[肉羊哩咖]

經典科幻小說再次搬上銀幕，由 Frank Herbert 原作嘅小說出版於 1965 年。跟住仲有五部續作，全部大受好評，佢未寫第六套續集就過咗身，之後佢家人發現佢留低有好詳盡嘅手稿，夠寫多起碼一本書，而佢個仔同另一位作家合作，寫咗好多部前傳外傳同續篇，但評價不一。

呢部小說長期被諭為不可能拍成電影，事關有好多係諗同講多過做，亦有大量專用名詞。好難用一套電影拍到一般觀眾會明。1984年 David Lynch 拍過第一部小說，香港有上，之後電視都有播過，影像係好出式，但係兩面唔討好，熟書嘅話佢唔忠於原著，一般人又睇唔明。跟住要去到 2000年，John Henderson 替 Scifi Channel 拍咗第一部三話嘅電視短篇。無論劇情同特技都受好評，仲跟住拍多二套續集，包咗三部續集，未完晒成部正傳，就停咗。

直到三年前到，個版權落咗去 Legend Entertainment 手上，計劃重拍，佢搵咗 Blade Runner 2049 個導演 Denis Villeneuve 執導（今次無搞錯喇掛），呢個 project 班卡士就好大，男主角係 Interstellar 嘅 Timothée Chalamet，仲有 Oscar Issac, Josh Brolin, Jason Momoa 同張震等等。而家由 WB 發行，行內話呢個係 WB 對《星戰》嘅回應咁話，上個月出咗條試片，受邀睇咗嘅一致好評咁話，聽住先。若果掂嘅話，WB 話會開拍外傳放落去 HBO Max 度。而家除咗小道消息之外，乜都無得睇住，咁遲吓睇吓係點。