魔迷喜訊！阿仙奴願意接收呢條「廢柴」
要數曼聯近年表現最差球員，連格認第二，冇人敢認第一，呢位27歲中場曾超過1年英超冇入波、冇助攻，絕大部分魔迷都要求賣走佢，依家終於可望成真。英國《每日郵報》指阿仙奴計劃簽入連格，代替借用期即將屆滿離隊嘅丹尼施巴路斯。
由於丹尼施巴路斯即將回歸皇馬，並準備轉投貝迪斯，阿仙奴領隊阿迪達需要簽新中場，日前就睇中愛斯賓奴小將馬克洛卡，依家將連格視為收購目標之一。據悉，阿仙奴高層辛尼爾已經接觸連格嘅經理人拉奧拿，商討簽入呢位英格蘭國腳嘅可能性。
被網民寸為「連美斯」嘅連格，今季各項賽事上陣35場，入2球，但2個入球都係無關痛癢嘅盃賽，佢喺英超仍然維持超過1年入球荒。加上曼聯簽入波基斯費南迪斯後，連格上陣機會進一步下降，已成為冗員。
連格將於2021年夏天約滿，相信曼聯會盡快出售佢，有傳紅魔鬼要求2000萬鎊轉會費，唔知阿仙奴接唔接受呢？
