公測版 2.7.9.17830 已釋出，重點：

• 可以唔洗用外掛，直接以語音脵其他玩家通話
• F-16 大量更新，包括頭盔對地模式
• AJS-37 亦有大量更新
• 有兩個新戰役發售

詳細：
https://www.digitalcombatsimulator.c...a/2.7.9.17830/


悲報: Viggen 個領航系統有 bug 完全用唔到，Heatblur 話遲下會有 hotfix.。

出年會有啲乜，Eagle Dynamics 出咗呢條片：


眼利嘅網民，見到之前公怖咗開發緊嘅 F-15E、南大西洋、幻影 F1 、Ka-50 第三代、A-6 （AI使用）、真正動態天氣（有彩虹！）同阿柏奇之外，片末見巴黎和倫敦，猜測係諾曼第地圖新版，最後個經緯度係阿富汗境內，而個紅圈，正是 F-4E 個照準：唔～～～

係咪用 VR 打空戰嗰陣拎頭扭到頸都斷?！有人介紹之後，搵咗個外掛叫 VRNeckSafer，令玩家拎頭嗰陣，視點轉向幅度擴大，等人唔洗有狼顧之相都可以 check-six，注意只兼容 SteamVR，當開咗 SteamVR 之後再行外掛就得。除咗可以手動控制視點轉動嘅幅度，亦可以用自動波調控唔洗煩。下載:
https://gitlab.com/NobiWan/vrnecksafer/-/tree/master

公測版緊急修正版已出：
https://www.digitalcombatsimulator.c...a/2.7.9.18080/

又又又特價～即日至二月七號，由七折去到半價都有～

Apache 又延期，暫定去到二三月到先出貨。暫時睇住最新片頂住癮先～

HeatBlur 同 ED 合製 F-4E!


公佈咗暫時只有空軍版，並今年內以 early access 形式上架。

公測版 2.7.10 釋出，主要修正 AI 控飛機行為同埋大量 F-16C、MiG-19P 同 Mirage 2000C 嘅新功能同修正，等等。
https://www.digitalcombatsimulator.c.../2.7.10.18996/

公測版小更新釋出，無乜嘢改～
https://www.digitalcombatsimulator.c.../2.7.10.19402/

仲有，新春特價去到七號。如果想體驗（舊） Top Gun 嘅訓練，又有 F-14 同內華達州個地圖嘅，可以諗諗個 Zone 5 戰役，由前 Top Gun 教官編成，揸住 F-14 完成各項「訓練」任務，大受好評。上次更近仲免費加多咗個「極秘」任務，同某個特殊試驗場有關（但唔係 Area 51）

穩定版追上公測版進度。係咁多。

AH-64D 宣布進入內部測試隌段，應該三月下旬有得玩。

噉，MB-399 點吖？！廠商答：都係今年第一季予定。

近排現實世界爆咗咁大隻鑊，搞到正式個討論區都靜咗唔少；廠商出咗公告，勸人唔好整啲有關嘅影片，為免畀人利用嚟發假新聞。早前真係有人誤以為係，開戰頭一日，傳說中嘅「基輔の鬼」（キエフの亡霊）空戰片段，實際係 DCS 片段嚟。

都係時侯還啲債。上回提到，玩熟/悶 F/A-18C，下一部玩乜好？本人推介 A/V-8B NA。

呢部係世界首部實用化垂直昇降戰鬥機，嘅第二代。呢個型號 NA 因為有前置紅外線探測器，可作夜間作戰。

好：操作好似 F/A-18C，比較易上手，可以垂直昇降，唔洗玩直昇機都得，係好新鮮同富挑戰性。雖然任務係對地支援為主，但因為可以垂直昇降，近距空戰可以使出特有戰術；可載武器數量又夠多，有種武器仲係呢度（同 A-10C）獨有 -- 激光引導火箭～

唔係噉好：機艙畫面質數真係麻麻，尤其係玩 VR，即使係執咗噉耐，啲 MFD 同 HUD 都係唔清，比 F-16C 仲要差。因為機體本身無後燃器，低空突入無 AJS-37 嗰種爽快感，加上而家 DCS 啲紅外線影像應真麻麻，等改進咗玩夜間任務會好啲。

期待呢架機嚮南大西洋地圖出嘅時候，會更啱玩。

講咗噉多要錢嘅嘢，下次講一下啲免費嘢 -- Mods

ED 公怖咗 AH-64D 進入「金碟」狀態，啫係就快有得玩。留意會嚮公測版出先，而隻機仲未完全完成。

可能受近排國際大事件影響，DCS 正式討論區改咗做 forum.dcs.world

久違咗嘅公測版更新，予告咗星期四會出，如無意外嘅話，阿柏奇到其時會出。期待。

萬眾期待嘅長弓阿柏奇 AH-64D 直昇機，隨住最新嘅公測版釋出。除此以外，主要改善咗部份前望紅外線影像，F-16有重要改善，尤其係飛行模形，令到更靈活，可以；幻影 2000-C 亦有大量更改。除此以外，最明顯嘅係敍利亞地圖免費向東擴展，畀到 AH-64D 可以玩啲對 ISIS 嘅戰鬥任務。詳細：
https://www.digitalcombatsimulator.c....7.11.21408.1/

特價又嚟！廿八號去到四月四！

公測版 2.7.11.22041 稍後釋出，主要多咗三個戰役買，同埋執返好多阿柏奇啲嘢，尤其加咗 trim reset 會飛得易啲。詳細:
https://www.digitalcombatsimulator.c.../2.7.11.22041/

最新公測版修補出咗，主要救返啲死機嘅錯誤：
https://www.digitalcombatsimulator.c.../2.7.11.22211/

正式版追上公測版，都算快，啫係有阿柏奇揸喇～

C兄好有心寫咗好多DCS World嘅資料, 不過喺香港真係好似極少人玩
PS. 我自己就玩咗DCS兩年多

本人玩咗年零，仲新手，叫做細個玩過吓呢類 FS，因為有 VR 先返嚟，跟住咪畀老婆鵝咯～～～ 要寫仲有好多嘢寫，都係因為懶未寫得切，寫啲嘢都叫做自娛。

返入正題：最新公測 2.7.12.23362 出咗，除咗改善 Super Carrier 夜間甲板人員嘅動畫之外，F/A-18C 仲加咗 Case III 狀態下使用嘅 Auto ILS，AH-64D，F-14A/B，F-16C 同 Mi-24P 都有好多更新，詳情如下:

https://www.digitalcombatsimulator.c.../2.7.12.23362/

我就玩咗兩年幾但仍然都係一個新手, VR我就冇, 只係駁4隻monitors, 有一隻用嚟做Helios cockpit, 兩隻做MPD + Thrustmaster MFD Cougar Pack

嘩，本人得套 TM 16000 喳。寫好多時有錯有漏，希望唔嫌麻煩指正。

真係唔敢指正, 我本身好懶睇說明書, 慢慢一路飛一路學所以進度真係比較慢, 不過好開心發現原來哩度有香港同好可以交流下