引用:
作者: 肉羊哩咖
警告！你有感情煩惱嘅話千祈唔好睇呢部戲！
《婚姻物語》Marriage Story （個名本人譯）講原本住嚮紐約生活嘅兩公婆: Adam Driver 同 Scarlett Johnannson，因為婚姻破裂，女嘅要返去洛城重回佢嘅演藝事業，而男嘅又唔願離開佢紐約個「舞台」，一個東一個西，為咗個仔歸邊邊去到要打官司嘅故仔 -- 一個極唔開心嘅故仔。
兩個主角，同埋搞到件事唔煩變到好複雜嘅律師，都極度好戲，尤其演女方嗰位律師嘅 Laura Dern （侏羅紀公園，TLJ），passive-aggressive，扮晒老死但其實一心撳你錢。導演兼編劇好識用鏡頭（尤其啲大頭鏡頭）同燈光角度，到營造出充滿情緒嘅情節，尤其兩位主角感情時好時壞，似離非離，啲內心戲見到導演同演員嘅功力。成部戲最強烈感情嘅，係尾段一場兩個因為好小事發展到吵大鑊，強烈到睇到一半要停機，行開五分鐘先繼續到 -- 女嘅含住淚鬧，個佬發洩完去到尾成個人崩潰晒。到最後借個仔（唔透係咩事 ），回應返第一幕，絕對係一鎚揼落觀眾個心度，好嘢，
唯一要吐糟：Adam Driver 你都係唔好再唱歌，唔該晒。
呢部片嚮呢兩個月嘅獎項時節嘅提名常客，跟住嘅日子都預佢陸續有嚟。睇返轉頭，唔好同本人講《愛爾蘭佬》喇，單係呢部片都比舊年部 Roma 好好多，唔止會歷久常新，講故仔個手法、導同演都超幾班。（呼）Netflix 可能以後會拍多啲呢啲成人向攞獎片，呢方面啲對家有排都追唔上。
（老實講，本人雖然無睇過，應該唔係好多人記得德斯汀荷夫曼呢套經典）
|
真係好睇，睇完既感覺就好似聽首李克勤既紙牌屋一樣。
由手機版發出
