[肉羊哩咖]

Fleabag 第二季點計都計唔落去 APV，但用 iPlayer 睇咗，又唔想各位老細跳嚟跳去，呢度講埋，離咗譜惟有向各位老細洒個冧先～～～

如果上一季有太多嘢講，到最後幾乎條條都埋條尾又有啲亂，呢一季好以話總其成變返一個緊湊嘅故仔；一開頭好快講 Fleabag 點「漂白」佢自己（咁話），清咗上一季部份不必要嘅枝節再展開，第一話利用佢老豆再婚，講解返佢上一季以嚟佢點解會有咁嘅心態，再去處理佢家人同愛情生活，成話都大部份都係一個餐廳裡面發生，但又峰廻路轉，逐話計，可能係近年最好睇嘅。

女主角同觀眾「打眼色」仍然係重點，好顯出佢嘅演技同埋繼續係主要笑料泉源；男主角 Andrew Scott (Sherlock、Black Mirror) 飾演嘅天主教神父，英美好多女讚佢係 #hotpriest，佢同 Fleabag 一幕嚮社交平台有好大廻響咁話。

成季令到成個故仔完整，雖然有啲嘢暗場交待，但每個角式都有進展，尤其係女主角搵到人生嘅轉向。當然仍然會有好多人話呢套係「裡拳」戲，但好多時有意無意講身為女性嘅煩惱，再加一句：「如果我對波大啲，就唔洗學人做咩女性主義者」，係唔係真係見仁見智～

女主角 Phoebe Waller-Bridge 原本做開舞台劇，呢套係佢套劇搬上螢幕，亦係佢其中一套電視劇本，之後佢有份演出 Star Wars: Solo 入面同 Lando 拍檔件「進步」機械人，可以話係新晋編劇中最紅嘅一個，紅到占士邦 Daniel Craig 都點名要加埋佢去寫 Bond 25。