[多奇出品] - 一剎那低潮不代表永恆 - 科蘭
科蘭依個名對球迷嚟講可以話係大家都認識，曾經效力過香港聯賽球隊傑志，幫球隊攞過香港超級聯賽冠軍、香港足總盃同埋菁英杯。另外，當然唔可以唔講佢曾經為馬德里體育會同烏拉圭國家隊分別拎到歐霸冠軍同世界杯殿軍。依家睇番科蘭嘅職業生涯覺得佢好有成就，但其實佢曾經都有過一段低潮時期，就係由2002至2004年效力曼聯期間。
喺2002年1月，曼聯以690萬鎊買佢過嚟加強鋒力，可借佢上陣咗18場比賽都無辦法入到波。直到8個月後，喺歐聯對海法馬比卡嘅比賽，當時曼聯贏到4比2，咁啱碧咸搏到12碼，然後個12碼就讓俾科蘭去射，結果就正式取得佢加盟曼聯嘅首個入球。不過，喺英超聯賽正式入球就要去到2002年10月對阿士東維拉接應施維斯達嘅傳送頂向死角入網，令球隊可以追和1比1。之後佢主場對修咸頓又取得入球，當時傑斯快開罰球俾華朗，華朗即刻傳俾科蘭，然後佢就喺禁區外遠射得手，射入致勝嘅一球，最後曼聯贏2比1。當時科蘭興奮到除咗件波衫落嚟慶祝，但就要好耐先著番好件衫，依一幕相信有睇直播嘅球迷應該仲有啲印象。當時球迷諗住佢可以好似雲尼斯達萊咁會有源源不絕嘅入球，可惜佢嘅表現始終係好飄忽。
最後，喺2002至2003年球季，科蘭入咗6個聯賽入球，依個數字對一位前鋒嚟講絕對係唔合格。其實當時佢入球量偏低，唔係佢唔努力，亦都唔係佢實力唔夠強，主要係當時狀態大勇嘅雲尼斯達萊主導咗曼聯攻擊線，雲佬會企喺對手禁區嘅危險地帶，然後就得到源源不絕嘅供應，而科蘭主要係禁區外位置接應傳送，所以佢根本得唔到足夠入球機會，依個亦可以解釋科蘭嘅入球多數以遠射為主嘅原因。除咗雲佬之外，後備殺手蘇斯克查亦都佔去唔少入球機會，令到科蘭覺得正選前鋒有雲佬入波，後備就有蘇B，佢根本可有可無，令到科蘭失去存在感同迷失方向。而科蘭亦得唔到球迷支持，就算佢作客對利物浦入咗兩球贏2比0，球迷會覺得科蘭只係把握杜迪克嘅失誤而入波，唔係一件光彩嘅事嚟。無論入波定唔入波都俾球迷話，筆者諗當時佢心情都唔好受。
人生有時就係咁，每個人想走一條直路去取得成功，但其實有幾多成功人士係一直都順境無受過挫敗，從挫敗中領悟到一啲寶貴嘅經驗，依個先至係令自己一生受用。無錯取得成功嗰刻真係好開心，會有好多人祝賀自己，但成功過後，亦都要面對新挑戰。人唔會因為取得成功而解決晒所有自己本身嘅問題，追求同達到目標嘅價值在於大家真誠地付出努力，衝破重重難關，喺每段難關見證住自己成長，然後再將依啲寶貴嘅結果同經驗分享俾親人同同伴，不斷循環，唔會完結，足球亦係一樣。
