掂呀!波費一紀錄承繼葡萄牙前輩紅魔
曼聯尋晚喺歐聯大炒布魯日晉級,尼日利亞新兵恩哈路開齋,仲有巴西中場費特洛迪古斯梅開二度,不過統統都唔夠葡萄牙中場波基斯費南迪斯搶鏡。
呢位今年一月以高達4,700萬鎊轉會費加盟嘅25歲中場,今場又射入1球12碼,兼夾兩次策動攻勢入波,而佢今場嘅「士哥」,更令佢成為繼拿尼之後,近8年來首位為「紅魔鬼」連續兩場入波嘅葡萄牙球員添!
繼上場對屈福特射入12碼取得加盟後首個入波之後,「波費」今場又一次用佢嘅小跳步式射法操刀極刑一針見血。幫曼聯打開紀錄之後,佢又先後兩次策動進攻,包括34分鐘前場左路斬去右邊底線,經桑馬達第一時間傳中畀恩哈路入波。然後7分鐘後,佢又喺前進搶到對手波,交畀費特洛迪古斯再傳出禁區頂,由麥湯米尼撞射入網。
僅只一個月就已經奠定喺曼聯進攻線嘅重要性,就連《鏡報》記者安達臣都大讚:「喺一月份出現高達4,700萬鎊嘅轉會並唔多見,但曼聯為費南迪斯所付出嘅錢已經得到回報。呢位葡萄牙球員成為咗曼聯喺主場贏波嘅基石。佢喺代表曼聯前5場波已經攻入2球同有2助攻,喺伊巴謙莫域之後,曼聯已經未見過好似佢咁有影響力嘅轉會。」