曼聯提早回收阿歷斯山齊士 有冇可能?
曼聯前鋒拉舒福特重傷要抖3個月,引入前鋒突然成為「紅魔鬼」嚟緊1個幾星期嘅最大任務,領隊蘇斯克查透露可能要靠「短炒」作為應急方案,有傳聞話曼聯考慮提早回收外借國際米蘭嘅阿歷斯山齊士,希望呢位智利國腳可以救急。
阿歷斯山齊士借去國際米蘭冇耐就重傷,直到最近2場波先至後備姿態復出,如果返曼聯救亡係「時間啱啱好」。不過球迷嘅希望好快就幻滅,事關《曼徹斯特晚報》證實,阿歷斯山齊士嘅外借合約入面並冇「提前終止」條款,國米唔可以「退貨」,曼聯亦唔能夠提早回收,意味蘇斯克查要繼續向外物色前鋒人選。