德政!IFAB宣布下季仍然可以換5人
負責討論及修改球例嘅國際足協理事會(IFAB)宣布,每隊單場可換5位球員嘅「臨時規則」下季仍然可以繼續實行,同時亦畀各地賽事自行選擇是否恢復以往換3人嘅舊制,所以下季可能會出現部份聯賽,可以一隊換5人,但部聯賽只會換3人嘅情況。
各地聯賽因為新冠肺炎大發爆,而停擺多時,復賽後賽程被逼濃縮,比賽非常頻密,為免球員容易受傷,或者體力出現問題,IFAB之前已批准每隊可以1場比賽換5位球員,比以往多2人,但同樣只有3次換人機會。
IFAB近日開會後,認為新一季賽程仍然受新冠肺炎影響,導致遲開鑼,賽程難免又會比較緊密,容許各地賽會自行決定是否沿用「5人更換制」。
呢項措施對球員絕對係德政,一方面主力有多啲時間抖,唔使踢到殘,導致受傷,另一方面後備球員亦有更多上陣機會。