[多奇出品] - 蘇B為曼聯帶來的得與失
曼聯作客對年青人嘅歐聯比賽，因為雲拜沙卡喺上半場攞紅牌，所以蘇B立刻需要作出臨場調動，而依幾個調動就成為勝負嘅關鍵，最後因為連加特嘅回傳失誤，令到球隊反輸1:2。
對好多球迷嚟講輸波唔緊要，佢哋亦都唔係想將責任全部推晒俾雲拜沙卡同連加特，但係蘇B嘅調動又真係幾令人費解。你話換辛祖出嚟球迷都明白點解，但換走C朗同般奴兩位鬥心同攻擊力兼備嘅球員，反而換入馬斯亞同連加特就真係估佢唔到，而依兩個調動亦都成為球迷批評蘇B為輸波負責嘅主因。
究竟蘇B適唔適合繼續帶曼聯？依個筆者答你唔到，但自己可以為球迷分析佢為曼聯帶嚟嘅得同失：
得：
一、買人眼光獨到：喺買人方面球會管理層係完全聽從蘇B嘅指示，而佢藉住自己獨到嘅眼光先後買咗麥佳亞、雲拜沙卡、般奴、卡雲尼、華拉尼同辛祖等猛將、甚至C朗都可以再次邀請返嚟，而蘇B所買番嚟嘅球員大部份都係實用性好高同歸屬感強，甚至係球隊中不可或缺嘅主力，例如：麥佳亞、雲拜沙卡同般奴等等。
二、建立和諧關係：由於蘇B處事作風冷靜及溫和，所以令到球隊隊內氣氛和諧，球員間相處算係融洽，領隊同球員極少出現對立局面。另外，蘇B因為同球會有良好嘅人事關係、了解球會文化、建立深厚感情，再加上佢為球會所立下嘅汗馬功勞，令到曼聯管理層同名宿都支持佢。能夠令到球會內部管理層、名宿同球員團結，亦都係好重要。
失：
一、多次衝擊冠軍失敗：對球隊支持者嚟講，無論成績幾唔錯都好，只要係攞唔到冠軍，之前嘅努力變得毫無意義。好似熱刺前領隊普捷天奴咁，就算係入到歐聯決賽，聯賽經常排前四名，都係難逃被炒嘅命運。而且球迷認為球隊要嘅人已經買夠，時間亦都俾足你，如果都係拎唔到冠軍，唔該你離開。
二、臨場調動缺乏應變：依個因素係球迷唔太接受蘇B帶隊嘅地方，球場上形勢千變萬化，依一分鐘作出嘅決定同下一分鐘所作嘅相同決定，結果可以係好唔同。球迷可以睇到蘇B每次調動前，都要聽晒其他人所俾嘅意見先做決定，好少話自己獨自諗調動，再加上蘇B帶隊缺乏霸氣。其實絕大部份球迷都知踢波好多時踢個勢，所以激勵士氣尤其對比賽關鍵時刻非常重要。
分析完蘇B帶隊嘅得同失，大家又會點睇蘇B呢？好多時人睇對方，總希望對方可以保留晒佢所有優點，而缺點同問題只要針對到然後作出改善咪得囉。但其實可能對方嘅優點係從佢嘅缺點建立出嚟，所以如果要蘇B改善晒佢嘅問題就真係唔容易。到底蘇B係咪球迷所接受嘅領隊，依個就留俾大家討論喇。
