改編至著名幻想小說作家 Neil Gaiman 有份寫嘅同名作品 The Good Omens，故仔係講上帝（六千年前，咳）創造世界，跟住「下面」班友（啫係天使）亂估，以地球作為最終決戰場地，但先要消滅晒班人類，再由天界同地獄軍再嚟決勝負（咁似 Devilman 嘅？
）
為咗咁，兩邊都派咗件「無間道」落去人間，報料同埋為末日大戰做準備，故仔一開頭，黑天使接咗「魔鬼之子」，去調換剛出世美國駐英大使個BB，利用咁去引發末日（咦好似某名恐㤢電影系列噃～
）點知兩條友嚮凡間享福享得太耐，留戀呢個世界同慢慢由敵對變成好友，再加上黑天使同佢班幫閒是是旦旦，結果兩條友出動去阻止世末⋯⋯故仔就咁展開，主要係講同黑白天使歷險，間中講返佢哋嚮人間咁多年嘅經歷，好多歷史上「名人」客串，主線仲有講魔鬼之子，仲有獵巫師後人同「世上唯一一位正確預言家」嘅後人發生嘅事。最後留咗位有續集。
入面勁多英式幽默同笑話，兩位主角當然出色，連同當中一位細路女都做得唔錯。一粒鐘一話共六話，緊湊無乜多餘劇情，雖然有預言書嘅關係，擺到明「先讀」，但無破壞到個情節嘅緊張感，仲加入咗好多幽默原素落去，同埋畀到預言家後人條線有咗意義。原作者 Neil Gaiman 包辦晒全部編劇，保證保持有原作「神髓」，不過啲特技認真麻麻，同 Titan 嗰水平。音樂都OK，黑天使好鐘情 Queens 啲歌，所以歌以呢啲為主。
仲有，當中有唔少名演員客串，留心吓啲 credit 喇。
