[肉羊哩咖]

自問唔係 Sonic 迷，打 Sonic 1 永遠唔過 Green Hill Zone 2～～～ 入去係睇占爺，故仔無乜期待，唔似之前啲作品玩咩「抗暴」，而係公路電影格。第一幕幾悶吓，尤其個 origin 幾「老作」，不過去到第二幕就幾正，占爺真係完全復活，有佢嘅場口就生晒，佢跳舞嗰度好正。笑位亦都好多，但係有度真係唔知係咪咁啱細路睇。最後大戰幾忠於「原著」；收得嘅續集舖定好晒。配 Sonic 嗰位幾生鬼，佢同男主角好夾，除咗占爺之外，因為片長真係幾短，其他角式無乜發揮。總括幾開心，不過睇咗唔會留太多印象 -- 除咗 credit 開頭嗰啲扮 game 畫面，好正。

題外一：玩快速難免會玩「世界停頓」，呢套都有，好多影評話似 X-Men First Class，喂，X-Men 都係「致敬」Over the Hedge 松鼠嗰幕，Over the Hedge 仲正。片段 YouTube 有得睇。

題外二：據聞因為導演要全部執過 Sonic 啲造型，搞到間特技間公司做完呢單就「光榮結業」，唔知真定假。