曼聯躉紅魔鬼地帶[VOL.95]各項賽事三連勝,入球眾數,重上正軌？

[Busconcamp]

曼聯欲免費簽梅頓斯　隨時衰係舊將手



英超曼聯增兵消息繼續停不了，英國《每日鏡報》報道話佢哋有意由拿玻里手中免費簽入比利時前鋒梅頓斯，本來以佢哋名氣同誠意，成事機會應該唔錯。不過，原來喺意甲發展多年嘅梅頓斯，根本仲想留喺意大利生活。同時，有意斟佢嘅意甲勁旅國際米蘭仲有梅頓斯喺比利時國家隊嘅拍檔盧卡古喺度，二人合作開自然傾都容易啲，「紅魔鬼」隨時又要空手而回呀！

32歲嘅梅頓斯今季尾就約滿拿玻里，由於拿玻里主席迪羅倫迪斯拒絕開畀佢一份兩年年薪600萬鎊合約，所以梅頓斯都堅持季尾自由身走人，而其他球會就可以由一月開始同佢傾。據知，除咗曼聯之外，多蒙特都有意將佢收歸旗下，不過，佢哋預計都係敵唔過意甲對梅頓斯嘅誘惑。

梅頓斯2013年由巴黎聖日耳門改投拿玻里，至今喺意甲上陣219場攻入88球，喺意甲踢慣踢熟。家陣國米主帥干地想搵佢哋嚟拍住盧卡古增強攻力，難怪梅頓斯會心動嘅。

[Busconcamp]

【東體爭議】曼聯唔需要普巴復出



球星保羅普巴近排終於接近傷癒，預計下周就可以復操，對於近期戰績回升嘅「紅魔鬼」嚟講，表面睇應該係一大喜訊。呢位法國球星仲話復出之後，要做個年輕球員榜樣，叫隊中新仔要珍惜機會喎！不過老實講，一向最唔識珍惜就係你，依家「紅魔鬼」係咪仲需要你，真係好難講囉！

保羅普巴話：「我希望自己可以幫到佢哋（年輕球員）。呢間係全球其中一間最大球會，或者係史上最大。既然佢哋依家有幸留喺度，我就同佢哋講，『把握機會踢好啲，你哋年輕，有質素，根本冇嘢好驚！我希望可以成為佢哋榜樣，無論係場內定場外，即使我唔覺得自己好老，但我已經諗緊將來呢班年輕球員會取代我位置，始終我唔會踢一世嘛！」

聽落堅令人感動，不過眾所周知，一向唔多珍惜曼聯生涯嘅，好似正係保羅普巴本人。單係今年夏天不斷扭計要去皇馬，到之後開季成日同球會不和，表現時好時壞，由你去做年輕球員榜樣，其實好令人擔心囉！

近排曼聯連贏熱刺同曼城，班波開始上力，中場線由費特洛迪古斯同麥湯米尼組成嘅組合，攻守俱佳。究竟保羅普巴復出，佢仲有冇碇企？佢復出係咪仲幫到球隊呢？即使佢可以提升「紅魔鬼」實力，但隊內氣氛又可唔可以保持繼續好呢？事實上，喺外國勁多討論區球迷都話，曼聯已經唔再需要保羅普巴，冇乜事，你都係走把啦！

[Busconcamp]

廢物VAR+詭異烏龍！曼聯被屈2分



深夜英超，曼聯主場對愛華頓，出現罕見烏龍波。紅魔鬼門將迪基亞被角球笠過，搞到中堅域陀連迪路夫擺烏龍，幸好有18歲射手格連活特入波做救世主，最終打和1:1。

曼聯開波僅17秒就幾乎入波，連格禁區內轉身抽射僅貼柱出界，之後拉舒福特、丹尼爾占士先後窄角度起腳，都唔中目標。「福仔」仲有1次勁射罰球，被愛華頓門將比克福特撲出。

不過踢到36分鐘，愛華頓開出角球，迪基亞跳起打手槌，但打唔中，皮球笠過佢之後，省中企喺遠柱嘅域陀連迪路夫，改變方向入網，呢位瑞典國腳冷不提防之下擺烏龍。

當時愛華頓前鋒卡維特利雲喺小禁區內，明顯衝撞迪基亞，干擾咗佢打手槌，但球證睇完VAR後，仍然判入波有效，引起爭議。

曼聯下半場加強攻力，但勞基梳爾起腳被比克福特撲出，丹尼爾占士補射，竟然省中連格面部，搞到佢暈得一陣陣，域陀連迪路夫亦有1次勁射僅高出。

77分鐘曼聯終於扳平，後備入替連格嘅18歲新星格連活特射個貼柱波入網，逼和愛華頓1:1，曼聯都係要痛失2分。

曼聯今場佔上風，所失1球有啲冤枉，但球隊失分，進攻球員把握力差，亦要負上責任，拉舒福特連番起腳無功而還，安東尼馬迪爾、連格大部分時間踢到冇晒影，竟然都要靠18歲小將格連活特救亡，紅魔鬼下月收購前鋒刻不容緩。

至於同時間開波嘅另一場英超，熱刺憑盧卡斯莫拉射入靚波，加上維頓漢補時入波，作客以2:1絕殺狼隊，升上第5位，只係落後第4位車路士3分。

[Busconcamp]

入球歐洲第3！曼聯天才終非池中物



曼聯又做羅賓漢，贏完熱刺同曼城之後，返到奧脫福未來陣容不整嘅愛華頓又失分，只能1:1逼和對手。拉舒福特連續入波強勢斷纜，安東尼馬迪爾同連格表現又於水準以下，好彩仲有格連活特救駕。呢名18歲小將繼上仗歐霸盃梅開二度後，今仗又於人叢中左腳抽入，2場射入3球，本季喺各項賽事轟入7球，成為「歐洲第3」。

格連活特於65分鐘換入代替連格，只需12分鐘就入波，縱使前面有3個愛華頓球員，依然能以左腳抽地波收死比克福特，過程清脆俐落，盡展一流射手本色。因為球隊攻擊人員冇乜選擇，領隊斯克查唯有提升格連活特上一隊，但佢一次又一次證明自己實力。上仗鬥阿爾克馬爾，佢入2粒仲博到1球12碼，今次仲射入第1個英超入球，直接為球隊攞番1分。

格連活特今季於英超、英聯盃同歐霸盃都入過波，總共已入7球，睇番歐洲5大聯賽，只有查頓辛祖（11球），以及阿仙奴巴西小將加比爾馬天尼利（8球）2個年輕人，比格連活特入波更多。雖然曼聯又失分，但格連活特嘅表現，會令魔迷搵到安慰。

[Busconcamp]

本尊認證！格連活特正式做新尹佩斯



英超曼聯近排打起一個超新星格連活特，喺近兩場包括英超同歐霸賽事入面入咗3球，佢隻左腳射術驚人，被指勁有前曼聯荷蘭射手尹佩斯影子。今日，尹佩斯本人仲親口確認「綠木」似佢，有資格做佢接班人喎！

18歲嘅格連活特，上場英超幫曼聯追和愛華頓球波，禁區內左腳快射，真係堅似尹佩斯，後者受訪嗰陣大讚呢位新星前途無限：「我認為佢嘅未來將會非常好，因為佢每一場比賽入面，都嘗試學我。佢學我嘅風格，學我嘅技術，仲有學我隻左腳同射門方式。」得到尹佩斯本尊認證加持，格連活特呢鋪掂喇！

[Busconcamp]

歐霸盃32強！曼聯阿仙奴抽到硬嘢



繼歐聯16強之後，歐霸盃亦進行咗32強抽籤，兩支英超豪門曼聯、阿仙奴都抽到由歐聯降格落嚟嘅球隊。

曼聯將會對比利時班霸布魯日，上屆歐霸盃亞軍阿仙奴迎戰希臘勁旅奧林比亞高斯。另一支英超球隊狼隊仲大鑊，對手係有中國球星武磊助陣嘅西甲球隊愛斯賓奴。

至於由歐聯轉戰歐霸盃嘅意甲勁旅國際米蘭抽到好籤，對手只係保加利亞球隊盧多格德斯。32強仲有1場重頭戲值得關注，就係德甲利華古遜鬥葡超波圖。

歐霸盃32強抽籤結果

狼隊(英超) Vs 愛斯賓奴(西甲)

士砵亭(葡超) Vs 巴沙克舒希(土超)

基達菲(西甲) Vs 阿積士(荷甲)

利華古遜(德甲) Vs 波圖(葡超)

哥本哈根(丹超) Vs 些路迪(蘇超)

尼科西亞(塞浦甲) Vs 巴素利(瑞士超)

克盧日(羅甲) Vs 西維爾(西甲)

奧林比亞高斯(希超) Vs 阿仙奴(英超)

阿爾克馬爾(荷甲) Vs 寧斯(奧甲)

布魯日(比甲) Vs 曼聯(英超)

盧多格德斯(保甲) Vs 國際米蘭(意甲)

法蘭克福(德甲) Vs 薩爾斯堡(奧甲)

薩克達(烏超) Vs 賓菲加(葡超)

禾夫斯堡(德甲) Vs 馬模(瑞典超)

羅馬(意甲) Vs 真特(比甲)

格拉斯哥流浪(蘇超) Vs 布拉加(葡超)

註：前者首回合主場，首回合會喺明年2月20日展開，次回合則喺2月27日舉行。

[Busconcamp]

斷十字韌帶　曼聯棄將緣盡歐國盃



里昂荷蘭射手迪比上周五法甲對雷恩勇戰受傷，原來好大鑊，球會周二官方公布，迪比左膝十字韌帶斷裂，至少休息6個月，不但提早收咧，更確認無法代表荷蘭參加明年夏天歐洲國家盃決賽周及奧運會。

里昂在官網貼文如下：迪比左膝十字韌帶受傷，將於本周接受手術，迪比與知名十字韌帶專家科泰會面，聽取各方面意見後，傾向前赴美國治療，並確認無法出席歐洲國家盃及東京奧運。

25歲嘅迪比曾於2015至17年效力曼聯，並獲安排穿上7號球衣，但表現低迷黯然離隊，不過轉投里昂後表現出色，好多紅魔球迷都希望曼聯重召呢位荷蘭射手，迪比今季在里昂各項賽事射入14球，在歐國外交出6球8助攻，狀態甚佳，如今嚴重受傷無論對里昂及荷蘭都係重大損失，重返曼聯更加唔使諗。

[Busconcamp]

【賽後解碼】認清自我　拉舒福特挑戰30球



拉舒福特喺英聯盃1傳1射帶領曼聯入4強，今季各項賽事貢獻14個入波同6次助攻，只係半季嘅入球數字已經寫下「福仔」出道以來新高。自從拉舒福特放棄做正前鋒嘅「目標」之後，重返左翼位置更加得心應手，入球同助攻數字都大爆發，過去11場波狂入10球(加4次助攻)。

大部份攻擊球員都希望踢中路位置，拉舒福特都唔例外，不過季初代安東尼馬迪爾踢中鋒明顯力不從心，佢嘅把握力亦非頂尖，結果因為不勝重任搞到愈踢愈差，但自從踢返左翼之後，拉舒福特可以專心用速度進行爆破，邊路入楔嘅準確性同靈活性亦係佢拿手好戲，做番自己最擅長嘅工作，就係「福仔」爆發主因。

依家曼聯嘅反擊踢法，係拉舒福特最舒適嘅戰術，以佢近期嘅超強入球率，今季各項賽事挑戰30球大關絕對唔出奇，事實上「福仔」出道後每年入球都有增加(見表)，但今季認清自己能力之後，先至真正大躍進。

拉舒福特入球統計(各項賽事)

2019/20●23場入14球

2018/19●47場入13球

2017/18●52場入13球

2016/17●53場入11球

2015/16●18場入8球

[Busconcamp]

曼聯長老即將約滿　明夏自由身離隊



英國傳媒報道，曼聯長老級球員艾舒利楊格將於明夏約滿，球會及球員雙方並無開啟續約談判，若然係咁，嚟緊冬季轉會窗可與英國以外球會自由接觸，明夏更可自由身離隊。

年屆34歲嘅楊格今夏獲蘇斯克查留用，續約1年，當時係希望佢幫助隊中年輕球員成長，不過今季佢嘅上陣時間唔多，上場歐霸盃對阿爾克馬爾有波入已經算係咁，明年夏天佢將會35歲，相信曼聯唔會再留佢。

英國《晚旗報》報道，曼聯同球員雙方並無續約打算，楊格明夏離隊已成定局。

[Busconcamp]

曼聯職球員齊爆料　普巴踢咗告別戰



曼聯中場球星保羅普巴由9月尾一直缺陣至今，領隊蘇斯克查曾經話呢位法國國腳會喺12月初復出，但都係未見人。英國《鏡報》爆料，指有曼聯球員及工作人員都認為普巴唔會再為紅魔鬼上陣，因為佢將於下月轉會市場重開後離隊。

保羅普巴由上季季尾已經盛傳要離隊，今夏更幾乎轉投皇馬，雖然未能成事，但並未改變佢上「艦」嘅決心，所以計劃下月再次「衝關」，爭取加盟皇馬。

26歲嘅普巴今季只為曼聯上陣6次，最近1次已經係9月30日對阿仙奴，之後一直因為足踝受傷缺陣，原本有望上場英超復出，但又話病咗唔踢得，實在耐人尋味。

因此，部分曼聯球員及工作人員認為普巴根本冇打算再為曼聯披甲，9月尾對阿仙奴一役已經成為佢嘅告別戰。

曼聯2016年夏天用8900萬鎊收購普巴，會方現時將佢標價1.5億鎊，就睇下皇馬會唔會接貨。

[Busconcamp]

記得佢嗎？前曼聯天才踢西盃仲有貨交



贊奴沙，仲記唔記得先？曾經嘅曼聯天才，曾經嘅比利時超新星，不過依家都只係喺西甲皇家蘇斯達做個常規後備。日前呢位24歲中場喺西班牙盃出戰西丁球會貝塞里爾甘保斯，贊奴沙今場難得擔正，即刻個人大演帽子戲法，兼加多一次助攻，最後領軍大勝8比0。唔講唔知，呢次係贊奴沙職業生涯首次連中三元，而佢過往單季最多入球都只係4球，話唔定今季有機會打破紀錄呀！

值得一提，早幾日曼聯名將畢特先講起贊奴沙，話佢當年係最受期望嘅「紅魔鬼」新星，具備一切成為世界頂級球星質素，係自傑斯之後最具天份球員，只可惜係呢位比利時國腳缺乏堅毅決心同態度，覺得好可惜咁話。畢特話無論點，贊奴沙一定可以喺球圈佔得一席，賺到唔錯收入，只係未必做到最頂級。仲有，贊奴沙都希望今場波可以幫佢爭番正選，以爭取下年入選比利時出戰歐國盃決賽周嘅大軍。

[Busconcamp]

曼聯玩控傳　馬迪爾入球傳咗23腳



曼聯喺英聯盃大勝高車士打3比0，當中出現一個金球，就係第3球安東尼馬迪爾入波，原來呢個入球，曼聯球員喺禁區外圍總共傳咗23腳，直情係巴塞嘅TIKI TAKA，犀利呀。

英傳媒報道，曼聯該個金球，總共進行23次傳送，令對方防守重心不斷轉換，由左到右，直到桑馬達喺禁區頂送出過頭波入禁區，拉舒福特接應殺入左路底線傳中，安東尼馬迪爾近門剷射入網，全程一氣呵成。

不過網上嘅精華片段，大部份只係剪咗桑馬達畀過頭波開始，直至安東尼馬迪爾入波嘅片段，之前傳咗廿幾腳就冇剪低囉。

[Busconcamp]

迪基亞派膠！曼聯輸畀包尾球隊



曼聯作客包尾屈福特，養傷近3個月嘅保羅普巴傷愈復出，後備上陣，但防線連接失誤，門將迪基亞「派膠」，加上右閘雲比沙卡禁區內犯規，被判罰12碼，最終0:2輸波，延續「羅賓漢劫富濟貧」本色。

曼聯之前12次英超對屈福特，贏咗11次，加上對手排包尾，以為今場好易食，但踢落卻係另一回事，曼聯上半場表現毫無生氣，中場組織欠奉，經常斷纜，即使偶有攻門機會，但球員把握力差，包括安東尼馬迪爾射斜出界，連格有單刀機會，佢選擇笠射卻射高。屈福特靠零星反擊亦冇作為，兩隊上半場加埋只有7次射門，而且全部唔中目標，可見比賽水準極低。

換邊後節奏加快，僅5分鐘曼聯就失守，屈福特中場韋曉士大腳開出罰球，年僅21歲嘅伊斯美拿沙亞接應隊友頭槌二傳，凌空抽射撻Q，皮球彈地而起，原本冇角度又冇力度，但迪基亞竟然接唔實，漏咗個波入網。

只係過咗4分鐘，雲比沙卡禁區內鏟跌伊斯美拿沙亞，被吹罰12碼，迪尼主射入網，曼聯閃電崩盤落後2球。

踢到63分鐘，蘇斯克查終於派出保羅普巴上陣救亡，但情況冇乜改善，反而屈福特攻門更入肉，最終曼聯輸0:2。

曼聯今季贏過勁旅曼城、熱刺、車路士、李斯特城，打和利物浦、阿仙奴，但卻喺韋斯咸、水晶宮、屈福特等下游球隊身上失分，得不償失，想入前4位更加難。

[Busconcamp]

2組控球數字　拆解曼聯「羅賓漢」之謎



「曼聯的劇本」繼續上演，遇強愈強、遇弱愈弱，作客包尾球隊屈福特又濟貧，吞2蛋完場。曼聯特性非常明顯，蘇斯克查話保羅普巴復出增加創造力有助擊敗勁旅、尼曼查馬迪就話年輕球員鬥弱旅集中力唔夠，但其實最大原因係曼聯只適宜放棄控球打突擊。

根據統計數字，於蘇斯克查帶隊時代，曼聯有11場控球率比對手低，竟然贏出當中8場，比率高達73%。但28場控球率贏對手嘅比賽，只能贏出當中10場，百分比只有36%，足足少咗一半有多，認真恐怖；而最得人驚係近17場曼聯控球較多嘅賽事中，只係贏得1場。呢個就反映到，所謂弱旅愈來愈識得點對付曼聯，就算放棄控球、畀紅魔攞個波嚟搓，曼聯都一樣贏唔到。

曼聯之前可以砌低熱刺、曼城，本季又雙殺車路士，全靠對手肯主動進攻，留低後防大片空位畀拉舒福特、安東尼馬迪爾同丹尼爾占士發揮，但只要弱旅死守，就可將以上3人威力減至最低，曼聯中場又以工兵居多，頭18場聯賽入面，桑馬達、連格、安達斯彭利拿、費特洛迪古斯、尼曼查馬迪、普巴同麥湯米尼，只有麥湯米尼（2球）同彭利拿（1球）入過波，反映紅魔中場入球能力勁低。曼聯劫富濟貧，唔係冇得解。

[Busconcamp]

曼聯終極敗家仔　連格渣到你唔信



曼聯去到包尾大幡屈福特主場，成個上半場都冇腳射中龍，其中1球最近磅嘅來自連格。呢名前英格蘭國腳，單刀面對賓科士打，諗都唔諗就笠對手，但冇咁嘅腳法當然射唔入，皮球越楣而去。呢名27歲中場近日備受蘇斯克查重用，但今仗再度冇腳好波；據統計佢已超過25小時冇於英超入波同助攻，對上一次助攻已經係於上年拆禮物日時做出，堅係敗家仔中嘅敗家仔。

呢名曼聯青訓產品，一向雷聲大、雨點小，今季已經被蘇帥打入冷宮，係早前於歐霸盃分組賽第5輪，喺出咗線後，先畀佢戴上隊長臂章打正選並取得入球，但面對哈薩克對手艾斯坦拿，曼聯始終都倒輸1:2。

之後連格於曼市打吡戰打正選，曼聯爆冷贏波，賽後連格話自己狀態返晒嚟，躊躇滿志話要為曼聯建功立業，但佢於紅魔嘅最佳位置，睇嚟係喺後備席。連格同曼聯嘅合約到2021年結束，到依家球會仲未同佢傾新約。

[Busconcamp]

由世界最佳跌落英超最差　迪基亞想點？



英超曼聯尋晚倒灶不敵包尾大幡屈福特，要知道對手唔止係實力全英超最差，連埋尋晚贏曼聯兩個入波，今季聯賽18戰先入得11球，係英超入波最少嘅球隊。「紅魔鬼」熱倒，今場要負最大責任梗係派膠嘅門將迪基亞，上幾季仲被視為全球最佳門將之一嘅佢，近呢兩季夾埋先後喺聯賽6次犯錯導致失波，係同期英超最差，老實講，佢真係對唔住自己份1,300萬鎊超高年薪囉！

數字唔呃你，依家曼聯同迪基亞喺英超已經連續13場唔能夠「零封」對手，上一次聯賽冇失波已經係今年9月14日小勝李斯特城1比0賽事，而「紅魔鬼」今季18輪聯賽就只有2場冇失波。話晒曼聯今季為後防高價引入雲比沙卡同哈利馬古尼，以為可以執靚條防線，點知又因為迪基亞跌Watt影響成績，如果迪基亞再唔生性，「紅魔鬼」今季隨時玩完都似！

[Busconcamp]

【東體爭議】曼聯仲需要普巴！



「神又係你、鬼又係你」，一講起曼聯仲用唔用保羅普巴，肯定大把球迷話我哋《東網體育》一時一樣，查實對普巴嘅又愛又恨，又點只我哋？仲有好多曼聯球迷，仲有球壇中人囉！尋晚普巴復出後備登場踢咗26分鐘，即刻令「紅魔鬼」進攻線生番晒，《天空體育》畀咗佢曼聯全隊最高嘅7分，前英格蘭國腳中鋒高治公開呼籲曼聯咪畀普巴走。曼聯需唔需要普巴？拗一世都拗唔完！

普巴對上一場聯賽露面係9月30日，休戰接近3個月先復出，但佢唔使好多時間已經搵番晒感覺，幾次靚交都製造到威脅，自己都有射門唔曳，齋講技術實力，唔計態度，佢肯定頂級，由佢入替連格，唔少「魔迷」都應該開心，感受到級數分別。

退咗役嘅高治尋晚講波話：「當普巴同桑馬達喺後備席，曼聯就係缺乏靈感去撕破屈福特防線。屈福特成班人守喺後場，根本冇位畀安東尼馬迪爾、拉舒福特、連格同丹尼爾占士去走位。呢個時候，曼聯就係需要人去搵出突破點，就係當普巴登場後先做到。普巴係進攻思維，而麥湯米尼同費特洛迪古斯就缺乏普巴嘅視野。」

主帥蘇斯克查賽後都話，對於曼聯，今場唯一得着就係普巴復出，佢嘅質素同決斷，係球隊最需要：「普巴嘅過頭波傳送，為球隊同自己都製造到機會。佢一直好努力去爭取回復狀態，佢已經準備好踢番多啲，就睇吓佢之後咩情況啦！」

[Busconcamp]

又創最低分紀錄　蘇斯克查一句說話勁灰



曼聯尋晚作客0比2不敵屈福特，今季聯賽18戰只得25分，原來呢個係佢哋自1989年以來，聖誕節前最低分紀錄。唔少「魔迷」賽後都將責任推晒落領隊蘇斯克查身上，唔少人叫佢落台，又有人話佢係小丑。至於「蘇B」本人又點睇呢場賽事呢？

「蘇B」表示：「以我哋今場表現，根本唔配有勝利。我哋傳波太慢，好似踢紀念賽咁。失咗控球又唔會積極去搶番，成場波都踢唔出應有強度。到後來我哋想追和，但又做得唔夠，球員必須要全場都保持集中力，但我哋未有做到。」

對於迪基亞派膠，「蘇B」都冇怪責太多：「佢最近狀態好好，今次只係意外。佢信心好好，呢個係積極訊號，提醒大家喺球場上，你一定要每場都爭取贏波，可惜我哋今次做唔到。我哋可以不斷糾纏住，但亦可以盡快忘記，事關我哋之後有兩場重要比賽呀！」

[Busconcamp]

網民發起反蘇B行動！預言有名帥接替佢



曼聯上場英超輸畀包尾嘅屈福特之後，炒蘇斯克查嘅聲音又再次響起，大量網民參與「OleOut」行動，紛紛要求呢位挪威少帥下台，有人更改圖將佢惡搞成小丑。

一位網名叫「i_am_gabryiel」嘅網民將蘇斯克查相片改圖成小丑樣貌，並寫上評語話：「求下曼聯，唔再畀呢個小丑搞破壞。」

其他人亦紛紛發貼批評蘇斯克查，包括話：「今季最低點，令人厭惡，蘇斯克查下台。」

「除咗前6位之外，我哋邊隊都贏唔到，我認為係時候作出改變。」

「佢非常冇用，蘇斯克查下台。」

「再見了，蘇斯克查。」

「依家就請普捷天奴。」

「炒蘇斯克查，請普捷天奴。」

可見曼聯球迷對蘇斯克查嘅不滿程度已經達臨界點，如果未來幾場再有乜閃失，恐怕球會管理層都保佢唔住。

[Busconcamp]

意甲重生　盧卡古提起曼聯仲係好悲



意甲老牌勁旅國際米蘭今季表現脫胎換骨，依家力壓群雄排喺榜首，要數佢哋能夠取得佳績頭號功臣，必定係比利時前鋒盧卡古，呢位「新魔獸」至今喺聯賽轟入12球，相比起佢上季喺英超曼聯，表現可以話係徹底翻生。日前，盧卡古接受《紐約時報》訪問，佢除咗講到英超同意甲分別，當一提起佢嘅曼聯日子，仲係超悲傷囉！

盧卡古回想喺奧脫福日子，經常成為球迷批判對象，佢覺得非常唔公平：「啲人成日話，你表現唔錯，但係又呢樣嗰樣。好似喺對皇馬場歐超盃，我入咗波，但都錯過咗一次機會，啲人就不斷強調我錯失松會。我同保羅普巴講過，喺曼聯一年，抹殺咗我之前8年嘅成功。」聽得出盧卡古對自己喺曼聯嘅日子，仲係好耿耿於懷囉！

[Busconcamp]

曼聯一月開倉清貨　兩大名將悲情送走



平安夜不平安！英超曼聯今日有消息流出，話佢哋揸Fit人伍德沃德已經勒令喺下月轉會窗重開期間，將陣內冗員掃走，其中今季不受重用嘅尼曼查馬迪同馬高斯盧祖均係頭號清貨對象。此外，包括菲爾鍾斯，同兩名未續約新星鍾塔西及安祖高美斯亦可能離隊他投。

包括尼曼查馬迪同馬高斯盧祖今季夾埋先上陣過6場英超，根據《每日星報》所講，領隊蘇斯克查已通知二人，球會嘅未來發展大計冇佢哋份，而伍德沃德更落「柯打」下月將佢哋賣走，以騰出大軍空位同籌措資金引入新兵。

據知，至少有一隊英超球隊已經表達對尼曼查馬迪有意，係咪去熱刺跟番摩連奴就冇人知。至於喺2014年以1,600萬鎊加盟嘅馬高斯盧祖，雖然能夠兼任中堅同左閘，但礙於「蘇B」寧願將機會留畀新人如科素文沙同杜安薛比等，馬高斯盧祖離隊亦勢成定局，有傳佢會被賣離英超。

方面，根據《ESPN》報道，近期冇乜上陣機會嘅菲爾鍾斯都同樣會被掛牌出售。至於兩名新星本身都係到出年夏天約滿，但遲遲都未同球會續約，如果一月賣唔走，都會係眼白白睇住佢哋明夏免費離隊，到時損失仲大。

[Busconcamp]

巴塞睇中曼聯新星　打造雙美斯組合



曼聯近年成績低迷，大部分球員表現被批評得體無完膚，但其實紅魔鬼仲有「猛人」，只係蘇斯克查唔用，但就獲得巴塞隆拿垂青，準備下月簽入佢，呢位哥仔就係19歲中場安祖高美斯。

身高只有1米61嘅安祖高美斯屬於「短小精幹」球員，腳法細膩，擅長個人突破，佢喺2017年5月英超煞科戰對水晶宮入替朗尼，以16歲零263日成為曼聯自1953年以來最年輕上陣球員，足以證明呢位英格蘭小國腳潛力優厚。

不過，安祖高美斯之後上陣機會非常少，大部分時間踢預備組賽事，令佢意興闌珊，近日更刪除個人社交網有關曼聯嘅貼文，似乎去意已決。

安祖高美斯將於明夏約滿，可於下月開始同其他球會傾加盟問題，英國《每日郵報》指巴塞睇中呢位新星，認為佢技術型踢法啱晒「地上最強」。如果成事，巴塞到時可以打造「美斯+高美斯」攻擊組合，都幾有噱頭。

[Busconcamp]

前利物浦中場來投　曼聯願放保羅普巴



曼聯領隊蘇斯克查日前表示，1月轉會市場唔會放走法國中場保羅普巴，不過意大利媒體《都靈體育報》平安夜爆出猛料，話祖雲達斯收購保羅普巴一事取得突破性進展，而當中關鍵一步，就係前利物浦中場安利簡恩成為交易籌碼，令蘇斯克查願意「反口」促成交易！

保羅普巴想離開曼聯已經係公開秘密，重返祖雲達斯係佢心水選擇，《都靈體育報》今次爆料被英國傳媒廣泛報道，祖雲達斯同意將德國國腳安利簡恩送去曼聯，另外再加5,200萬鎊現金轉會費作為條件。雖然曼聯2016年夏天用破世界紀錄轉會費9,000萬鎊收購，不過佢依家只剩18個月合約，身價縮水亦在所難免。

事實上，喺蘇斯克查嘅新體系之下，踢法滋油嘅保羅普巴完全唔啱踢，安利簡恩雖然創造力同腳法唔及保羅普巴，不過防守力、活力同爛打都係曼聯中場所需要嘅特質。現年25歲嘅安利簡恩之前踢利物浦成名，不過轉投祖雲達斯後慢慢失寵，今季更加被踢出球隊歐聯大軍名單，為咗打救職業生涯，「變節」去曼聯亦在所不惜。

[Busconcamp]

曼聯開超高周薪都冇用　夏蘭特揀多蒙特！



冬季轉會窗仲未開，曼聯已經要承受第一個大挫折，頭號收購目標夏蘭特，寧願去德甲多蒙特都唔去紅魔鬼。蘇斯克查對呢位本屆歐聯射入8球嘅挪威超新星非常欣賞，早前親身飛去奧地利游說佢加盟，並承諾支付20萬鎊周薪。但19歲嘅夏蘭特依然拒絕，曼聯上下及全球魔迷必定好失望。

身為前曼城名將夏蘭特嘅囝囝，今季於奧地利班霸薩爾斯堡表現一流，22次出場攻入28球，並於歐聯射入8粒，幾乎帶領球隊晉級，成為曼聯、祖雲達斯、多蒙特及RB萊比錫青睞。同南野拓實一樣，夏蘭特合約中都有超抵解約金條款，多蒙特今次收購成功，只需1800萬鎊。

夏蘭特已手持多蒙特波衫影相，今次將簽約5年，周薪約為13萬鎊，「蜜蜂兵團」將於轉會窗重開後正式宣布佢加盟。曼聯雖然收購失敗，但近期拉舒福特、安東尼馬迪爾及格連活特都表現出色，或許將注意力放去中場球員上面，可能更加適合。

[Busconcamp]

輸畀屈福特未算最衰　曼聯一個處境更大鑊

曼聯上輪英超竟然不敵包尾大幡屈福特0:2，其中「鋼門」迪基亞牛油手派膠，幫屈仔先開紀錄，之後雲比沙卡再輸12碼，曼聯雖有保羅普巴復出，但最後連破蛋嘅能力都冇。近期先後於屈福特、愛華頓、阿士東維拉、錫菲聯、般尼茅夫等身上失分，紅魔鬼現僅排聯賽榜第8，錄得近30年來最曳聖誕成績。

輸畀屈福特當然唔係好事，但最麻煩、最大鑊係紅魔鬼嘅賽後反應。據英媒《Metro》報道，當輸波後返回更衣室，全隊上下無論係年輕球員又好、大佬級球星又好，全部粒聲唔出，木無表情咁坐晒喺度；連領隊蘇斯克查都毫無火氣，唔知可以同班球員講啲咩。呢個現象絕對令人擔心，反映出蘇帥對球隊差勁成績一籌莫展，根本冇辦法去改善，試問又點可以好好激勵球員？領隊都諗唔到辦法，對曼聯嘅年輕班底嚟講，未來只會如盲頭烏蠅一樣。