曼聯10萬周薪續約軒達臣 向迪基亞施壓
曼聯就門將位置人選開始做工作，英國傳媒報道，紅魔鬼向剛從錫菲聯結束外借回巢嘅年輕門將甸恩軒達臣開出優厚合約，包括4年+1，周薪更由6萬鎊加到10萬鎊，新球季仲會與迪基亞爭奪正選位置。
蘇斯克查接手曼聯後，球隊各個位置都執得七七八八，唯獨迪基亞表現不穩問題冇晒符，反觀上季外借到錫菲聯嘅甸恩軒達臣卻表現出色，協助球隊取得英超第9名，季中一度有機會爭奪歐聯及歐霸資格，蘇帥把握住軒達臣結束外借機會，向佢開出肥約，藉此向迪基亞施壓。
英國《太陽報》報道，曼聯向軒達臣開出如此優厚條件，是為門將接班做準備，一旦迪基亞退化或離隊，球隊仍然有一位當打及有高水平門將可用；同時錫菲聯已簽入般尼茅夫門將蘭斯達爾，續借軒達臣機會不大，「軒仔」可以叠埋心水留喺曼聯，同迪基亞爭位。
