既然 Interstellar 話愛可以突破物理限制,好多人都話冇問題,又有咩好講啫?!(鞋)
—————
《雨傘學院》漫畫改篇,講一班阿媽都係無性懷孕情況下,出同一日出世嘅細路,其中七個,個個各有異能,收集埋同一間學校入面,被訓練成為超英——之後嘅故事;故仔就係因為個「老豆」兼學院院長瓜咗,各「兄弟姐妹」再集合開始。
唔講太多劇情,你諗住 X-Men Days of the Future Past (咁啱又有 Ellen Page 做主角)撈埋《愛回家》再加啲 MIB 同 The Incredibles 咁就差唔多,都幾大路,無乜新嘢,除咗四哥最後玩「合體技」之外 — 掛?主線有三條:七妹 Ellen Page 一條、其他兄弟一條、時間殺手又一條。
Ellen Page 可能因為角式設定嘅關係,木到成塊板咁;班兄弟中以四哥最搶鏡,造型夠多之餘,時趣怪時情緒化又唔會太誇張,而做五哥呢條老積死「細路」加埋佢個「老伴」都做得好好;中間穿插兩件時間殺手,初時好型好有威脅感,中後又變成搞笑角式,講大公司前線最底層辛酸,幾好玩,尤其有一集唔覺意 High 鬼咗勁好笑。無睇原著漫畫,睇過網上啲資料,TV 版角式造型比較真實系,唔會太誇張,個「白色小提琴」同漫畫造型係兩回事。
好多謎前傳都交待得幾清楚,不過好多時跳嚟跳去,一個唔留神會甩咗就會一頭霧水;另一個大問題係節奏,有時好緊張嘅,又轉咗去講第二樣無乜關係嘅嘢,最弊係大難臨頭都仲係私人恩怨行先;仲有幾兄弟好多時幾求其唔小心,「蝙蝠俠」二佬行走江湖咁多年,居然可以嚮兇案現場留底指紋等等,仲由頭到尾當七妹無到,演員以佢最太牌點可能會無嘢吖~ 三家姐係人都認得佢,居然可以玩潛入?!仲有未「被收講」嘅細路究竟會點?
本人好有理由相信二佬個 FF 入面,係同佢「阿媽」
好嘅特技唔錯,好過泰埋斯好多,其中人形黑猩猩做得好像真,動作場面幾有限,尤其可能係「最強」嘅六哥,打得唔多,但係都好睇。而講到明係玩時間穿越,無乜嘢個後果係無得救嘅。
成部劇共十話,叫做中上,好過 The Defenders 好多,可以代替 Netflix MCU;最後留咗個大尾,期待第二季。