多蒙特有Plan B 買迪比頂辛祖
曼聯頻頻出招，力爭收購多蒙特翼鋒查頓辛祖，更有傳多蒙特已經同意紅魔鬼開出嘅6000萬鎊固定轉會費，另加4000萬鎊浮動轉會費嘅開價。
不過，多蒙特仲有1個顧慮，就係賣走查頓辛祖之後，應該搵邊個填補佢嘅位置。根據英國《太陽報》及《每日郵報》爆料，多蒙特將「辛祖替身」鎖定為里昂前鋒迪比，如果簽到呢位荷蘭國腳，就會將查頓辛祖賣畀曼聯。
事情最巧合係26歲嘅迪比曾於2015至17年效力過曼聯，但因為表現欠佳，被出售去里昂，亦成為佢事業翻身轉捩點。
2017至19年2季法甲，迪比合共射入29球。迪比剛過去球季原本表現都好好，踢13場法甲入9球，但因為上年12月受重傷提早收咧，幸好現時已經傷愈復出，有份喺上場法聯盃決賽上陣對巴黎聖日耳門。
值得一提，當年曼聯出售迪比去里昂，合約之中有回購條款，紅魔鬼知道多蒙特對迪比有興趣之後，可能會先回購迪比，作為收購查頓辛祖嘅交易條件。
