[肉羊哩咖]

同 X-Men First Class 一樣，呢季《雨傘學院》都連埋歷史事件做劇情嘅一部份，就係總統甘乃迺遇刺事件。純粹拋書包，無透，不喜可以唔睇，無人迫你。

甘乃迺第一任嘅時候，正直美蘇冷戰高峰期，61年先有 CIA 策劃進攻古巴，謀求推翻親蘇嘅卡斯特羅，以失敗收場嘅「入侵豬玀灣」事件；同年再有柏林危機 -- 蘇聯要脅西方各國從西柏林撤軍；再有62年幾乎爆發全面核戰嘅古巴飛彈危機（按：史實比套電影《驚天13日》"13 Days" 更驚險，一方面美國有段時間真係想打有核武嘅古巴，另一方面有隻蘇聯潛艇因為無法同總部聯絡，緊張得滯幾乎發射核彈）；雖然最後都一一擺平，但美國國內鷹派覺得佢對紅色勢力太軟弱。

63年度11月22號，總統一行人去咗德州達拉斯市，為佢連任做勢。同日坐住部開篷車行到去 Dealey Plaza 嘅時候，突然遇到鎗擊，驗屍報告講佢前後中兩鎗身亡。同日拉到個疑犯，亦係唯一疑犯 Lee Harvey Oswald，有目擊者指佢嚮佢打工嘅德州課本大樓，開鎗行刺總統。兩日後佢畀警方押解時，嚮警署停車場畀個夜總會老闆 Jack Ruby，近距離用鎗即場打死。

當年無咁多電視戶外直播，亦無人人有部手機，但係唔少圍觀嘅人都有拍照同拍片，其中一條由 Abraham Zapruder 拍嘅片，係著名嘅 Zapruder Film （有興趣搵搵），距離最近，紀錄咗甘乃迺中鎗嗰廿幾秒嘅事，研究人仕認出邊啲人拍咗片，可惜無咁近，亦仲有部份拍片嘅人唔知道佢哋嘅身份，呢啲「不明人仕」亦無行出嚟提供佢哋啲片。

雖然美國總統遇到行刺「自古有之」，以甘乃迺受歡迎嘅程度，有論者以為佢做總統可以再長啲，美國嘅近代史可能好唔同，可能唔會咁介入越戰，國內嘅種族問題亦會舒緩好多，而尼克遜亦未必做到總統咁話。

歷史無如果，不過當年官方對事件解釋同結論未能夠服眾，衍生出呢個陰謀論嘅大題材，啲「研究員」對官話好唔同意，佢哋對當時事件嘅前前後後，由各個當事人可能相關嘅人物，到當時環境嘅剖析，各個事物嘅細節，可以話鉅細無遺（當中真係有個圍觀嘅神秘黑衣人，担住把黑色遮），佢哋啲嘢實在太多大雜，無可能寫得晒，不過當中，67年新奧爾良地撿控告 Clay Shaw 有份參與刺殺最高調著名，呢單嘢亦拍成電影《驚天大刺殺》"JFK"。之後政府同眾議院都前後調查過事件，但無有力實質證據推翻呢個「獨行鎗手」（A Lone Gunman）嘅結論。