好多玩家等咗,講咗,鬧咗好多年嘅,就係一向以嚟嘅 DCS,都係「單春」,淨係用到粒 U 入面一個核,勉強可以話兩粒。以近呢幾年多核嘅 U 「一街到係」,搞到用咗咁多金砌嘅機好嘥。至從 ED 講話會支援「多線處理」,都等咗好多年。
3 月 10 號個公測版 (2.8.3.37556)就正式支援「多線處理」。好簡化咁講:每個程式,只要支援「多線處理」,好以分散好多工作畀粒 U 入面啲核去一齊處理。好似 Chrome 咁,開咗每個 tab 都可以分畀一粒核,一齊行。而家 DCS 可以支援「多線處理」,遊戲入面每個物件都可以交畀一粒核主理,分担啲計算,咁性能表現會更好,尤其多人連線、複雜嘅任務,以至 VR 都會受惠。
由於仲係屬測試性質,所以支援「多線處理」嘅係另一個執行檔案,分開咗唔支援嘅版本。
據呢兩三日以嚟反應,就算唔係複雜嘅情況,frame rate 都有 20% 甚至 50% 嘅改善,而用 I 記嘅用戶表示,呢個版本好鍾意用咗啲 e-Core 先。 ED 就話而家仲係開發早期,仲有好多改進空間。而之前預告會支援 DLSS 同埋 Vulkan API,令人期待。
成個更新等咗個半個月,當然唔止一樣嘢:
Mi-24P 個 AI 界面更新
A-10C II 加入 UHF/VHF ARC-210 無線電,可以話機體嘅設備已經齊全
幻影 F-1 有新嘅電子反制系統,同極大量修正
AJS-37 外觀上改進
F-14 同樣外觀同駕駛艙有改善,亦執過 F-14A 個飛行模型
南大西洋地圖加入 4 個機場,亦有唔少改進。
亦無可能得咁少嘢,幾乎各個模組都有嘢執返,詳細(係好長)如下:
https://www.digitalcombatsimulator.c...a/2.8.3.37556/