曼聯躉紅魔鬼地帶[VOL.94]~Closed~

[Busconcamp]

FT
1:1
前線賣人唔入貨,
後防明明執好左但又重係失埋d大意波...

[digiharuka]

作者: Busconcamp

FT
1:1
前線賣人唔入貨,
後防明明執好左但又重係失埋d大意波...

就算唔賣人都無用, 仲係踢4231 就難入波

[Busconcamp]

占士仔着火　曼聯一樣撐唔住



英超頭場，曼聯雖有新星丹尼爾占士近4仗轟3粒，但打多個之下，作客仍被「聖人」修咸頓逼和1比1，連續3場聯賽失分之餘，近19場正式賽事只得1場冇失波，防線堅唔穩陣。

由於安東尼馬迪爾因傷缺陣，曼聯主帥蘇斯克查將「福仔」拉舒福特移前打中鋒，並用老將桑馬達取代連格作後上支援，雖然開波後修咸頓藉地利係威係勢撳住搶，但去到10分鐘，麥湯米尼妙傳畀丹尼爾占士，佢於左路殺入禁區扣番大位，嚟個炮彈式勁射破網，開季4場聯賽入3粒，旺到冇朋友。

易邊後「聖人」大舉反撲，58分鐘曼聯門神迪基亞打手拳打出不遠，奇雲丹素右路傳中，中堅維斯達加特力壓域陀連迪路夫頂成1比1。不過冇耐助攻嘅奇雲丹素因飛剷麥湯米尼，「兩黃一紅」被逐。紅魔先後換入連格、尼曼查馬迪及格連活特，加強攻力，可惜未攻破修咸頓嘅鐵桶陣，最終各一言和。

曼聯唔單止連續3場聯賽失分，連埋今仗在內，佢哋自從今年2月以來，近19場正式賽事，只得1場保持清白之身，堅尷尬。雖然紅魔今夏已重金購入右閘雲比沙卡同哈利馬古尼，但一來新防線組合仍未夾熟，二來中場未能起到屏障作用，只得防中麥湯米尼不斷執漏係唔夠，而且紅魔已經6個月聯賽作客(共6場)不勝，咁點爭前4呀。

[Busconcamp]

迪基亞拒絕續約　曼聯終極方案對付佢



曼聯創下近27季最差開季成績之後，仲面臨另一個危機，就係門將迪基亞眼見球隊每況愈下，決定「跳船」拒絕續約，打算明夏自由身離隊。

據悉，迪基亞嘅經理人原本已經同曼聯達成口頭協議，就係迪基亞續約6年，周薪35萬鎊。不過，迪基亞提出一個條件，就係要睇下球隊成績，先至決定是否續約。

由於曼聯今季表現仍然冇起色，管理層都知道無法留力呢位西班牙鋼門，計劃等明年1月冬季轉會市場重開後，以「賤價」3000萬鎊將迪基亞出售畀巴黎聖日耳門(PSG)，以免人財兩失。

雖然PSG可以等到明夏免轉會費簽入迪基亞，但曼聯管理層認為，PSG絕對希望提早簽入佢，以免夜長夢多，明夏被其他豪門搶走，預料紅魔鬼索價3000萬鎊轉會費，PSG都會接受。

[Busconcamp]

曼聯再受打擊　普巴傷埋



曼聯上場英超被修咸頓逼失1:1之外，原來中場球星保羅普巴亦被對手踩傷，對於已經連續3場不勝嘅紅魔鬼，無疑係雪上加霜。

雖然保羅普巴上場踢足全場，但有電視台影到佢賽後離場時，行路拐下拐下，似乎係受傷。領隊蘇斯克查表示，保羅普巴係被對手踩傷足踝，但佢堅持比賽到完場。

保羅普巴將會接受詳細檢查，睇下傷勢嚴唔嚴重，可能會缺陣為法國出戰未來2場歐國盃外圍賽對阿爾巴尼亞及安道爾。

雖然保羅普巴近年表現一直受到球迷批評，但佢今季已經為曼聯貢獻2次助攻，核心地位不容置疑，如果佢有乜三長兩短，曼聯想翻身就更加難。

[Busconcamp]

近27年最差開局　蘇斯克查過唔到聖誕？



英超曼聯今晚作客修咸頓僅能打和1比1，唔少球迷認為，若非「聖人」尾段打少個，「紅魔鬼」隨時3分全失都唔出奇。事實上，曼聯自從開咧戰大勝車路士4比0後，已經連續3場不勝，只得2和1負，佢哋對上一次聯賽作客贏波，竟然要倒數番去今年2月27日作客贏水晶宮3比1。

至於佢哋開季4戰只得1勝2和1負得5分，原來係自92/93球季之後，近27季最差嘅開季成績。雖則92/93球季曼聯開季4戰只得1勝1和2負得4分，而佢哋嗰季最後係後上奪冠；不過今季各位球迷睇怕都好難相信「紅魔鬼」仲可以再創奇蹟！仲有，上季「寸王」摩連奴都叫做捱到12月輸畀利物浦後先被炒，依家蘇斯克查個勢，又仲可以捱幾耐？

[Busconcamp]

英超最強攔截王　雲比沙卡破硬紀錄！



曼聯開季成績令人失望，不過新加盟右閘雲比沙卡表現就相當唔錯，周六作客1比1打和修咸頓一戰，呢位英格蘭國腳錄得10次攔截，成為今季英超第1位單場錄得雙位數字攔截次數球員！

因為腳長而被稱為「蜘蛛」嘅雲比沙卡，上季喺水晶宮以129次攔截成為英超「攔截王」，本來今季轉投實力更強嘅曼聯，理論上面對較少防守壓力下，數字應該會下跌，不過佢今季4場聯賽攔截次數分別為6次、9次、1次同埋10次，4場波已累積26次攔截，照呢個走勢，要破上季紀錄應該唔成問題。

雲比沙卡除咗攔截次數多之外，成功率亦相當之高，佢4場波作出31次攔截有26次成功，成功率達到84%，曼聯今次總算冇簽錯人。

[Busconcamp]

【東體爭議】曼聯前途全押普巴　蘇B玩命！



曼聯周六(31號)英超作客被修咸頓逼和1比1，連續第3場贏唔到波，事實上「紅魔鬼」今場組織力唔強，中場核心保羅普巴雖然都好努力做好多嘢，但成效真係一般，呢位法國球星全場62次交波只係得50次成功，成功率得81%，雖然佢都為隊友製造咗4次機會，但整體演出仍然係壞多於好。

其實曼聯最大問題，就係保羅普巴嘅影響力過大，雖然球隊前線3人都係個人能力唔差嘅球員，但成隊波組織幾乎係靠保羅普巴一個，無論係「必然正選」麥湯米尼定係後備嘅尼曼查馬迪，都唔係擅於組織嘅中場。蘇斯克查賽後表明保羅普巴呢個夏天一定唔會走，但佢亦要旨望普巴場場都踢到曉飛，如果單靠快速反擊呢一招打全季，曼聯同蘇斯克查今季前途都令人擔心。

[Busconcamp]

【金7沒落】連格正式要求着曼聯7號！



曼聯開季成績差勁，已經9個月未有錄得英超入波或者助攻嘅連格，一直係球迷炮轟目標，不過據英國傳媒爆料，呢位英格蘭國腳竟然向曼聯提出，繼承阿歷斯山齊士離隊後嘅7號波衫！目前着14號嘅連格，喺英格蘭國家隊都係着7號，但係佢真係夠班咩？

客觀咁睇，球衣號碼就只不過係一個號碼咁簡單，但當中象徵意義對球迷嚟講都好重要，曼聯7號之前嘅主人有佐治貝斯、笠臣、簡東拿、碧咸同C朗拿度等傳奇人物，即使近年7號「水貨」充斥，好似A山齊士、迪馬利亞同迪比等等，但佢哋都叫有一定國際地位，如果依家7號畀連格，相信曼聯球迷會嬲到爆炸囉！

奧脫福球場廣播員Michelle踢爆連格想着7號後，曾效力曼聯嘅法國前鋒沙夏表示：「唔係想踩連格，佢係曼聯青訓出身，應該清楚知道7號波衫唔係你話要就要，而係要用表現贏番嚟，當球會認同你可以代表到曼聯，自然就會畀你。」

[Busconcamp]

曼聯下季波衫曝光　執祖記唔要設計？



雖然新季先啱啱開始，但已經有下季波衫設計流出，曼聯將變身斑馬兵團！據英國《太陽報》報道，紅魔鬼下季其中一件作客球衣，將採用黑白為主色，中間部份一條直間分開波衫2邊，望落去成件祖雲達斯波衫咁款！有傳呢個設計，本身就係「三間牌」造畀祖記嘅今季主場波衫款式，但祖雲達斯就拒絕使用，唔通今次曼聯係要執祖雲達斯二攤？

睇番呢張波衫流出圖，新季曼聯作客球衣會以白色做主色，球隊會徽同波衫贊助商標誌都用上黑色，而中間嘅一條黑白間，堅有祖記味道。《太陽報》問過曼聯會方同「三間牌」，兩者都拒絕評論呢件球衣，但就好肯定咁講，呢個絕非祖記曾經拒用嘅款式。

1978/79球季，曼聯曾着上類似款式嘅作客波衫，但最終只排第9。

[Busconcamp]

踢4輪衰過曼城一年　蘇斯克查死撐冇危機



英超曼聯開季4輪失咗7分，認真羞家，更加搞笑係，有傳媒發現，原來曼聯嘅死敵曼城，自2019年開始，踢到依家先失咗5分，係總共22場先失5分，明顯高過「紅魔鬼」幾班。不過，即使面對住醜到爆戰績，曼聯主帥蘇斯克查仲係話未驚過喎！

曼城係上季英超、足總盃同聯賽盃3冠王。自從踏入2019年開始，曼城上季踢18場聯賽錄得17勝1負佳績，今季4戰就錄得3勝1和，總計2019年暫時就有20勝1和1負，僅失5分。再用同期曼聯聯賽戰績比較，「紅魔鬼」原來係失咗30分之多，較曼城多失25分，堅羞家囉！

對於曼聯目前危機，「蘇B」話：「對修咸頓場波，我哋開局唔錯，仲取得領先。本來我哋有機會爭取入第2、3球，點知一次失誤就令我哋付出代價。之前3場波，我哋都贏唔到，但其實踢得都好過對車路士場波。我哋主導咗比賽，製造咗入球機會，只係贏唔到，然後再失波，我哋其實冇乜運。」原來只係冇運？咁唯有祝曼聯好運啦！

[Busconcamp]

意甲變曼聯舊生會　達美安加盟帕爾馬



曼聯繼續清洗球員，繼近日踢走盧卡古、阿歷斯山齊士、基斯史摩寧之後，依家又宣布出售右閘達美安畀帕爾馬，轉會費只係140萬鎊，簡真係半買半送。

呢位30歲意大利國腳2015年由拖連奴加盟曼聯，轉會費達1270萬鎊，估唔到4年之間貶值近9成。

達美安可以司職左右二閘，甚至可以客串中堅，但始終得唔到曼聯近2任主帥摩連奴、蘇斯克查信任，過去2季英超加埋只上陣14次，今季更加未上過陣。因此，曼聯以平價畀達美安離隊，對球會同球員都係一件好事。

值得一提，盧卡古、阿歷斯山齊士、基斯史摩寧、達美安今次都係去意甲搵食，4位前紅魔鬼又可以聚首。

[Busconcamp]

曼聯小子彈爆開4人　勁抽入網



曼聯近3場英超都贏唔到，進攻尤其不濟，只入3球，但其實紅魔鬼有一位「美斯」，領隊蘇斯克查卻唔識用，佢就係安祖高美斯。

呢位19歲英格蘭新星於日前U23英超賽事，為曼聯U23對韋斯咸U23，射入一個精彩入球，佢當時接應隊友傳送後，個人表演，突破對手4人包圍，勁射入網，屬於巴塞隆拿球王美斯招牌式入球。

呢條入波片段喺網上瘋傳，大量曼聯球迷認為紅魔領隊蘇斯克查應該將安祖高美斯提升上一隊，代替表現低迷嘅連格，否則下場贏唔到李斯特城。

身高只有1米61嘅安祖高美斯司職進攻中場及翼鋒，雖然佢身材矮小，但腳法細膩，速度又快，因而有「小子彈」之稱。

安祖高美斯之前曾經為曼聯一隊上陣過3次，包括上年12月英超後備上陣對哈特斯菲爾德，佢亦有份參加今夏季前熱身賽，並於國冠盃對熱刺，取得首個一隊入球。

不過，開季之後，安祖高美斯只能踢U23賽事，曼聯依家陷入困局，安祖高美斯機會來了，可能成為球隊秘密武器。

[Busconcamp]

雲比沙卡受傷退出英軍　



英格蘭將於周六(7日)深夜歐國盃外圍賽主場對保加利亞，但球隊爆出傷兵問題，首次入選嘅曼聯右衞雲比沙卡，因為背部受傷退隊，未能一嘗大國腳比賽滋味。

21歲嘅雲比沙卡今夏以5000萬鎊轉會費，由水晶宮加盟曼聯之後，表現出色，成功獲得英格蘭主帥修夫基垂青，第一次入選大國腳，佢日前仲有參加訓練。

不過，英格蘭足總依家宣布，雲比沙卡退隊，修夫基透露呢位新星背部受傷，所以畀佢返回曼聯治療，同埋冇打算補選球員，預料馬體會右閘捷比亞會出任正選。

英格蘭除咗主場對保加利亞之外，仲會對科索沃，兩支對手實力麻麻，難怪修夫基胸有成竹。

[Busconcamp]

曼聯更衣室怒震　蘇帥狂插球員係笑話！



曼聯更衣室大震動，領隊蘇斯克查要爆喇！上輪英超紅魔鬼被修咸頓迫和，頭4場英超僅取5分，已遠遠落後榜首利物浦7分。英國《太陽報》報道，蘇帥於賽後怒不可遏，大鬧一班球星係「笑話」同「令人尷尬」，仲狂鬧佢哋想作個人表演，多過服務整體。有消息傳出蘇帥最不滿係2名前鋒拉舒福特同安東尼馬迪爾，認為佢哋完全踢唔出賽前部署。

今季曼聯出閘又脫腳，錄得自1992年以後最差開季成績，蘇帥梗係睇班波唔順眼，喺更衣室忍唔住狂插球員。據消息指蘇帥嬲到震，認為球隊演出直頭係「笑話一則」，睇到佢同全球曼迷好尷尬，表現完全唔可以接受。一向強調整體作戰、合作性機動性並重嘅蘇斯克查，狠鬧一班球星尤如一盤散沙，個個各自為戰，一心只諗住個人表演，置球隊整體利益於不顧。佢仲冇開名咁表示，有球員演出特別差，如果再唔改善，只會累埋其他隊友。

據《The Athletic》報道，蘇帥暗鬧嘅其實係拉舒福特同馬迪爾。蘇帥對2個年輕前鋒寄予厚望，成個星期為2人作出特訓，不停指示2人要多走位多楔前柱爭取埋門，但落到場2人好似忘記晒所有指示，令蘇帥嬲到爆。

蘇帥仲指，希望班波於國際賽周好好反省，如果下場聯賽對李斯特城都贏唔到，球員將會陷入極大麻煩。蘇帥咁講完全正確，因為首當其衝、最大鑊嘅就係佢本人，事實上曼聯新季成績低落，蘇帥已經承受唔少壓力，紅魔鬼再唔識贏，佢個帥位都唔多穩陣。

[Busconcamp]

【阿King】曼聯舊班底崩潰　必須換晒11人



曼聯公布球隊8月份表現最佳球員候選名單，分別係丹尼爾占士、雲比沙卡、哈利馬古尼。無錯，3人有一個共通點，都係今夏加盟，從好一方面睇，證明買啱人，但同時反映舊有班底完全唔掂，單靠呢3位新兵，仍然未夠力度令紅魔鬼重振雄風。

3位新紅魔鬼喺8月表現對辦，年僅21歲嘅丹尼爾占士4場英超入3球，成為陣中首席射手。右閘雲比沙卡喺4場波作出31次攔截有26次成功，成功率達到84%，中堅哈利馬古尼亦大大改善中路防守。

雖然3人交到功課，但點解曼聯踢4場聯賽只取得1勝2和1負，創下近27年最差開季成績呢？歸根究底都係舊人表現仍然冇起色，足球係11個人踢，單靠3位新兵踢出身價波，都係未夠，令人慨嘆，莫非曼聯要換晒11位正選先至得？

英國傳媒指，曼聯上場被修咸頓逼和後，領隊蘇斯克查於更衣室大發雷霆，鬧爆球員表現係笑話。再睇埋紅魔鬼今次8月最佳球員候選名單，由新兵包辦，連一向有信心保證嘅門將迪基亞都冇份，突顯舊班底係幾咁不濟，已經唔係可笑，而係可悲。

[Busconcamp]

有心唔怕遲　曼聯明年初搵佢頂連格



國際轉會窗關閉，熱刺丹麥中場基斯甸艾歷臣最終並未有如傳聞中轉戰西甲，皇馬同巴塞都冇簽佢，尚餘1年約嘅佢只能乖乖留喺熱刺。《太陽報》報道，曼聯準備明年初冬季轉會窗重開時出手挖角，原因係小將連格表現太差，要搵艾歷臣番嚟救亡。

基斯甸艾歷臣傳聞去西甲傳得好勁，甚至有報道話佢已經喺馬德里買咗樓，可惜最後轉會撻Q，佢本人都好無奈：「我都想好似《足球經理人》遊戲咁自己決定踢邊隊，可惜現實唔係咁。」

曼聯今夏曾開出7000萬鎊向熱刺要人，但當時熱刺正與皇馬斟介，因此不了了之，依家去西甲去唔成，蘇斯克查又見連格表現差勁，開季至今0入球0助攻，所以曼聯準備冬窗第一時間將呢位27歲中場搶到手。

[Busconcamp]

新韋利爆發　身價1億曼聯都吼實



意大利今輪歐洲國家盃外圍賽又贏波，累積5戰5勝，史上首次獲此成績，其中今場對阿美尼亞梅開二度嘅25歲射手比洛迪，賽後獲意國傳媒一致好評，封佢做「新韋利」，原來呢位拖連奴前鋒之前曼聯都有留意過，現時曼聯鋒力單薄，更應該簽佢。

比洛迪上半場一腳門前窩利撞射，再於下半場憑個人控球能力及射術破門，加上兩次入球被判詐胡，顯示高超埋門觸角，賽後《米蘭體育報》形容：「意大利終於搵到韋利接班人。」

25歲嘅比洛迪在拖連奴效力踏入第5球，佢一直都係陣中主力，入球數字平穩，最突出係16至17球季38場入28球，而今季開季至今已為球隊攻入7球，狀態步入高峰，預計即將迎接大爆發嘅一季。

拖連奴將比洛迪嘅違約金定為1億歐元，今夏韋斯咸曾開價6000萬鎊，但遭拖連奴拒絕，早前曼聯、車路士及AC米蘭都對比洛迪有興趣，不過因價錢問題唔成事；現時曼聯只得拉舒福特、安東尼馬迪爾及格連活特3個前鋒，實在唔夠用，明年1月要買人嘅話，呢位比洛迪值得考慮。

[Busconcamp]

奧雲：拉舒福特非頂級射手



拉舒福特自於青年時代、得到尹戈爾賞識，進而提升至一隊後，一直被封為曼聯及英匿蘭國家隊的未來希望；今夏盧卡古離隊後，福仔更順理成章成為紅魔鬼首席前鋒。他於英超首仗鬥車路士梅開二度，不過之後3場聯賽都顆粒無收。

奧雲道：「拉舒福特腳法好、具組織力，這都是我沒有的；不過我擁有一樣東西他是沒有的，就是頂級埋門觸角。阿古路、哈利卡尼、科拿都有，但福仔沒有。他自小都是邊線球員，而且又打過10位，你看他的表現就知，他根本不是一個純射手。他會每季貢獻一些入球，但不要寄望他可以擔起球隊入球重責。」(goal.com)

[Busconcamp]

盧祖：1月或要求離曼聯

曼聯後衞馬高斯盧祖，今季繼續於紅魔鬼被投閒置散，他向阿根廷傳媒表示，會入選國家隊，他或迫於無奈地於1月另覓新東家。

馬高斯盧祖近年都非曼聯正選，他於今夏本有機會過檔愛華頓，但最後2間球會未能達成協議，最後他唯有留隊：「早前我有機會轉會愛華頓，不過交易卻沒有達成。阿根廷領隊史卡朗尼對我說，因為我於季前熱身賽有上陣，故決定選我入伍，可見要入選國家隊，就肯定要於球會中有穩定出場時間。如到1月我都未能搶得曼聯正選，我會要求離開。」

愛華頓主帥馬高施華承認，於上個轉會窗希望得到盧祖：「去到轉會窗即將完結時，對我而言於市場上選擇不多。我希望得到盧祖，而他亦想加盟，但兩間球會未能達成協議。」(goal.com)

[Busconcamp]

普巴與連加特

首先我覺得普巴係攻守俱佳嘅球員，但喺防守時我睇唔到佢享受防守，佢嘅身體語言表達在回防時係唔願跑去回防。不過，在到佢參與進攻我可以睇到佢處於集中，全程投入同具有創造力嘅一面。我哋成日講佢要點改善缺點，倒不如俾佢哋發揮長處，做佢喜歡同享受嘅工作。

連加特在進攻方方面嘅特點係佢擅於分波，在前場做逼搶較其他隊員快同有威脅，而當佢冇波在腳時佢亦都勤於走動同埋佢同福仔，馬仔嘅默契佳，佢有當年朴智星嘅特質。可惜，作為一位攻擊球員佢欠缺咗兩重最重要特質；就係俾對方後衛嘅危機感同埋射門嘅準成度。例如：當佢見到對手在前面，佢就多數都係橫傳，佢唔會在適當嘅時候正面挑戰對手。而在射門方面，佢唔係冇射門欲，只不過係經常射唔中龍門同埋撻Q。

不過，我哋可以推普巴踼10號位。如果普巴可以利用佢有威脅嘅遠射，獨到短傳入滲加上佢嘅高大身形嘅頭搥，就可以增強曼聯進攻嘅強度，亦都可以減少佢在後場扭波失誤被人打反擊的機會。仲有普巴係唔係一個喜歡經常跑動嘅人，佢係屬於一個踢位置嘅球員，即係跑動唔使多，只係適當時候走到一個有威脅嘅位置就得。

反而連加特可以俾佢試吓打防中。因為防中需要一個擅於跑動嘅人，再加上曼聯現有嘅中場麥湯文尼同馬迪都係踢位置，靴里拉又走咗，所以中場補個勤於跑動嘅人係好重要。佢能夠不斷回防為中堅作屏障，亦都可以在後場拉空位置等後場嘅人可以送個皮球去前面，就似以前當時費sir將前鋒阿倫史密夫改造成防守中場。另外，佢亦都喜歡當有敵人在前面時就將個波傳俾人而唔係去扭過人，咁就減少好似普巴在後場扭失波嘅情況。

我個人覺得，踢波要進步唔係好似讀書咁，要搵出錯誤然後改正，而係要因材施用，利用球員嘅優點，隱藏佢哋嘅缺點。當一個球員開始踢到有信心，缺點都會變成優點。

[Busconcamp]

連格退隊！英格蘭以後唔使用佢

英格蘭準備出戰歐國盃外圍賽前，曼聯翼鋒連格宣布因病退隊，呢位26歲球星已經提前返球會養病，正式缺席對保加利亞以及科索沃2場歐國盃外圍賽。事實上，連格由上季尾開始一直表現低迷，英格蘭國家隊席位亦都岌岌可危，喺「三獅兵團」新人輩出情況下，連格仲有冇機會返國家隊真係令人懷疑。

上年世界盃決賽周後，連格曾經連續為英格蘭喺熱身賽對美國以及歐國聯贏克羅地亞入波，因此得到領隊修夫基力撐，但隨住佢喺曼聯愈踢愈沉，唔少球迷都覺得佢唔值得再入國家隊，英格蘭正選位置幾乎肯定會被查頓辛祖搶走，加上阿歷士張伯倫復出以及赫臣奧杜爾即將傷愈，如果連格仲唔快啲踢番「連美斯」水準，睇怕再入國家隊機會都幾渺茫。

[Busconcamp]

英超今季首個落鑊領隊！下個熱門係...

英超球會屈福特周日(8號)官方宣布，西班牙籍領隊查維加西亞正式被炒魷，成為今季英超第1個「落鑊」主帥。屈福特發出簡短聲明話：「球會上下希望查維加西亞同佢團隊會有更好發展，屈福特會一直歡迎你哋。」屈福特同時宣布聘用前領隊科里斯回巢，54歲嘅科里斯同樣嚟自西班牙，7月嗰陣同上海申花解約，佢喺15/16球季曾經執教屈福特。

現年46歲嘅查維加西亞上年1月中途接手教屈福特，連續2季護級成功之外，上季更帶領屈福特殺入足總盃決賽，可惜今季開咧4仗只得1分敬陪末席，結果難逃被炒厄運。隨住查維加西亞被炒後，據XX公司嘅下個離職領隊XX，曼聯主帥蘇斯克查就成為XX，熱刺嘅普捷天奴同紐卡素領隊布魯士就並列XX。

[Busconcamp]

37萬鎊周薪都唔要　嫌棄曼聯成績太差



英國各大傳媒爆料，指曼聯門將迪基亞已經拒絕會方提出嘅37萬鎊周薪續約條件，並決定明年夏天以自由身加盟祖雲達斯，繼承保方衣缽。

曼聯今夏一直想同迪基亞傾續約，願意畀呢位28歲西班牙國腳35萬鎊周薪，甚至近期加碼至37萬鎊，令佢成為世界最高薪門將。

不過，迪基亞仍然不為所動，但並非嫌人工低，而係根本唔想留隊，因為覺得曼聯冇爭標實力，留隊只會浪費時間。而且如果曼聯今季又未能打入英超前4位，再次無緣下屆歐聯，迪基亞下季又要減人工，留隊等於「慢性自殺」。

與此同時，祖雲達斯率先準備「預簽」迪基亞，雙方明年1月就可以正式展開談判。據報，迪基亞亦樂意加盟祖記，因為呢支意甲豪門擁有C朗、馬菲斯迪歷特等球星，起碼捧意甲冇難度，甚至有力問鼎歐聯冠軍。

特別係盧卡古、阿歷斯山齊士、基斯史摩寧等前曼聯隊友今季都去咗意甲搵食，似乎都幾好路數，難免令迪基亞心動。

祖雲達斯一向係「免簽之王」，近年多次免轉會費簽入球星，派路、普巴都係代表作，今季亦「免簽」艾朗藍斯同拉比奧特，應該好有把握簽埋迪基亞。

[Busconcamp]

曼聯執到寶　占士入亨利式金球！



曼聯喺英超開季成績麻麻，不過新星翼鋒丹尼爾占士就勁搶鏡，開咧4場已經入咗3球，仲贏埋曼聯8月最佳球員獎。周二(10號)國際友賽威爾斯主場對白俄羅斯，「新傑斯」丹尼爾占士繼續火熱狀態，17分鐘佢喺禁區犄角位「亨利式」熨射遠柱直入，瀟灑程度100分！連坐喺後備席嘅加里夫巴利都睇到拍爛手掌，威爾斯亦憑丹尼爾占士一箭定江山，以1比0贏波。

曼聯只係用1,500萬鎊就簽入呢位21歲飛翼，喺今時今日轉會市場嚟講真係超值，蘇斯克查今勻執到寶啦！