2019 年度你最喜愛電視劇

[肉羊哩咖]

除咗電視上嘅，你可以舖包埋串流平台上，同電視短篇，唔可以係動畫，唔可以係 SP。首度播放/上架必定嚮 2019年內

首先，同電影一樣，今年真係痴線，勁多好嘢上（而然爛都有好多），尤其係幻想系，要揀當中最好嘅好鬼死難，以下志在拋磚引玉。

最愛：

1 - 魔鬼神探 Lucifer S4：完全偏心嘅選擇 -- 唔洗再解釋咁多喇掛。 因為話數少咗，主線濃縮咗好多，男女主角都有發揮，加埋班配角因為上季而轉變有好多發揮，爭啲漏咗新女角極之搶戲，完全唔似覺係 MILF 嚟（逃），今季仲多咗啲動作元素；唔似 Castle 過咗三季就跌 watt，保持到啲化學反應同趣味。希望下季有個好尾。

2 - The Mandalorian S1：（繼續無公信力咁偏心）幾乎係今年最佳，唔好講細路帶起嘅人氣，最緊要回歸返到星球大戰嘅原味：西部片式冒險故事；另一樣好緊要，無將啲怪力亂神嘅嘢同政治擺到最前（咳），平平實實咁演譯，但係每話質素落差幾大（唔係話有啲唔得），但比起第一就爭啲（都話咗偏心㗎啦）。

3 - The Boys S1：如果無《朦面佬與阿B之西部活劇》，呢套絕對係第二，拆解超英作品（同諷刺大企業）之餘，嗰位「正義嘅朋友」絕係亮點，好在班凡人一樣無輸蝕，Butcher 壓場感十足，而男女主角嘅關係發展好夠味，轉折亦都吸引，最好嘢就唔洗睇過原著都明，仲要改到比原著好嗰度先勁。

4 - Fleabag S2：如其玩性別政治，不始諷刺啲人係唔係都玩性別政治，講笑啫，觀眾如果掛住乜乜物物主義去睇，完全捉錯用神，一邊繼續密集笑料，另一邊睇住女主角終於成長，唔需要同觀眾「分享」佢嘅內心感受，反而真正老實去認識作為女性係點嘅一回事 -- 佢夠胆死有五到十分鐘，講享受女性更年期後嗰種無咗唔方便，重獲「自由」嘅感受。女主角同 Andrew Scott 呢個靚仔神父好有火花。S1 仲有女主角兼編劇 Phoebe Waller-Bridge 自己個舞台劇嘅影子，呢度完全擺脫仲講咗個好唔同嘅故仔。第一話以呢度咁多講套嚟講，可能係最好睇單一話嚟。

5 - The Witcher S1：嬴第六一個馬鼻，主要演員好得，打鬥又出式，但係時序前前後後有啲亂，每一話唔夠咁平均，但有一兩話真係唔係咁掂，尤其係講 Elf 嗰一話。

(特別上榜）6 - Mr Robot S4：完結篇繼續玩高難度，具真實性嘅 hacking 已經係指定動作，演嘅出色唔在講（Rami Malek 同 BD Wong 有幾好戲仲要嘥口水？）故仔精彩緊張角式動機合理，到個結局個大扭橋唔只拍案叫絕，合理之餘可以教觀眾回味返呢四季成個旅程，非常聰明而有人味；但今季太多太集中嘅話數，嫌成個講故仔成個過程唔順，仲有一兩話擺明玩 style 作狀得滯令本人失望。

(特別上榜）7 - Mindhunter S2：David Flincher 繼續玩美國近歷史式警匪片，今次除咗又係咁玩齋噏演譯案情呢啲高難度動作，開始寫多啲各主角嘅私生活，多少少辦公室政治，亦將主角們「學」返嚟嘅技巧，應用返去破單大案做主線，個劇本好聰明咁揀單唔只極富政治性，而成單案到今日都受爭議。你唔識班犯有幾巴閉就比較難投入（好在有大量解畫片同維基幫到你）。

(特別上榜）8 - The Good Omen：維持英式短少精桿劇集模式，（當然仲）夾雜大量英式笑料（啫係大部份人唔識笑嗰隻），勝在兩位主角撐得起成部劇，佢哋個互動極可觀，故仔奇趣之餘仲有好多諷刺嘅筆觸，其餘兩位大人配角同班細路發揮合格有突，最後個扭橋更令人鼓掌；特技絕對唔掂，唔及下面套 His Dark Materials 咁落本，但無礙欣賞。

其他：

The Expanse S4 只煲咗一半，當你好心急要撳個 Next Episode 掣嘅時候，就知有幾好，暫時睇落絕對唔係第三都第四。

The Watchmen S1：好多嘢講，每樣都好精深，難得個大結局又幾㘣滿收尾；但衰在有好多嘢一開始唔交待清楚，另外，唔熟（原著）書好多嘢真係唔知咩嚟。都係臨尾四話一展開就唔捨得唔追埋佢。

The Chilling Adventures of Sarbina S2：多咗個男友但居然無爭風呷醋，兩位「大魔頭」校長都好有壓場感，邪氣三姐妹仲好搶鏡，班姑媽都好戲，結局比上一季更有迫力，但可惜因為少咗人界校園嘅戲份，同原本班老友路人化咗好多，有位個故仔仲好「監粗嚟」，故仔趣味性反而差過 S1，隻貓繼續無口，可惜。

His Dark Materials S1 幾有趣，亦不惜工本，有大明星，劇情忠於原著，可惜太慢同埋個結局太令人失望。

Sex Education S1 同 Umbrella Academy S1 都好玩，但各有缺點成唔到最 top。

Stranger Things S3 比唔上 S1，好過 S2 少少，個頭開得好但一路係咁跌落去，到最後「大戰」令人有啲失望（除咗個勁好玩嘅歌舞片段）

The Titans 只睇咗 S1 而無睇 S2，入唔到榜。

The Good Place S4 未完唔計入。

無睇 Succession、Handmaiden Tales、Chernobyl、Better Call Saul 同 Doom Patrol 等等等等未能評論。

應該仲有好多好嘢，不過一時三刻寫唔晒。

[cancerman]

今年最愛係The Mandalorian同The Boys

今年最愛角色係尤達寶寶？？

[肉羊哩咖]

完全無留意到 Fleabag S2 係 2019年 出品，排過榜啲次序。

[Busconcamp]

唔多睇美劇,
容禾低個層次
愛的迫降...睇真妹演技

[肉羊哩咖]

--- del ---