分別睇咗兩個系列，論者都係親西反俄，講嘅都係點解布丁要侵略烏克蘭；原由，各位老細當然唔會信布丁每次都唔同嘅蔗口，呢兩位不約而同（？）都推測，都係因為陰謀論作祟～
由無雷公咁遠講起：至從 89 年柏林圍牆倒冧，一輪「蘇東波」事件，大部份東歐前華約國家同蘇聯「割蓆」，跟住過多兩年，蘇聯自己都要解體，好多前「加盟共和國」都搞獨立。但呢啲國家仍然行前蘇聯嗰種「中央集權」式體制（咳）。
1992 年，波斯尼亞戰爭爆發，1995 年北約介入。
1999 年，3 個前蘇聯附庸國加入北約：波蘭、捷克、匈牙利。北約開始「東擴」喇。
2003 年，美英等國再度攻打伊拉克，蔗口係因為伊拉克仍然擁有「大殺傷力武器」。
2004 年，烏克蘭發生「橙色」革命。保加利亞、波羅的海三國、羅馬尼亞、斯洛伐克等國加入北約。
2005 年，吉爾吉斯坦又發生「郁金香（色）」革命。美國當時總統小布殊就改口，話呢次伊拉克戰爭係「輸出」民主，係「紫色革命」咁喎～ 其實佢係執人口水尾，順應隨口噏，跟「世界潮流」。
去到呢個位，跟住嘅中東發生嘅「乜乜之春」唔好提，當時有啲擁有「完善體制」嘅國家領導人，同圍住佢哋班「朋友」就會「諗」，平時班賤民好乖好聽話，點解有「小貓三四隻」唔知邊度跳出嚟，乳臭未乾嘅死靚仔示吓威，跟住就變成大型示威，再變成有鎗有炮嘅「暴力衝突」，然後就發生「政變」～～～好驚～～～
好有麥太嗰句：從前有個小朋友唔聽話，有一日，佢死咗。
呢班友當然唔會搵盤水照吓個樣，反而會開始唱子華嗰隻歌《衰邊個》，搵呢幾單嘢（當然唔包小布殊嗰啲肺噏），有咩共通點。
佢哋嘅結論係：CIA、猶太人、索羅斯、deep state、「光明會」之類等等等等，佢哋夾埋搞陰謀，借非政府組織（NGO），暗中畀錢一班「演員」出嚟搞事，就好易令到當地群眾群情洶湧，國家咁就會被搞「亂」～ 而呢幾單所謂「顏色革命」就係咁嚟㗎。(係咪有啲耳熟呢？）
捌開只有 2004 年烏克蘭單嘢真係正牌用「橙色」嚟表示反政府嘅立場，呢啲所謂「顏色革命」係「敵對外國帝國主義亡我之心不死⋯⋯」（下刪幾十萬字）搞出嚟。問題係：
一嚟完全冇論者拎得出有乜實證。
二嚟雖則 CIA 的確上世紀五六十年代有唔少前科，搧動平民反抗當地政府，之後發現嚮中南美洲搵啲貪錢貪權嘅軍頭，供應金錢軍火，易好多，就借佢哋推翻當地民選政府，安插獨裁政權；啲確「屎」跡斑斑，但係 CIA 成功率係認真低得好難睇（唔信可以查一查），好多時仲衰到燒返轉頭（好似古巴豬玀灣事件），加上國內外反彈太大，無耐冷戰玩完，CIA 嘅經費急跌，70 年代以來，佢哋都唔再興玩呢味，美帝廿一世紀嘅做法，索性直情明刀明鎗「行入嚟」「幫你」革命～
三嚟，呢班友當正佢哋眼中嘅「順民」，完全係無腦無自我無主見嘅「傻仔」，唔出奇，有文明以嚟，好多政府商業機構都夢想有班咁嘅理想嘅「人民」，但從來未成功過 -- 連 Facebook 都唔掂。（按：睇吓嗰件 Tik Tok 得唔得）
四嚟，對統治階級嚟講，樹立個「外來」嘅「稻草人」，絕對好洗好用，一嚟乜都可以賴落去，二嚟乜都唔洗諗，簡單直接。但係政權轉變呢家嘢，唔係話「撳」個掣就得 ～ 諗返轉頭，有「完善體制」嘅國家，話咁易就被搞掂，又唔好「妄自菲薄」。
作為「陰謀論」，乜都完全係莫須有，「信者得救」。
反而，俄佬至二十世紀末開始，就照「顏色革命」嘅「理論」，照板煮碗，輸出呢類革命，2014 年烏東同克里米亞，就係例子。之後再講。
來源：
How to Kill a God
https://youtu.be/uBAnt_w8vvY?si=ylgv4zEhjpqLKjDW
由布丁受訪講起，反駁佢啲所謂「顏色革命」陰謀論。
How Ukraine's Fake Culture War Became a Real Geopolitical Conflict
https://www.youtube.com/watch?v=exJ0...dhc2xpZ2h0aW5n
呢個係四部系列嘅頭一部，系列前二條片講烏克蘭戰爭嘅前因，溫故知新好有用；後二條片反駁「北約東擴」係謬論，同布丁點受美式陰謀論影響。
