[肉羊哩咖]

（唔理，開始離題）只係玩 DCS World VR，睇過啲監測數據，張 MSI 4090 都係好係老世咁食緊 300 零 W 左右，就算玩 MSFS 都係咁上下，係咪真係要 Cyperpunk 2077 呢啲先至推得盡啲？！已經降壓去到 920mV，事關再低啲已經唔多穩定，DCS World VR 會死，唔係 VR 反而無乜事。有少少後悔，個牛買咗成千 W 嘅完全係嘥錢 -- 唔係本人想，NVIDIA 「勸」人玩 4090 起碼要個 850W 嘅牛。換過角度睇，有人拆咗張 4090 FE 睇，成張咭老蓮咁大咁長，副底板其實佔三份二都無，大部份都係散熱系統～ 而成個設計，啲用電功率預得好鬆，好驚死未來啲 game / app 會扯得更盡。

講溫度，呢樣緊要啲，又係睇啲監測數據唔太誇張，頂晒籠都係六五度樓下，最甘反而係粒 U，R7 5800x3D 可以滾到 68 到 70 度左近，一嚟佢個架構疊埋啲 cache 玩威化餅咁，會好熱，二啲本人因為嫌唔襟唔玩 AIO，只係用個一般到唔一般嘅 Cooler Master Hyper 212（部機搵人砌嘅，啲料選擇好有限公司），係爭啲，係好在仲未要 throttle。因為都知啲料有幾熱力四射，個箱用咗極誇張嘅 Factral Design Torrent，跟箱已經有五把扇，前頭有二把 280mm，下面有三把細啲嘅吹啲風上去，後面自己加咗把 120mm 嘅扇扯啲風出去，除咗發力嗰陣幾嘈之外，好在都未做到暖爐嘅效果。

留意而家天頭仲係涼，遲少少熱啲就知味道～ 可能真係要玩晝伏夜出。