[肉羊哩咖]

Loki S1 總括比上兩部都仲好。Loki 係 MCU 最有趣嘅反派，可以話比 Thanos 更有血有肉，而 Tom Hiddleston 演出好唔在講，佢係有成長嘅角式。有人話 Loki 嚮神話中屬帶動轉變嘅角式，有啲似聖經入面魔鬼嘅作用（？！）；而 MCU 入面佢不斷作惡，被打敗，「死」，跟住翻生，再作惡⋯⋯去到 Thor 3 先跳出呢個循環。（Screen Crush 有段 YouTube 片講得好好，麻煩去望望）

呢度係個「未進化」嘅版，都算係個 re-boot 嚟，角式嘅探討係呢套劇嘅一大主題，加個女版嘅「自己」去襯起反照，你可以話係啲電影再玩一次，有老細講一話就「完成進化」就快得滯，其實佢未遇到「另一個自己」之前，實情佢未有根本嘅改變，佢都係以前噉一味諗點呃人求存，等機會就搶人個位坐正。之後佢仲有條感情線都通嘅 -- 佢呢挺人只係會戀上自己～ 佢一句 Because you can't trust...and I can't be trusted 可以話總結成個角式嘅兩面，都可以話係個悲劇嚟～

女嘅初頭唔多入戲，個樣老咗啲（咳），不過睇落去順眼咗啲 -- 演出就麻麻，成日畀佢個拍檔搶鬼晒啲戲～ 個結尾無乜再寫佢就爭啲，不過個主角始終係男，都接受； 改女嘅做 Sylvie 都啱，唔係一叫 Loki 就有兩個人一齊應。（Doctor Jones!）

最有「化學反應」嘅梗係同 Owen Wilson 啲場口，未必有 FAWS 開頭兩位主角咁有 punch，勝在次次無甩拖，從來無令人失望過。 佢兩條友來來回回好正，仲互相帶動成長，個結局噉安排法，今季唔夠喉，下季搭返夠。如果去到最尾都無個 jet ski 嘅場面，本人一定嘈！

其他角式，除咗出咗一話嘅 John Majors 同 Richard E. Grant 極大嘅亮點，其他啲角式真係好一般，甚至可以話唔完整，尤其個判官呢個「大角式」真係紙噉薄，只可以話係賤唔夠奸，個 B-15 真係嘥晒，反而被 TVA 整死另一個獵人仲寫得好過佢。

有人批之前兩套 D＋ 戲太 woke （脷伸：本人唔覺），呢套攞明講幾大嘅議題 -- 法西斯/一元宗教與自由意志（咦？咁似 BW 嘅？），用落 Loki 呢挺角式度好啱，諷刺好多「神聖不可侵犯」嘅人同嘢，後面都唔慌係好嘢嚟，你睇 TWHR 條友都 short short 哋，任佢點講個出發點幾正都好，講真佢都係靠大量殘殺去保住自己嘅存在（可能更黑，不過無講）～ 亦帶出一個兩難 -- 鏟走咗一個大奸人，好可能出另一堆更爛嘅局面，點揀？ 英文話齋：The Devil You Know and the Devil You Don't ，現實例子不可勝舉，呢度亦無個答案（住？）。本人覺得好多時係一個奸人都會帶出個更差嘅奸人～（因為某法律嘅關係，都要留一留口～）呢套比之前兩套，劇情更完整（FAWS 實屬不幸）其實更啱一次過煲。

上一次個最後波士玩全宇宙，呢次玩多元宇宙，噉，下次要玩到去幾大？本人無睇，不過據聞套 Rick and Morty -- 其中一位編戲有份寫 Loki -- 因為要不斷「突破」，所以一季比一季誇張都幾不可收拾，希望 MCU 唔會咁。

總結：唔該整個 Kid Loki 和/或 Alligator Loki（Lokigator?) 嘅外傳？本人一定「瞓身」支持～