曼聯躉紅魔鬼地帶[VOL.95]各項賽事三連勝,入球眾數,重上正軌？

[Busconcamp]

【真相】拉舒福特同沙拿、史達寧「同呢」



曼聯今季成績唔理想，好多球迷將矛頭直指拉舒福特，指佢擔唔到大旗連累曼聯進攻乏力。雖然數據唔代表一切，不過拉舒福特今季嘅個人進攻數字相當「靚正」，目前佢英超有5個入波同3次助攻，直接間接製造8個入波，入波、助攻數字同利物浦雙星穆罕默德沙拿及沙迪奧文尼完全一樣，製造入波亦同史達寧(7入波+1助攻)一樣係8球，4大前鋒並列今季「製造入波最多球員」，更勝奧巴美揚同哈利卡尼。

今季英超製造入波排名

8球●史達寧 7入波 + 1助攻

8球●拉舒福特 5入波 + 3助攻

8球●穆罕默德沙拿 5入波 + 3助攻

8球●沙迪奧文尼 5入波 + 3助攻

7球●奧巴美揚 7入波 + 0助攻

7球●哈利卡尼 6入波 + 1助攻

[Busconcamp]

羅馬拒絕收留　曼聯棄將明夏回歸



基斯史摩寧今夏由曼聯外借到意甲羅馬，而且表現唔錯，令一眾紅魔擁躉都好安慰，不過有消息指羅馬無意買斷史摩寧，預計該中堅將於明天夏天回歸。

英國《天空體育》報道，基斯史摩寧外借羅馬後有上佳表現，不過羅馬方面並無開啟買斷程序，冇打算留用，因此明年夏天外借期滿，史摩寧仍然會重投曼聯。

不過現時曼聯後防人腳已飽和，並無史摩寧位置，若然佢明夏歸隊，肯定會變成冗員，到時曼聯又要諗計將佢外借或搵人接收，都幾尷尬。

[Busconcamp]

罰球世界波+12碼！福仔隻手劏車曼聯晉級



即睇福仔超靚罰球金球：https://bit.ly/2N0oiK5　

曼聯本季首次3連勝，英聯盃作客淘汰車路士！曼聯為爭盃今仗強陣出擊，整體表現唔曳，其中王牌射手拉舒福特更加踢到曉飛，先轟入12碼，換邊後更射入超遠程世界波罰球，以2:1劏車入8強！

曼聯今仗派出大量正選作客史丹福橋，拉舒福特、丹尼爾占士、麥湯米尼、哈利馬古尼、域陀連迪路夫、雲比沙卡同費特洛迪古斯都有出場，相反車仔就只有基斯甸普列錫、高華域、佐真奴費路等大將落場。曼聯於陣容較完整下，再度打出穩健防守，球隊上半場亦取得較多射門，其中13分鐘麥湯米尼接應右路角球，第一時間抽射僅柱邊出界，爭啲為紅魔打開紀錄。25分鐘丹尼爾占士快速扭入禁區，馬高斯阿朗素從後將佢踢跌，上場對諾域治曾經極刑宴客嘅拉舒福特，今次再冇失威一射搞掂，為曼聯先開紀錄，客軍半場領先1:0。

50分鐘，車仔爭啲扳成平手，赫臣奧杜爾接應左路傳中禁區內一射竟然撻Q，60分鐘佢窩利抽射一樣唔中目標。但車仔61分鐘終於追平，巴舒亞伊禁區勁抽割草式地波轟入死角扳平1:1。但曼聯有Fit爆福仔助陣，74分鐘佢主射30碼罰球狂抽死角入網，梅開二度助曼聯晉級。

[Busconcamp]

【特稿】好似一個人！拉舒福特為大戰而生



曼聯近期表現全面回勇，射手拉舒福特嘅翻生明顯係主要原因，季初一直受到球迷批評嘅「福仔」，卸下單箭頭包袱之後脫胎換骨，近4場比賽入4球，睇佢射罰球嘅眼神，自信心返晒嚟，連領隊蘇斯克查賽後都話：「(個罰球)真係好似C朗拿度，唔係咩？」如果拉舒福特Keep住呢團火，一眾豪門就要打醒精神！

拉舒福特並唔屬於超高產量前鋒，不過佢哋入波「含金量」極高，今季各項賽事嘅7個入波，有6球係面對強敵攻入，對手分別係車路士(2場)、利物浦同李斯特城；睇埋拉舒福特歷來32個英超入波，有超過3分之1係面對Big 6球隊取得(11球)，可見拉舒福特係遇強愈強！

唔好忘記，拉舒福特今日(31號)只係啱啱22歲生日，嚟緊仲有大把進步空間。自從C朗拿度之後，曼聯有冇一個喺重要大賽入面可以令球迷充滿信心嘅球員？依家可能搵到了！

[Busconcamp]

45+
失球,
到底要幾時到至清醒？

[Busconcamp]

【東網爭議】曼聯要伊巴謙定文迪蘇傑？



英超老牌勁旅曼聯今季表現反覆，未達預期，唔少人都覺得佢哋鋒力平平，需要喺一月買前鋒。不過，「紅魔鬼」主帥蘇斯克查就唔係咁睇，認為單係拉舒福特加埋安東尼馬迪爾已經夠照。只係，連日來有關「紅魔鬼」要喺冬窗買入喺祖雲達斯失寵嘅文迪蘇傑就傳唔停，只係曼聯名宿恩斯就話，如果要買文迪蘇傑，不如搵伊巴謙莫域回歸仲好，大家又點睇呢？

克羅地亞射手文迪蘇傑今季喺祖記唔受重用，本來喺夏天佢有機會離隊，但到最後一刻，佢都係拒絕咗來自卡塔爾嘅聘約，據知原因係佢想職業生涯尾期可以留喺歐洲五大聯賽搵食。所以有傳如果曼聯一月肯向佢開出合約，加盟機會極高，對於斟介呢位33歲前鋒，恩斯實在唔多認同。

恩斯話：「伊巴謙莫域之前好似講笑咁話去西甲，但轉頭又傳佢會留喺美職，甚至話佢會去澳職，但計我話，如果佢願意，返嚟奧脫福會係個唔錯選擇。蘇斯克查依家需要一個有經驗嘅球員，呢個人無論場內場外都要有影響力，佢要幫手控制更衣室，要係個真領袖，伊巴謙莫域一定係最佳人選。」呢位前曼聯中場硬漢認為「呂布」可以作為年輕球員模範：「我認為文迪蘇傑喺呢方面唔得囉，所以點解唔簽番伊巴謙莫域呢？」

「呂布」已經38歲，喺球場仲係咪可以長期保持高水準？恩斯回應：「我哋都知佢唔可能踢足全場，但唔好忘記佢永遠都係個致命殺手。如果你畀佢落場15至20分鐘，佢會喺呢段時間完成射門。要知道曼聯依家最大問題係好難創造入球機會，就算有都射唔正，要解決問題，伊巴謙莫域係個完美人選。」

[Busconcamp]

費查：麥湯米尼有我影子



曼聯名宿費查表示，紅魔陣中小將麥湯米尼有佢當年影子，今季表現開始成熟，有機會成為曼聯今季最佳球員。

35歲嘅費查於2003至2015年效力曼聯，贏過5次英超冠軍，所以佢相當留意同樣來自蘇格蘭嘅麥湯米尼，並在《天空體育》表示：「或者麥湯米尼有條件成為今季曼聯最佳球員，就算保羅普巴同場，佢都有好多攔截及大範圍防守。」

「麥湯米尼已成熟，身體條件變好，在場上開始變得有威脅，今季佢一直保持上佳表現，甚具競爭力，喺佢身上有我嘅影子。」

「佢獲得不同教練嘅信任，服從指令，並樂意為隊友犧牲自己嘅數據，並充滿自信，佢嘅職業生涯將步向成功。」

[Busconcamp]

【賽後解碼】曼聯防線打回原形冇得救



聯後衞眼神防守累事！英超作客挑戰般尼茅夫嘅「紅魔」曼聯，前場進攻冇料到之餘，後防又再出事，畀般茅嘅前紅魔前鋒祖舒亞京治禁區射入細哨戲耍式入波，最終曼聯以0比1落敗，吞下今季聯賽第4敗。

曼聯早前「雙紅會」賽和死敵利物浦之後，各項賽事交出3連勝佳績，其中傷愈復出嘅安東尼馬迪爾上輪聯賽有波入，帶領球隊以3比1擊敗諾域治，一度畀紅魔球迷同領隊蘇斯克查寄予厚望，以為法國前鋒可以帶領球隊保持强勁走勢，可惜自從蘇B今年3月坐正領隊一職之後，曼聯從未試過喺聯賽連續2場贏波，呢場「紅魔」發揮亦一如既往飄忽。

上半場大部分時間雙方要喺滂沱大雨下惡戰，惡劣環境明顯影響曼聯發揮，開局早段無論安東尼馬迪爾或拉舒福特都未能製造具威脅埋門，反而喺臨完上半場前，畀般茅前鋒祖舒亞京治前一次禁區亂戰，門前學足「細哨」朗拿甸奴絕技輕鬆挑過曼聯守將雲比沙卡之後，射穿迪基亞十字關，為般茅取得奠勝一球。落後嘅曼聯，下半場雖然攞返唔少進攻主動權，不過依然無法擊破般茅嘅密集防守，最終慘吞聯賽第4場敗仗，各項賽事3連勝斷纜。

[Busconcamp]

【人物誌】曼聯青訓棄將　變屠魔殺手



曼聯上場英超0:1不敵般尼茅夫，3連勝走勢結束，最諷刺係射死紅魔鬼嘅球員，正係曼聯青訓產品祖舒亞京治。

現年27歲嘅祖舒亞京治2008年加入曼聯青年軍，翌年獲提升上一隊，但佢5年紅魔鬼生涯，未曾為曼聯上陣，因為大部份時間被外借，包括去過普雷斯頓、慕遜加柏、侯城、布力般流浪。2013年被布力般流浪買斷，4年前轉投般尼茅夫，終於一嘗踢英超滋味。

祖舒亞京治表現最出色係2016/17球季，於英超上陣36場入16球，上季亦有12球進帳，今季已經入咗3球。加埋今場在內，祖舒亞京治已經第5次射破紅魔鬼大門，由曼聯棄將變成屠魔殺手，非常爭氣，亦證明曼聯當年冇眼光，結果種下禍根。

祖舒亞京治、盧卡古「脫魔」之後，都有神勇演出，更加突顯曼聯用人方面有眼無珠，難怪搞到依家攻力咁弱。

值得留意，祖舒亞京治係挪威國腳，同曼聯主帥蘇斯克查係同胞，唔知蘇B有冇興趣搵呢位7號仔回巢呢？

[Busconcamp]

曼聯新目標　1億鎊爭簽盧卡古拍檔



曼聯一月簽新前鋒又有新目標？根據英國《太陽報》報道，「紅魔鬼」原來已經睇中佢哋舊將盧卡古......喺國際米蘭嘅前鋒新柏檔拿達路馬天尼斯，亦即係阿根廷球王美斯喺國家隊嘅前鋒新拍檔。據知，拿達路馬天尼斯喺國米份約嘅買斷合約價高達9,600萬鎊，仲要係話連巴塞隆拿都想簽佢返去拍美斯，睇嚟「紅魔鬼」要完成收購絕對唔易呀！

話曼聯肯用到接近成億鎊去簽個新仔前鋒，究竟呢個22歲新星有幾勁先？要知道國米喺2018年7月由阿甲競賽會將佢買入，都只係用2,000萬鎊，家陣隨時升值5倍將佢賣走，都認真過癮呀！講番呢個阿根廷新星，上季喺「藍黑兵團」唔算太受重用，只得13次正選。不過今季國米改由干地領軍，拿達路馬天尼斯反而得到機會，然後佢喺前線拍住新加盟嘅盧卡古又踢得好好，馬天尼斯今季合共已經錄得5入球1助攻添！

根據報道，曼聯領隊蘇斯克查都好欣賞佢，加上近排盛傳話想簽入33歲嘅文迪蘇傑，點講都只係短線幫到手，望長線都係要搵拿達路馬天尼斯呢類後生仔。不過，曼聯個如意算盤始終唔易打響，事關來自西班牙傳媒報道，就話巴塞都想簽佢去頂蘇亞雷斯，尤其係拿達路馬天尼斯喺國家隊都有同美斯合作開，容易建立默契咁話。睇嚟嚟緊一月同下個暑假，呢個阿根廷新星爭奪戰應該會勁精彩。

[Busconcamp]

【普巴2.0】祖記又打劫　勢免費簽曼聯猛將



2012年曼聯免費放走保羅普巴畀祖雲達斯，4年後以8900萬鎊回購堅蝕，如今紅魔鬼又試面對同類事件，陣中19歲天才鍾達希，極有機會於出年夏天免費加盟「斑馬兵團」！呢名荷蘭翼鋒天才橫溢，領隊蘇斯克查視佢為球隊未來，但因為出場機會唔多，鍾達希到依家都未肯簽約，曼聯為免重蹈覆轍，堅要好好處理！

當年普巴離開紅魔，仲係由費格遜領軍，有傳後者認為普巴性格有缺憾，故畀佢免費離開。估唔到普巴於意甲火速成長踢到曉飛，好快就成為世界其中一個最有料中場，曼聯於2016年以破世界轉會費紀錄回購佢，曼聯球迷都歎一句，點解當年要放走佢？

依家輪到鍾達希。呢名身高1米81嘅翼鋒，2018年夏天已隨一軍征戰季前賽，到蘇斯克查上年尾接手曼聯後，就將佢提拔到一隊當中，並於今年3月，畀佢首次於英超上陣對修咸頓。到歐聯16強次回合作客巴黎聖日耳門，鍾達希更後備出場，睇到蘇帥非常睇好呢名荷蘭小將。

呢名曾祖父係中國人嘅天才翼鋒，有傳佢眼見同輩格連活特，以及左閘班頓威廉斯都陸續上位，自己卻苦無機會出場，故暫時仲未肯同球隊續約；英媒仲話祖雲達斯知道佢下年夏天約滿，已經準備好出手搶人，希望重演當年免簽普巴好戲。鍾達希潛質優厚，速度飛快踢法又充滿侵略性，呢類球員非常值錢，唔好話幾年後曼聯會回購佢，如果下個夏天真係免費畀佢離開，就等於將幾千萬鎊掟落海，曼聯高層堅要諗辦法留人喇。

[Busconcamp]

超爆呀！曼聯同伊巴謙莫域傾緊呀！



嘩嘩嘩！大新聞呀！早幾日先自己宣布稍後會重返西班牙踢波嘅瑞典戰神伊巴謙莫域，今日突然又同前東家曼聯扯上關係。根據意大利媒體《TuttoMercatoWeb》報道，「紅魔鬼」已經同伊巴謙莫域傾緊，睇吓有冇重返奧脫福救亡嘅可能。

事實上，38歲嘅伊巴謙莫域依然相當打得，自從2018年由曼聯過檔洛杉磯銀河之後，合共上陣58場入咗53球，兼有15次助攻。早前佢先後同拿玻里及國際米蘭扯上關係，到佢話會返去西班牙，有傳係會加盟今季神奇球隊CF格蘭納達添！

至於曼聯方面，雖然主帥蘇斯克查話信得過拉舒福特同安東尼馬迪爾，不過缺乏一個表現穩定同具經驗嘅箭頭，明顯又係重大問題，而外間亦一直傳出佢哋想喺一月增兵，依家再傳搵「呂布」回歸，真係有可能喎！

[Busconcamp]

沙特大使爆料！王儲已收購咗曼聯



咗一排嘅曼聯賣盤消息，取得突破性發展，一位名為麥祖比嘅沙特阿拉伯名譽文化大使，喺社交網上爆料，指沙特財團已於當地時間11月1日，完成收購曼聯嘅工作，依家只係等紅魔鬼正式宣布易主。

根據麥祖比個人簡介，佢係沙特阿拉伯名譽文化大使，有專業公關演講及管理顧問經驗，並致力培訓青少年成為文化大使，同沙特官方有緊密聯繫，亦係《名人世界》在線報紙創辦人，佢似乎已率先收到內幕猛料。

過去一段日子，盛傳沙特王儲穆罕默德‧薩勒曼計劃收購曼聯，但之前2次提出收購，都被曼聯班主格拉沙家族拒絕。

據悉穆罕默德‧薩勒曼早前第3次報價，加碼至40億美元，令格拉沙家族心動，並派出代表前往沙特會談。

雖然曼聯官方曾經發聲明指，格拉沙家族對球會係長期投資，但家族成員之一嘅奇雲格拉沙早前透過紐約交易所出售15%曼聯股份，可見家族內已經有人唔想再持有曼聯。加上沙特油資不斷利誘，格拉沙家族最終將紅魔鬼賣盤，絕對唔奇。

[Busconcamp]

曼聯補鑊！免費包機送球迷睇歐霸



曼聯今季表現低迷，上周六輸畀般尼茅夫0比1之後，依家累積11戰13分，創出同期史上最差開季成績，羞家紀錄破唔停！可能為咗舒緩球迷怨氣兼補鑊，「紅魔鬼」宣布為部分Fans提供免費包機，喺香港時間11月28日凌晨飛去睇歐聯盃分組賽客戰艾斯坦拿場波。

曼聯嘅老闆良心發現？原來唔係咁嘅事。據BBC報道，由於曼聯官方合作夥伴Thomas Cook Airlines宣布破產，佢哋早前搞咗「紅魔鬼」作客艾斯坦拿嘅睇波旅行套餐，安排球迷飛去哈薩克觀戰。

Thomas Cook Airlines突然執笠，曼聯自然上埋身，只好免費為報咗團嘅「魔迷」提供機票，免得件事愈搞愈大。其實Thomas Cook Airlines都係曼城、利物浦同車路士嘅合作夥伴，同樣搞到一頭煙，曼城、利物浦就好好彩，搵到其他航空公司合作，車路士就要學曼聯咁自己出錢，負責12月11號球迷前往里爾睇歐聯嘅機票費用。

[Busconcamp]

M9>P15起脚省中客隊球員...
改向入球

18分鐘
M5>M39門前補入
2:0

[Busconcamp]

客隊零星攻門都可以入到波...

M9再次交後...
R10楣底彈入,
轉眼擴大返比數3:1

[Busconcamp]

曼聯密斟華倫孖寶　彌補最弱一位置



一直盛傳曼聯將於明年1月轉會市場重開後大肆增兵，但消息人士指領隊蘇斯克查認為冬季轉會市場，難以有足夠人選可以揀，所以傾向只買最需要嘅一個位置球員，就係右翼。

曼聯現時最有威脅嘅進攻球員，主要集中左路，包括拉舒福特、丹尼爾占士、安東尼馬迪爾。右路只能靠老將桑馬達、18歲小將格連活特，甚至要右閘雲比沙卡，兼顧右路進攻。

英國傳媒指曼聯冬季首要工作係收購右翼，解決左右失衡問題。據悉，蘇B睇中華倫西亞孖寶，卡路士蘇拿、費倫托利斯。22歲嘅卡路士蘇拿成名比較早，而且可以勝任中場中同右中場。

不過，如果以今季表現，19歲新星費倫托利斯更加搶眼，佢屬於正宗右翼，踢法更有侵略性，早前歐聯對里爾射入1球，成為首位喺歐聯入波嘅2000後西班牙球員，潛力優厚。如果曼聯只簽入其中一人，似乎費倫托利斯比較抵買。

[Busconcamp]

3箭頭各入1粒　曼聯大勝出線



曼聯周五(8日)凌晨在歐霸盃主場出擊，憑美臣格連活特、安東尼馬迪爾及拉舒福特各建1功，以3比0大勝柏迪遜，在L組提前兩輪出線，亦是自從英超首戰大勝車路士後，4個月來首場贏3球或以上勝仗，相當難得。

曼聯表現積極，開賽3分鐘安東尼馬迪爾就食鋪詐胡，直至21分鐘，格連活特接應拉舒福特妙傳，門前近射建功成1比0，33分鐘，格連活特送交門前安東尼馬迪爾擴大比數至2比0完半場。

下半場49分鐘，艾舒利楊格在邊線接應隊友長傳，然後輕力回中，拉舒福特狂抽掛網成3比0，3箭頭1人入1球，有紀律有隊型。

曼聯全場控球63%，全場14射7中，客隊2射0中，曼聯贏波合理。

[Busconcamp]

「未來隊長」受傷　個天都唔鍾意曼聯？



曼聯剛於歐霸盃大勝柏迪遜，3大射手拉舒福特、安東尼馬迪爾同格連活特都有波入，迎來難得一場大勝，唔少魔迷都覺得滿意。但好衰唔衰係今季表現極佳、被魔迷封為「未來隊長」嘅麥湯米尼，今仗受傷須即時被調離火線，佢本人號稱可以及時傷愈、於今輪聯賽上陣鬥白禮頓，但領隊蘇斯克查就比較保守，話其傷勢需要觀察。

曼聯今季演出長期於水準以下，多名中、前場球員都備受批評，但中場麥湯米尼就保持到水準，本季聯賽場場正選披甲，已成蘇帥心目中不可或缺嘅一員。鬥柏迪遜一戰麥湯米尼踢到75分鐘受傷，需由連格入替。

賽後麥湯米尼表示並無大礙可鬥白禮頓，但蘇帥就話：「我暫時未知麥湯米尼傷情。佢今場都話自己OK，但受傷之後根本唔可以繼續踢落去。我當然想佢今輪聯賽可以落場，但我真係唔知實際情況。」

查實今戰中堅哈利馬古尼都受傷，但蘇帥就表示馬古尼傷勢較輕，故今輪可以照舊落場。

[Busconcamp]

【賽後解碼】行雲流水！曼聯鋒線應該係咁！



曼聯喺歐霸盃大勝兼提早出線，可以話係「紅魔鬼」今季少有嘅佳作，領隊蘇斯克查今場排出強陣，尤其成條攻擊線速度、活力、侵略性一流，賽後大批曼迷一致認定，拉舒福特、丹尼爾占士、美臣格連活特同安東尼馬迪爾，就係曼聯鋒線嘅最強組合。

事實上，拉舒福特、安東尼馬迪爾同丹尼爾占士一直都係曼聯必然主力，但18歲超新星美臣格連活特嘅精彩表現，證明佢有能力搶佔正選席位，今場佢以右翼身份上陣1傳1射，成為曼聯史上最年輕喺歐洲賽有入波同助攻球員(18歲37日)，功架十足。

蘇斯克查未來賽事應該保持今場嘅進攻組合，只要將10號位由桑馬達換成今場休息嘅丹尼爾占士，呢年極年輕同極有才華嘅鋒線，有可能會進化成英超其中一條最令人聞風喪膽嘅攻擊線。

[Busconcamp]

一項數字！曼聯可以捧今屆歐霸盃



曼聯喺周五(8日)凌晨歐霸盃以3:0大勝柏迪遜，提早晉身32強，表現遠比踢英超好。翻查紀錄，原來曼聯喺歐霸盃已經保持跨屆15場不敗，以法定時間90分鐘計算，累積取得10勝5和，屬於今屆歐霸盃參賽球隊之中，最長不敗紀錄。

曼聯對上一次喺歐霸盃輸波，已經係2016年11月作客1:2不敵費倫巴治，自此之後再未輸過，並於2017年5月決賽擊敗阿積士，奪得冠軍，期間取得7勝4和。

曼聯過去兩季都係踢歐聯，今季再次踢歐霸盃又延續「歐霸專家」本色，4戰取得3勝1和，走勢同2年前相似，隨時可以重溫捧盃好夢，到時唔使打入英超前4位，都可以以歐霸盃冠軍身份出戰下屆歐聯，所以曼聯今季應該以爭奪歐霸冠軍為首要任務。

[Busconcamp]

曼聯中堅傷愈！另一位大將都冇事



曼聯將於周日(10日)晚英超主場對白禮頓，紅魔鬼收到好消息，中堅域陀連迪路夫已經傷愈，可以復出。

呢位瑞典國腳早前對般尼茅夫一戰受傷，已缺陣上場歐霸盃對柏迪遜，好彩佢嘅傷勢已經無大礙，可以復出鬥白禮頓，領隊蘇斯克查可以排出近期大受好評嘅三中堅陣式，對於紅魔鬼搶分絕對係好事。

此外，上場歐霸盃受傷嘅中場麥湯米尼亦已經冇事，同樣可以出戰白禮頓，曼聯近3次主場對白禮頓，都成功贏波，今次應該冇理由甩拖啦。

[Busconcamp]

【賽後解碼】曼聯贏波不完美可改善



英超曼聯今晚打出漂亮一仗，喺主場以3比1輕取白禮頓，全取3分。「紅魔鬼」今場表現正路，整體充滿活力，開賽17分鐘就先憑安達斯彭利拿嘅幸運入波，近門起腳省中人改變方向入網領先。2分鐘後，曼聯再趁一次門前混戰，靠對手戴夫保柏嘅烏龍球拉開紀錄到2比0。

換邊後初段，曼聯表現回落，踢得漫不驚心，畀白禮頓攞番唔少攻勢。客隊仲喺64分鐘憑隊長李維士鄧克接應角球頂入，追成1比2。好彩，曼聯喺2分鐘後即刻靠拉舒福特接應安東尼馬迪爾妙傳，近射得手，終鎖定3比1勝局。

曼聯今場贏波之後，各項賽事近6場贏5場，即使上輪英超不敵般尼茅夫，整體狀態都算返晒嚟。更重要一點，佢哋喺聯賽榜排名仲一口氣由14位攀升返上第7位，好睇好多。

不過，「紅魔鬼」今季整體表現都仲係不穩，間中都有甩拖，畀唔到球迷信心，好似今場擊敗只係實力普通嘅白禮頓，球迷都好似難得開心。仲有當然要提升梗係前線把握力，前鋒「福仔」今場仲有球近門6碼無人看管射斜，如果爭氣啲，「魔迷」都可以輕鬆啲。

[Busconcamp]

普巴翻版！曼聯2位潛力新星自由身走人



曼聯領隊蘇斯克查聲稱會重用年輕球員，但陣中2位新星鍾塔西、安祖高美斯卻苦無上陣機會，由於兩人將於明夏約滿，屆時可以自由身離隊，隨時重演2012年7月保羅普巴免轉會費加盟祖雲達斯事件。

下月就20歲嘅鍾塔西司職翼鋒，近2季都有參加曼聯季前集訓，一度被睇好會成為傑斯接班人。呢位荷蘭小將上季英超有2次上陣機會，英足盃亦踢過1場，並喺上屆歐聯16強次回合對巴黎聖日耳門後備披甲，表現備受好評。

不過，鍾塔西今季英超加埋只踢過24分鐘，歐霸盃68分鐘，大部分時間踢預備組，佢早前對米杜士堡，射入2球及1次助攻，踢預備組超晒班，但卻未能佔一隊席位，令佢非常冇癮。

至於19歲中場安祖高美斯今季上陣機會更少，英超只上陣踢咗9分鐘，2場歐霸盃加埋只踢158分鐘。呢位英格蘭新星腳法細膩，往往可以憑個人技術突破對手防線，創造入波機會，曼聯現時正需要呢種中場，可惜佢始終得唔到蘇斯克查信任。

鍾塔西、安祖高美斯只剩下半年合約，可於明年1月開始同其他球會傾加盟問題，就好似保羅普巴2012年1月就同祖雲達斯簽加盟協議一樣。

曼聯並冇優先續約權，而2人都傾向走人，其中荷甲勁旅燕豪芬一直想簽鍾塔西。

[Busconcamp]

曼聯又要做水魚　今次回購好彩有折



英超褪色勁旅曼聯近年買人經常入錯貨，又或者買貴貨，唔少網民都將佢哋標籤成轉會市場水魚添！近日，英國傳媒又有佢哋嘅轉會消息傳出，今次係話佢哋出年夏天以7,000萬鎊向水晶宮回購前鋒韋費特沙夏。雖然今次「紅魔鬼」應該又做水魚畀人大賺一筆，但要慶幸係佢哋當日賣走沙夏個交易有條二次出售抽佣條款，變相今次回購有折，唔使做咁大條水魚囉！

能夠兼任前鋒同翼鋒嘅英格蘭球星韋費特沙夏，喺曼聯傳奇名帥費格遜喺2013年冬窗最後一批引援之一，當年買佢返嚟用咗1,000萬鎊。可惜之後「費爵爺」退休，沙夏喺2013年夏天先報到，但就唔受跟住嘅兩任領隊包括莫耶斯同尹戈爾重用，合共只曾為「紅魔鬼」上陣4次，就分別被外借去卡迪夫城同水晶宮。2015年夏天，曼聯正式將佢賣番畀水晶宮，但轉會費只收600萬鎊，但當年交易註明，如果水晶宮之後將佢賣走，曼聯可以收番轉會費嘅25%。

直到近兩季，韋費特沙夏逐漸搵番信心，愈踢愈好，無論個人突破定射門都勁高水平，甚至畀球迷讚佢係「倫敦球王」。之前暑假，阿仙奴曾經開價4,000萬鎊想買佢，但因為距離水晶宮定價嘅8,000萬鎊差太遠，自然被拒絕，不過英國傳媒就話曼聯依家對佢係志在必得，願意畀7,000萬鎊去買人，考慮到之前「紅魔鬼」同水晶宮都買入過雲比沙卡，大家合作開，自然萬事成商量。值得一提，因為之前沙夏返水晶宮嘅交易條款，就算曼聯開價7,000萬鎊，實質都只係要畀5,250萬鎊，據聞唔少「紅魔鬼」球迷聽到，都慶幸今次冇做最大水魚囉！