2021/22 英格蘭超級足球聯賽第五周 - 韋斯咸 VS 曼聯
全場完，韋斯咸1:2曼聯
上半場3分鐘梳爾開出角球後，麥湯文尼頭鎚頂高出界。16分鐘麥佳亞係邊線防守時被兩名對手逼搶成功，再落底線斜傳俾中間射門，被華拉尼封阻彈出瓦解攻勢。20分鐘對手嘗試吊入中間先被華拉尼頭鎚頂走，其後兩腳射門射高出界。24分鐘C朗亦不甘示弱，接應普巴橫傳燙射被門將接實，27分鐘梳爾試腳遠射又被門將接實。不過29分鐘韋斯咸先開記錄成0比1，對方接應橫傳遠射省中華拉尼改變方向入網。33分鐘中路麥湯文尼一次靚直線傳俾C朗，C朗一cup再射被隨後嘅對方球員攔截成功。但34分鐘C朗把握到機會接應般奴傳中腳面攻門，先被門將撲到後執雞補中成1比1，半場完。
下半場46分鐘又係C朗左路接應般奴短傳起腳但被門將救出，51分鐘韋斯咸左路傳中後，禁區內有人後腳攻門出界。隨後中段時間兩隊對攻，但兩邊攻勢未有太大威脅，而68分鐘雲拜沙卡禁區內一次從後鏟波疑似犯規，幸好球證無吹罰。78分鐘又有一次12碼爭議，C朗係禁區內帶波疑似被侵犯跌低，球證亦都無任何表示。尾段時間88分鐘後備入替嘅連加特左路一記燙射世界波破網，協助曼聯領先至2比1。不過補時階段92分鐘幾乎絕殺對手嘅曼聯因為梳爾中手球而被罰12碼，迪基亞飛身撲出12碼，為曼聯鎖定勝局至2比1完場，賽後就連蘇斯克查都一齊為迪基亞歡呼。
