曼聯新星一腳爆紅 新細哨嚟啦!
曼聯今季爆出唔少新星,格連活特、班頓威廉斯都喺一隊企穩陣腳,下一個上位新星好可能就係17歲嘅中場麥比利(Hannibal Mejbri)!
呢位法國超新星上年夏天先至由摩納哥轉投曼聯,雖然年紀輕輕,但曼聯已經要用到420萬鎊轉會費將佢收購,潛力相當優厚。呢位攻擊型中場今季主力踢U18賽事,所以曝光率唔算高,不過佢喺名將畢特重點栽培下,今季已經有6次助攻,最近一場對打比郡嘅U18賽事,麥比利就以一腳No-Look超精準長傳震撼球迷,迅即受到曼迷熱捧。
呢條熱爆影片入面,麥比利喺中場線拎波後,喺對手衝去攔截前,施展「望右交左」嘅神級長傳,個波直接穿過打比郡防線,交到深入腹地嘅隊友腳下。雖然只係輕描淡寫一腳,但影片就喺Reddit引嚟曼迷「狂J」,紛紛留言話:「呢個係我哋嘅朗拿甸奴」、「好期待佢為曼聯一隊上陣」、「呢啲先係No-Look,法明奴嗰啲學嘢啦」.......