車路士球迷會Vol.36 ~杜曹執教後第一場勝仗 舊將被重用及重生~

[蛋撻王子]

《由當日接近零英人變成今日英軍大戶 淺談車路士青訓抬頭的契機》



自泰利等黃金一代相繼從英格蘭國家隊退下來之後，車路士一直都無乜出產過一啲具能力既本土球員代表「三獅軍團」，什至被外界揶揄為一支沒有英人既英格蘭球隊，直到今季受惠於轉會禁令所影響，加上林伯特既推動，令唔少車路士本土青訓都能晉升至一隊效力什至成為核心球員，由當日接近零英人變成今日英軍大戶，相信唔少車迷都樂見哩個現象。

泰利、林伯特、祖高爾、艾殊利高爾，數數手指哩個組合既名字都有成十幾年歷史，仲要未數曾經仲有布歷治，雖則講完之後都係被抽水居多，當日藍軍其實係有唔少具級數既英人為國家隊骨幹成員，而自佢地相繼退出以及離開過後，要數到車路士近年黎既英人就得番前隊長加利卡希爾同仲喺隊內既巴克利，但拍埋去班老大哥度，佢地無論喺實力以至星味上都真係差幾班。

其實車路士自艾巴莫域治入主後哩十幾年，佢除左投放左唔少錢喺收購實力球員之外，同樣地亦放左唔少資源喺改善青訓既系統同架構上，當然，每支球隊既青訓所帶到比球會既成果唔係一朝一夕，同樣地亦都唔會因為你今年投放左一大筆金錢落去，所以去到下年就一定會有收獲，青訓系統從來都係需要經過長年累月既累積，由球員自小喺接觸足球既年紀加入直到能夠打職業賽一直慢慢培育，而亦要得到一個晉身一隊既機會。

早幾年其實都已見到車路士青訓系統既成功，青訓梯隊一直都有喺國內聯賽什至歐洲賽內獲得奬項取得唔錯既成績，所出產既由早一代既路夫斯捷克、基斯甸臣、艾基、蘇蘭基等，去到依加新一輩艾巴咸、蒙特、湯姆利，仲要未數仲有好幾個外借左出去同埋仲喺梯隊內既潛質新星，其實藍軍一直都唔缺乏自家青訓，只係無機會比佢地晉身一隊，而直到今季受制於轉會禁令，可以話出現左一個契機。

老實講，如果唔係哩個所謂既轉會禁令，依加艾巴咸、蒙特佢地幾個又會去左邊？都幾肯定依然會繼續外借，而球會亦只會以買人作為補充，喺現今球員市場下，買過質素可能普普通通既閒閒地都要用你幾千萬鎊，買返黎仲要未必包岩用。當然，培育青訓球員唔係唔需要成本，但對於一個係真正自家出產既年輕球員黎講，對於球會既忠誠以及歸屬感，定必比起收購返黎既高，而同時亦都係每支球會既球迷都定必樂意見到既事黎。

錯有錯著，加上佢地能夠把握得到機會表現自己應有既質素，完完全全將危轉化為機，亦令黎緊既青訓球員既前路比起過去更加平坦。

Fanpiece - 藍獅: https://football.fanpiece.com/bluexl...feature=scroll

其實有時同朋友傾開都會講呢樣野
依家車仔真係好英軍

我最想就係英國人會鐘意多番D車路士
因為聽講英國本土車路士係相對地無咁受歡迎既英超球隊