【東體爭議】超強數據！曼聯正選左閘要用佢
曼聯今季提拔唔少年輕球員，前鋒美臣格連活特可能最多人談論，不過講到表現成熟度同即時擔正能力，左閘班頓威廉斯似乎更勝一籌！
勞基梳爾今季係蘇斯克查心目中正選左閘，但19歲新星班頓威廉斯近期開始上位，每次上陣都令球迷留低深刻印象，今場足總盃重賽對狼隊，班頓威廉斯同丹尼爾占士可以話係攻勢泉源，呢位英格蘭小將防守穩陣，而且非常勇躍參與助攻，今場67次觸球有86%傳球成功率，7次爭奪有6次贏出，仲有3次解圍、2次攔截同1次關鍵傳球，絕對係攻守兼備。
仲有一項數據非常得球迷歡心，原來班頓威廉斯最近7次上陣，有6場曼聯係保持不失球，呢位小將嘅攻、守表現比起勞基梳爾有過之而無不及，如果佢可以成功喺下半季搶贏正選，夏天代表英格蘭踢歐洲國家盃決賽周都唔係冇可能。
