《半程總結 比上不足 比下有餘 林伯特的第一份英超冬季成績表》
無論干地、沙利以至到依加林伯特，都會有一份半程總結去回顧一下佢地所帶領既車路士喺開季至今，球隊喺成績、戰術以及球員配置上既變化，而以林伯特哩位少帥只有一季執教打比郡既經驗黎講，
能夠帶領車路士喺今季咁嚴峻既環境底下能夠得到依一刻既形勢黎講，絕對可以話係合格有餘。
由傳出林伯特接手車路士直到官宣既一刻，其實時間係非常之短，自英冠附加賽打比郡失利鐵定未能晉身英超過後，時任主帥林伯特其實喺果刻都經已拒絕執教藍軍，但奈何沙利選擇賠錢回歸意大利執掌祖雲達斯，間接迫使身只有一季英冠經驗既林伯特需要立即重返史丹福橋救駕，但無論對球會、球迷定係對林伯特自己本身，
今次既執教唔單純係新挑戰咁簡單，仲有好多車路士長遠已久所累積既深層次問題需要面對，再加上夏薩特既離隊以及轉會禁令既限制，基本上今次既挑戰亦係過往前所未見。
而隨林伯特回歸既教練團亦係過往曾於車路士任職的，分別係副手摩利斯Jody Morris以及體能教練Chris Jone，前者過往曾擔任藍軍青年梯隊主教練，論臨場經驗可以話比起林伯特更豐富，後者同時亦將車路士U23梯隊中將教練Joe Edwards提升至一隊協助，再加上先後有名宿馬基列尼及艾殊利高爾回歸加入青年梯隊，以及施治於管理層中擔任要職，車路士成個內幕班底基本上都係以年青以及名宿作為骨幹，亦睇得到林伯特希望教練團中多名曾於青年軍幫過手既教練能夠協助年青球員於一隊中成長。
受制於轉會禁令所影響再加上夏薩特既離隊，林伯特只能運用隊中現有球員重新建立過另一套戰術體系，
倚重兩位於英冠回歸既前場球員艾巴咸同愛將蒙特作為進攻核心，再有其他球員圍繞配合，而季初轉會窗完結前賣走同為歐冠功臣既大衛雷斯，顯然係為左釋出無人能夠100%擔任正選既信息，林伯特季初至今先後運用過好幾套陣式作賽，分別係4231、433以及343，各有優劣，
而戰術結構黎講都係繼續以重傳控作核心。
除左由前場開始迫搶之外，林伯特亦著重隊中球員靈活多變既走位，球員之間既位置能夠隨時改變，
亦希望以小組式傳送能夠兩三腳就打入對手核心區域，而年輕球員各自於季初小爆發，將車路士既聯賽排名推高，不過球隊始終欠缺穩定性，控制體力流放方面既處理亦唔係好，好多時下半場球員就出現莫氣，加上後防球員各自失誤，令車路士出現不失球既場次愈見愈少。
比上不足比下有餘，以歐聯分組賽出線以及英超排名黎講林伯特絕對係合格有餘，但個別場次既醜態以及後場經常失波既問題令球迷留下唔少壞印象，不過至少見得到如果繼續依照哩個方針行落去，其實未來既車路士仍然值得一眾車迷們期望，再加上冬季轉會窗解禁既契機，如果能夠再喺個別位置上作出補強，有效地改善上半季所面對既問題，相信季尾既成績係可以再進一步。
Fanpiece - 藍獅:
https://football.fanpiece.com/bluexl...feature=scroll
我本來都話就算降班都唔割
依家比林伯帶到入前四
可以入到歐聯16
其實真係超晒標
當然球迷一定想球隊成績更加好
但我到呢刻黎講已經收晒貨
就算未來半季表現唔對板都覺得大家應該要多多接受同支持
林伯既青春風暴已經比其他隊伍拆解左
之後真係要真功夫應戰
