曼聯躉紅魔鬼地帶[VOL.95]各項賽事三連勝,入球眾數,重上正軌？

[Busconcamp]

蘇斯克查超曳數據　曼聯球迷真心灰



紅魔踏入2020仲未開齋，今個月打咗三場波，輸兩場、和一場，魔迷已經對佢哋無晒希望。今晚曼聯係英超對住榜尾嘅諾域治，牌面上好似有機會，根據過往嘅數字紀錄都係贏多輸少，但球隊問題多多，要贏波真係未必有把握。

紅魔啱啱係英聯盃主場輸畀曼城軍心受創，老將艾舒利楊格決心離隊，近排同曼聯傾轉會問題已經躁躁地，又點會有心機會踢好波。最近就有一個統計，蘇斯克查領軍嘅勝率五成都冇，同歷屆主帥相比係最差嘅一個，連莫耶斯都有五成一，睇嚟曼聯家陣比賽，唔失分都偷笑喇。

[Busconcamp]

國米馬體會力搶！曼聯死攬中場廢柴



睇番曼聯陣容，最弱肯定係中場線，但本季已被貶為後備嘅尼曼查馬迪，依然有勁旅吼到實。國際米蘭領隊干地，似乎對曼聯球員情有獨鍾，繼簽入盧卡古、阿歷斯山齊士，並斟緊艾舒利楊格後，亦都希望於1月轉會窗引入馬迪；另外馬體會亦對馬迪有興趣，不過曼聯已全部拒絕，馬迪起碼會留到季尾。

馬迪於蘇斯克查麾下，重要性已大大減低，本季正選位置被麥湯米尼搶走，而其出場次序，亦排於安達斯彭利拿及費特洛迪古斯之後，但呢名31歲塞爾維亞國腳一樣仲有市場，國米希望除對巴塞中場維度爾有意外，亦希望簽入馬迪增強中場實力，而馬體會更想用赫達靴里拉加現金提出收購。

但因為麥湯米尼受傷，曼聯唔夠防中替換，已經表明唔會出售馬迪，就睇吓馬迪之後會唔會用表現回饋蘇帥嘅信任。

[Busconcamp]

7600萬鎊！曼聯力斟西班牙全能天才



曼聯中場傷兵多，逼球會高層重金出手，以7600萬鎊力斟西班牙天才全能中場！保羅普巴剛做手術有排抖，麥湯米尼亦復出無期，據意大利傳媒報道，曼聯欲於今個轉會窗，出天價狂撬拿玻里西班牙國腳法比安彭拿。呢名23歲好波之人，能勝任中場所有位置，皇馬同巴塞都對佢流晒口水，唔知曼聯今次能否搶人成功呢？

曼聯中場人才短缺，最有卡士、最有前途嘅2位大將，於短期內都難以復出，其餘人腳如費特洛迪古斯、安達斯彭利拿、桑馬達、尼曼查馬迪同連格等都難當大任，紅魔鬼要力搶前4位置，靠呢班人腳難以成事，故蘇斯克查希望於今個轉會窗，重點加強中場實力。

法比安彭拿年紀輕輕，但踢法相當成熟而且極富頭腦，已經入選西班牙國家隊，並且成為正選，反映佢卡士有幾高。佢最擅長位置係防中，但亦可推前一格造波，呢個建基於佢嘅超高足球智慧同穿針引線嘅能力。如果有需要，法比安彭拿更可充任左、右中場，就係呢點已經令2支西甲班霸流晒口水，視佢為未來棟樑。

《calcionapoli24》報道，曼聯已將法比安彭拿視為頭號收購目標，拿玻里主席迪羅蘭迪斯舊年講過，法比安彭拿值1.5億歐元，但據了解只要曼聯肯畀7600萬鎊就有得傾。

[Busconcamp]

水魚接貨！美職球會出5100萬年薪簽馬迪



一直盛傳曼聯中場尼曼查馬迪將於今個月離隊，但唔係去熱刺或者國際米蘭，而係去美職！

根據英國《太陽報》爆料，美職球會芝加哥火燄已經開出1份500萬鎊(約5100萬港元)年薪合約，邀請呢位31歲塞爾維亞國腳加盟。

芝加哥火燄近年羅致唔少球星，代表作一定係2017年簽入前曼聯中場「小豬」舒韋恩史迪加，吸引好多球迷捧場，大大提升球會知名度。

呢位德國名將上季美職收咧後，已經宣布退休，芝加哥火燄食過返尋味，再次向曼聯球員埋手，希望簽入尼曼查馬迪填補韋恩史迪加嘅位置。

尼曼查馬迪近年表現走下坡，就算轉投其他歐洲大球會，都難以取得正選，所以去美職賺取高薪養老，都係一個好選擇。

[Busconcamp]

高層奧脫福密斟　曼聯簽世界級中場快搞掂



曼聯簽世界級中場在望喇！根據英國多個媒體報道，「紅魔鬼」已經正式向葡超士砵亭報價，有意以5,500萬鎊收購中場波基斯費南迪斯。有報道指「波費」嘅經理人尋日已經現身曼聯辦公室密斟，相信交易勢在必行，有望周內成事！

有關曼聯買「波費」嘅消息，今次連可信性更高嘅《BBC》同《每日郵報》都有報道，《太陽報》話曼聯揸Fit人伍德沃德已經同士砵亭及「波費」經理人展開談判，仲開出咗5,500萬歐元報價。至於《每日郵報》甚至講「波費」經理人尋日朝已經現身曼聯辦公室，而士砵亭主席華蘭達斯都有積極同伍德沃德講數。

《BBC》記者史東透露：「有兩個唔同消息來源都證實曼聯想買費南迪斯！」而士砵亭主帥施拿斯都話：「失去費南迪斯係無可避免嘅事。」事實上，曼聯早喺舊年夏天已經想簽「波費」，不過當時價錢唔啱，佢哋都未夠決心，只係依家曼聯中場兩名大將保羅普巴同麥湯米尼都因傷長抖，「紅魔鬼」再唔出手買出場，想爭前四真係唔會有機會。唔係講笑，「波費」今季代表士砵亭上陣24場，攻入13球兼有13次助攻，有佢加盟，「紅魔鬼」戰鬥力應該可以大幅提升。

仲有，曼聯主帥蘇斯克查日前都公開承認過，曼聯有考察「波費」，而曼聯名將里奧費迪南仲係社交網表示：「我同球迷一樣，等緊球隊官宣費南迪斯加盟消息。」似乎各界都相信，「波費」入魔會極快成事。

[Busconcamp]

曼聯鐵衞復出！即表演倒掛射門



曼聯有好消息！養傷半年嘅中堅艾歷拜利已經傷愈，並復出踢U23英超賽事。呢位25歲科特迪瓦國腳狀態相當唔錯，更加喺一次角球攻勢之中，使出倒掛金勾射門，技驚四座，可惜差少少未能入波。

艾歷拜利近年備受傷患困擾，上年7月同熱刺踢熱身賽，再次受重創，需要開刀治療膝部傷患，近期先至復操，依家終於可以上陣踢U23賽事，總算走出傷患陰霾，預料唔使幾耐，應該可以重返英超賽事，對於防線傷兵滿營嘅曼聯，絕對係好事。

艾歷拜利將於今季結束後約滿，佢能否獲得續約，就要睇今季餘下時間嘅表現，難怪今次踢U23賽事都咁搏命，協助曼聯U23以2:1擊敗紐卡素U23。

[Busconcamp]

福仔200戰省2粒　曼聯醒神數諾域治



踢咗1個鐘唔夠，拉舒福特就梅開二度，加上安東尼馬爾爾同超新星格連活特各建一功，曼聯以狂風掃落葉姿態，主場狂數諾域治4:0全取3分。今戰係福仔第200場曼聯賽事，佢上、下半場各入1球，本季於各項賽事已攻入18球，可以話光芒四射！

曼聯隊長哈利馬古尼，早前傳出因臀部肌肉撕裂要抖1個月，但原來完全係流料，今仗正選登場踢足90分鐘，而前線2大射手拉舒福特同馬迪爾都當弗，相反諾域治就有正選射手迪姆普基缺陣，此消彼長下曼聯可謂佔盡優勢。今仗主隊領隊蘇斯克查派出桑馬達踢正選，此子亦以優秀演出回饋主帥信任，27分鐘佢右路扣入中路，起左腳傳向遠柱盲眼位，拉舒福特趕到左腳撞入，為曼聯先開紀錄。

曼聯之後氣勢大盛，29分鐘安達斯彭利拿右腳一抽太正被接實，3分鐘後福仔左路強行推進，終於搵到空位出腳，但射門角度太窄被接實，其後費特洛迪古斯禁區頂左腳一彎又唔中龍。完半場前諾域治有追平黃金機會，簡威爾禁區內起右腳射遠柱死角，迪基亞飛身單手神救。

換邊後5分鐘曼聯增添紀錄，諾域治門將告魯爾出迎，於禁區內撞低班頓威廉斯，球證直指12碼點，福仔操刀中鵠，領先到2:0。54分鐘曼聯開出短角球，桑馬達左腳斬靚波，安東尼馬迪爾門前頭槌頂入增添比數。之後蘇帥換入丹尼爾占士同格連活特，75分鐘，18歲嘅格連活特於禁區外左腳射遠柱網仔入，射成4:0完場。今戰曼聯前中後3線發揮理想，迪基亞亦有神救，相信曼聯球迷會睇得好過癮。曼聯贏波後22戰積34分，壓過錫菲聯升上第5位。

[Busconcamp]

【阿King】2次助攻！桑馬達係曼聯真核心



曼聯喺周六(11日)晚英超以4:0大勝諾域治，踏入2020年終於開齋，亦係紅魔鬼自開鑼戰炒車路士4蛋後，今季英超最大勝仗。

曼聯球迷最開心嘅事，唔止因為球隊贏得漂亮，仲見到領隊蘇斯克查終於覺醒，棄用「零貢獻」連格，並由桑馬達擔正。呢位31歲西班牙老將貢獻2次助攻，盡顯中場核心本色，曼聯下半季要爭入英超前4位，真係靠晒佢。

連格已經超過1年未曾喺英超入波或助攻，因而被網民寸係「零格」，紛紛要求球會踢走佢，連一直偏愛佢嘅蘇斯克查都頂唔順，今場終於棄用佢。

桑馬達亦以行動證明自己，先至係曼聯最需要嘅中場創造者，其中第1個入球，佢恰到好處嘅長傳，造就拉舒福特近門建功，堪稱一絕，令人諗起以往碧咸嘅「七旋斬」。

曼聯今季最大弱點，就係缺少1位創造型中場，所以一直傳要簽基斯甸艾歷臣，但其實桑馬達都有能力做好呢個角色，希望經此一役後，蘇斯克查可以好好信任呢位忠臣。

[Busconcamp]

曼聯大勝有代價！拉舒福特傷咗



曼聯上場英超大勝諾域治4:0，前鋒拉舒福特個人梅開二度，但呢位22歲英格蘭國腳踢到59分鐘，就被換走，錯過上演帽子戲法機會。

初時以為係領隊蘇斯克查故意畀佢休息留力，但真相係福仔受咗傷。賽後蘇斯克查話：「拉舒福特今季踢咗好多比賽，佢有些少受傷，所以當時決定換走佢，唔想佢冒險。」

不過，拉舒福特就向球迷大派定心丸：「我的確想完成帽子戲法，但未來幾星期賽程緊密，被換走只係為安全着想，我期待嚟緊周中英足盃重賽上陣對狼隊。」

拉舒福特今季於各項賽事已攻入18球，係曼聯最強進攻武器，蘇斯克查梗係要錫住佢啦。

[Busconcamp]

曼聯長老同國米傾妥　3日內轉會



曼聯喺今個冬窗仲未簽到新兵，反過來就有球員畀人挖走。意大利傳媒報道，34歲紅魔艾舒利楊格與國際米蘭傾妥個人條件，年薪300萬歐元，預計3日內完成轉會。

《米蘭體育報》報道，國米同楊教授簽約年半，合約至2021年夏天，年薪300萬歐元唔係嘢少，年紀一大把嘅楊格冇理由放棄呢次機會，留喺曼聯獻世。

報道又指，雖然曼聯欠缺左閘，唔希望楊教授離隊，但楊格好想去國米，同兩位前紅魔盧卡古及阿歷斯山齊士團聚，所以如無意外曼聯都會畀佢離隊，因此預計3日內完成交易。

[Busconcamp]

蘇斯克查：贏在勤力

【Now Sports-體育】曼聯在周六英超主場大炒諾域治4:0，領隊蘇斯克查賽後坦言高興。

「我們開局表現出色。當你離開的時候，肯定對手會用勤力去形容我們，這是我希望球隊做出的事。在任何英超比賽，你需要好好運用壓迫及控制。」蘇斯克查（Ole Gunnar Solskjaer）說。 華舒福第200場為曼聯披甲連建兩功，自然獲得蘇B盛讚：「他這樣快便達成200場，實在出色。他整場都踢得精采，尾段有點傷，所以我們換走他。他一直保持冷靜，我們都為他高興。」

至於交出兩次助攻的攻中馬達認為：「今天是很好的實例，證明我們應該相信自己，可以踢得穩定。有很多球隊競爭歐聯席位，車路士也取3分，所以我們要專注自己。」

[Busconcamp]

蘇斯克查：換走拉舒福特並非因為受傷



拉舒福特今場攻入兩球，為自己上陣200場賽事留個紀念，但他沒有踢足全場爭取帽子戲法，被蘇斯克查提早換走。

蘇斯克查表示：「拉舒福特這麼快便上陣200場，實在是神奇的事情。今場他踢了一大段時間，但有一點不舒服，所以提早換走他，總體來說我滿意他的演出。」(Goal.com)

[Busconcamp]

雲達比請曼聯食檸檬

【Now Sports-體育】曼聯1月增兵受重大打擊，目標之一的中場雲達比表明今季留效阿積士。

曼聯領隊蘇斯克查在去年夏天已經希望收購中場，可惜未能成事，盛傳於冬季轉會市場力爭簽入曾和皇家馬德里扯上關係的雲達比（Donny van de Beek）。 不過，這名22歲荷蘭國腳說：「我現在不能或不想做任何事。我之前已經說過，如今再說一次：我今季會留在阿積士，可能下季也會。」 「那些關於皇馬或曼聯的報道是好現象，但對於當下毫不重要，我已經說過在留在阿積士，而且100%會這樣做。」

雲達比今季為這荷蘭班霸上陣24場，攻入8球，表現持續十分穩定。 曼聯近年陷入低迷，於英超排名差勁，亦多次未能出戰歐聯，加盟似乎有危也有機，雲達比同意：「我現在不會去想，但你所說的是事實。」

[Busconcamp]

士砵亭教練暗示：般奴未必留得住

【Now Sports-體育】消息指曼聯即將買入士砵亭中場般奴費蘭迪斯，對此其教練表示已準備好替補人選。

「紅魔鬼」戰將普巴久久未能傷癒，又有傳他離心甚重，加速了領隊蘇斯克查尋找另一位中場核心，而有傳士砵亭的般奴費蘭迪斯（Bruno Fernandes）正是他的心儀人選。對於這個轉會消息，士砵亭教練施拿斯顯得十分曖昧：「我無法保證任何事情，因為我都沒有最新消息。般奴是一位偉大球員，這種級數的人物總是有價有市。我不希望他離開，但實在有必要安排一位替補人選。雖然最好不要發生，不過總要做好打算。」

字裡行間，暗示球隊已經為費蘭迪斯的離開做好一切準備。 這宗轉會近日有不少炒作，既有消息指一位「神秘人」日前往曼聯進行體測，外型似十足般奴費蘭迪斯；而曼聯名宿里奧費迪南在周五時在社交網上更指名道姓稱其成「魔」在即，已經令球迷氣氛非常熾熱；再加上本人為士砵亭對陣塞圖巴爾一役入波時慶祝，卻以雙手掩蓋雙耳，曼聯球迷更認為是該球員的離隊訊號。

[Busconcamp]

超級經理人發功　4大球會斟連格



曼聯27歲中場連格近期搭上吸血經理人拉奧拿，轉會有進展，據報連格獲推薦去意甲4大球會，包括AC米蘭、國際米蘭、羅馬及拿玻里都有聯繫，其中AC米蘭機會最大。

之前有消息傳出，由於連格表現低迷，特別係元旦賽日曼聯0比2不敵阿仙奴之後，曼聯高層有意用連格加錢，向李斯特城斟介占士麥迪臣。消息指，曼聯準備出價4500萬鎊加連格，交易占士麥迪臣，爭取喺冬窗完成交易。

與此同時，連格就同拉奧拿搭上，拉奧拿係伊巴謙莫域、米希達利恩及保羅普巴嘅經理人，依家再有連格加盟，令佢更加把炮，早前拉奧拿順利安排伊巴謙莫域轉投AC米蘭，因此再安排連格加盟紅黑兵團，亦係順理成章。

[Busconcamp]

要做紅魔新人王？拉舒福特要先問呢位前輩



曼聯歷來出產大量球星，要數近季最出色，拉舒福特肯定係其中之一。上星期「紅魔鬼」對諾域治之戰，唔經唔覺原來已經係「福仔」為球隊上陣嘅200戰，事後曼聯官網仲讚佢係球會史上排第3後生達到呢個里程碑球員，僅次於兩「紅魔」傳奇佐治貝斯同傑斯。不過，事後另一位曼聯經典前鋒韋西迪嘅太太就留言話，原來曼聯官網都當佢老公冇到，講後生成就，韋西迪先係No1呀！

直到依家都保持住世界盃史上最年輕出賽球員紀錄嘅曼聯名將韋西迪，想當年17歲已經幫「紅魔鬼」一隊上陣，同時係英足盃決賽史上最年輕入球者。講到佢幫曼聯上陣第200次，原來係1986年9月6日對李斯特城，當年嘅佢都只係21歲4個月，比起依家已經22歲先完成200場嘅「福仔」仲後生一截。

對於曼聯嘅錯誤資訊，韋西迪太太留言話：「事實上，我老公韋西迪（完成200場）仲後生過呢三個囉！」「紅魔鬼」官方收到留言之後，即刻修改番個排名，並且作出道歉。至於跌到苟第4位嘅「福仔」都好識撈，留言話：「為偉大嘅韋西迪感到高興，永不會被遺忘！」想當年韋西迪年僅26歲就因膝傷退役，否則成就更高，希望將來「福仔」會超越一眾前輩，咁曼聯球迷就安樂晒囉！

[Busconcamp]

【東網爭議】簽葡國林伯！普巴連格賣得



曼聯好大機會可以簽入「葡國林柏特」波基斯費南迪斯，意味球隊最弱嘅進攻中場位置，終於有人填上。與此同時，曼聯亦可以放心出售一直有離心嘅保羅普巴，以及「最不受球迷歡迎人物」連格。

曼聯近年為進攻中場人選傷透腦筋，保羅普巴回巢後，以佢嘅射門慾同創造力，一度以為佢可以勝任呢個位置，但前主帥摩連奴卻要求佢墮後，結果發揮唔出效力祖雲達斯嘅水準。

蘇斯克查執教初期，普巴表現有改善，但之後又故態復萌，由上年夏天到現時，都未打消離隊嘅念頭。加上佢今季長期養傷，變成可有可無嘅人，以波基斯費南迪斯嘅級數，足以取代佢，紅魔鬼亦可以下決心斬纜，趁普巴仲值錢，盡快賣走佢。

至於超過1年未曾喺英超入波同助攻嘅連格，蘇斯克查派佢上陣，搞到曼聯好似長期「踢少1人」，引起大量魔迷不滿，並要求棄用佢。只要曼聯簽到波基斯費南迪斯，魔迷嘅願望應該可以成真，因為到時連格已經冇留隊價值。

據悉，曼聯會方認為連格身價值4000萬鎊，普巴值1億鎊以上，如果真係可以將兩人出售，唔止可以抵銷收購波基斯費南迪斯嘅5500萬鎊轉會費，仲有一大筆資金剩，可以再增兵提升實力，紅魔鬼復興就有望。

[Busconcamp]

傾掂合約！曼聯冬季首簽48小時內完成



曼聯收購士砵亭中場波基斯費南迪斯，取得重大進展，葡萄牙媒體育TVI24指，紅魔鬼已經同士砵亭及呢位25歲葡萄牙國腳達成協議，可望於48小時內公布完成轉會。

曼聯早於上年夏天已經想簽波基斯費南迪斯，但最終未能成事，冬季轉會市場重開後，又再出手。士砵亭一度要求6000萬鎊轉會費，曼聯還價5500萬鎊，由於未有其他球隊加入爭奪，呢支葡超勁旅惟有接受曼聯報價。

意大利《米蘭體育報》指曼聯亦已經同波基斯費南迪斯價掂合約，向呢位「葡國林柏特」開出一份5年半合約，年薪達到512萬鎊。

據悉，「波費」經過上年夏天轉會失敗教訓之後，已敦促士砵亭同曼聯盡快完成交易，希望早日為紅魔鬼上陣。

波基斯費南迪斯今季為士砵亭於各項賽事上陣24場入15球，屬於高產中場。佢亦有份同C朗一齊協助葡萄牙捧上年歐國聯冠軍。

[Busconcamp]

盧祖「愛回家」！將成為交易籌碼



盛傳曼聯即將簽入士砵亭中場波基斯費南迪斯，英國《每日郵報》指交易總值達6000萬鎊，當中包括5100萬鎊轉會費，以及紅魔鬼要送埋後衞馬高斯盧祖畀士砵亭。

據悉，曼聯唔想畀太多現金，於是提出將馬高斯盧祖列入交易籌碼，呢位29歲阿根廷國腳曾於2012至14年效力士砵亭，並打出名當，結果被曼聯收購。

士砵亭方面非常了解馬高斯盧祖嘅實力，加上佢當年為球隊作出唔少貢獻，所以歡迎佢回巢，願意接受曼聯提出嘅條件。換言之，只要曼聯簽入波基斯費南迪斯，馬高斯盧祖就好可能隨即離隊，重返士砵亭。

近期一直指曼聯另一位守將艾舒利楊格將會離隊，但依家馬高斯盧祖可能快佢一步。

[Busconcamp]

雙方價位差成億！曼聯購費南迪斯勁危



士砵亭企硬價錢，又唔接受球員交換，曼聯購波基斯費南迪斯遇上阻力。保羅普巴剛做完手術、麥湯米尼又受重創有排未出得，逼使紅魔鬼欲於1月轉會市場購入費南迪斯。雙方代表日前已面對面傾過，但離傾成仲有段距離。據《每日郵報》報道，曼聯只肯出5000萬鎊另加1000萬鎊浮動條款；如士砵亭想的話，可以加入馬高斯盧祖、安祖高美斯等球員在內，但對方表明要6400萬先有得傾。

雙方早前已派出代表進行面對面磋商，據報費南迪斯本人亦希望入魔，但紅魔鬼現階段唔想畀超過5000萬鎊，所以只想用浮動條款氹士砵亭落疊，而且亦唔介意加入盧祖、安祖高美斯或年輕門將祖爾皮利拉入單Deal入面。不過士砵亭對上述球員少少興趣都冇，仲認為5000萬鎊完全唔合理，認為6400萬鎊已係最低價位。

《每日郵報》表示，雙方目前僵持不下，大家都企得好硬，但磋商工作依然繼續，就睇吓未來有冇單位肯退讓，費南迪斯先可以成為曼聯球員。呢名25歲葡萄牙國腳，雖然司職中場但入球能力一流，上季於葡超攻入20球及貢獻13個助攻，而本季一樣咁Fit，已射入15球、造出13次助攻。

[Busconcamp]

意大利傳媒：高列巴尼今夏投曼聯



曼聯斟波基斯費南迪斯仲未知咩情況，但另一邊廂斟介拿玻里法國中堅高列巴尼就斟妥晒，意大利傳媒報道，該位28歲中堅將於今夏加盟曼聯，轉會費為6400萬鎊。

其實曼聯斟高列巴尼已經有一段時間，傾到最近終於達成協議，意大利一個電台節目講到實牙實齒：「拿玻里鐵定出售高列巴尼予曼聯，價錢在7000至7500萬歐元，冬窗未能完成轉會，預計會於今夏加盟。」

曼聯去年夏天花8000萬鎊簽入哈利馬古尼，後防表現大有改善，不過球隊仍有打兩場好波就有一場失準問題，簽入高列巴尼預計可徹底解決防線問題，全力爭標。

[Busconcamp]

曼聯放棄挽留　賤賣連格



雖然27歲中場連格係曼聯青訓產品，但唔啱用都要賣。英國傳媒報道，曼聯已決定放棄挽留連格，並準備降價出售，標價為2500萬鎊，低於實際市價4000萬鎊。

英國《鏡報》報道，任何球會只要出到2500萬鎊，曼聯就會將連格出售。今次放售比市價足足平咗1500萬鎊，完全係連格自己唔爭氣，佢今季嘅傳射數據慘不忍睹，上陣27場僅入1球，演出形同虛設。

據報道，連格透過超級經理人拉奧拿，同意甲球會取得聯繫，其中AC米蘭機會最大，依家曼聯割價大傾銷，睇嚟連格離隊機會頗高。

[DevilElvis]

機會唔係無比佢，係佢把握唔到，只好放棄出馬達。

[Busconcamp]

蘇斯克查若收大信封　將獲賠500萬鎊



英國傳媒計過，假如曼聯高層決定解僱領隊蘇斯克查，將要賠償500萬鎊，總計費格遜退休後，曼聯炒領隊嘅使費就會接近4000萬鎊。

曼聯今季戰績飄忽，總體嚟計係踢兩場好波一場衰波嘅節奏，咁樣爭冠軍真係好難，英國《太陽報》報道，曼聯係咪換領隊，未來幾星期係關鍵。

總計費格遜退休後，曼聯喺炒領隊上嘅賠償花費，炒摩連奴賠咗2000萬鎊，炒尹戈爾賠咗900萬鎊、炒莫耶斯賠咗500萬鎊，假如炒蘇斯克查要賠500萬鎊，總計就係3900萬鎊，接近4000萬鎊關口。

[Busconcamp]

曼聯買費南迪斯　肯唔肯放佢去士砵亭？



曼聯極欲收購士砵亭攻中波基斯費南迪斯，但雙方就轉會費僵持不下。士砵亭希望得到現金5000萬鎊、另加1500萬鎊浮動轉會費，紅魔鬼就希望搵馬高斯盧祖、安祖高美斯或門將祖爾彭利拿加入交易中，希望可以減少轉會費支出。士砵亭對上述3人零興趣，但就有意搵安達斯彭利拿頂替波基斯費南迪斯，領隊蘇斯克查正在考慮，會唔會放棄呢名本季英超出場19次嘅巴西球員。

曼聯求財若渴，但經過上個夏天豪使1.5億鎊購入哈利馬古尼、雲比沙卡同丹尼爾占士後，不欲於冬季轉會窗再次大破慳囊，故仲係同士砵亭討價還價中。據知士砵亭方面，唔係對曼聯球員冇興趣，只係睇曼聯肯唔肯畀安達斯彭利拿離開。呢名24歲巴西中場，本季得到蘇斯克查器重，於聯賽曾披甲接近20次射入1球，對蘇帥嚟講可謂好使好用，依家保羅普巴、麥湯米尼長傷，先希望買波基斯費南迪斯，如果咁樣「1換1」，球隊於人數上始終唔夠。

另外後防馬高斯盧祖一直係雞肋，而且佢人工偏高，於上個轉會費已傳出曼聯或將佢賣到愛華頓，只係交易到最後不了了之。雖然士砵亭負擔唔起佢人工，但有傳費倫巴治肯畀8萬鎊周薪盧祖，故呢名阿根廷國腳或會轉到土超搵食，結束5年半曼聯生涯。