VAR兩次幫手！曼聯由輸變贏
周日(22日)凌晨英超，曼聯上演「爭議10分鐘」，全靠VAR幫手，以1比0擊敗西布朗，終於取得今季英超首場主場勝仗。
曼聯對住今季聯賽仲未贏波嘅西布朗，都陷於苦戰，踢到下半場2分鐘，更加幾乎先失守，當時般奴費南迪斯喺禁區內疑似踢跌對手干拿加歷查，球證大衞古特一度判罰12碼，但佢睇完VAR之後，認為般奴費南迪斯並冇犯規，取消12碼判決。
9分鐘之後，輪到曼聯博到12碼，般奴費南迪斯主射被西布朗門將森莊士東撲出，但球證大衞古特又要睇VAR，發現般奴費南迪斯起腳前，森莊士東腳部已經提早離開龍門白界線，需要重射，結果般奴費南迪斯今次勁射入網，真係唔入射到入。曼聯10分鐘之內，由幾乎落後0比1，變成領先1比0，來回兩球，夠晒戲劇性。
曼聯9月英超對白禮頓，球證吹雞完場，但翻睇VAR，改判12碼，由般奴費南迪斯射入，全取3分，VAR今場又「建功」，可以話曼聯今季「最佳12人」。
