巴塞曼聯聘約都唔理 迪姆華拿利字當頭
邊個咁大膽?連巴塞隆拿同曼聯開價斟介都唔理?講緊係效力德甲勁選RB萊比錫嘅德國土炮射手迪姆華拿!
根據英國《每日鏡報》報道,包括巴塞同曼聯兩支西英勁旅都已經正式提出斟介,但呢位射手都繼續使出拖字訣,皆因佢仲想等佢心目中最想加盟球會,即係英超利物浦,事關佢想跟名帥高普搵食喎!
德英傳媒上星期都有報道,話迪姆華拿同萊比錫份合約有條買斷條款,只係相對唔算貴嘅5,100萬鎊,但呢個價只要一過咗今年4月就會大幅調升,換句話講,真係有買趁早。
消息一出,據聞巴塞同曼聯都已經正式提出收購,事關兩會都希望喺今夏執番靚條鋒線,只係迪姆華拿睇過菲臘比古天奴過檔巴塞之後冇運行,好似有陰影;而曼聯就已經唔再係歐聯一線,所以佢都有所嫌棄。講到底,呢位23歲射手都係想等埋利物浦係咪會趕喺最後一刻向佢開出合約,確保自己唔好上錯車。
當然,迪姆華拿都有擔心,去到「紅軍」有冇得踢正選,事關利物浦條「埃及文明」鋒線近季真係無堅不摧。
不過,始終穆罕默德沙拿同沙迪奧文尼今年都28歲,羅拔圖法明奴去到10月仲29歲添,「紅軍」主帥高普都深知,要為鋒線年輕化開始行動,所以真係買佢都絕對唔出奇。仲有一點,原來迪姆華拿個紅理人卡爾軒斯科士打,以前球員時代踢過史特加同馬賽,同高普原來都係老友,就更令呢單交易有機會成真。
講番迪姆華拿,今季喺德甲上陣23場入咗21球,喺歐聯都有4球進帳,包括上星期對熱刺一箭定江山,已經被視為歐洲球壇最頂級射手之一,難怪咁受歐洲頂級球會歡迎,呢場射手爭奪戰,睇嚟4月底會有答案喇!
此篇文章於 03-02-20 02:11 PM 被 Busconcamp 編輯。
|