修夫基聽民意！格連活特9月做大國腳
曼聯18歲新星格連活特喺英超復賽之後，愈戰愈勇，近3場都有波入，成為自1999年以來，第1位連續3場英超入波嘅18歲或以下球員。英國傳媒指，英格蘭國家隊領隊修夫基都好留意格連活特表現，打算9月徵召佢入伍出戰歐國聯。
曼聯史上單季入波最多嘅20歲以下球員，分別係佐治貝斯、傑特、朗尼，3人都係入17球。格連活特今季各項賽事已經有16球進帳，要超越呢3位前輩，應該冇問題，佢今季英超仲有4次遠射入網，冠絕同儕。
因此，紅魔鬼主帥蘇斯克查上場賽後表示，格連活特有能力晉身大國腳，據悉英軍主帥修夫基都有同感，已經決定入場睇英足盃4強曼聯對車路士，其中一個目的就係觀察格連活特表現。
英國《每日郵報》指修夫基打算9月召入2位小將入國家隊，除咗格連活特之外，阿仙奴新星布卡約沙卡都有機會入選。
