曼聯賣迪基亞?可能係好主意!
曼聯幾經艱苦之下,今季季初成功游說門將迪基亞續約到2023年,不過英國《每日郵報》爆料,話曼聯竟然計劃喺今個夏天賣走呢位西班牙鋼門,將所得資金投放喺其他位置增兵上,聽落好似匪夷所思,但亦可能會係一個好主意。
報道指曼聯有感迪基亞近年表現未見特別突出,喺外借錫菲聯嘅甸恩軒達臣日漸成熟下,下季曼聯大有機會收番嚟自己用,由佢同阿根廷門將羅美路競逐正選。甸恩軒達臣嘅錫菲聯今季只係失過25球,係僅次利物浦後失波第2少球隊,只得22歲嘅甸恩軒達臣無疑有極優厚發展潛力。
如果曼聯放走29歲嘅迪基亞,預料會賣到一個極好價錢,祖雲達斯同巴黎聖日耳門一直對迪基亞虎視眈眈,估計轉會費至少6,000萬鎊,加上迪基亞續約後周薪高達37.5萬鎊,如果甸恩軒達臣順利接班,「紅魔鬼」慳呢筆錢絕對好使好用。