2021/22 歐聯分組賽 - 曼聯 VS 阿特蘭大
全場完，曼聯3:2阿特蘭大
上半場開段曼聯都有幾次攻勢，3分鐘福仔跑前接應麥湯文尼直傳成單刀，可惜被判越位在先，9分鐘格連活特、C朗及般奴等人禁區邊射門被擋出。但14分鐘阿特蘭大一次右路傳中俾門前嘅隊友撞射入網，麥湯文尼只能眼白白望住對手取得入球。19分鐘C朗落底線右邊傳中，費特遠柱接應先控再射被門將及時撲出。但27分鐘阿特蘭大再憑住一次角球機會再下一城至0比2，麥佳亞又再一次企錯位，導致對手輕鬆門前頭鎚頂入，不過更值得一提嘅係福仔完半場前多次射失，浪費多個黃金機會...曼聯輸兩球入更衣室。
下半場47分鐘C朗接應隊長傳球攻門先被門將救到，福仔左邊補射又射失，49分鐘再係福仔遠柱浪射出界。不過52分鐘福仔終於見功，協助曼聯追回一球至1比2，跑前接應般奴斜傳射遠柱地波入網。隨後阿特蘭大球員接二連三犯規領黃之下，曼聯試圖把握住對手失誤開始攻門，57分鐘格連活特右路傳中俾麥湯文尼撞射可惜中柱出界，63分鐘般奴轉身短傳俾C朗射遠柱被門將救到。中段時間65分鐘曼聯換入普巴及卡雲尼，而對手71分鐘連番遠射被迪基亞救出，頗為驚險。見對手體力開始下降，74分鐘般奴右路邊線傳中，卡雲尼中間漏俾遠柱嘅麥佳亞射入，雙方追成平手至2比2。尾段時間80分鐘梳爾傳中，C朗招牌式頭鎚頂至死角入網，最終曼聯以3比2反勝阿特蘭大。
