入球，簡直係「豪門殺手」，據悉曼城同熱刺都有興趣簽入佢。

諾域治現時排包尾，好大機會降班，一班主力可能已經準備搵定後路，以免下季要去踢英冠，曼聯可望趁機收購簡威爾，英國傳媒估計佢身價只係3000萬鎊，又真係幾抵玩。

[Busconcamp]

【阿King】答我呀！點解連格仲可以踢正選

曼聯0:2不敵阿仙奴，領隊蘇斯克查可以話係咎由自取，因為佢派出「零先生」連格做正選，呢位英格蘭中場貫徹「零貢獻」作風，結果踢到58分鐘就被換走。

其實連格廢都已經唔係今時今日嘅事，佢對上1次喺英超助攻，已經係2018年12月28日對哈特斯菲爾德，最近1次喺英超入波，更加要數到2018年12月22日對卡迪夫城。

換言之，連格連續橫跨兩年喺英超0入波0助攻，佢今場對阿仙奴，有31次觸球，26次傳球成功，1次射門，剷波、搶截、解圍都係0次，但犯規同失誤就分別有3次同2次，可以話係成事不足、敗事有餘，被評為全場最低5.7分。

最諷刺係蘇斯克查偏偏安排佢出任「靈魂10號位置」，前英格蘭主帥艾拿戴斯認為踢呢個位置嘅球員，一季起碼要入10球及6至8次助攻，先至算合格，搵連格踢呢個位，等於踢少1人，曼聯冇乜理由唔衰。

其實曼聯陣中不乏可以勝任10號位嘅球員，包括桑馬達，呢位西班牙中場傳射能力俱佳，而且大賽經驗豐富，絕對有能力擔當進攻策劃者角色，但蘇斯克查卻將佢投閒置散，搵連格擔正，實在係自殺式排陣，曼聯想復興，第一步必須踢走連格。

[Busconcamp]

國米加入爭普巴　肯放一人即成事

英超曼聯嘅麻煩中場保羅普巴，究竟喺一月轉會窗係咪離隊，一直惹嚟各界關注，根據最新消息，除咗皇馬同祖雲達斯對呢位法國中場有興趣外，依家連意甲「一哥」國際米蘭都想加入戰團，事關國米主帥干地想同呢位舊部下再合作。據知，曼聯對同國米交易唔係冇興趣，但大前題係呢個交易要加入球員交換，如果國米肯放阿根廷射手拿達路馬天尼斯畀「紅魔鬼」，再加埋差價補錢，曼聯有望答允交易呀！

根據英國《每日鏡報》所講，干地因為以前教祖記嗰陣，曾經同普巴合作，對於呢位法國世界盃冠軍中場能力非常認可，而干地亦希望能夠再同普巴合作。至於對曼聯而言，放走普巴根本完全唔係問題，尤其早前《曼徹斯特晚報》先做咗個民意調查，結果顯示接近7成球迷都同意普巴走人。

據知，曼聯認為普巴家陣大約值1.5億鎊，而「紅魔鬼」希望可以將拿達路馬天尼斯加入交易中，估計呢位阿根廷前鋒依家值8,000萬鎊左右，只要「藍黑兵團」肯放人，再補番大約7,000萬鎊，交易就可成事。介紹番幾句，喺阿根廷國家隊前線同美斯做拍檔嘅拿達路馬天尼斯，今季喺意甲入咗8球，喺隊中只係僅次入咗12球嘅盧卡古，但只得22歲嘅佢，絕對係潛力無限。

[Busconcamp]

魔鬼連線！連格拍吸血經理人同曼聯宣戰



作反喇！由曼聯自家培訓嘅英格蘭國腳連格，雖然喺2019年度過咗一個0入球0助攻球季，不過今季依然得到領隊蘇斯克查給予唔少落場機會，真係羨煞幾多「紅魔鬼」隊中具潛質新人。只係，唔知係咪聽得多自己成為咗曼聯嚟緊收購新兵嘅交易籌碼傳聞，今日有英媒報道，話「連美斯」已經決定泊吸血經理人拉奧拿個碼頭，實行魔鬼連線齊齊搵食，似係向「紅魔鬼」高層宣戰，睇嚟連格喺奧脫福嘅日子已經正式倒數！

27歲嘅連格，早幾年由新人身份冒起，慢慢得到重用，仲憑住穩定表現，曾經入選埋英格蘭國家隊，似係前途無限。不過，喺2019年連格好似突然迷失，成年都冇喺英超入波同交出助攻，就連國家隊揀人都冇佢份。早前，有消息話「紅魔鬼」打算收購李斯特城中場占士麥迪臣，竟然係用現金加連格去交易，聽到你都咪話唔灰心。

根據《每日郵報》所講，本身係2021年先合約到期、兼有1年優先續約權嘅連格，近排走咗去同拉奧拿傾合作，打算搵呢位外號「吸血經理人」做自己經理人，處理工作同轉會事務。要知道拉奧拿近半年因為搞保羅普巴去留問題，以及早前幫曼聯目標艾寧夏蘭特轉咗去多蒙特之後，已經正式同曼聯鬧翻，依家連格搵拉奧拿幫手，即係擺明預咗同「紅魔鬼」反面啦！

事實上，拉奧拿之所以肯畀連格埋堆，皆因佢一直想拓展自己喺英格蘭嘅市場，消息話佢相信簽入連格將會為佢向呢個方向踏出一大步。查實拉奧拿本身都係好多英超外援經理人，就連伊巴謙莫域、米希達利恩、盧卡古同保羅普巴，都係經拉奧拿安排轉會曼聯，不過簽番個英格蘭本土兵，總算係幫佢開拓到多一瓣生意，呢次「魔鬼連線」合作，拉奧拿點計都係有贏冇輸。唯一係一眾曼聯迷聽到，肯定會更加憎恨拉奧拿同連格，希望佢哋早走早着囉！

[Busconcamp]

曼聯鎖定雷霆救兵　竟然係摩連奴棄將



曼聯今季陣容單薄，尤其中場線喺保羅普巴同麥湯米尼養傷之下，蘇斯克查調兵更加捉襟見肘，今個月買中場似乎係當務之急。據《曼徹斯特晚報》消息，近期喺熱刺失寵嘅哈利雲克斯已經成為曼聯獵物。

哈利雲克斯係熱刺前領隊普捷天奴愛將，不過自從摩連奴上任之後，近9場聯賽佢只有3場擔任正選，「寸王」更加鍾意體力化、防守力強嘅艾歷迪亞、穆沙施素高同尼當比利。報道指哈利雲克斯覺得自己唔適應摩連奴嘅戰術，所以唔排除轉會尋求新發展。

不過，哈利雲克斯係為23歲嘅年輕英格蘭球員，同熱刺合約又去到2024年，熱刺向曼聯索取嘅轉會費肯定唔會低，「紅魔鬼」呢次收購將係極大賭博。

[Busconcamp]

半場吞3蛋　曼市打吡紅魔慘敗



英聯盃4強首回合曼市打吡曼聯對曼城，紅魔鬼奧脫福主場踢唔出氣勢，上半場落後3球劣勢下靠拉舒福特破蛋，以1比3敗陣，踏入2020年3戰未嚐一勝，至於曼城先勝一仗，次回合返主場只要打穩陣波，晉級在望。

聖誕新年快車過後，今戰雙方均作出輪換，個別主力休息，曼城今仗反客為主，17分鐘率先攻門，貝拿度施華右路引球切入中路，在禁區頂離門20碼起左腳勁射遠柱上角入網，憑一記世界波先開紀錄。

33分鐘曼城擴大比數，貝拿度施華交靚直線，域陀連迪路夫瞓盡攔截落空，馬列斯成功入楔單刀扭過埋迪基亞送入空門，曼城贏到2比0；39分鐘，奇雲迪布尼左路殺入禁區，窄位起腳迪基亞撲出，皮球反彈安達斯彭利拿入網擺烏龍，曼城運都贏埋，半場領先3比0。曼聯自1997年5月對米杜士堡後，23年來第1次喺奧脫福半場失3球，又寫一項恥辱紀錄。

3球落後嘅曼聯仍未放棄，下半場70分鐘一次快攻，拉舒福特接應連格傳送，右路單刀埋門破蛋追成1比3完場，曼城首回合領先3比1，次回合回師主場相當好踢，曼聯要翻身除非有奇迹出現。

[Busconcamp]

【工廠仔】曼聯最痛！蘇斯克查吊命之謎



曼聯喺英聯盃被曼城技術性擊倒，近3場比賽1和2負再陷低谷，雷同嘅情況今季一而再咁重演。最神奇嘅係，「紅魔鬼」今季雖然4次經歷3場或以上不勝走勢，但至今仍然未試過連續2場輸波，而且低潮之後往往會出現「小陽春」。上年10月4場不勝之後立即打出3連勝，11月底至12月初3場不勝後，再用一波3連勝回應，可惜曼聯今季亦係「贏不過3」，呢2場3連勝已經係曼聯今季最佳紀錄。

輸畀曼城之後，網上有又大批曼迷要求蘇斯克查下台，希望曼聯盡快請普捷天奴上任，不過曼聯高層向來都唔係「當機立斷」嘅管理層，蘇斯克查每次陷入炒魷邊緣，總係能夠出現短期反彈「吊命」，令到猶豫不決嘅曼聯高層「炒唔落手」。正正就係呢個失望-希望-失望-希望嘅循環，令紅魔鬼陷入無間地獄，曼聯最痛莫過於此。

[digiharuka]

夏蘭特簽唔到好可惜? 只鬼叫佢泊了那個XX經理人, 唔黎仲好過

[Busconcamp]

避開7號魔咒　波基斯揀曼聯18全因佢



曼聯新兵波基斯費南迪斯尋日就宣布揀咗18號做佢新波衫「冧巴」。本身喺士砵亭着8號嘅佢，由於「紅魔鬼」8號已有桑馬達呢個主人，最終佢唯有轉號碼，但就冇揀到喺奧脫福勁有代表性嘅7號。相反，係揀咗由前曼聯隊長艾舒利楊格留低嘅18號，但背後原因，原來佢勁鍾意昔日18號主人史高斯！

話說曼聯7號經典人物有包括佐治貝斯、碧咸，仲有C朗拿度，不過自從CR7喺2009年離開之後，除咗路爾斯華倫西亞叫做好少少嘅7號仔，其他包括奧雲、迪馬利亞、迪比同最緊要嘅阿歷斯山齊士，真係一着起件7號仔波衫，就實係冇運行，表現走樣，難怪波基斯都唔揀佢。

至於點解揀做18號仔，波基斯解釋：「我以前着8號，呢個係我爸爸做球員時嘅號碼，兼且係我生日同我鍾意嘅『冧巴』。至於18號則係我太太嘅生日，另一個原因，當我成長期，我睇見史高斯着住佢，一個神奇球員嘅號碼，所以我好鍾意，我知我將會負起好大責任。」

曼聯名將史高斯由1996年就着起「紅魔鬼」18號，經過15年，係佢將「紅魔鬼」呢個號碼真正打出名堂。當史高斯第一次掛靴，艾舒利楊格就接手做咗18號新主人，一着就8年半，而即使史高斯喺2012/13球季復出，佢就改着22號波衫，直到依家，18號終於交託畀波基斯，希望佢唔會令球迷失望啦！

[Busconcamp]

【阿King】波費亂世成魔　有一種責任

曼聯簽入波基斯費南迪斯，令曼迷回想番起昔日紅魔鬼2位同樣來自士砵亭嘅葡萄牙球星C朗同拿尼，2人成魔時期屬於費格遜領軍嘅黃金年代，捧盃捧到手軟，波基斯費南迪斯今次加盟曼聯，剛好相反，紅魔鬼陷入多年低迷，亦冇費Sir「呵護」，一到位就要擔起核心責任，前路比2位前輩艱巨10倍。

C朗2003年夏天以18歲之齡加盟曼聯，着起碧咸離隊後留下嘅傳奇7號，當時包袱亦唔輕，但勝在有「爸爸」費格遜悉心保護，得以慢慢成長，踢咗曼聯3季後先至真正大爆發。

至於拿尼2007年挾「新C朗」之名成魔，有大師兄C朗照顧，又有費Sir耐心畀機會發揮，希望栽培佢成材，否則都留唔到7季咁耐。

不過，波基斯費南迪斯現時情況完全唔同，曼聯主帥蘇斯克查雖然係費格遜高徒，但教波能力同費Sir有一大距離，唔可以慢慢指導「波費」，反而需要佢擔任救兵角色，要求立即令球隊翻生。

因此，如果波基斯費南迪斯未能即時創造出外界期望嘅效果，恐怕又會被標籤為「水貨」、「普巴2.0」等污名。C朗以前有3季時間證明自己，但「波費」只有今季餘下時間，踢完今季就知佢命運係「C朗」亦或「拿尼」。

[Busconcamp]

里奧收晒風　曼聯有咗波費好輕鬆

英超曼聯日前成功收購葡萄牙中場波基斯費南迪斯，依家做咗講波佬嘅曼聯名將里奧費迪南，為咗了解今次收購，近日就特登搵咗自己兩個舊隊友兼「波費」嘅國家隊隊友收風，睇吓呢位嚟自士砵亭嘅貴價中場係咪真係料立足「紅魔鬼」？好彩，里奧兩位老友都大讚「波費」係貨真價實猛將，將可以解決曼聯長期創造力不足嘅大問題喎。

里奧搵咗兩位老友攞料，唔使講大家都知，梗係兩位昔日曼聯球星C朗拿度同拿尼，里奧話：「我舊隊友拿尼話，佢(波費)係個頂級球員，完全適合英格蘭足球，讚佢擁有所有技巧同元素。C朗都讚佢係頂級，喺國家隊製造好多機會畀佢。佢喺操控皮球、攞波都係充滿信心。」

里奧之後補充：「呢啲都係當曼聯簽入新球員時，你最希望聽得到嘅意見。所以各位球迷，基於我所聽到同睇到有關佢(波費)，我希望亦都好有信心佢可以好好完成到佢嘅工作。」

呢位曼聯經典後衞指出：「佢係嗰種可以製造入球機會嘅球員。曼聯喺面對主攻對手，自己要打防反時候，佢哋前線有速度就可以撕破對手。只係當喺奧脫福面對主打穩守突擊嘅球隊就會陷於苦戰，呢個時候，波基斯費南迪斯就可以入嚟扮演重要角色，因為佢有想像力同創造力，然後喺禁區邊附近策動攻勢同入波。佢嘅特性正係曼聯最需要，尤其係喺保羅普巴缺陣，呢個問題最明顯。」

[Busconcamp]

蘇B確認！波費奧脫福殺破狼

曼聯今個轉會窗高價購入葡萄牙國腳、士砵亭隊長波基斯費南迪斯，呢名紅魔新18號仔，啱啱加盟已肯定會為曼聯喺今輪英超登場！領隊蘇斯克查確認，波費狀態冇問題，今仗肯定會為曼聯上陣，於奧脫福同魔迷見面。

波費近日先通過體測，加入曼聯大家庭，佢於首課操練時勁好笑容，笑到好似個細路仔一樣，睇到今次轉會堅係夢想成真。蘇斯克查透露，波費目前狀態唔錯：「佢一直有為士砵亭上陣，所以狀態不俗，當然佢剛加入，我哋會細心研究佢對狼隊時會參與幾多，但肯定嘅係佢會喺大軍名單當中。」

自狼隊升班後，同曼聯每次交鋒都不落下風，曾保持5次不敗，係到上次於英足盃重賽交手先僅敗0:1，但該仗就有拉舒福特受傷。狼隊一直都係豬頭骨，唔知波費有冇本事，令曼聯今場踢得輕鬆啲呢？