曼聯躉紅魔鬼地帶[VOL.95]各項賽事三連勝,入球眾數,重上正軌？

[Busconcamp]

emoji洩行蹤！費南迪斯飛緊去曼聯做體測



英國各大傳媒早前爆料，指曼聯已經同意用總值6800萬鎊「組合轉會費」簽入士砵亭中場波基斯費南迪斯。最新消息，葡萄牙媒體SIC捉到呢位25歲「新人王」訪問，佢承認好想去英超比賽，佢同朋友合照時，笑到四萬咁口，更被一個emoji「出賣」，似準備飛去曼聯做體測。

波基斯費南迪斯準備開車走人時，葡萄牙媒體SIC記者走前問佢想唔想去英超搵食，佢答一直都想，記者再問佢係唔係加盟曼聯，呢位葡萄牙國腳就不置可否。

不過，波基斯費南迪斯去向就被朋友「出賣」，佢同朋友Carolina Deslandes喺升降機內合照，被Carolina放上社交網，除咗見到「波費」笑逐顏開之外，仲發現相中有個「飛機」emoji，疑似準備飛去曼聯做體測，睇嚟曼迷好快收到好消息。

英國《太陽報》指波基斯費南迪斯將會同曼聯簽約4年半，仲可以優先續約1年。轉會費方面，包括基本金額4700萬鎊，如奪得冠軍另加850萬鎊，另外再加1250萬鎊有條件轉會費。

[Busconcamp]

魔迷心涼　蘇B爆粗鬧爆連格



英超老牌勁旅曼聯尋晚喺英聯盃作客小勝曼城1比0，表現雖然唔曳，但唔足以反超「藍月亮」，最終以總比數2比3不敵曼城4強出局。場波一直踢得勁肉緊，下半場連格一次前場交失波，激到場邊嘅領隊蘇斯克查爆粗大鬧，轉個頭仲將「連美斯」換走埋，呢一幕對於唔少曼聯迷可能係全場最精彩鏡頭呀！

畀香港網民寸佢係「連美斯」嘅連格，上場足總盃入波，將佢今年總入球數字打破上季0球數字，以為佢翻生爭氣，點知今場擔正又回復水準，繼續冇料到。連格今場唯一貢獻係曼聯入波嘅罰球，算係由佢搏返嚟，不過其餘時候，佢真係踢得麻麻。尤其係下半場中段，連格一次喺前場第一時間回傳畀隊友費特洛迪古斯，點知交錯位畀曼城球員截到打反擊，好彩最終史達寧射失，曼聯先冇被追和。

睇見呢一幕嘅「蘇B」，即刻喺場邊爆粗怒吼：「你再嚟多一次，ＸＸＸ我就換走你！」5分鐘之後，「蘇B」真係將連格換走，不過呢個時候，「蘇B」已經冷靜番，同連格擊掌再攬番吓，反而「連美斯」好似未驚完，唔多敢望就走番入更衣室！

[Busconcamp]

蘇斯克查：曼聯仲需要多1位射手



曼聯成功以8000萬歐元簽入士砵亭中場波基斯費南迪斯之後，增兵行動仲未停，領隊蘇斯克查表示，球隊需要再增添多1位前鋒，睇嚟冬季轉會窗關閉前，曼聯會再有新兵加盟。

講到波基斯費南迪斯會唔會喺周日(2月2日)凌晨英超上陣對狼隊，蘇斯克查話：「等我哋完成簽約後，再講呢個問題，只可以話費南迪斯身體狀態非常好，亦已經準備好上陣。」

至於被問到曼聯會唔會喺冬季轉會窗關閉前，再簽入球員，蘇斯克查承認有需要：「我需要1位射手，球隊需要入波。」言下之意，曼聯增兵行動未完。

曼聯錯失挪威天才射手艾寧夏蘭特之後，有傳睇中狼隊前鋒魯爾占美尼斯、RB萊比錫迪姆前鋒華拿。

28歲嘅魯爾占美尼斯今季英超已入11球，屬於狼隊首席射手，而23歲德國國腳迪姆華拿今季德甲已經入20球，協助RB萊比錫排榜首，球隊正全力爭標，恐怕未必會喺季中放走佢。

英超冬季轉會窗將於英國時間1月31日晚11點關閉，曼聯要買人就要快啦。

[digiharuka]

夏蘭特簽唔到好可惜? 只鬼叫佢泊了那個XX經理人, 唔黎仲好過

[Busconcamp]

避開7號魔咒　波基斯揀曼聯18全因佢



曼聯新兵波基斯費南迪斯尋日就宣布揀咗18號做佢新波衫「冧巴」。本身喺士砵亭着8號嘅佢，由於「紅魔鬼」8號已有桑馬達呢個主人，最終佢唯有轉號碼，但就冇揀到喺奧脫福勁有代表性嘅7號。相反，係揀咗由前曼聯隊長艾舒利楊格留低嘅18號，但背後原因，原來佢勁鍾意昔日18號主人史高斯！

話說曼聯7號經典人物有包括佐治貝斯、碧咸，仲有C朗拿度，不過自從CR7喺2009年離開之後，除咗路爾斯華倫西亞叫做好少少嘅7號仔，其他包括奧雲、迪馬利亞、迪比同最緊要嘅阿歷斯山齊士，真係一着起件7號仔波衫，就實係冇運行，表現走樣，難怪波基斯都唔揀佢。

至於點解揀做18號仔，波基斯解釋：「我以前着8號，呢個係我爸爸做球員時嘅號碼，兼且係我生日同我鍾意嘅『冧巴』。至於18號則係我太太嘅生日，另一個原因，當我成長期，我睇見史高斯着住佢，一個神奇球員嘅號碼，所以我好鍾意，我知我將會負起好大責任。」

曼聯名將史高斯由1996年就着起「紅魔鬼」18號，經過15年，係佢將「紅魔鬼」呢個號碼真正打出名堂。當史高斯第一次掛靴，艾舒利楊格就接手做咗18號新主人，一着就8年半，而即使史高斯喺2012/13球季復出，佢就改着22號波衫，直到依家，18號終於交託畀波基斯，希望佢唔會令球迷失望啦！

[Busconcamp]

【阿King】波費亂世成魔　有一種責任

曼聯簽入波基斯費南迪斯，令曼迷回想番起昔日紅魔鬼2位同樣來自士砵亭嘅葡萄牙球星C朗同拿尼，2人成魔時期屬於費格遜領軍嘅黃金年代，捧盃捧到手軟，波基斯費南迪斯今次加盟曼聯，剛好相反，紅魔鬼陷入多年低迷，亦冇費Sir「呵護」，一到位就要擔起核心責任，前路比2位前輩艱巨10倍。

C朗2003年夏天以18歲之齡加盟曼聯，着起碧咸離隊後留下嘅傳奇7號，當時包袱亦唔輕，但勝在有「爸爸」費格遜悉心保護，得以慢慢成長，踢咗曼聯3季後先至真正大爆發。

至於拿尼2007年挾「新C朗」之名成魔，有大師兄C朗照顧，又有費Sir耐心畀機會發揮，希望栽培佢成材，否則都留唔到7季咁耐。

不過，波基斯費南迪斯現時情況完全唔同，曼聯主帥蘇斯克查雖然係費格遜高徒，但教波能力同費Sir有一大距離，唔可以慢慢指導「波費」，反而需要佢擔任救兵角色，要求立即令球隊翻生。

因此，如果波基斯費南迪斯未能即時創造出外界期望嘅效果，恐怕又會被標籤為「水貨」、「普巴2.0」等污名。C朗以前有3季時間證明自己，但「波費」只有今季餘下時間，踢完今季就知佢命運係「C朗」亦或「拿尼」。

[Busconcamp]

里奧收晒風　曼聯有咗波費好輕鬆

英超曼聯日前成功收購葡萄牙中場波基斯費南迪斯，依家做咗講波佬嘅曼聯名將里奧費迪南，為咗了解今次收購，近日就特登搵咗自己兩個舊隊友兼「波費」嘅國家隊隊友收風，睇吓呢位嚟自士砵亭嘅貴價中場係咪真係料立足「紅魔鬼」？好彩，里奧兩位老友都大讚「波費」係貨真價實猛將，將可以解決曼聯長期創造力不足嘅大問題喎。

里奧搵咗兩位老友攞料，唔使講大家都知，梗係兩位昔日曼聯球星C朗拿度同拿尼，里奧話：「我舊隊友拿尼話，佢(波費)係個頂級球員，完全適合英格蘭足球，讚佢擁有所有技巧同元素。C朗都讚佢係頂級，喺國家隊製造好多機會畀佢。佢喺操控皮球、攞波都係充滿信心。」

里奧之後補充：「呢啲都係當曼聯簽入新球員時，你最希望聽得到嘅意見。所以各位球迷，基於我所聽到同睇到有關佢(波費)，我希望亦都好有信心佢可以好好完成到佢嘅工作。」

呢位曼聯經典後衞指出：「佢係嗰種可以製造入球機會嘅球員。曼聯喺面對主攻對手，自己要打防反時候，佢哋前線有速度就可以撕破對手。只係當喺奧脫福面對主打穩守突擊嘅球隊就會陷於苦戰，呢個時候，波基斯費南迪斯就可以入嚟扮演重要角色，因為佢有想像力同創造力，然後喺禁區邊附近策動攻勢同入波。佢嘅特性正係曼聯最需要，尤其係喺保羅普巴缺陣，呢個問題最明顯。」

[Busconcamp]

蘇B確認！波費奧脫福殺破狼

曼聯今個轉會窗高價購入葡萄牙國腳、士砵亭隊長波基斯費南迪斯，呢名紅魔新18號仔，啱啱加盟已肯定會為曼聯喺今輪英超登場！領隊蘇斯克查確認，波費狀態冇問題，今仗肯定會為曼聯上陣，於奧脫福同魔迷見面。

波費近日先通過體測，加入曼聯大家庭，佢於首課操練時勁好笑容，笑到好似個細路仔一樣，睇到今次轉會堅係夢想成真。蘇斯克查透露，波費目前狀態唔錯：「佢一直有為士砵亭上陣，所以狀態不俗，當然佢剛加入，我哋會細心研究佢對狼隊時會參與幾多，但肯定嘅係佢會喺大軍名單當中。」

自狼隊升班後，同曼聯每次交鋒都不落下風，曾保持5次不敗，係到上次於英足盃重賽交手先僅敗0:1，但該仗就有拉舒福特受傷。狼隊一直都係豬頭骨，唔知波費有冇本事，令曼聯今場踢得輕鬆啲呢？

[Busconcamp]

【突發】蘇B剛話佢留隊　盧祖回歸學生隊

曼聯今個1月動作多多，剛購入葡萄牙國腳中場波基斯費南迪斯，轉頭就有球員離開，後防馬高斯盧祖正式被借到阿根廷甲組球隊學生隊半季。盧祖於學生隊出身，之後輾轉加盟曼聯，周二領隊蘇斯克查先講過唔會畀盧祖離隊，轉頭就要講拜拜。盧祖希望回歸母會爭取表現，以再次進入阿根廷國家隊。

盧祖9年前離開學生隊加盟莫斯科斯巴達，之後踢過士砵亭2季，於14年以1600萬鎊身價轉投曼聯，曾經為紅魔鬼取得歐霸盃、英足盃同英聯盃冠軍。盧祖共為曼聯於聯賽上陣122次，貢獻2入球、4助攻。雖然蘇斯克查一直鍾意呢名防守球員，但佢周時傷多過踢，所以未能保持狀態。2日前蘇帥曾被問及盧祖前途，當時佢先表示盧祖唔會喺今個轉會窗離隊，點知轉個頭就成事，認真估佢唔到。

學生隊現時由前阿根廷球星、曼聯中場華朗做主席，領隊係前巴塞中堅米列圖。當成功借入盧祖後，學生隊喺網上開心表示：「你終於返到你最開心嘅地方，呢度係屬於你嘅。我哋終於重遇，球會上下打從心底歡迎你返嚟。」

[Busconcamp]

堅定流先？哥迪奧拿點名讚曼聯五魔

日前上演嘅英聯盃曼市打吡，曼城最終輸波照晉級。賽後，曼城領隊哥迪奧拿似乎對次回合真係輸得心服口服，大讚曼聯球員踢出主帥蘇斯克查嘅戰術要求，同時仲講出咗5個佢非常欣賞嘅「紅魔鬼」隊員添！

查實場波就係曼城控制大局，仲先後兩次送個波入網，可惜都唔計數。賽後，哥帥就話：「我好欣賞佢哋今場表現。上次喺奧脫福係我哋踢得好好，好到我都冇預計咁好。只係今場輪到我哋輸波，佢哋前場球員質素真係冇得彈，其實喺今次輸波之前，我已經有種感覺，係佢哋好努力去踢出蘇斯克查所想，而真係成功喎。或者佢哋唔係場場都咁穩定，有時喺主場踢我差，因為往往對手都守到好後，令佢哋陷於苦戰，但我真心鍾意佢哋演出，以及佢哋擁有嘅質素。」

之後哥帥仲講出佢最欣賞5個曼聯球員：「我以前已經睇過域陀連迪路夫喺賓菲加演出。勞基梳爾係好出色球員。哈利馬古尼係全球其中一個最出色中堅。佢哋前場班人真係好快，尼曼查馬迪同費特洛迪古斯，都係出類拔萃嘅球員，尤其係馬迪，真係好突出。假以時日，佢哋會做得更好，曼聯會返番去佢哋以往多年處身嘅位置。」

[Busconcamp]

【東體爭議】呢個Moment費特要爆喇！

英超曼聯近季戰績低迷，日前打英聯盃4強次回合雖然砌低曼城，但因為總比數輸2比3，都係要被淘汰出局。曼聯球員今季演出都係飄忽，真係獲球迷認同冇乜幾個，不過當中上季加盟嘅巴西中場費特洛迪古斯，今季堅係愈踢愈好，就連曾效力阿仙奴嘅西班牙球星法比加斯都點名讚佢，大家又認唔認同先？

法比加斯睇完場曼市打吡之後，喺社交網發文：「喺我睇過嘅近幾場大戰，費特都表現出色！」家陣先得26歲嘅費特，自從9月開始就踢足晒「紅魔鬼」嘅所有英超比賽，雖然佢冇入波，亦只得1次助攻，但佢滿場飛踢法令佢慢慢贏得「魔迷」支持。

包括法比加斯在內，雖然都對費特表現滿意收貨，但仲有一樣係連「法比仔」都覺得佢做得麻麻，呢樣就係處理罰球，包括對曼城時候嘅危險位置罰球，費特都只係一腳抽落人牆。法比加斯話：「呢樣都係畀(桑)馬達處理晒啦！」

事實上，關於費特嘅罰球功架，其實係有曼聯領隊蘇斯克查及桑馬達認證。「蘇B」尋日喺曼聯官網講到：「當感覺嚟到，桑馬達一定係最好嗰個。不過喺日前練波嗰陣，桑馬達同我講，費特練波嗰陣(罰球)真係冇得彈。佢(費特)好似射入咗6、7球，大家都覺得費特着晒火！呢個係佢哋共同決定，應該係正確決定，只係最後結果麻麻啫。」

老實講，喺麥湯米尼同保羅普巴都仲養緊傷，其實蘇B又真係仲有幾多個中場揀？你哋又覺得費特係咪未來曼聯中場最理想人選？

[Busconcamp]

閂窗終極一簽　曼聯搵到福仔頂替人！

曼聯於冬季轉會窗關閉前經歷生死時速，最後完成2簽，購入年輕門將之餘，更搵到拉舒福特頂替人！福仔早前重創有排唔出得，曼聯於冬季轉會窗遍尋射手，於閂窗前出價2000萬鎊力斟祖舒亞京治失敗後，最終借得前屈福特前鋒、現效力中超上海申花嘅恩哈路半年，到季尾擁有優先購買權。

早前曾傳出曼聯有意購入大牌卡雲尼，亦對里昂穆沙迪比利有興趣，但全部都未能成事，亦傳出球隊對皇家蘇斯達前鋒韋利安荷西有意思。但去到閂窗前數小時，曼聯終於向祖舒亞京治出手，報價2000萬鎊力求將呢名挪威國腳收歸旗下。不過般尼茅夫卻企硬要4000萬鎊，最終曼聯放棄並另覓人選。

綜合英媒報道，曼聯同熱刺分別向上海申花求借恩哈路，最終恩哈路希望轉會曼聯。恩哈路今次會入魔半年，到季尾曼聯將決定會否將佢買斷。今年30歲嘅恩哈路，於14至17年係屈福特主力射手，99次上陣射入39球，之後佢到中超搵食，今季為上海申花披甲19次射入10球。

早前非洲國家盃外圍賽，恩哈路為尼日利亞於外圍賽射入7球，到決賽周亦射入5球，表現搶眼，相信於短時間內頂替福仔唔成問題。

除恩哈路外，曼聯亦從英甲修安聯簽入20歲年輕門將彌敦比索。

[Busconcamp]

波費向曼聯報到　周六幫手屠狼

葡萄牙中場球星波基斯費南迪斯周五(31日)凌晨正式向曼聯報到，出席簽約儀式，波費同曼聯簽約5年半，另有1年續約選項，轉會費最高為8000萬歐元(約6.8億港元)，球員身體狀況正常，由於尼曼查馬迪剛在英聯盃領紅停賽，蘇斯克查稱周六聯賽對狼隊，波費會立即落場。

該25歲中場周三抵達曼市，成轉會手續後出席簽約儀式，蘇斯克查稱：「佢仲要接受身體檢查，不過我知道佢身體十分健康，隨時可以落場，佢自己亦都準備好。」

外號「葡超林柏特」嘅波費，離開士砵亭前接受球會訪問，向葡超球迷道別，期間流下男兒淚，7情上面，佢喺英超踢成點仲要睇，但佢公關做到足，係叻仔嚟嘅。

[Busconcamp]

【人物誌】誇張！曼聯新射手人工高過普巴

曼聯喺冬季轉會窗最後時刻，向上海申花借用咗尼日利亞前鋒恩哈路，大家唔好以為紅魔鬼貪小便宜，搵個中超兵頂檔。其實恩哈路現時周薪達30萬鎊，比2位曼聯球星保羅普巴、拉舒福特仲要多1萬鎊。

現時30歲嘅恩哈路2017年由屈福特轉投長春亞泰，之後再加盟上海申花，雖然佢名氣一般，但上海申花仍然向佢提供30萬鎊周薪。

試諗下保羅普巴、拉舒福特現時周薪都只係29萬鎊，就知恩哈路人工幾誇張。據悉，曼聯今次向上海申花支付300萬鎊借用費，並負擔恩哈路三份一人工，即係畀10萬鎊周薪，就算淨係計呢10萬鎊，都已經多過雲比沙卡、艾歷拜利、菲爾鍾斯等多位曼聯球員嘅周薪。

不過，恩哈路入球率都算高，上季中超上陣17次入10球，而2015/16年球季為屈福特踢英超，上陣37次入15球，一分錢一分貨。

[Busconcamp]

曼聯悶和狼隊　蘇B搞死費南迪斯！

1月轉會窗以高價入魔嘅波基斯費南迪斯，啱啱加盟就被領隊蘇斯克查委以重任正選登場，披上18號戰衣於奧脫福迎戰狼隊，最終雙方踢成0:0完場。

費南迪斯全場多次起腳，上半場禁區外怒轟被門將救出，換邊後主射罰球亦中龍，但都係過唔到客軍門將。呢名葡萄牙國腳上半場以攻中姿態出現，多次嘗試作致命傳送；但下半場竟被領隊蘇斯克查調去踢防中，唔知呢名天價新將會有咩諗法。

費南迪斯剛由士砵亭過檔曼聯，轉會費可達8000萬鎊，魔迷均對呢名新兵寄予厚望；球隊續有保羅普巴同麥湯米尼缺陣下，蘇B亦即刻畀佢打正選。上半場曼聯畀佢踢攻中，左右兩隊配以丹尼爾占士及桑馬達，安達斯彭利拿及費特洛迪古斯就出任雙防中。

[Busconcamp]

恩哈路曼聯Number曝光　揀佢因為一個人

曼聯新加盟前鋒恩哈路，喺「紅魔鬼」嘅波衫Number仲未正式公布，不過據網站《All Nigeria Soccer》爆料，呢位30歲尼日利亞射手將會着上25號，呢個號碼自路爾斯華倫西亞離隊後一直懸空。

恩哈路喺上海申花着嘅9號，依家由安東尼馬迪爾擁有，而佢之前效力屈福特着嘅24號，亦由小將科素文沙着緊。恩哈路揀25號除咗因為佢冇人着之外，亦係向尼日利亞名宿、曾效力阿仙奴嘅簡奴致敬，該尼日利亞名將效力阿仙奴5年間，都係着25號波衫。

不過，曼聯嘅25號就冇乜「歷史」可言，除路爾斯華倫西亞之外，之前着呢個號碼嘅有尼克鮑維、丹尼森遜、大衛鍾斯、科東尼同祖迪告魯夫等等，多數都係曼聯嘅「過客」。

[Busconcamp]

夏蘭特合約秘密！曼聯仲有機會？

挪威天才前鋒艾寧夏蘭特上月轉會多蒙特後，即時大爆發為「蜜蜂兵團」踢4場入8球，唔少球迷都大嘆曼聯「走寶」，不過英國《每日快報》爆料，原來艾寧夏蘭特嘅合約中有個神秘條款，令曼聯仍然有機會「彌補過錯」！

多蒙特只係用1,800萬鎊低價就買到艾寧夏蘭特，原來亦有附帶條件，「肥仔經理人」拉奧拿要求5年合約內，必定要加入買斷條款，拉奧拿原本想Set個價係4,200萬鎊，但經過談判之後同意個買斷費設喺6,300萬鎊，而且唔可以喺1年之內啟動，意味最早都要明年1月先至可以行使。

相比艾寧夏蘭特嘅驚人潛質同超卓表現，6,300萬鎊對於曼聯等一眾豪門嚟講絕對係濕濕碎，拉奧拿亦明顯想借呢位19歲新星轉會繼續搵大錢。曼聯如果想再斟艾寧夏蘭特，嚟緊呢1年嘅首要任務就係同拉奧拿修補關係啦！

[Busconcamp]

名將點醒你　教精曼聯點用波費同普巴

曼聯貴價新兵波基斯費南迪斯上輪首演對狼隊，雖然場波贏唔到，但佢個人表現都獲得各界好評。比賽期間，主帥蘇斯克查將「波費」先後擺過喺攻中同防中兩個位，表現各有不同，究竟點樣用「波費」先係最好？同埋有「波費」之後，快將傷愈復出嘅保羅普巴又擺邊？

對於呢兩個問題，「紅魔鬼」名將沙柏就有意見，佢話兩個拍住上肯定會有勁好代學作用，而加多個防中同佢哋組成中場鐵三角，就梗可以將曼聯帶番去頂級勁旅行列。

沙柏話：「我認為佢哋兩個會係好拍檔，你只要將佢哋拍住多個肯做防守工作嘅球員，就會解決一切。費南迪斯係個天生直線進攻思維嘅中場，我諗佢哋嘅組合可以為對手引發各種各樣問題，呢樣正係曼聯最需要。今季長時間冇普巴係令人好失望，我諗大家都好掛住佢，普巴能為球賽帶來獨特嘅魅力同創造力。」

沙柏同時仲批評「紅魔鬼」喺轉會市場運作失敗，由季中賣走好球員盧卡古同阿歷斯山齊士，到之後錯過艾寧夏蘭特，然後係臨急臨忙引入恩哈路：「佢哋放走有一定水平嘅球員，然而引入根本唔夠水平嘅球員。」

[Busconcamp]

病毒隔離！曼聯冬季集訓唔帶保羅普巴

法國中場保羅普巴想離開曼聯人所共知，雖然1月轉會窗完結後仍然留隊，不過曼聯同佢「割席」嘅心意已路人皆見。

據英國傳媒報道，曼聯周六將會拉隊飛去西班牙嘅Marbella集訓，不過領隊蘇斯亞查已下令保羅普巴唔需要隨隊，自己單獨進行復康訓練。

雖然保羅普巴做完手術後仍未痊癒，目前亦冇消息講幾時可以復出，但歇冬集訓除咗係練波之外，亦係加強球隊團結嘅機會，消息人士指蘇斯克查唔畀保羅普巴跟隊，就係想同呢個「病毒」進行隔離。

[Busconcamp]

【賽後解碼】曼聯鋒線毒瘤　入波變解圍

曼聯名宿加利尼維利早前講過，引入波基斯費南迪斯，絕不能即時解決球隊進攻問題，因為中前場問題千瘡百孔，紅魔鬼仲有排執。

今輪曼聯主場鬥狼隊，又再次顆粒無收，失去拉舒福特、要安東尼馬迪爾打正前可謂得啖笑。呢名法國鋒將全場冇腳好波，踢踢吓自然拉邊令禁區周時冇人，下半場佢更無啦啦踢走個波、搞到踏順步韻準備抽爆網嘅桑馬達冇得起腳，難怪曼聯就算畀超貴人工，都要借中超射手恩哈路。

自福仔受傷重創之下，曼聯3場英超1和2負，最大鑊係1球都入唔到。輸畀利物浦冇嘢好講，但主場不敵般尼堅肉酸，今場鬥狼隊鋒線各自為政、進攻雜亂無章，打正箭頭位嘅馬迪爾完全起唔到作用，無論係對住龍門抑或背身攞波都未能造成威脅，而佢周時唔喺禁區，亦令曼聯前場失去目標人物，全場只能靠波基斯費南迪斯同桑馬達禁區外起腳。

馬迪爾下半場愈踢愈沉，可謂形同虛設，77分鐘曼聯難得做到個波去到18碼點，當時桑馬達已經衝緊埋去，如果起到腳極有機會打開紀錄，點知馬迪爾就發緊夢，多腳帶返個波向後，曼聯失分佢「居功至偉」。馬迪爾絕非打正箭頭材料，自己埋門又冇，為隊友鋪橋搭路又欠奉，曼聯球迷只希望恩哈路早日操起狀態落場。一日毒癗馬迪爾打箭頭，紅魔一日冇運行。

[Busconcamp]

傑斯畀料　曼聯新兵有個隱患

曼聯新簽中場波基斯費南迪斯即買即用，聯賽對狼隊完成首演，外間評價唔錯，不過紅魔名宿傑斯有唔同意見，佢認為呢位葡萄牙中場有個弱點，如果用得唔好，會係曼聯一個隱患。

傑斯所講嘅弱點，係波費嘅防守能力，佢話：「佢係有料嘅，不過仲未知佢嘅最佳位置，蘇斯克查要諗清楚，當佢位置移後，防守可能係一個隱患。」

傑斯補充指出：「佢嘅位置介乎進攻同防守兩點之間，佢有分波能力，亦有足夠視野佢完成，但條件係要有隊友走位接應。」

[Busconcamp]

命中注定！朗尼倒戈要踢曼聯出局！

英格蘭足總盃第4圈重賽，打比郡主場4比2大破諾咸頓晉級，1月加盟嘅英格蘭傳奇前鋒朗尼又有波入，佢帶領打比郡晉級之後，第5圈將會迎戰曾效力過14年嘅曼聯，唔少網民都話係命中注定，仲話劇本已經寫好朗尼會親自踢「紅魔鬼」出局添！

34歲嘅朗尼近期狀態大勇，今場佢射入12碼為打比郡埋齋，已經連續3場比賽有波入，最重要係打比郡晉級後，將會主場迎戰曼聯，曼聯領隊蘇斯克查早前都話非常期待：「能夠再喺球場上對朗尼好非常美妙嘅事，佢仍然係一個頂級球員。」

朗尼自2017年離開曼聯後，曾經為愛華頓兩次倒戈曼聯，雖然最終都係輸波收場，但唔少曼聯球迷喺社交網表示，有預感朗尼會喺足總盃射死「紅魔鬼」喎！朗尼效力曼聯期間入過253球，係球會史上最多入波球員，嚟緊就等佢幫安東尼馬迪爾、美臣格連活特等等上一堂啦！

英足盃16強形勢

錫周三 對 曼城
打比郡 對 曼聯
車路士 對 利物浦
修咸頓/熱刺 對 諾域治
樸茨茅夫 對 阿仙奴
李斯特城 對 伯明翰
西布朗 對 紐卡素
雷丁 對 錫菲聯

*3月6日舉行

[Busconcamp]

曼聯增兵2.0！今夏5億買維拉柏豪

曼聯上月順應民意，簽入葡萄牙國腳波基斯費南迪斯，提升中場創造力，原來買中場行動仲未完，根據英國《每日郵報》爆料，紅魔鬼將於今夏轉會市場再簽入重量級中場球員，頭號目標係阿士東維拉隊長基亞利殊。

早前曾經傳曼聯想收購李斯特城中場占士麥迪臣，但呢位英格蘭國腳即將續約，紅魔鬼決定轉移目標，向基亞利殊埋手。

被指貌似本港歌手周柏豪嘅基亞利殊屬於維拉青訓產品，早於7年前已經為維拉出戰英超，即使球隊之後降落英冠，佢都選擇留隊，並協助維拉今季重上英超。

24歲嘅基亞利殊今季為維拉於各項賽事射入9球及5次助攻，包括作客曼聯一役，射入世界波，引起紅魔鬼管理層注意，據悉有意於今夏用5000萬鎊(約5億港元)收購佢。不過，曼聯出手買人，難免又被抬價，睇怕點都要加碼，先至有機會成事。

[Busconcamp]

普巴攤牌離隊　曼聯隊友：好事嚟嘅

曼聯麻煩友保羅普巴又搞事，呢位法國中場最近向隊友表態，希望今夏離開曼聯，但估唔到嘅係並無引來隊友反感，更得到隊友力撐，認為佢離隊對大家都係好事，支持佢離隊。

英國《曼徹斯特晚報》報道，普巴自聖誕快車檔期受傷，至今未有上陣，期間佢接受右足踝手術，近期拆除保護裝置，現進行康復訓練，復出無期。雖然普巴經常搞事，但佢同曼聯大部份隊友關係唔錯，最近佢又同相熟隊友談心，表達希望離隊想法，獲得隊友們支持。

普巴一直係曼聯禍亂根源，寸王摩連奴因為同佢不和被辭退，蘇斯克查對住佢都冇晒辦法，由得佢自生自滅。由於普巴同曼聯僅餘18個月合約，今夏曼聯出售佢嘅機會甚高，消息指祖記同皇馬都有意接收普巴，估計曼聯亦會以合適價錢將呢條麻煩友出售。

[Busconcamp]

咪玩啦！曼聯舊將搵恩哈路同簡東拿比較

曼聯喺轉會窗臨結束前及時由中超上海申花借用尼日利亞前鋒恩哈路，老實講，球圈大部份人都認定，「紅魔鬼」今次都只係亂石投林，危急關頭乜都試吓。不過，前曼聯門將保斯尼治近日受訪就鼓勵「紅魔鬼」球迷，話世事充滿驚喜，提到當年曼聯簽入法國球星簡東拿咪一樣冇期望，但最終簡東拿成為咗「奧脫福皇帝」，幫曼聯贏得唔少冠軍。

對於臨急簽入恩哈路，保斯尼治話：「呢筆係緊急簽約，我明白大家都認定曼聯其實冇乜目標，只係亂買人，但考慮到佢哋係喺冇咗拉舒福特下情況去增兵，但又想爭入前四，簽人係必須。講真，簽入恩哈路冇得輸喎，根本冇人對仍有期望嘛！」

之後，呢位澳洲門神仲充滿幻想話：「你永遠無法預知將來係點，好耐好耐以前，曼聯曾經簽入一個法國球員(簡東拿)，大家都係對佢冇乜大期望，但最終佢幫球隊完成有史以來最成功賽後之一。我認為曼聯仲有機會入前四，球季踢到依家只係落後（第4位球隊）6分根本唔算啲乜。佢哋最主要問題係唔識入波，但呢樣係同球隊比賽方式有關，我對曼聯有信心，佢哋仲有機會。」