[肉羊哩咖]

（寫嚮前面）

早到19年頭已經想寫啲有關 TV 科幻嘅嘢，但要搵食（仲有打機同睇其他嘢）所以無時間，趁開咗 The Expanse S4 寫過呢套嘅簡介，志在拋磚引玉。

The Expanse S1 - S3 好似香港 Netflix 都仲有。

The Expanse 係根據同名小說系列改篇，套小說仲未完，正傳預計有九部，仲有其他外傳同短篇出版咗；本人無讀過，但只知 TV 版講到而家，只係套書嘅頭兩三部咁少，可以話長拍長有。

故事開始前，人類開發太陽系（都係因為資源缺乏呢啲「老梗」_，因為政治角力，而分成咗三大勢力；元地球圈（含月球）稱聯合國（地聯），由殖民地獨立出嚟嘅火星，同埋被兩大國合管，但爭取獨立嘅小行星帶

地聯表面上人多軍力龐大，但環境日漸惡劣，資源缺乏，大敗比火星之後一直同對方長期維持冷戰狀態，國力損耗極大。

火星雖然都係行民主政體，但對國民圃結度要求極高，全民致力改變火星成為可居住嘅星球同埋發展軍事科技，軍隊細但非常精銳，科技同單位戰技都係地聯之上。想像好似一個好有牙嘅新加坡咁。

小行星帶係一堆軌道在火星同木星之間嘅小星球，唔係一般電影咁係一個密集嘅碎石帶，反而各粒星矩離相當遠，疏疏落落；當中最大係谷神星（Ceres）係主要嘅舞台，故事亦有發生嚮愛神星（Eros），呢啲小星體上面啲資源被挖乾之後，變成住人嘅小殖民星，雖然叫做一個勢力，佢哋無一個自主嘅政府無軍隊，每粒星一係被地連，唔係就被火星管治。當地人自稱 Belters （ Asteroid Belt 轉化成），同火星一樣，Belters 有自己一套語言同文化，因為佢哋嘅收入同搵命搏返嚟嘅資源，大部份都拎咗去進貢畀地聯同火星，生活極艱苦，對欺壓佢哋嘅兩國充滿仇恨心態，故事發生之前已經發展出獨立運動，但由於內部山頭極多，難以團結，以致各有各做，部份激進派系進行恐怖主義。

三方嘅勢力平衡既脆弱同緊張，就嚮呢個時候，突然殺出個謎之第四勢力，世界從此激烈變化。

電視版最大嘅特式係相當注重真實感，黑科技唔多，其中一個係個超快加速引擎，唔係呢咩光速或者係空間跳躍呢類，只係啲加速度可以極快，等行星間航行比較有效率；而故事嘅設定上亦極注重慣性原理嘅影響，太空船唔係同一個面向由起點去到終點，係要半路中途要反轉架太空船，用同一個引擎減速先得；亦因為咁，當年發明呢個超加速引擎條友，因為加速得太勁，搞到成身唔郁得減唔到速，係咁加速而監生被壓死。之後嘅發展到要用呢個引擎，全部乘員都要坐好，仲要注射特種藥物抗壓。另一方，單係船嘅加速力就可以產生人工重力，所以船嘅設計亦同其他講太空嘅作品唔同：一般嘅好似飛機咁，人嘅面向係同航行方向相同，呢度就係頭頂向住航行方向。同時，突然減速亦對乘員產生致命嘅傷害。

各星球重力唔同，對各國嘅人都有影響：火星嘅重力係地球嘅三份之一，所以火星國民嚟到地球，好似而家要適應時差咁，食藥同休息先得，就算得咁都會覺得「舉步為艱」；Belters，尤其嚮小行星出世嗰啲最慘，因為長期嚮無乜重力嘅環境大，佢哋比較瘦同高，骨質最脆弱，困佢哋嚮地面同受刑無乜分別。

戰鬥嘅真實性亦都重，雖然不能免俗，戰鬥場面有聲同全部嚮視距範圍內，同原著好唔同：據報書入面講當年地聯火星最大嗰場宇宙戰，如果有觀察者嚮戰場正中間，只係見到兩邊遠處好快咁出現一輪閃光之外，一隻船都見唔到，乜都聽唔到就分勝負散場～～～但放嚮影像作品好可能接受唔到。除咗咁，其他表達手法相當合理，故事無所謂無形嘅能量盾之類嘅超科技，加上無阻力同慣性關係，單係傳統機炮、磁軌炮同導彈/魚雷嘅威力已經極大，船艦中彈之後，同坐坦克入面一樣，中彈產生嘅碎片會變成一大堆亂飛嘅子彈，人員隨時突然死亡。所以能夠搶先發現到敵人，武器射程遠過對方嘅極著數。火星軍就持住呢啲技術優勢，打敗地聯兼稱雄太陽系。